Ngaba Ubuya Kuwucima Umsonto Oqhumayo?

UYESU KRISTU wavakalisa iindaba ezilungileyo zoBukumkani bukaThixo kuzo zonke iindidi zabantu. Uninzi lwabo lwalucinezelekile, ludimazekile. Kodwa uYesu wabanika isigidimi esikhuthazayo. Wayenovelwano ngabantu ababandezelekileyo.

Umbhali wencwadi yeVangeli uMateyu wabalaselisa uvelwano lukaYesu ngokutsalela ingqalelo kwisiprofeto esibhalwe nguIsaya. Ecaphula amazwi awazalisekiswa nguKristu, uMateyu wabhala esithi: “Ingcongolo etyumkileyo akayi kuyaphula, nomsonto oqhumayo akayi kuwucima, ade awuphumelelise ekoyiseni umgwebo.” (Mateyu 12:20; Isaya 42:3) Athetha ukuthini la mazwi, yaye uYesu wasizalisekisa njani esi siprofeto?

Ukuhlolisisa Esi Siprofeto

Ngokuqhelekileyo ingcongolo ikhula kwindawo enomgxobhozo yaye ayisosityalo someleleyo nesizinzileyo. “Ingcongolo etyumkileyo” ibiya kuba buthathaka ngenene. Ngoko ke kuyacaca ukuba ifanekisela abantu abacinezelweyo okanye ababandezelekileyo njengalaa ndoda yayinesandla esishwabeneyo eyaphiliswa nguYesu ngeSabatha. (Mateyu 12:10-14) Kodwa kuthekani ngomsonto wesibane ekubhekiselwe kuwo kwesi siprofeto?

Isibane esiqhelekileyo kumakhaya enkulungwane yokuqala yeXesha lethu Eliqhelekileyo sasisisitya esifana nebhekile yomdongwe enomqheba ongqukuva. Ngokuqhelekileyo esi sibane sasizaliswa ngeoli yomnquma. Ngamandla awo okufunxa, umsonto owenziwe ngeflakisi wawutsala ioli ukuze ivuthise umlilo. Kakade ke, ‘umsonto oqhumayo’ ubuya kuba ngosele uza kucima.

UYesu wavakalisa isigidimi sakhe esithuthuzelayo kubantu abaninzi ngokufuziselayo ababefana nengcongolo etyumkileyo, evikivekileyo nenyhashiweyo. Kwakhona aba bantu babefana nomsonto weflakisi oqhumayo kuba intlantsi yabo yokugqibela yobomi babo kwakukufutshane ukuba icime. Ngokwenene babecinezelwe yaye bedimazekile. Noko ke, uYesu akazange ayaphule ingcongolo etyumkileyo yokomfuziselo okanye acime umsonto oqhumayo wokomfuziselo. Amazwi akhe anothando, athantamisayo nanovelwano akazange ongeze ukudimazeka nokudandatheka kubantu ababandezelekileyo. Kunoko, amazwi akhe neenkqubano zakhe kunye nabo zazinomphumo olukhuthazo.—Mateyu 11:28-30.

Ngokufanayo namhlanje, abaninzi bafuna uvelwano nokhuthazo kuba bejamelene neengxaki ezidimazayo. Kwanabakhonzi bakaYehova abasoloko benamandla. Ngamanye amaxesha abanye bafana nemisonto eqhumayo. Ngoko ke amaKristu afanele abe ngakhuthazayo—ngokungathi kunjalo, avuselele idangatye—ngaloo ndlela esomelezana.—Luka 22:32; IZenzo 11:23.

NjengamaKristu sifuna ukuba ngabakhayo. Besingayi kuzama ukwenza buthathaka ngabom nabani na ofuna uncedo lokomoya. Eneneni, sinqwenela ukuxelisa umzekelo kaYesu ekomelezeni abanye. (Hebhere 12:1-3; 1 Petros 2:21) Isibakala sokuba singaqondanga besinokunyhasha nabani na olindele ukukhuthazwa sithi sisinika isizathu esihle sokucinga nzulu ngendlela esiqhubana ngayo nabanye. Ngokuqinisekileyo asifuni ‘kuwucima umsonto oqhumayo.’ Luluphi ukhokelo olungokweZibhalo olunokusinceda ngokuphathelele oku?

Imiphumo Yokugxeka

Ukuba umKristu ‘uthe waqutyulwa nokuqutyulwa sisiphoso esithile, abo bangaboMoya, bamele bamluleke onjalo benomoya wobulali.’ (Galati 6:1) Noko ke, ngaba bekuya kufaneleka ukujonga iimpazamo kwabanye size sisebenzise onke amathuba avelayo ukuze sibalungise? Okanye ngaba bekuya kuba yinto entle ukubanyanzela ukuba baphucule ngokubaxelela ukuba imigudu abayenzayo ngoku ayanelanga, mhlawumbi sibenze bazive benetyala? Abukho ubungqina bokuba uYesu wenza nayiphi into enjalo. Nangona iziinjongo zethu ukunceda abanye ukuba baphucule, abo bagxekwa ngokungenabubele basenokuziva benziwe buthathaka kunokuba bomelezwe. Kwanokugxeka okwakhayo kunokudimaza ukuba kubaxiwe. Ukuba besinokubonakalisa ukunganeliseki yimigudu emihle yomKristu okhutheleyo, ubesenokunikezela aze athi, ‘Kakade kutheni ndizixhamla nje?’ Eneneni, usenokunikezela ngokupheleleyo.

Ngoxa kubalulekile ukunikela isiluleko esisekelwe kwiZibhalo, oko akufanele kusoloko kunjalo ngabadala abamiselweyo okanye abanye ebandleni. Iintlanganiso zamaKristu aziqhutywa ngokuyintloko ukuze kunikelwe yaye kwamkelwe isiluleko. Kunoko, sihlanganisana rhoqo ukuze sakhane yaye sikhuthazane ukuze bonke banandiphe ukunxulumana kwabo nenkonzo yabo engcwele kuThixo. (Roma 1:11, 12; Hebhere 10:24, 25) Hayi indlela ekuba kuhle ngayo xa siwazi umahluko phakathi kwempazamo enzulu nokungafezeki ekububulumko nokubonakalisa uthando ukukubetha ngoyaba!—INtshumayeli 3:1, 7; Kolose 3:13.

Abantu basabela ngokukhawuleza gqitha xa bekhuthazwa kunaxa begxekwa. Enyanisweni, xa abantu bevakalelwa kukuba badlelw’ indlala, basenokubambelela ngakumbi kuloo nto bebegxekwa ngayo! Kodwa xa benconywa ngokufanelekileyo, bayakhuthazeka, baze bashukunyiselwe ukuba baphucule. (IMizekeliso 12:18) NjengoYesu, ngoko ke masibe ngabakhuthazayo yaye singaze ‘siwucime umsonto oqhumayo.’

Kuthekani Ngokuthelekisana?

Ukuva amava amnandi amanye amaKristu kusenokusichukumisa gqitha. UYesu naye wavuya xa weva ngempumelelo yabafundi bakhe ekuvakaliseni isigidimi soBukumkani. (Luka 10:17-21) Ngokufanayo, xa sisiva ngempumelelo, ukuba ngumzekelo omhle, okanye ingqibelelo yabanye esikholwa kunye nabo, siyakhuthazeka yaye siziva sizimisele ukubambelela kwikhondo lethu lobuKristu.

Kodwa, kuthekani ukuba ingxelo ibinikelwa ngohlobo lokungathi ithi, ‘Nina anenzi kakuhle njengala maKristu, yaye benifanele ukuba nenza okungaphezu koku nikwenzayo’? Ngaba ngokunokwenzeka umphulaphuli ebenokuqala ucwangciso olungqongqo lokuphucula? Kucace mhlophe ukuba uya kudimazeka aze mhlawumbi anikezele ngokukodwa ukuba uthelekiswa ngokufuthi nabanye okanye kubhekiselwa kwinto enjalo. Oku kufana ncam nomzali obuza umntwana wakhe oku, ‘Kutheni ungafani nomkhuluwa wakho nje?’ Amazwi anjalo anokubangela ingqumbo nokudimazeka, kodwa akadli ngakukhuthaza imikhwa emihle. Ukuthelekiswa nabanye kusenokuba nomphumo ofanayo nakubantu abakhulu, kude kubenze babe nengqumbo ngakumbi kwabo bathelekiswa nabo.

Asinakulindela ukuba bonke abantu benze umsebenzi olinganayo enkonzweni kaThixo. Komnye wemizekeliso kaYesu, inkosi ethile yanika abakhonzi bayo italente yesilivere enye, ezimbini okanye ezintlanu. Ezi talente bazinikwa ‘elowo ngokwamandla akhe.’ Abakhonzi ababini abarhweba ngobulumko bazandisa iitalente zabo yaye banconywa kuba babethembekile, nangona umsebenzi wabo wawunemiphumo engafaniyo.—Mateyu 25:14-30.

Umpostile uPawulos ngokufanelekileyo wabhala: “Elowo ke makawucikide owakhe umsebenzi, wayeya kwandula ukuba neqhayiya ngokwakhe yedwa, angabi nalo ngomnye.” (Galati 6:4) Ngoko ke, ukuze sibakhuthaze ngokwenene abanye, sifanele sizame ukuphepha ukuthelekisa okungakhiyo.

Ezinye Zeendlela Zokwakha Abanye

Yintoni esinokuyenza ukuze sakhe abadimazekileyo size siphephe ‘ukucima umsonto oqhumayo’? Kaloku, ukunikela ukhuthazo akungomcimbi nje wokulandela umgaqo othile. Noko ke, kuyinto enokwenzeka ukuba amazwi ethu abakhe abanye ukuba sisebenzisa imigaqo yeBhayibhile. Yiyiphi eminye yayo?

Yiba ngothobekileyo. KwabaseFilipi 2:3, uPawulos wasibongoza ukuba ‘singenzi nanye into ngokweyelenqe, nangokozuko olulambathayo.’ Kunoko, sifanele sithethe size sibonise ukuthobeka xa sisenza izinto. ‘Ngokuthobeka kwentliziyo sifanele simbalele omnye ekuthini nguyena wongamileyo kunathi.’ UPawulos akazange athi sifanele singazicingeli kwaphela. Kunoko, sifanele sazi ukuba ngandlel’ ithile wonke umntu wongamile kunathi. Igama lesiGrike apha eliguqulelwe ngokuthi “owongamileyo” libonisa ukuba umntu “uwanikela umva amalungelo akhe, aze ngenkuthalo aqwalasele iziphiwo omnye umntu ongamileyo kuzo.” (New Testament Word Studies, nguJohn Albert Bengel, Umqulu 2, iphepha 432) Ukuba senza oku size sibagqale abanye njengabongamileyo, siya kuqhubana nabo ngendlela ethobekileyo.

Bonisa intlonelo. Ngokuthetha ngokunyanisekileyo, sinokukwenza kucace ukuba sinentembelo kwabo banyanisekileyo sikhonza nabo, sibajonga njengabantu abanqwenela ukukholisa uThixo. Kodwa masithi bafuna uncedo lokomoya. Ngoko masinikele uncedo ngendlela ebonakalisa intlonelo, nenesidima. UPawulos wawubeka ngolu hlobo lo mbandela: “Mayela nembeko leyo, phangelanani.”—Roma 12:10.

Yiba ngumphulaphuli olungileyo. Ewe, ukuze sikwazi ukukhuthaza abo basenokuba bajamelene neengxaki ezidimazayo, kufuneka sibe ngabaphulaphuli abalungileyo, kungekhona abahlohli. Kunokunikela amacebiso akhawulezileyo, ayinkwalambisa, masithabathe ixesha elifunekayo ukuze sinikele ulwalathiso olusekelwe kwiZibhalo oluhlangabezana ngokwenene neentswelo abanazo. Ukuba asazi ukuba masithini, uphando olusekelwe eBhayibhileni luya kusinceda sithethe ngendlela ethuthuzelayo size sibomeleze abanye.

Yiba nothando. Kufuneka sizive sibathanda abo sinqwenela ukubakhuthaza. Xa silubonakalisa kwabo sikhonza nabo uYehova, uthando lwethu lufanele ludlulele ngaphaya kokwenza nje izinto abazithandayo. Lufanele lubandakanye imvakalelo enzulu. Ukuba sinothando olunjalo ngabo bonke abantu bakaYehova, amazwi ethu aya kuba lukhuthazo lokwenene kubo. Kwanokuba sifuna ukubacebisa ukuze baphucule, akunakufane kwenzeke ukuba oko sikuthethayo kungaqondwa kakuhle okanye kubangele umonakalo xa intshukumisa yethu ingekokuveza imbono yethu kodwa ikukunikela uncedo olunothando. Kunjengokuba uPawulos ngokucacileyo wathi, “uthando luyakha.”—1 Korinte 8:1; Filipi 2:4; 1 Petros 1:22.

Yiba Ngowakhayo Ngalo Lonke Ixesha

Kule “mihla yokugqibela” enomngcipheko, abantu bakaYehova bajamelana nezilingo ezininzi. (2 Timoti 3:1-5) Akumangalisi ukuba maxa wambi bethwaxwa zizinto ezingaphaya kwamandla okunyamezela. Njengabakhonzi bakaYehova, ngokuqinisekileyo asifuni kuthetha okanye senze izinto ezinokwenza nabani na kwabo sinqula nabo azive enjengomsonto oqhumayo osele uza kucima.

Ngoko ke, hayi indlela ekubaluleke ngayo ukuba sikhuthazane! Masenze wonke umgudu esinokuwenza ukuze sibe ngabakhayo ngokuba ngabathobekileyo nabanentlonelo kwabadimazekileyo esinqula nabo. Kwanga singaphulaphula ngenyameko xa bezityand’ igila kuthi size ngalo lonke ixesha sifune ukubanceda ngokunikela ingqalelo kwiLizwi likaThixo, iBhayibhile. Ngaphezu kwako konke, masibonakalise uthando, kuba esi siqhamo somoya oyingcwele kaYehova siya kusinceda somelezane. Kwanga singangathethi okanye senze izinto nangayiphi na indlela ‘esenokucima umsonto oqhumayo.’