Indlela Yokufikelela Iintliziyo Zabantu Esibafundisayo
1. Indlela yokufundisa kaYesu yazichukumisa njani iintliziyo zabaphulaphuli bakhe?
1 UYesu Kristu wayebafikelela iintliziyo abaphulaphuli bakhe. Ngesinye isihlandlo, iintliziyo zabafundi bakhe ‘zazivutha’ emva kokuba ebacacisele kakuhle iZibhalo. (Luka 24:32) Ngenxa yokuba ukuthobela uThixo kumele kusuke entliziyweni, singazifikelela njani iintliziyo zabo sibafundisayo ukuze batshintshe ubomi babo?—Roma 6:17.
2. Ukusebenzisa ubuchule nengqiqo kunceda njani ekufikeleleni intliziyo yomntu?
2 Sebenzisa Ubuchule Nengqiqo: Kubantu abaninzi, ukusuka nje uchaze okulungileyo nokubi akuyi kubashukumisela esenzweni. Enyanisweni, ukuhlasela iinkolelo zabo usebenzisa inqwaba yezibhalo kunokubabhekelisa. Ukuze sikhuthaze umntu, sifanele siqale siqonde isizathu sokuba ekholelwa yaye esenza izinto ngendlela azenza ngayo. Imibuzo ekhethwe ngobuchule iya kumnceda achaze indlela avakalelwa ngayo. (IMize. 20:5) Kulapho siya kutsho sikhethe amazwi akwiLizwi likaThixo aza kumfikelela intliziyo. Ngoko sifanele sibonise umdla wobuqu size sibe nomonde. (IMize. 25:15) Khumbula ukuba mntu ngamnye uthatha ixesha lakhe ukwenza inkqubela. Vumela umoya kaYehova ukuba uchaphazele indlela acinga nenza ngayo izinto.—Marko 4:26-29
3. Singabanceda njani abo sibafundisayo babe neempawu ezintle?
3 Bancede Babe Neempawu Ezintle: Iivesi zeBhayibhile ezithetha ngothando nokulunga kukaYehova zinokunceda abo sibafundisayo babe neempawu ezintle. Sinokusebenzisa izibhalo ezinjengeNdumiso 139:1-4 okanye uLuka 12:6, 7 ukuze sibonise indlela uThixo anomdla ngayo kuye ngamnye wethu. Xa abantu beqalisa ukuxabisa ububele obungasifanelanga bukaYehova, uthando nokuzinikela kwabo kuye, kuyakhula. (Roma 5:6-8; 1 Yoh. 4:19) Naxa bebona ukuba indlela abenza ngayo izinto iyamchaphazela uYehova, banokutsho bafune ukumkholisa.—INdu. 78:40, 41; IMize. 23:15.
4. Sinokuluhlonipha njani ukhetho lomntu xa simfundisa entsimini?
4 UYehova akanyanzeli namnye ukuba athobele imiyalelo yakhe. Kunoko, ubonisa mntu ngamnye ubulumko bokuphulaphula icebiso lakhe. (Isa. 48:17, 18) Sixelisa uYehova xa sifundisa ngendlela enceda abantu bazenzele isigqibo. Xa abantu bezimisela ukwenza utshintsho ebomini babo, imiphumo iba yeyexesha elide. (Roma 12:2) Loo nto ide ibasondeze ‘kumgocagoci weentliziyo’ uYehova.—IMize. 17:3.