INDLELA YOKUPHILA YAMAKRISTU

Inqaku Elitsha Kwincwadi Yentlanganiso

Ukususela ngoJanuwari 2018, kwintlanganiso yaphakathi evekini kuza kuthethwa ngengcaciso nemifanekiso esuka kwiNguqulelo Yehlabathi Elitsha YeZibhalo Ezingcwele yokufunda ekwiwebhsayithi yethu, enoba ayikabikho ngolwimi lwakho. Ngokuqinisekileyo le nkcazelo iza kukunceda kube lula ukulungiselela le ntlanganiso. Okubaluleke nangakumbi, ngamana ingakunceda usondele ngakumbi kuYehova uBawo wethu osithandayo.—Rom 11:33.

INGCACISO

Ingcaciso isinika inkcazelo ngenkcubeko, iindawo nolwimi ekuthethwa ngalo kwiivesi zeBhayibhile.

Mateyu 12:20

Umsonto weflekisi: Yayisisibane esasiqhelekile ezindlini esasigalelwa ioli yeminquma. Lo msonto wawutsala ioli ukuze isibane sikhanye. Ibinzana lesiGrike elithi ‘umsonto weflekisi’ kusenokwenzeka ukuba lalibhekisela kumsonto owawuqhuma ngenxa yothuthu olubangelwa kukucima kwesibane. Isiprofeto esikuIsaya 42:3 saxela kwangaphambili ukuba uYesu onovelwano wayeza kuligcina liphila ithemba kubantu abathobekileyo nabacinezelekileyo.

Mateyu 26:13

Inene: Igama lesiGrike elithi ämēnʹ ngesiHebhere lithi ämānʹ lithetha ukuthi “makube njalo” okanye “ngokuqinisekileyo.” UYesu wayesoloko elisebenzisa eli binzana xa etshayelela into aza kuyithetha, esenza isithembiso okanye ethetha ngesiprofeto ukuze abethelele ukuchana nokuthembeka kwaso. Ukusebenzisa kukaYesu igama elithi “inene” okanye amen ngale ndlela, kuthiwa kubalasele kwingxelo yeVangeli. Xa ngokuphindaphindiweyo wathi (a·menʹ a·menʹ), njengakwincwadi yeVangeli kaYohane, amazwi akhe aguqulelwa ngokuthi “inene, inene.”—Yoh 1:51

UMFANEKISO

Iifoto, imifanekiso, iividiyo ezingenamazwi nemizobo zibonisa iinkcukacha zezinto ezahlukahlukeneyo ekuthethwa ngazo eBhayibhileni.

IBhethefage, INtaba YemiNquma NeYerusalem

Kule vidiyo imfutshane kuhanjwa indlela engena kwimpuma yeYerusalem esuka e-et-Tur—ekucingelwa ukuba yayiyiBhethefage ekuthethwa ngayo eBhayibhileni—eya kweyona ndawo yalapho iphakamileyo kwiNtaba yemiNquma. IBhethani ikwimpuma yeBhethefage kwicala elisempuma kwiNtaba yemiNquma. UYesu nabafundi bakhe babedla ngokuchitha ubusuku eBhethani xa beseYerusalem, ngoku eyiel-ʽAzariyeh, ngesiArabhu ethetha “Indawo KaLazaro.” Ngokuqinisekileyo uYesu wahlala kuloMarta, kuloMariya nakuloLazaro. (Mat 21:17; Mar 11:11; Luk 21:37; Yoh 11:1) Xa wayebuyela ekhayeni lakhe eYerusalem, kusenokwenzeka ukuba uYesu wasebenzisa indlela efanayo nale ibonisiweyo kule vidiyo. NgoNisan 9, 33 C.E., xa wayengena eYerusalem ngeNtaba yemiNquma esuka eBhethefage, kusenokwenzeka wahamba ngendlela eya eYerusalem.

Indlela Esuka eBhethani Eya EBhethefage
EBhethefage
INtaba YemiNquma
INtlambo yaseKidron
Itempile EseNtabeni

Isikhonkwane Esikwithambo Lesithende

Lo ngumfanekiso wethambo lesithende lomntu ekubethelelwe kulo isikhonkwane sentsimbi esibubude obuziisentimitha eziyi-11.5. Lo mfanekiso wafunyanwa ngo-1968, xa kwakusembiwa, ibe kuthiwa ngowexesha lamaRoma. Ububungqina bokwembiwa kwezinto zakudala obubonisa ukuba izikhonkwane zazisetyenziwa xa kubulawa umntu ngokumbethelela emthini. Esi sikhonkwane kusenokwenzeka ukuba siyafana neso sasetyenziswa ngamajoni amaRoma ukubethelela uYesu esibondeni. Eli thambo lafunyanwa kwibhokisi yelitye, ebizwa ngokuba yiossuary apho kwakufakwa khona amathambo abantu abafileyo emva kokuba umzimba ubolile. Oku kubonisa ukuba umntu owayebulawelwe esibondeni wayekwazi ukungcwatywa.—Mat 27:35.