2 | “Intuthuzelo Esuka EBhayibhileni”

IBHAYIBHILE ITHI: “Kuba zonke izinto ezabhalwa kwixesha eladlulayo zabhalwa ukuze kufundiswe thina, ukuze ukunyamezela kwethu nokuthuthuzelwa ziZibhalo kusincede sibe nethemba.”—ROMA 15:4.

Ithetha Ukuthini Loo Nto?

IBhayibhile isikhuthaza ngezinto ezithuthuzelayo ezincedayo xa sicinga ngendlela engafanelekanga. Umyalezo oseBhayibhileni uphinda usinike ithemba lokuba, ukuba buhlungu ngokweemvakalelo kuza kuphela.

Isinceda Njani Le Nto?

Sonke ngamanye amaxesha sikhe singonwabi, kodwa abo banedepression nabanexhala banokusoloko bebuhlungu ngokweemvakalelo. Inceda njani iBhayibhile?

IBhayibhile isinika izinto ezininzi ezintle esinokucinga ngazo ezinokuthathela indawo iingcinga ezimbi. (Filipi 4:8) Inokugcwalisa iingqondo zethu ngeengcinga ezisithuthuzelayo nezisenza sizole size sikwazi ukulawula iimvakelelo zethu.—INdumiso 94:18, 19.
IBhayibhile iyasinceda siyeke ukucinga ukuba akho yethu.—Luka 12:6, 7.
Iivesi ezininzi eziseBhayibhileni ziyasiqinisekisa ukuba asikho sodwa, ibe uThixo uMdali wethu uyiqonda kakuhle indlela esivakalelwa ngayo.—INdumiso 34:18; 1 Yohane 3:19, 20.
IBhayibhile ithembisa ukuba uThixo uza kuziphelisa iingcinga ezibuhlungu. (Isaya 65:17; ISityhilelo 21:4) Xa sikhathazwa ziingcinga neemvakalelo ezibuhlungu, sinokufumanisa ukuba esi sithembiso sisinika amandla okunyamezela.

Indlela Enceda Ngayo IBhayibhile-UJessica

Indlela Endichaphazela Ngayo IDepression

“Xa ndandina-25 ndaye ndaphazamiseka kwaza kwafunyaniswa ukuba ndinedepression embi kakhulu. Ndandisuka ndibe neengcinga ezingalawulekiyo zezinto ezibuhlungu ezenzeka kum kwixesha elidlulileyo. Oogqirha bandinceda ndaqonda ukuba idepression yam ibangelwa ziingcinga ezimbi zezinto ezibuhlungu ezaye zenzeka ebomini bam. Ukongezelela kumayeza awayendinceda, ndandikudinga ukuthetha noogqirha ngokuqhubekayo ukuze bandincede ndiyazi ndize ndiyilungise indlela yam engafanelekanga yokucinga.”

Indlela IBhayibhile Endinceda Ngayo

“Xa ndandinedepression kakhulu, ndandiba nexhala ndoyike de ibe ngathi intliziyo yam iza kuma, kube nzima nokuphefumla, ndingcangcazele ibe ngathi ndishiywa ziingqondo. Qho ebusuku ndandiba neengcinga ezindiphazamisayo nendingakwaziyo ukuzilawula. Njengokuba iNdumiso 94:19 icacisa, uThixo unako ukusithuthuzela aze asenze sizole xa sinamaxhala angaphezu kwamandla ethu. Ecaleni kwebhedi yam ndabeka iBhayibhile nencwadi enezibhalo ezindikhuthazayo. Xa ndandingakwazi ukulala ndandifunda iivesi eziseBhayibhileni ndize ndivumele iingcinga zikaThixo zindithuthuzele.

“IBhayibhile isikhuthaza ukuba sitshintshe iingcinga ezingahambiselaniyo noko sikwaziyo ngoThixo. Ekuqaleni, ndandiqinisekile ukuba akho yam ibe andithandeki. Kodwa ndiye ndafunda ukuba ukucinga ngolohlobo akudibani noko kuthethwa yiBhayibhile, kuba imchaza uThixo njengotata onothando nonovelwano okhathalele mntu ngamnye. Kancinci kancinci, ndaye ndakwazi ukulawula iingcinga zam kunokuba ndivumele iingcinga zam zindilawule. Ndaye ndafunda ukuzijonga ngendlela uThixo andijonga ngayo. Le nto yayibalulekile ukuze ndohlukane neengcinga ezingafanelekanga ngam.

“Ndijonge phambili kwixesha laxa iingcinga ezimbi nokucinga okuyingozi kungasekho. Ndiyayazi ukuba kwixesha elizayo azizubakho iingxaki zengqondo. Ukwazi le nto kundinika amandla okunyamezela, ibe kundinceda ndijonge phambili kwixesha elizayo xa ndizobe ndingenayo idepression.”