1 | Umthandazo “Liphoseni Kuye Lonke Ixhala Lenu”

IBHAYIBHILE ITHI: “Liphoseni kuye [UThixo] lonke ixhala lenu, kuba unikhathalele.”—1 PETROS 5:7.

Ithetha Ukuthini Loo Nto?

UYehova uThixo uyasimema ukuba simxelele zonke izinto ezisikhathazayo. (INdumiso 55:22) Akukho ngxaki inkulu okanye incinci esingenakuyithandazela. Ukuba ibalulekile kuthi, ibalulekile nakuYehova kuba usikhathalele ibe ukhathalele nendlela esiziva ngayo. Ukuthandaza kuye yeyona nto ibalulekileyo ukuze sifumane uxolo lwengqondo.—Filipi 4:6, 7.

Ingasinceda Njani Loo Nto?

Xa sinezigulo eziphazamisa iimvakalelo, sisenokuziva sisodwa. Abanye abantu basenokungasoloko beyiqonda indlela esivakalelwa ngayo. (IMizekeliso 14:10) Kodwa xa simxelela uThixo emthandazweni indlela esivakalelwa ngayo, siza kutsho sifumane umntu osimamela enovelwano ibe esiqonda. UYehova uyasazi, uyayazi intlungu yethu nezinto ezisixhalabisayo, ibe ufuna sithandazele nantoni na esikhathazayo.—2 Kronike 6:29, 30.

Ukuthetha noYehova ngomthandazo kuyasiqinisekisa ukuba usikhathalele. Singavakalelwa njengomdumisi owathandaza wathi: “Kuba uyibonile inkxwaleko yam; uyayibona intlungu yam engathethekiyo.” (INdumiso 31:7) Ukwazi ukuba uYehova uyayazi intlungu esikuyo, loo nto ingakwazi ukusinceda sikwazi ukuqhubeka nobomi ngamaxesha anzima. Akapheleli nje ekuboneni izinto ezisikhathazayo. Ngokungafaniyo nabantu uyayiqonda imeko esikuyo ibe uyafuna ukusinceda sifumane intuthuzelo nokhuthazo oluseBhayibhileni.

Indlela Enceda Ngayo IBhayibhile-UJulian

Indlela Ekundichaphazela Ngayo Ukuba Nexhala

“Ndiba nengxaki yokuba nexhala nokoyika okubaxiweyo (OCD). Ndingalindelanga ndiye ndibe nexhala. Ngelinye ixesha andibi nanto, ngelinye ndibe nexhala elingaphaya kokuqonda kungekho sizathu. Ndiye ndibe nexhala kakhulu xa ndiphakathi kwabanye abantu. Ndixhalatyiswa kakhulu kukuba bacinga ntoni ngam.

“Abahlobo bam abayaziyo ingxaki yam yokuxhalaba, benza konke abanako ukuze bandincede. Ndiyavuma ukuba ngamanye amaxesha baye bathethe izinto ezingandincediyo. Kodwa ndinombulelo kuba bezama ukundinceda.

“Ngamanye amaxesha ixhala neOCD ziye zenze kube nzima ukuthandaza. Kufuneka ndisebenzise ingqondo kakhulu ukuze ndikwazi ukucinga nokuthetha noYehova ngomthandazo. Ingqondo yam icinga le naleya ngokukhawuleza—de ndiphazamiseke. Xa ndingakwazi ukulawula iingcinga zam, kuye kube nzima ukuxelela uYehova into endiyicingayo okanye indlela endivakalelwa ngayo.”

Indlela Endinceda Ngayo IBhayibhile

“Ndifunde eBhayibhileni ukuba ukuze imithandazo yamkeleke kuThixo akunyanzelekanga ibe mide okanye ube ngumntu owabeka kakuhle amagama. Ngamanye amaxesha xa ndingakwazi ukuyibeka ngamazwi indlela endivakalelwa ngayo, ndivele ndithandaze ndithi: ‘Yehova, ndicela undincede.’ Ngelo xesha, ndiye ndibone ukuba uYehova uyandiva aze andiphendule. Ukongezelela emthandazweni, ndiye ndafuna uncedo kwezonyango. Ndiyavuya, ibe ndizibulela zombini ezi ndlela zoncedo, imeko yam ibhetele kakhulu. Nangona kuye kube nzima ukucela uncedo kuTata wam osezulwini ndiyathandaza kuba ndiqinisekile ukuba uyandithanda ibe uyafuna ukundinceda.”