Okulungileyo Nokungalunganga: Sinokuyithemba IBhayibhile
Asinakuqiniseka ngemiphumo yendlela esikhetha ukuziphatha ngayo xa siyisekela kwindlela esivakalelwa ngayo okanye abavakalelwa ngayo abanye abantu. IBhayibhile iyasixelela ukuba kutheni, kodwa ayipheleli nje apho. Inamacebiso anokuthenjwa ngendlela yokuziphatha angasinceda sikwazi ukuphila ubomi obonwabisayo nobanelisayo.
SIYALUDINGA UKHOKELO LUKATHIXO
EBhayibhileni, uYehovaa uThixo uthi abantu bayaludinga uncedo lwakhe futhi abanakukwazi ukwenza yonke into ngokwabo. (Yeremiya 10:23) Yiloo nto esinike imigaqo yokuziphatha eBhayibhileni. Uyabathanda abantu ibe akafuni senze izigqibo ezingafanelekanga eziza kusivisa ubuhlungu zize zenze ubomi bethu bube nzima. (Duteronomi 5:29; 1 Yohane 4:8) Ngaphezu koko uMdali wethu unobulumko nolwazi oludingekayo ukuze asinike elona cebiso lokuziphatha liwodlula onke amanye. (INdumiso 100:3; 104:24) Nangona kunjalo, uThixo akabanyanzeli abantu ukuba baphile ngemithetho yakhe.
UYehova wanika indoda nomfazi wokuqala uAdam noEva yonke into ababeyidinga ukuze bonwabe. (Genesis 1:28, 29; 2:8, 15) Wabanika nemiyalelo elula awayelindele ukuba bayithobele. Wabayeka bazikhethela ukuba baza kuyithobela na loo miyalelo. (Genesis 2:9, 16, 17) Kodwa okubuhlungu kukuba uAdam noEva zange bayithobele imiyalelo kaThixo baze benza unothanda. (Genesis 3:6) Ube yintoni umphumo? Ngaba abantu bamele bazigqibele ngento elungileyo nengalunganga? Hayi khona. Izinto ezenzeka kudala zisinika ubugqina bokuba ukungayihoyi imithetho kaThixo akusenzi sibenoxolo nolonwabo olungapheliyo.—INtshumayeli 8:9.
IBhayibhile isinika amacebiso obulumko ngendlela yokuziphatha anokusinceda nokuba sihlala phi nokuba sihlala nabantu abanjani entsatsheni. (2 Timoti 3:16, 17; jonga ibhokisi ethi “Incwadi Yabantu Bonke.”) Khawucinge ngendlela iBhayibhile eyenza ngayo le nto.
Funda okungakumbi ngokuba kutheni kusithwa ‘iBhayibhile lilizwi likaThixo’.—1 Tesalonika 2:13. Bukela ividiyo ethi Ngubani umbhali weBhayibhile? ku-jw.org/xh.
IBHAYIBHILE ISIXELELA INTO UTHIXO AFUNA SIYENZE
IBhayibhile isixelela ngobuhlobo uThixo awayenabo nabantu ukususela ekuqaleni. Isinceda sikuqonde oko uThixo akujonga njengokungileyo nokulunganga, okuncedayo nokwenzakalisayo. (INdumiso 19:7, 11) Izifundo asifundisa zona zisoloko zichanile futhi zisinceda imihla ngemihla ukuze sikhethe ukuziphatha ngendlela eza kusinceda.
Ngokomzekelo khawucinge ngecebiso elifumaneka kwiMizekeliso 13:20: “Ohamba nezilumko uza kuba sisilumko, kodwa osebenzisana nezidenge uza kungena engxakini.” La mazwi aseyinyaniso nanamhlanje njengoko ayeyinyaniso nangexesha lakudala. IBhayibhile igcwele amacebiso aluncedo naxabisekileyo.—Jonga ibhokisi enomxholo othi “Ubulumko ObuseBhayibhileni Busoloko Bunceda.”
Mhlawumbi uyazibuza, ‘Ndingaqiniseka njani ukuba amacebiso eBhayibhile ngendlela yokuziphatha angadinceda?’ Inqaku elilandelayo liza kuthetha ngabantu abancedwayo ngala macebiso.
a UYehova ligama likaThixo.—INdumiso 83:18.