Bathabatheni Njengomzekelo Abaprofeti—UHabhakuki
1. Yintoni enokusenza sivakalelwe njengomprofeti uHabhakuki?
1 Njengoko sijamelene nobungendawo obandayo emhlabeni, sisenokuvakalelwa njengoHabhakuki, owabuza uYehova esithi: “Kutheni undenza ndibone okwenzakalisayo, uze uqhubeke ujonga inkathazo?” (Hab. 1:3; 2 Tim. 3:1, 13) Ukucinga ngomyalezo kaHabhakuki nomzekelo wakhe wokuthembeka kunokusinceda sinyamezele njengoko silinde imini yomgwebo kaYehova.—2 Pet. 3:7.
2. Sinokubonisa njani ukuba siphila ngokuthembeka?
2 Phila Ngokuthembeka: Kunokuba abe buhlungu kakhulu ngenxa yeemeko zakhe ezinzima, uHabhakuki waqhubeka ephaphile yaye ekhuthele. (Hab. 2:1) Lo mprofeti waqinisekiswa nguYehova ukuba ilizwi lakhe liya kuzaliseka ngexesha elifanelekileyo ibe “lowo ulilungisa, ngokuthembeka kwakhe uya kuqhubeka ephila.” (Hab. 2:2-4) Kuthetha ukuthini oko kumaKristu aphila kweli xesha lesiphelo? Okubaluleke nangakumbi kunokwazi ukuba isiphelo siza kufika nini, kukuqiniseka ukuba siza kufika. Ukholo luya kusinceda sihlale sithe qwa size sibeke umsebenzi wokushumayela kwindawo yokuqala.—Heb. 10:38, 39.
3. Kutheni sifanele sihlale sivuya njengoko sikhonza uYehova?
3 Gcoba NgoYehova: Ukholo lwethu luza kuvavanywa xa uGogi wakwaMagogi ehlasela abantu bakaYehova. (Hez. 38:2, 10-12) Imfazwe iba buhlungu, nkqu nakwabo baza kuyiphumelela ekugqibeleni. Ukutya kusenokunqaba, abantu basenokulahlekelwa zizinto zabo buze ubomi bube nzima. Siza kuthini xa kuvela iingxaki? UHabhakuki wayebulindele ubunzima, ngenxa yoko wazimisela ukuhlala evuya njengoko ekhonza uYehova. (Hab. 3:16-19) “Uvuyo lukaYehova” luya kusinceda sijamelane nezilingo ezizayo.—Neh. 8:10; Heb. 12:2.
4. Luluphi uvuyo esinokulufumana ngoku nakwixesha elizayo?
4 Abo uYehova abasindisayo kwimini yakhe yokugweba baya kuqhubeka befundiswa ngendlela uThixo afuna siphile ngayo. (Hab. 2:14) Abo bavusiweyo nabo baya kufunda ngoYehova. Kwanga singawaxhakamfula kwangoku amathuba okuthetha ngoYehova nangemisebenzi yakhe emangalisayo!—INdu. 34:1; 71:17.