Yintoni Enokusinceda Sibe Nekamva Eliqinisekileyo?

Njengoko kubonisiwe kumanqaku adlulileyo, abantu bazama ukuba nekamva eliqinisekileyo ngokuthembela kwilakhi, imfundo, ubutyebi, nokuba ngabantu abalungileyo. Kodwa ke, ukusebenzisa ezi zinto ukuze ube nekamva elibhetele kufana nokusebenzisa imaphu erongo ukuze ufike endaweni. Ngaba le nto ithetha ukuba akukho nto iza kukunceda ube nekamva eliqinisekileyo? Hayi!

OYENA MNTU UNOKUKWAZI UKUSINCEDA

Siye sibuze kwabantu abadala nabanobulumko xa siza kwenza isigqibo. Nathi sinokulufumana uncedo kumntu omdala nonobulumko kunathi. Singafunda kwicebiso asinika lona kwincwadi eyaqalisa ukubhalwa kwiminyaka eyi-3500 eyadlulayo. Loo ncwadi yiBhayibhile.

Kutheni unokuyithemba iBhayibhile? Kuba umbhali wayo ngoyena umdala nonobulumko kunayo yonke into ephilayo. Kuthiwa ‘nguLowo Kanaphakade’ ‘osusela ngonaphakade ukusa ngonaphakade.’ (Daniyeli 7:9; INdumiso 90:2) “UnguMdali wezulu, uThixo wokwenene, Lowo wadala umhlaba.” (Isaya 45:18) Usixelela nokuba igama lakhe nguYehova.—INdumiso 83:18.

Kuba iBhayibhile isuka kuMdali wabantu bonke, akukho hlanga okanye ibala ilikhethileyo. Amacebiso ayo ebesoloko esebenza ibe ikwazile ukunceda abantu kuwo onke amazwe. Ifumaneka ngeelwimi ezininzi ngaphezu kwayo nayiphi na enye incwadi ibe yeyona ncwadi isasaziweyo.a Le nto ithetha ukuba nokuba umntu uphi, angakwazi ukuyifunda aze ancedwe yiyo. Le nto ithethwa apha ingqinwa nayiBhayibhile xa isithi:

“UThixo akakhethi, kodwa kuzo zonke iintlanga wamkela nabani na omoyikayo nowenza izinto ezilungileyo.”—IZENZO 10:34, 35.

Njengokuba umzali okhathalayo ebanceda abantwana bakhe, noYehova uThixo nguTata onothando osincedayo esebenzisa iLizwi lakhe iBhayibhile. (2 Timoti 3:16) Sinokulithemba iLizwi lakhe kuba sidalwe nguye ibe uyayazi eyona nto isenza sonwabe.

SINOKUYITHEMBA IBHAYIBHILE

Sinokuyithemba into ethethwa yiBhayibhile ngekamva kuba izinto eyathi ziza kwenzeka ngoku nendlela abantu abaza kuziphatha ngayo, yayithetha kwiminyaka eyi-2000 eyadlulayo ibe siyazibona zisenzeka ngoku.

INTO IBHAYIBHILE EYATHI IZA KWENZEKA

“Iintlanga ziza kulwa nezinye iintlanga, amazwe alwe namanye amazwe. Kuza kubakho iinyikima ezinkulu, kubekho indlala nezifo ezingubhubhani kwiindawo ngeendawo.”—LUKA 21:10, 11.

INDLELA IBHAYIBHILE EYATHI ABANTU BAZA KUZIPHATHA NGAYO

“Ngemihla yokugqibela kuza kufika amaxesha ekunzima ukuwanyamezela. Kuba abantu baza kuthanda iziqu zabo, bathande imali, baqhayise, baziphakamise, bathethe kakubi ngoThixo nangabantu, bangathobeli bazali, bangabi nambulelo, bangathembeki, bangabi naluthando, babe nenkani, bangcolise amagama abantu, bangakwazi kuzibamba, babe ziindlobongela, bangazithandi izinto ezilungileyo, bajikele abahlobo babo, bangafuni kumamela mntu, bakhukhumale likratshi, bathande ulonwabo kunokuba bathande uThixo.”—2 TIMOTI 3:1-4.

Inokwenzeka njani into yokuba iBhayibhile ichaze izinto eziza kwenzeka zize zenzeke ngendlela ebithe ziza kwenzeka ngayo? Siqinisekile ukuba uyavumelana noLeung waseHong Kong othi: “Iziprofeto zeBhayibhile zabhalwa kudala. Ayinakwenzeka into yokuba umntu achaze into eza kwenzeka ize yenzeke ngobunjalo bayo. Nyhani, iBhayibhile isuka kumntu onobulumko ngaphezu kwethu.”

Zininzi kakhulu izinto iBhayibhile eyathi ziza kwenzeka ezenzeka nyhani.b Ezi zinto zibonisa ukuba nyhani iBhayibhile liLizwi likaThixo. Uthi uYehova: “NdinguThixo ibe akekho ofana nam.” “NdinguLowo uchaza umphumo wezinto zingekenzeki.” (Isaya 46:9, 10) Unesizathu esihle sokuyithemba into ethethwa yiBhayibile ngekamva.

AMACEBISO ANOKUSINCEDA NGOKU NANGONAPHAKADE

Uza kuncedakala xa usebenzisa amacebiso aseBhayibhileni. Khawucinge ngale mizekelo.

UKUJONGA IMALI NOMSEBENZI NGENDLELA EFANELEKILEYO

“Kubhetele ukuphumla kancinci kunokuziqoba ngomsebenzi onzima nokuleqana nomoya.”—INTSHUMAYELI 4:6.

INDLELA YOKUBA NENTSAPHO EYONWABILEYO

“Ngamnye wenu makamthande umfazi wakhe, kanye njengokuba ezithanda; kwelinye icala, umfazi umele amhloniphe kakhulu umyeni wakhe.”—EFESE 5:33.

INDLELA YOKUPHATHA ABANYE

“Wuyeke umsindo, uyilahle nengqumbo; sukucaphuka uze wenze izinto ezimbi.”—INDUMISO 37:8.

Ukusebenzisa izinto esizifundiswa yiBhayibhile kuza kusinceda sonwabe ngoku nakwixesha elizayo. EBhayibhileni uThixo usithembisa ukuba siza kuphila kamnandi kwixesha elizayo, kuza kubakho

UXOLO NOKHUSELEKO

“Baza kuphila kamnandi kukho uxolo oluninzi.”—INDUMISO 37:11.

IZINDLU NOKUTYA KOMNTU WONKE

“Baza kwakha izindlu, bahlale kuzo, batyale amasimi eediliya, batye iziqhamo zawo.”—ISAYA 65:21.

UBOMI OBUNGENAZIGULO NOKUFA

“Kungabi sabakho kufa, kungabi sabakho kuzila nakukhala nantlungu.”—ISITYHILELO 21:4.

Yintoni ekufuneka uyenze ukuze uqiniseke ukuba uza kubakhona xa kusenzeka ezi zinto? Yiva ukuba lithini inqaku elilandelayo.

a Ukuze ufunde okungakumbi ngokuguqulelwa nokusasazwa kweBhayibhile, yiya ku www.pr2711.com/xh uze ujonge phantsi kwendawo ethi OKO KUFUNDISWA YIBHAYIBHILE > IMBALI NEBHAYIBHILE.

b Ukuze ufunde okungakumbi jonga incwadi yesiNgesi eyakhutshwa ngamaNgqina kaYehova ethi The Bible—God’s Word or Man’s? kwisahluko 9. Iyafumaneka kwi-intanethi ku www.pr2711.com. Jonga kwindawo ethi LIBRARY > BOOKS & BROCHURES.