Hlala Uzilumkele Izinto Ezinokukulinga

1-2. (a) Wathini uYesu xa wayelumkisa abafundi bakhe? (b) Kwakutheni ukuze abafundi bamshiye uYesu? (Jonga nemifanekiso.)

“NDIYAQONDA kona ukuba intliziyo iyafuna ukwenza okulungileyo, kodwa wona umzimba ubuthathaka.”a (Mat. 26:41b) Xa uYesu wayethetha la mazwi, wayebonisa ukuba uyaqonda ukuba sinesono, futhi siza kuzenza iimpazamo. Kwangaxeshanye wayesilumkisa ukuba singazithembi kakhulu. Kwiiyure ezimbalwa ngaphambi kokuba athethe la mazwi, abafundi bakhe bamqinisekisa ukuba soze bayishiye iNkosi yabo. (Mat. 26:35) Babefuna ukwenza into elungileyo. Kodwa zange baqonde ukuba xa kunzima kwakungazukuba lula ukuyenza loo nto. Yiloo nto uYesu wabalumkisa wathi: “Hlalani nithe qwa, ningayeki ukuthandaza, ukuze ninganikezeli xa nilingwa.”​—Mat. 26:41a.

² Okubuhlungu kukuba abafundi bakaYesu zange bahlale bethe qwa. Xa wayebanjwa ngaba baba kunye naye, okanye banikezela esilingweni, babaleka? Ngenxa yokuba bengazange bahlale bethe qwa, benza kanye le nto babethe abasoze bayenze, bamshiya uYesu.​—Mat. 26:56.

3. (a) Ukuze sihlale sinyanisekile kuYehova, kutheni kufuneka sikuphephe ukucinga ukuba soze sone? (b) Ziintoni esiza kuthetha ngazo kweli nqaku?

³ Masingacingi ukuba thina soze sone. Ewe kona, asizimiselanga ukwenza nantoni na eza kumcaphukisa uYehova. Sekunjalo, sinesono, ngoko kunokuba lula ukunqwenela ukwenza into engalunganga. (Roma 5:12; 7:​21-23) Singaqondanga, sinokuzibona sesinqwenela ukwenza into erongo. Ukuze sihlale sinyanisekile kuYehova nakuNyana wakhe, kufuneka senze into uYesu awathi masiyenze, sihlale silumkile, singalingelwa ekwenzeni isono. Eli nqaku linokusinceda. Okokuqala, siza kuva ukuba zeziphi izinto esimele sizilumkele kakhulu. Emva koko, siza kuva ukuba sinokuzikhusela njani esilingweni. Ekugqibeleni, siza kufunda ukuba sinokwenza ntoni ukuze sihlale silumkile.

EZONA ZINTO SIMELE SIZILUMKELE

4-5. Kutheni sifanele sihlale silumkele nokwenza izono ezibonakala zincinci?

⁴ Masingazideleli izono ezibonakala ngathi zincinci, kuba nazo zinokusenza siyeke ukuba ngabahlobo bakaYehova. Nazo zinokusibangela senze izono ezinzulu.

⁵ Sonke siza kulingelwa ekwenzeni into embi. Sekunjalo, mntu ngamnye unento angomelelanga kuyo. Isenokuba kukwenza isono esinzulu, ukwenza ezinye izinto ezingcolileyo okanye ukucinga njengeli hlabathi. Ngokomzekelo, omnye umntu usenokuba ulwa nokuziphatha kakubi ngesondo. Omnye usenokuba ulwa nokufuna ukwenza izinto ezingcolileyo ezinjengokuphulula amalungu esondo okanye ukubukela iphonografi. Kanti omnye usenokuba ulwa nokoyika abantu, ikratshi, ukukhawuleza abe nomsindo okanye enye into. Kunjengokuba uYakobi esitsho, “umntu ulingwa ngokutsalwa nangokubanjiswa ngumnqweno wakhe.”​—Yak. 1:14.

6. Yintoni esimele singaziqhathi ngayo?

⁶ Uyazazi ezona zinto ungomelelanga kuzo? Akuzukusinceda nganto ukwenza ngathi asiziboni izinto esingomelelanga kuzo, okanye ukuzixelela ukuba thina somelele, soze sone. (1 Yoh. 1:8) NoPawulos uthi nkqu nabo ‘bakhokelwa ngumoya,’ ukuba abalumkanga banokunikezela esilingweni. (Gal. 6:1) Simele singaziqhathi, sivume ukuba zikhona izinto esingomelelanga kuzo.​—2 Kor. 13:5.

7. Zeziphi ezona zinto simele sizigade? Yenza umzekelo.

⁷ Emva kokuba sizibonile izinto esilingeka lula zizo, yintoni esifanele siyenze? Sifanele sisebenze nzima ukuze sikwazi ukuxhathisa. Ngokomzekelo, ngamaxesha okubhalwa kweBhayibhile, eyona ndawo yayingomelelanga kwiindonga zesixeko yayiziigeyithi. Ngoko kwakusibakho oonogada abaninzi kuzo. Ngendlela efanayo, izinto esaziyo ukuba silingeka lula zizo kufuneka ibe zezona sizigadayo.​—1 Kor. 9:27.

SINOKUZILUMKELA NJANI?

8-9. Yintoni awayenokuyenza umfana ekuthethwa ngaye kwiMizekeliso isahluko 7 ukuze aphephe ukwenza isono esinzulu? (IMizekeliso 7:​8, 9, 13, 14, 21)

⁸ Singazilumkela njani? Makhe sive into esinokuyifunda kumfana ekuthethwa ngaye kwiMizekeliso isahluko 7. Waziphatha kakubi ngesondo nebhinqa eliziphethe kakubi. Kwivesi 22 sixelelwa ukuba lo mfana walilandela “ngoko nangoko.” Kodwa kwiivesi ezingaphambi kwale kuboniswa ukuba ngaphambi kokuba alilandele, zininzi izinto awazenzayo ezamenza wade wona.

⁹ Ziintoni awazenzayo ngaphambi kokuba enze isono esinzulu? Okokuqala, wahamba ngorhatya “ngesitrato esikufutshane nekona yendlu yaloo [mfazi wayeziphethe kakubi].” Emva koko wahamba ngendlela eya kwindlu yeli bhinqa. (Funda iMizekeliso 7:​8, 9.) Xa walibonayo, endaweni yokuba ajike, wavuma ukuba limphuze, walimamela xa lalithetha ngemibingelelo yobuhlobo elanikela ngayo. Mhlawumbi lalifuna acinge ukuba lingumntu olungileyo. (Funda iMizekeliso 7:​13, 14, 21.) Lo mfana ngewayelumkile, akasenza isono esinzulu, ukuba wayeziphephile izinto ezenzeka ngaphambi kokuba one.

10. Namhlanje umKristu unokuyenza njani impazamo efana neyenziwa ngumfana ekuthethwa ngaye kwiMizekeliso?

¹⁰ Into eyenzeka kumfana ekuthethwa ngaye kwiMizekeliso isahluko 7 ibonisa into enokwenzeka kuye nawuphi na umkhonzi kaYehova. Usenokwenza isono esinzulu aze acinge ukuba yonke into yenzeke ngequbuliso. Usenokude athi, “Ndiyibone seyisenzeka.” Kodwa xa ecinga ngento eyenzekileyo, usenokubona ukuba ngaphambi kokuba enze isono esinzulu, uye wenza izigqibo ezingafanelekanga. Mhlawumbi ube nabahlobo abangamthandiyo uYehova, ezinye iindlela ebezonwabisa ngazo, iiwebhsayithi ebengena kuzo okanye iindawo ebesiya kuzo bezingawafanelanga amaKristu. Mhlawumbi uye wayeka ukuthandaza, ukufunda iBhayibhile, ukuya kwiintlanganiso nasentsimini. Njengomfana ekuthethwe ngaye kwiMizekeliso, kusenokwenzeka ukuba isono asenzileyo asiyonto esuke yenzeka “ngoko nangoko.”

11. Sinokukuphepha njani ukwenza isono?

¹¹ Yintoni esiyifundayo? Masingalumkeli ukwenza isono nje kuphela, masilumkele nezinto ezinokusenza sone. Yiloo nto kanye awayicacisayo uSolomon emva kokuba esibalisele ngomfana nomfazi owayeziphethe kakubi. Xa ethetha ngalo mfazi uthi: “Ningabhaduleli ngasezindleleni zakhe.” (IMize. 7:25) Uphinda athi: “Hambela kude kuye, ungasondeli nakumnyango wendlu yakhe.” (IMize. 5:​3, 8) Indlela esinokuzikhusela ngayo ekwenzeni isono esinzulu kukuphepha izinto ezinokusenza sone.b Loo nto isenokufuna siziphephe izinto esaziyo ukuba zisenokusilinga nangona zingekho rongo kumaKristu.​—Mat. 5:​29, 30.

12. Yintoni awazixelela yona uYobhi? Ukubambelela kuloo nto kwakuza kumnceda njani? (Yobhi 31:1)

¹² Ukuze siziphephe izinto ezinokusenza sone, kufuneka sizixelele ukuba siza kulumka. Wenza loo nto noYobhi. ‘Wenza isivumelwano namehlo akhe’ sokuba akasoze ancwase amanye amabhinqa. (Funda uYobhi 31:1.) Ukubambelela kweso sigqibo kwakuza kumnceda angaze akrexeze. Nathi sinokuzixelela ukuba siza kuphepha nantoni na enokusilinga.

13. Kutheni simele sizilumkele izinto esizicingayo? (Jonga nemifanekiso.)

¹³ Simele silumkele nezinto esizicingayo. (Eks. 20:17) Abanye bacinga ukuba akukho rongo ukuba nombono wakho usenza izinto ezingafanelekanga, ukuba nje awuzukuzenza. Kodwa bayaphazama. Umntu ohlala ecinga ngento erongo, uza kuya ekufuna nyhani ukuyenza. Ngokungathi kunjalo, uzakhela isilingo ekuza kufuneka asebenze nzima ukuze asixhathise. Ewe kona, ngamanye amaxesha siza kuzicinga izinto ezirongo. Xa zifika ezingqondweni zethu, eyona nto iza kusinceda kukuba sizikhuphe ngoko nangoko, size sicinge izinto ezilungileyo. Loo nto iza kusikhusela singenzi isono esinzulu, kuba asivumeli iingcinga ezingafanelekanga zisenze sibe neminqweno ekuza kuba nzima ukulwisana nayo.​—Fil. 4:8; Kol. 3:2; Yak. 1:​13-15.

14. Yeyiphi enye into enokusinceda sizilumkele izilingo?

¹⁴ Yeyiphi enye into esinokuyenza ukuze sizilumkele izilingo? Kufuneka siqiniseke nyhani ukuba ukuthobela imithetho kaYehova kuza kusoloko kusinceda. Ngamanye amaxesha kusenokuba nzima ukucinga nokunqwenela ukwenza izinto ezithandwa nguThixo. Kodwa xa sizama ngamandla ukuzenza ezi zinto, siza konwaba nyhani.

15. Ukusebenzela ukunqwenela ukwenza izinto ezithandwa nguThixo kunokusinceda njani?

¹⁵ Kufuneka sisebenzele ukunqwenela ukwenza izinto ezithandwa nguThixo. Ukuba sifunda ‘ukukucaphukela okubi, sithande okulungileyo,’ siza kuzimisela kakhulu ukwenza izinto ezilungileyo, siziphephe ezinokusenza sone. (Amosi 5:15) Xa sinqwenela ukwenza izinto ezithandwa nguThixo, siza kukwazi ukuxhathisa xa kusenzeka sizibone sesikwimeko enokusenza sone.

16. Ukuxakeka zizinto ezisenza siye simthanda uYehova kunokusinceda njani sihlale sizilumkele? (Jonga nemifanekiso.)

¹⁶ Yintoni esinokuyenza ukuze sinqwenele ukwenza izinto ezithandwa nguThixo? Simele sihlale sixakeke zizinto ezisenza siye simthanda uYehova. Xa sikwiintlanganiso okanye entsimini, akubi lula ukuba silingeke. Siye sikufune kakhulu ukuvuyisa uYehova. (Mat. 28:​19, 20; Heb. 10:​24, 25) Ukufunda iLizwi LikaThixo nokucingisisa ngalo kusenza sikuthande kakhulu ukwenza izinto ezilungileyo size sikucaphukele kakhulu ukwenza ezimbi. (Yosh. 1:8; INdu. 1:​2, 3; 119:​97, 101) Khumbula kaloku, uYesu wathi kubafundi bakhe: “Ningayeki ukuthandaza, ukuze ninganikezeli xa nilingwa.” (Mat. 26:41) Xa sithandaza kuTata wethu osezulwini, simnika ithuba lokusinceda, ize loo nto isenze sizimisele kakhulu ukwenza izinto azithandayo.​—Yak. 4:8.

HLALA ULUMKILE

17. Yeyiphi ingxaki awayejijisana nayo uPetros?

¹⁷ Mhlawumbi sinokuzoyisa ngokupheleleyo ezinye izinto esingomelelanga kuzo. Kanti ezinye kusenokufuneka sijijisane nazo ixesha elide. Khawucinge ngento eyenzeka kumpostile uPetros. Ngenxa yokoyika abantu, wamphika kathathu uYesu. (Mat. 26:​69-75) Xa wayeshumayela enesibindi phambi kweNkundla Ephakamileyo YamaYuda, kwakubonakala ngathi uyekile ukoyika abantu. (IZe. 5:​27-29) Kodwa emva kweminyaka wakhe wayeka ukutya namaKristu angengomaYuda “kuba esoyika abo bolukileyo.” (Gal. 2:​11, 12) Waphinda woyika abantu. Mhlawumbi wayengekayoyisi ncam le ngxaki.

18. Yintoni ekusenokufuneka siphinde siyenze?

¹⁸ Nathi sinokuzibona sikwimeko efanayo nekaPetros. Njani? Kusenokufuneka siphinde silwe nento erongo ebesicinga ukuba sayoyisa. Ngokomzekelo, omnye umzalwana uthi: “Ndandineminyaka eyi-10 ndiyekile ukubukela iphonografi, ndade ndacinga ukuba ndiyoyisile le ngxaki. Kodwa ndandingekayoyisi ncam kuba ngamanye amaxesha ndandikhe ndifune ukuyibukela.” Okuvuyisayo kukuba zange anikezele. Waqonda ukuba kwakuza kufuneka ajijisane nayo yonke imihla, mhlawumbi ubomi bakhe bonke. Ngoku ulumke kakhulu, kangangokuba udlalela kude nephonografi, encedwa yinkosikazi yakhe nangabadala.

19. Yintoni esinokuyenza xa kukho into erongo esingekayoyisi ngokupheleleyo?

¹⁹ Yintoni esinokuyenza ukuze into erongo esingekayoyisi ngokupheleleyo ingasenzi sone? Kukwenza into esayixelelwa nguYesu esithi: “Hlalani nithe qwa.” Naxa ucinga ukuba womelele, hlala uzilumkela izinto ezinokukufaka esilingweni. (1 Kor. 10:12) Qhubeka usenza eza zinto zikuncede wakwazi ukulwa nengxaki onayo. IMizekeliso 28:14 ithi: “Uyavuya umntu ohlala ethe qwa.”​—2 Pet. 3:14.

SIZA KUNCEDAKALA NJANI?

20-21. (a) Kuza kusinceda njani ukuhlala sizilumkele izinto ezinokusilinga? (b) Ukuba asisonganga zandla yintoni aza kusenzela yona uYehova? (2 Korinte 4:7)

²⁰ Sinokuqiniseka ukuba soze sizisole ngenxa yokuba siye sahlala silumkile, asanikezela esilingweni. Ukwenza isono kunokusenza sonwabe nje “okwexeshana,” kodwa ukuthobela imithetho kaYehova kusenza sihlale sonwabile. (Heb. 11:25; INdu. 19:8) Loo nto yenziwa kukuba sadalelwa ukuphila ngemithetho kaThixo. (Gen. 1:27) Ukuba siphila ngendlela efunwa nguThixo, asizukuba nasazela santo, futhi kwixesha elizayo siza kuphila ngonaphakade.​—1 Tim. 6:12; 2 Tim. 1:3; Yude 20, 21.

²¹ Yinyaniso kona ukuba “umzimba ubuthathaka.” Kodwa loo nto ayithethi kuthi akukho nto sinokuyenza. UYehova ukulungele ukusinika amandla esiwadingayo. (Funda ama-2 Korinte 4:7.) Kodwa amandla asinika wona ngamandla angaqhelekanga. Nathi ke kufuneka sisebenzise amandla ethu ukuze sikwazi ukulwisana nezilingo. Ngoko ukuba asisonganga zandla, sinokuqiniseka ukuba uYehova uza kusiphendula xa simcela asiphe amandla esiwadingayo. (1 Kor. 10:13) Ngoncedo lukaYehova, sinokuhlala sizilumkele izinto ezinokusilinga.