Nceda Abanye ‘Bathobele Ngokusuka Entliziyweni’
1. Yintoni efunwa nguYehova kwabo bamnqulayo?
1 Ukuthobela kubalulekile ukuze sinqule uYehova ngendlela eyamkelekileyo. (Dut. 12:28; 1 Pet. 1:14-16) Kungekudala, uThixo uza kubagweba “abo bangamaziyo . . . nabo bangazithobeliyo iindaba ezilungileyo.” (2 Tes. 1:8) Sinokubanceda njani abanye ukuba ‘bazithobele ngokusuka entliziyweni’ iimfundiso zeLizwi likaThixo?—Roma 6:17.
2. Kutheni kubalulekile ukunceda abanye babe nokholo olungaxengaxengiyo?
2 Bancede Babe Nokholo Yaye Bamthande: IZibhalo zinxibelelanisa ukuthobela nokholo. Umpostile uPawulos wathetha ‘ngomyalelo kaThixo ongunaphakade wokukhuthaza intobelo ngokholo.’ (Roma 16:26) KweyamaHebhere isahluko 11 kukho imizekelo eliqela yabantu ababenokholo, uninzi lwabo olwalusenza ukuthanda kukaYehova. (Heb. 11:7, 8, 17) Kwelinye icala, ukungathobeli kunxulunyaniswa nokungabi nalukholo. (Yoh. 3:36; Heb. 3:18, 19) Kufuneka silisebenzise ngobuchule iLizwi likaThixo ukuze sincede abanye babe nokholo oluya kubenza bathobele.—2 Tim. 2:15; Yak. 2:14, 17.
3. (a) Ukuthobela kunxibelelene njani nothando? (b) Sinokuzinceda njani izifundo zethu zithande uYehova?
3 Ukuthobela kukwanxulunyaniswa nokuthanda uThixo. (Dut. 5:10; 11:1, 22; 30:16) Eyoku-1 kaYohane 5:3 ithi: “Ukumthanda uThixo kuko ukuthi, siyigcine imiyalelo yakhe; kwaye ayinzima imiyalelo yakhe.” Sinokuzinceda njani izifundo zethu ukuba zimthande uYehova? Ngexesha lesifundo, khangela amathuba okuzinceda zixabise iimpawu zakhe. Zichazele indlela wena omxabisa ngayo uThixo. Zincede zicinge ngokwakha ubuhlobo noYehova. Ewe, ukuthanda uYehova kuya kwenza abanye—kwanathi—bamthobele ngokusuka entliziyweni.—Mat. 22:37.
4. (a) Kutheni umzekelo wethu ubalulekile? (b) Yintoni esimele siyenze ukuze sibe ‘nentliziyo ethobelayo’?
4 Ngomzekelo Wethu: Enye indlela enamandla esinokukhuthaza ngayo abanye ukuba bathobele iindaba ezilungileyo ngumzekelo wethu. Noko ke, kufuneka umgudu oqhubekayo ukuze sibe ‘nentliziyo ethobelayo.’ (1 Kum. 3:9; IMize. 4:23) Kubandakanya ntoni oko? Yondla intliziyo yakho ngokuyifunda rhoqo iBhayibhile nangokungaphoswa ziintlanganiso. (INdu. 1:1, 2; Heb. 10:24, 25) Zama ukunxulumana nabo bantliziyo zabo zimanyaniswe lunqulo lwenyaniso. (IMize. 13:20) Yiya rhoqo entsimini, unomnqweno osuka entliziyweni wokunceda abantu abakwintsimi yebandla lenu. Thandaza kuYehova umcele ukuba akuncede ube nentliziyo elungileyo. (INdu. 86:11) Ziphephe izinto ezinokonakalisa intliziyo yakho, njengeendlela zokuzonwabisa ezikhuthaza ukuziphatha okubi nogonyamelo. Sukela izinto eziya kukwenza usondele nangakumbi kuThixo neziya komeleza ubuhlobo bakho naye.—Yak. 4:7, 8.
5. Basikelelwa njani abo bathobelayo?
5 UYehova waqinisekisa abantu bakhe bamandulo esithi babeya kufumana iintsikelelo zakhe xa bephulaphula ilizwi lakhe. (Dut. 28:1, 2) Nanamhlanje uYehova ubasikelela kakhulu “abo bamthobelayo njengomlawuli.” (IZe. 5:32) Ngoko ngamana singabanceda abanye ukuba bathobele ngokusuka entliziyweni ngemfundiso nangomzekelo wethu.