Ngaba Ubusazi?

Yintoni ekwimibhalo yakudala ebonisa ukuba iBhayibhile ichanile?

KWIBIBLE Lands Museum eYerusalem, kukho ilitye elabhalwa phakathi konyaka ka-700 noka-600 Ngaphambi Kwexesha Eliqhelekileyo. Eli litye lafunyanwa kumqolomba ekwakungcwatywa kuwo kufutshane naseHebron kwaSirayeli. Nantsi into ebhalwe kweli litye: “Uqalekisiwe uHagaf, unyana kaHagav nguYahweh Sabaot.” Le nto ibonisa njani ukuba iBhayibhile ichanile? Ibonisa ukuba igama likaThixo uYehova, elibhalwe ngoonobumba uYHWH kwiincwadi zakudala zesiHebhere, lalisaziwa futhi lalisetyenziswa ngamaxesha okubhalwa kweBhayibhile. Eminye imibhalo ekwimiqolomba ekwakungcwatywa kuyo ibonisa ukuba abantu ababezimela nababedla ngokudibanela kuyo babebhala igama likaThixo, kunye namagama abo awayenoonobumba begama likaThixo kwiindonga.

Xa wayethetha ngale mibhalo, uGqr. Rachel Nabulsi weYunivesithi yaseGeorgia wathi: “Kule mibhalo libhalwe kaninzi igama elithi YHWH. Le nto isifundisa into eninzi. . . . IBhayibhile nale mibhalo ibonisa indlela awayebaluleke ngayo uYHWH kumaSirayeli nakumaYuda.” Le nto ingqinelana neBhayibhile, apho igama likaThixo elibhalwe ngoonobumba abathi YHWH kwiincwadi zesiHebhere, livela kakhulu. Amagama abantu ayesoloko esiba negama likaThixo.

Amagama athi “Yahweh Sabaot,” abhalwe kwilitye esithethe ngalo ekuqaleni, athetha ukuthi “Yehova wemikhosi.” Le nto ibonisa ukuba ngamaxesha okubhalwa kweBhayibhile laliqhele ukusetyenziswa igama likaThixo nathi “Yehova wemikhosi.” Ibonisa nokuchana kwamagama aseBhayibhileni athi “Yehova wemikhosi,” avela kayi-283 kwiZibhalo ZesiHebhere. Kuthethwa ngawo kakhulu kuIsaya, uYeremiya noZekariya.