AmaNgqina KaYehova Abaphatha Njani Abantu Ababekade Bekhonza Nawo?

Sisoloko sizama ukuphatha wonke umntu ngothando, ububele, nentlonipho. Xa omnye wamaNgqina kaYehova etyhafile okanye eyekile ukukhonza, siye sizame ukuthetha naye, simqinisekise ukuba siyamthanda size sizame ukumkhuthaza ukuba aphinde akhonze kunye nathi.—Luka 15:4-7.

Ngamanye amaxesha, izinto umntu azenzayo zinokumenza asuswe ebandleni. (1 Korinte 5:13) Kodwa kuba sibathanda kakhulu abantu esikhonza nabo, siye sizame ukumnceda loo mntu ukuze angade asuswe. Naxa eye wasuswa, iBhayibhile isikhuthaza ukuba siqhubeke simbonisa uthando size simhloniphe.—Marko 12:31; 1 Petros 2:17.

Yintoni eyenza umntu asuswe ebandleni?

IBhayibhile ichaza ngokucacileyo ukuba xa umKristu esenza isono esinzulu aze angafuni ukuguquka, umele asuswe ebandleni.a (1 Korinte 5:11-13) IBhayibhile iyasichazela ukuba zeziphi izono ezinzulu ezinokwenza umntu asuswe. Ngokomzekelo, ibala abantu abalala nabantu abangatshatanga nabo, amanxila, ababulali, abantu ababetha abantu beentsapho zabo bebaphatha kakubi, namasela.—1 Korinte 6:9, 10; Galati 5:19-21; 1 Timoti 1:9, 10.

Kodwa, asivele sikhawuleze simsuse njee umntu owenze isono esinzulu ebandleni. Abadala bebandlab baye baqale bazame ukumnceda aguquke. (Roma 2:4) Baye bazame ukuthetha naye ngomoya omhle, bezolile ibe benobubele. (Galati 6:1) Ukwenza ngolo hlobo kunokunceda umntu owenze isono abone iimpazamo zakhe aze aguquke. (2 Timoti 2:24-26) Ukuba naxa kuzanywe kaninzi ukumnceda akaguquki, kodwa uqhubeka esenza izinto ezingavumelaniyo nemigaqo yeBhayibhile yokuziphatha, umele asuswe ebandleni. Abadala baye benze isaziso ebandleni sokuba loo mntu akaselilo iNgqina likaYehova.

Kunceda ngantoni ukususa umntu ozimisele ukuqhubeka esona? Okokuqala, ibandla lenza into efunwa nguThixo lokuba lizigcine licocekile ibe likhuselekile kumntu owenza izinto ezirongo. (1 Korinte 5:6; 15:33; 1 Petros 1:16) Enye into, umntu owenza izinto ezimbi usenokuyeka ukwenza isono aze azimisele ukutshintsha.—Hebhere 12:11.

AmaNgqina kaYehova abaphatha njani abantu abasusiweyo ebandleni?

IBhayibhile ithi amaKristu ‘mawayeke ukuhlobana’ nomntu osusiweyo ebandleni, angatyi “kwaukutya nomntu onjalo.” (1 Korinte 5:11) Ngenxa yaloo nto, asichithi xesha kunye nomntu osusiweyo. Kodwa loo nto ayithethi ukuba sivele senze ngathi akekho. Simphatha ngembeko. Wamkelekile ukuba aye kwiintlanganiso zethu, ibe xa elapho usenokubuliswa ngamaNgqina kaYehova.c Usenokucela uncedo kubadala ukuze akwazi ukubuyiselwa ebandleni.

Kwenzeka ntoni kumntu osusiweyo ebandleni kodwa umntu atshate naye nabantwana bakhe abasebatsha besengamaNgqina kaYehova? Nangona engasakhonzi uYehova kunye nabo, baseyintsapho yakhe. Kuba behlala endlini enye, ubuhlobo bakhe nomfazi wakhe kunye nabantwana abupheli ibe bamele babonisane uthando.

Umntu osusiweyo usenokucela abadala ukuba bayokumbona, ibe xa beye kuye, baza kumlungisa ngothando besebenzisa iZibhalo, baze bamkhuthaze ukuba aguquke aze abuyele kuThixo. (Zekariya 1:3) Ukuba uyayeka ukwenza into erongo, abonise ukuba ukufuna nyhani ukuphila ngemigaqo yeBhayibhile yokuziphatha, angabuyiselwa ebandleni. Ibandla liza kwenza njengokuba amaKristu aseKorinte ayesenza xa kukho umoni oguqukileyo, ‘limxolele lize limthuthuzele.’—2 Korinte 2:6-8.

Baziva njani abo babekhe basuswa ngaphambili?

Jonga izinto ezithethwa ngamanye amaNgqina kaYehova awayesusiwe ebandleni aza abuyela kuThixo.

“Xa ndandibuyela ebandleni, ndandicinga ukuba abadala baza kufuna ukwazi yonke into endandiyenzile kwiminyaka emininzi endandisuswe ngayo. Endaweni yaloo nto bathi, ‘Eyona nto sifuna ucinge ngayo yinto oza kuyenza ngoku.’ Emva koko, kwathi xibilili.”—UMaria, eUnited States.

“Ibandla lalivuya kakhulu xa ndandibuyiselwa. Ndaziva ndithandwa. Abazalwana noodade bandinceda ndabona ukuba ndixolelwe nguYehova kunye nabo, ndaza ndayeka ukutyiwa sisazela. Abadala babesoloko bendinceda ukuze ndiqinise ubuhlobo bam noYehova. Bandithuthuzela baza bandinceda ndabona ukuba uYehova wayendixabisa ibe usandithanda.”—UMalcom, eSierra Leone.

“Kuyandivuyisa ukwazi ukuba uYehova ubathanda kakhulu abantu bakhe kangangokuba uyaqiniseka ukuba intlangano yakhe icocekile kwindlela yokuziphatha. Nangona kusenokubonakala ngathi akuyonto intle ukususwa, yeyona nto ibonisa uthando nefanelekileyo. Kuyandivuyisa ukuba noTata osezulwini onothando noxolelayo.”—USandi, eUnited States.