Banokuncedwa Njani Abo Basusiweyo Ebandleni?

1-2. (a) UYehova uziva njani ngabantu abenza isono ngabom baze bangafuni ukuguquka? (b) UYehova angathanda benze ntoni abantu abenze isono?

UYEHOVA akavumeli abantu ukuba baziphathe nanjani na. Uyasicaphukela isono. (INdu. 5:​4-6) Ulindele ukuba siyithobele imithetho asibekele yona kwiLizwi lakhe. Ewe kona, akalindelanga ukuba abantu abanesono bangaphazami. (INdu. 130:​3, 4) Sekunjalo, akabanyamezeli abantu ‘abangamhloniphiyo, abajika ububele bakhe bube yinto abakuthethelela ngayo ukuziphatha kwabo ngokungenazintloni.’ (Yuda 4) IBhayibhile ithi “abangamthobeliyo uThixo” baza kutshatyalaliswa kwimfazwe yakhe yeArmagedon.​—2 Pet. 3:7; ISityhi. 16:16.

² Sekunjalo, uYehova akafuni kutshabalale nokuba ngumntu omnye. Njengoko sesifundile kumanqaku akule Mboniselo, iBhayibhile ithi uThixo “angathanda ukuba wonke umntu aguquke.” (2 Pet. 3:9) Abadala baye babe nomonde njengoYehova njengoko bezama ukunceda abantu abonileyo baguquke baze baphinde babe ngabahlobo bakhe. Kodwa abanye abantu baye bangalwamkeli olo ncedo. (Isa. 6:9) Abanye baye baqhubeke besona nangona abadala bezame kaninzi ukubanceda baguquke. Xa kunjalo, yintoni emele yenziwe ngabadala?

“MSUSENI LOO MENZI-BUBI”

3. (a) IBhayibhile ithi abadala bamele benze ntoni kumntu owenze isono aze angafuni ukuguquka? (b) Kutheni sinokuthi umntu ongakhange afune ukuguquka uzikhethele ngokwakhe ukususwa ebandleni?

³ Xa umntu owenze isono engaguquki, kuye kunyanzeleke ukuba abadala bathobele umyalelo okuma-1 Korinte 5:13 othi: “Msuseni loo menzi-bubi phakathi kwenu.” Ekubeni loo mntu ebesazi ukuba kuza kwenzeka ntoni kuye ukuba akaguquki, kuyafana nokuba uzikhethele ngokwakhe ukususwa ebandleni, uvuna into etyalwe nguye. (Gal. 6:7) Kutheni sisitsho? Kaloku nangona abadala bezame kaninzi ukumnceda aguquke, khange avume. (2 Kum. 17:​12-15) Izinto azenzileyo zibonisa ukuba akafuni ukuthobela imithetho kaYehova.​—Dut. 30:​19, 20.

4. Kutheni kuye kwenziwe isaziso xa umntu ongafunanga ukuguquka esusiwe ebandleni?

⁴ Xa umntu ongakhange aguquke esuswa ebandleni, liye laziswe ukuba akaselilo iNgqina LikaYehova.a Eso saziso asenzelwa ukumhlaza. Senzelwa ukunceda abazalwana noodade bathobele umyalelo okwiZibhalo othi ‘mabangahlobani naloo mntu, bangatyi kwaukutya naye.’ (1 Kor. 5:​9-11) Kukho isizathu esivakalayo sokuba kubekho lo myalelo. Kaloku umpostile uPawulos wathi: “Igwele elincinci liyibilisa yonke intlama.” (1 Kor. 5:6) Xa umntu ongaguqukiyo engasuswa ebandleni, abanye basenokucinga ukuba akukho mfuneko yokuthobela imithetho kaYehova.​—IMize. 13:20; 1 Kor. 15:33.

5. Simele simjonge njani umntu osusiweyo ebandleni, ibe kutheni?

⁵ Simele simjonge njani ke umKristu osusiweyo ebandleni? Nangona singazuchitha ixesha naye, asimncamanga, kodwa simjonga njengemvu elahlekileyo. Kaloku imvu ewushiyileyo umhlambi isenokuphinda ibuyele kuwo. Khumbula nokuba loo mntu wazinikela kuYehova. Okubuhlungu kukuba ngoku usengozini kuba akaphili ngokuvumelana nento awayeyithembise uThixo. (Hez. 18:31) Sekunjalo, lisekho nje ixesha, noYehova esafuna ukumenzela inceba, nathi sihlala sinethemba lokuba ngenye imini uza kubuyela ebandleni. Abadala banokubonisa njani ukuba abamncamanga umntu osusiweyo ebandleni?

ABADALA BABANCEDA NJANI ABO BASUSIWEYO?

6. Ziintoni abaza kuzenza abadala ukuze bancede umntu osusiweyo ebandleni?

⁶ Ngaba umntu osusiweyo ebandleni uyayekwa azibonele ukuba uza kubuyela njani kuYehova? Tu ke khona! Xa ikomiti yabadala ichazela umntu ongafuniyo ukuguquka ukuba uza kususwa ebandleni, iza kumxelela nezinto anokuzenza ukuze abuyiselwe. Kodwa abadala abazukuphelela nje apho. Amaxesha amaninzi baza kumxelela umntu owonileyo ukuba banqwenela ukuphinda badibane naye emva kweenyanga ezimbalwa ukuze babone ukuba akakaguquki na. Ukuba uyavuma, xa abadala bephinda bembona baza kumkhuthaza ukuba aguquke aze abuyele ebandleni. Nokuba nangoko akakaguquki, abadala baza kusoloko bezama ukumbona ukuze bamkhuthaze.

7. Abadala balubonisa njani uvelwano njengoYehova xa benceda umntu osusiweyo ebandleni? (Yeremiya 3:12)

⁷ Abadala baye bazame ukubonisa uvelwano njengoYehova xa benceda umntu osusiweyo ebandleni. Ngokomzekelo, uYehova akazange alinde amaSirayeli ukuba aqale aguquke ngaphambi kokuba azame ukuwanceda. Kodwa nokuba kwakungekabikho nto ibonisa ukuba ayaguquka, wayethumela abaprofeti bakhe ukuba baye kuthetha nawo. Njengoko sifundile kwinqaku lesibini lulo ngcelele, uYehova wabonisa indlela anovelwano ngayo ngokuxelela umprofeti uHoseya ukuba amxolele umfazi wakhe aze abuyelane naye, ngoxa wayengekayeki ukona. (Hos. 3:1; Mal. 3:7) NjengoYehova, abadala bakufuna nyhani ukunceda umntu owonileyo abuyele ebandleni, futhi abayenzi ibe nzima loo nto kuye.​—Funda uYeremiya 3:12.

8. Umzekelo kaYesu wonyana owayelahlekile usinceda njani siyiqonde bhetele indlela uYehova anenceba ngayo? (Luka 15:7)

⁸ Cinga ngomzekelo owenziwa nguYesu wonyana owayelahlekile, ekuthethwe ngawo kwinqaku lesibini lolu ngcelele. Utata wakhe wathi akumbona “wabaleka waya kuye, wamanga waza wamphuza.” (Luka 15:20) Akazange alinde unyana wakhe ibe nguye oqala acele uxolo, kodwa kuba wayemthanda unyana wakhe, yaba nguye obaleka aye kuye. Ekubeni le iyindlela uYehova aziva ngayo ngabantu abaye bamshiya, abadala baye bazame ngandlela zonke ukumlinganisa. Bafuna izimvu zikaThixo ezilahlekileyo zibuyele ekhaya. (Luka 15:​22-24, 32) Kaloku kuye kuvuywe ezulwini nasemhlabeni xa umoni ebuyela ebandleni.​—Funda uLuka 15:7.

9. UYehova ubakhuthaza ukuba benze ntoni abantu abonileyo?

⁹ Ukuza kuthi ga ngoku, sifundile ukuba uYehova akabavumeli abantu abangaguqukiyo ukuba bahlale besebandleni. Sekunjalo, akayeki ukuzama ukubanceda kuba ufuna babuyele kuye. KuHoseya 14:4 ichazwa kanje indlela uYehova aziva ngayo ngabantu abaguqukileyo: “Ndiza kukunyanga ukungathembeki kukaSirayeli. Ndiza kumthanda ngokusuka entliziyweni, kuba ndiyekile ukuba nomsindo.” Ukwazi le nto kwenza abadala baqaphele nantoni na ayenzayo umntu owonileyo, ebonisa ukuba uqalisa ukuguquka. Kumele kubaqinisekise nabo bamshiyileyo uYehova ukuba usabathanda futhi ufuna babuyele kuye.

10-11. Abadala baza kuzama njani ukubanceda abo sele besusiwe ebandleni?

¹⁰ Abadala baza kuzama njani ukubanceda abo sele besusiwe ebandleni, kuquka nabo baneminyaka emininzi besusiwe ebandleni? Aba bantu kusenokwenzeka ukuba basiyeka neso sono sabenza basuswa. Kanti abanye basenokungakhumbuli nokuba babesuselwe ntoni. Nokuba sekulixesha elingakanani bengasekho ebandleni, abadala baza kuzama ukubakhangela baze babatyelele. Xa beyokubabona, abadala basenokude bathandaze nabo baze babakhuthaze ukuba babuyele ebandleni. Kakade ke, umntu oneminyaka emininzi engasekho ebandleni, ukholo lwakhe lumele ukuba alusomelelanga. Ngoko ukuba uthi uyafuna ukubuya, abadala banokumfunela umntu oza kumqhubela isifundo seBhayibhile ngoku angekabuyiselwa. Ngalo lonke ixesha, iza kuba ngabadala abalungiselela ukuba aqhutyelwe isifundo seBhayibhile.

¹¹ Belinganisa indlela uYehova anenceba ngayo, abadala baza kubakhangela bonke abantu abamshiyileyo ukuze babazise ukuba, xa befuna ukubuya, umnyango usavuliwe. Ukuba umntu ubonisa ukuba uguqukile, aze ayiyeke nento engalunganga ebeyenza, usenokubuyiselwa ngokukhawuleza.​—2 Kor. 2:​6-8.

12. (a) Ziintoni ezifuna abadala balumke ngaphambi kokubuyisela umntu? (b) Kutheni singamele sicinge ukuba kukho abantu abangasoze benzelwe inceba nguYehova? (Jonga nombhalo osemazantsi)

¹² Ngamanye amaxesha abadala kufuneka bakulumkele kakhulu ukukhawuleza bambuyisele ebandleni umntu. Ngokomzekelo, ukuba wayesuselwe ukuxhaphaza umntwana, ukuwexuka okanye ukuwuphelisa ngamaqhinga umtshato wakhe, abadala bamele baqiniseke ukuba uguquke nyhani. (Mal. 2:14; 2 Tim. 3:6) Kaloku bamele bakhusele ibandla. Sekunjalo, simele singalibali ukuba uYehova uza kwamkela nawuphi na umntu omonileyo, oguquka nyhani aze asiyeke isono abesenza. Ngoko nakubeni abadala bemele babalumkele abantu abaye benzela abanye amaqhinga, abamele bacinge ukuba kukho abantu abangasoze benzelwe inceba nguYehova.b​—1 Pet. 2:10.

YINTONI ENOKWENZIWA LIBANDLA?

13. Indlela esimphatha ngayo umntu olulekwe yikomiti yabadala yahluka njani kwindlela esimphatha ngayo osusiweyo ebandleni?

¹³ Njengokuba sifundile kwinqaku elidlulileyo, ngamanye amaxesha kuye kwenziwe isaziso sokuba umntu uye walulekwa yikomiti yabadala. Xa kunjalo, sinokuqhubeka sichitha ixesha naye. Kaloku uye waguquka, waza wasiyeka isono abesenza. (1 Tim. 5:20) Usesebandleni futhi uyakudinga ukukhuthazwa ngamanye amaKristu. (Heb. 10:​24, 25) Kodwa wahlukile yena umntu osusiweyo ebandleni. Siyayeka ‘ukuhlobana naye, singatyi kwaukutya nomntu onjalo.’​—1 Kor. 5:11.

14. AmaKristu angazisebenzisa njani izazela zawo eziqeqeshwe yiBhayibhile kwindlela abaphatha ngayo abantu abasusiweyo ebandleni? (Jonga nomfanekiso.)

¹⁴ Ngaba le nto ithetha ukuba asizukumhoya tu umntu osusiweyo ebandleni? Akunjalo. Ewe kona, asizukuchitha ixesha kunye naye. Kodwa umKristu unokusebenzisa isazela sakhe esiqeqeshwe yiBhayibhile xa egqiba ukuba ammeme na kwiintlanganiso umntu osusiweyo ebandleni, mhlawumbi azalana naye okanye awayevana naye. Masithi ke loo mntu uyeza kwiintlanganiso. Ngaphambili besingasoze simbulise. Kodwa ngoku umKristu umele asebenzise isazela sakhe esiqeqeshwe yiBhayibhile. Abanye basenokuziva bekhululekile ukumbulisa okanye ukumamkela lo mntu kwiintlanganiso. Kodwa asizukuyitsala incoko okanye sichithe ixesha kunye naye.

15. Ku-2 Yohane 9-11 kuthethwa ngabantu abanjani? (Jonga nebhokisi ethi “Ngaba UYohane NoPawulos Babethetha Ngohlobo Olufanayo Lwesono?”)

¹⁵ Abanye basenokuzibuza, ‘Kanti iBhayibhile ayitsho na ukuba umKristu obulisa umntu onjalo uyazixhasa izinto ezimbi azenzayo?’ (Funda u-2 Yohane 9-11.) Kwesi sibhalo kuthethwa ngabawexuki nabantu abakhuthaza abanye ukuba benze izinto ezimbi. (ISityhi. 2:20) Ngoko ukuba umntu waziwa ngokusasaza iimfundiso zobuxoki okanye ngokukhuthaza abanye ukuba benze izinto ezimbi, abadala abazukulungiselela ukumtyelela. Kakade ke, lisekhona ithemba lokuba angabuyela ezingqondweni. Kodwa ukuba ayikenzeki loo nto, asizukumbulisa, futhi asizukummema ukuba eze kwiintlanganiso.

UKULINGANISA INDLELA UYEHOVA ANENCEBA NGAYO

16-17. (a) UYehova ufuna benze ntoni abantu abamonileyo? (Hezekile 18:32) (b) Abadala banokubonisa njani ukuba basebenza noYehova xa bezama ukunceda abantu abonileyo?

¹⁶ Yintoni esiyifundileyo kula manqaku ayi-5 ale Mboniselo? UYehova akafuni kutshabalale nomnye umntu. (Funda uHezekile 18:32.) Ufuna abantu abenze isono babe seluxolweni naye. (2 Kor. 5:20) Yiloo nto uYehova ebesoloko ekhuthaza abakhonzi bakhe ukuba baguquke, baze babuyele kuye. Abadala banenyhweba yokusebenza noYehova njengoko bezama ukunceda abantu abamonileyo ukuba baguquke.​—Roma 2:4; 1 Kor. 3:9.

¹⁷ Khawube nombono wendlela ekuvuywa ngayo ezulwini xa abantu abenze izono beguquka! Qho kukho imvu ebilahlekile ebuyela ebandleni, uTata wethu uYehova, uye avuye kakhulu. Njengoko sicingisisa ngenceba nobubele bakhe, siya simthanda uYehova.​—Luka 1:78.