Qhubeka Uhamba Ngokholo

1. Yintoni eyayisenza umpostile uPawulos avuye xa ecinga ngobomi abuphilileyo?

UMPOSTILE UPAWULOS wayesazi ukuba sele eza kubulawa, kodwa wayevuya kakhulu xa ecinga ngobomi abuphilileyo. Xa ecinga ngabo wakwazi ukuthi: “Ugqatso ndilubaleke kwada kwasekugqibeleni, ndiye ndalugcina lomelele ukholo lwam.” (2 Tim. 4:​6-8) Wenza isigqibo esasibonisa ukuba ulumkile ngokuphilela ukusebenzela uYehova, futhi wayeqinisekile ukuba uYehova uyavuyiswa nguye. Nathi sifuna ukwenza izigqibo ezibonisa ukuba silumkile size sivuyise uThixo. Singayenza njani loo nto?

2. Kuthetha ukuthini ukuhamba ngokholo?

² Xa wayethetha ngaye nangamanye amaKristu athembekileyo uPawulos wathi: “Sihamba ngokholo, kungekhona ngokubona.” (2 Kor. 5:7) Wayethetha ukuthini? Ngamanye amaxesha eBhayibhileni igama elithi ‘ukuhamba’ lithetha indlela umntu abuphila ngayo ubomi bakhe. Umntu ohamba ngokubona uxhomekeka kwinto ayibonayo, ayivayo, nakwindlela aziva ngayo xa esenza izigqibo. Kanti yena umntu ohamba ngokholo uxhomekeka kwindlela amthembe ngayo uYehova uThixo. Izinto azenzayo zibonisa ukuba uqinisekile ukuba uThixo uza kumsikelela, nokuba kuza kumnceda ukwenza izinto amcebisa zona kwiLizwi Lakhe.​—INdu. 119:66; Heb. 11:6.

3. Kunceda ngantoni ukuhamba ngokholo? (2 Korinte 4:18)

³ Kaloku sonke xa sisenza izigqibo sikhe sixhomekeke kwinto esiyibonayo, esiyivayo nendlela esiziva ngayo. Kodwa xa sisenza izigqibo ezibalulekileyo sisenokuba nengxaki ukuba sixhomekeka kuphela kwinto esiyibonayo okanye esiyivayo. Kutheni sisitsho? Kungenxa yokuba izinto esizibonayo nesizivayo azisoloko ziyinyani. Nokuba zingayinyani, ukuba sihamba ngokubona sisenokungayihoyi imithetho kaThixo. (INtshu. 11:9; Mat. 24:​37-39) Kodwa xa sihamba ngokholo siza kwenza izigqibo ‘ezifunwa yiNkosi.’ (Efe. 5:10) Ukwenza izinto esizicetyiswe nguThixo kuza kusenza sizole size sonwabe. (INdu. 16:​8, 9; Isa. 48:​17, 18) Ukuba siqhubeka sihamba ngokholo, siza kuphila ngonaphakade kwixesha elizayo.​—Funda 2 Korinte 4:18.

4. Umntu unokuzibona njani ukuba uhamba ngokholo okanye ngokubona?

⁴ Siza kuzibona njani ukuba sihamba ngokholo okanye ngokubona? Kwindlela esiyiphendula ngayo le mibuzo: Zixhomekeke entwenini izigqibo esizenzayo? Ngaba zixhomekeke kwizinto esizibonayo kuphela? Okanye kwindlela esimthembe ngayo uYehova nakwizinto asicebisa zona? Makhe sibone ukuba yintoni esinokuyenza ukuze siqhubeke sihamba ngokholo kwezi zinto zintathu zibalulekileyo: xa sikhetha umsebenzi, umntu esifuna ukutshata naye, naxa sifumana imiyalelo esuka kwintlangano. Kwinto nganye kwezi, siza kuthetha ngezinto esifanele sicinge ngazo ukuze senze izigqibo ezifanelekileyo.

XA UKHETHA UMSEBENZI

5. Yintoni esifanele siyijonge xa sikhetha umsebenzi?

⁵ Sonke sifuna ukukwazi ukufumana izinto esizidingayo, nezidingwa ziintsapho zethu. (INtshu. 7:12; 1 Tim. 5:8) Eminye imisebenzi ibhatala kakhulu. Inokwenza umntu osebenzayo akwazi ukufumana imali eyaneleyo yezinto ezidingwa yintsapho yakhe, ibekhona nayibekayo. Kanti eminye ibhatala nje imali eyanele izinto ezibalulekileyo ezidingwa yintsapho, njengokutya nempahla. Kuyaqondakala ukuba xa sisenza izigqibo ngomsebenzi esiza kuwuthatha, siqale sijonge ukuba ingakanani imali esiza kuyamkela. Kodwa ukuba le kuphela kwento umntu ayijongayo xa efuna umsebenzi, usenokuba akahambi ngokholo, uhamba ngokubona.

6. Xa sikhetha umsebenzi singabonisa njani ukuba sihamba ngokholo? (Hebhere 13:5)

⁶ Ukuba sihamba ngokholo siza kuyijonga nento yokuba lo msebenzi awuzukubuphazamisa na ubuhlobo bethu noYehova. Sisenokuzibuza: ‘Ngaba lo msebenzi ufuna ndenze izinto azicaphukelayo uYehova?’ (IMize. 6:​16-19) ‘Ngaba uza kundenza ndiphoswe ziintlanganiso, ndinqabe entsimini, ndingabi nalo ixesha elaneleyo lokufunda iBhayibhile, ndize ndingabi kunye nentsapho yam ixesha elide?’ (Fil. 1:10) Ukuba uyiphendula ngokuthi ewe le mibuzo, kubhetele ungawuthathi nokuba sekunzima kangakanani ukufumana umsebenzi. Ukuba sihamba ngokholo, senza izigqibo ezibonisa ukuba siqinisekile ukuba uYehova uza kusinika izinto esizidingayo.​—Mat. 6:33; funda amaHebhere 13:5.

7-8. Yintoni eyenziwa ngomnye umzalwana wakuMzantsi Merika eyabonisa ukuba uhamba ngokholo? (Jonga nomfanekiso.)

⁷ Khawuve indlela omnye umzalwana wakuMzantsi Merika, uJavier,a awabona ngayo ukuba kubalulekile ukuhamba ngokholo. Uthi: “Ndafaka isicelo somsebenzi owawuza kuyiphinda kabini imali endandiyifumana kumsebenzi endandikuwo, neyayiza kundenza ndifumane yonke into endiyifunayo.” Kodwa uJavier wayekufuna nyhani nokuba nguvulindlela. Uphinda athi: “Ndabizwa kwi-interview. Ngaphambi kokuba ndiyenze, ndathandaza kuYehova ndimcela ukuba andincede, ndiqinisekile nokuba wayeyazi eyona nto yayindifanele. Ndandikufuna kona nokunyuselwa emsebenzini, kodwa ndandingazukuwuthatha lo msebenzi ukuba wawungazukundinceda ndizenze izinto endandifuna ukumenzela zona uYehova.”

⁸ UJavier uthi: “Kwi-interview umphathi wandixelela ukuba kuza kufuneka qho ndisebenze nasemva kwexesha lomsebenzi. Ndamxelela ngembeko ukuba ngenxa yokholo lwam andizukwazi ukuyenza loo nto.” Ngoko uJavier zange awuthathe loo msebenzi. Kwiiveki ezimbini emva koko waba nguvulindlela. Ngasekupheleni kwaloo nyaka wafumana umsebenzi awayeza kusebenza iintsuku ezimbalwa ngeveki kuwo. Uthi: “UYehova wawuva umthandazo wam waza wandinika umsebenzi owandenza ndakwazi ukuqhubeka ndinguvulindlela. Ndikuvuyela nyhani ukuba nomsebenzi ondenza ndikwazi ukunikela ixesha elininzi ekukhonzeni uYehova nabazalwana bam.”

9. Yintoni oyifundayo kwinto eyenziwa nguTrésor?

⁹ Siza kwenza ntoni xa sibona ukuba umsebenzi esikuwo usenza singakwazi ukuhamba ngokholo? Khawuve into eyenziwa nguTrésor waseCongo. Uthi: “Ndafumana umsebenzi owawuyile nto kwakukudala ndiyifuna. Imali endandiyifumana yayiyiphinda kathathu endandiyifumana kumsebenzi endandikade ndikuwo, nabantu bendihlonipha.” Kodwa uTrésor wayesoloko ephoswa ziintlanganiso kuba wayesebenza nasemva kwexesha lomsebenzi. Ngamanye amaxesha abantu asebenza nabo babemnyanzela ukuba axoke ukuze zingaziwa izinto ezinganyanisekanga ababezenza emsebenzini. UTrésor wayefuna ukuwuyeka lo msebenzi, kodwa wayesoyika ukuhlala angawufumani omnye umsebenzi. Wancedwa yintoni? Uthi: “UHabhakuki 3:​17-19 wandinceda ndaqonda ukuba nokuba ndingawuyeka loo msebenzi, ndifumane obhatala kancinci, uYehova uza kundikhathalela. Ngoko ndawuyeka.” Ugqibezela ngokuthi: “Abaqeshi abaninzi bacinga ukuba umntu osebenza kwindawo ebhatala kakuhle angancama nantoni na. Angancama ixesha lokuba kunye nentsapho yakhe, nkqu nelokukhonza. Ndivuyiswa kukuba kungakhange kubekho nto iphazamisa ubuhlobo bam noYehova, kunye nentsapho yam. Emva konyaka uYehova wandinceda ndafumana umsebenzi obhatala imali eyanele izinto endizidingayo, nondenza ndibe nexesha lokumkhonza. Xa uYehova engoyena ubalulekileyo ebomini bethu, kangangexesha elithile sisenokuphila ngemali encinci kakhulu, kodwa uza kusikhathalela.” Ngoko ukuba siyazithemba izinto uYehova asicebisa nasithembisa zona, siza kuqhubeka sihamba ngokholo, futhi uza kusisikelela.

XA UKHETHA UMNTU OFUNA UKUTSHATA NAYE

10. Xa sikhetha umntu esifuna ukutshata naye yintoni enokubonisa ukuba sihamba ngokubona?

¹⁰ Umtshato sisipho esivela kuYehova, ngoko akukho nto imbi xa umntu efuna ukutshata. Xa kukho umzalwana udade acinga ukuba unokutshata naye, usenokuba ubona ubuntu bakhe, ubuhle bakhe, indlela aziwa ngayo, indlela ayisebenzisa ngayo imali, indlela ayiphatha ngayo intsapho yakokwabo nendlela amenza azive ngayo.b Zibalulekile ezi zinto. Kodwa ukuba ujonga zona zodwa, usenokuba uhamba ngokubona.

11. Xa sikhetha umntu esifuna ukutshata naye singabonisa njani ukuba sihamba ngokholo? (1 Korinte 7:39)

¹¹ Inoba uvuya nyhani uYehova xa ebona abazalwana noodade bezenza izinto azicebisayo xa bekhetha umntu abaza ukutshata naye. Ngokomzekelo, bayayenza into abacebise yona yokuba balinde de ‘babe badala ngokwaneleyo’ ngaphambi kokuba bathandane. (1 Kor. 7:36) Xa bejonga umntu abafuna ukutshata naye bajonga iimpawu athi uYehova umyeni okanye inkosikazi elungileyo imele ibe nazo. (IMize. 31:​10-13, 26-28; Efe. 5:33; 1 Tim. 5:8) Ukuba kukho umntu ongeloNgqina obonisa umdla kubo, bathemba icebiso elithi mabatshate umntu ‘ongumlandeli weNkosi’ elikuma-1 Korinte 7:39. (Wafunde.) Baqhubeka behamba ngokholo beqinisekile ukuba uYehova uza kuyikhathalela indlela abaziva ngayo ngaphezu kwakhe nawuphi na omnye umntu.​—INdu. 55:22.

12. Njengokuba sowulivile ibali likaRosa, yintoni wena oyifundayo kulo?

¹² Khawuve into eyenziwa nguRosa, uvulindlela waseColombia. Emsebenzini wakhe wayephangela nendoda engengomKristu eyaba nomdla kuye. Naye waba nomdla kuyo. Uthi: “Yayibanceda abantu ekuhlaleni futhi ibonakala ingumntu olungileyo. Ndandiyithanda indlela endiphatha ngayo. Yayinazo zonke iimpawu endizifunayo emyenini kodwa ingeloNgqina.” Uphinda athi: “Kwakunzima ukuthi andimfuni kuba nam ndandikufuna ukuba nomntu. Ngelo xesha ndandiziva ndindodwa, ndandikufuna ukutshata, kodwa ndingade ndimfumane umntu osenyanisweni.” Sekunjalo, uRosa zange ajonge kuphela into awayeyibona. Wacinga ngokuba xa enokutshata nalo mntu kwakuza kwenzeka ntoni kubuhlobo bakhe noYehova. Ngoko wayiphelisa yonke into eyayimdibanisa nale ndoda, waxakeka ngumsebenzi kaYehova. Kungabanga xesha lide emva koko, wamenywa ukuba aye kwiSikolo Sabavangeli BoBukumkani, ngoku nguvulindlela okhethekileyo. URosa uthi: “UYehova undenze ndavuya kakhulu.” Kusenokungabi lula ukuhamba ngokholo kwinto oyifuna nyhani, kodwa kusoloko kukunceda.

XA UFUMANA UMYALELO OSUKA KWINTLANGANO

13. Ziintoni ezinokusenza sihambe ngokubona xa sifumana umyalelo osuka kwintlangano?

¹³ Sisoloko sifumana imiyalelo esinceda sikhonze uYehova kubadala, kumveleli wesiphaluka, kwiofisi yesebe okanye kwiQumrhu Elilawulayo. Kodwa siza kuthini xa kukho umyalelo esingaziqondiyo izizathu zokuba siwunikwe? Sisenokubona ngathi loo myalelo uza kwenza izinto zibe nzima kakhulu kuthi. Sisenokude siqalise ukucinga kakhulu ngezinto abangazenzi kakuhle aba bazalwana basinika loo myalelo.

14. Yintoni eza kusinceda sihambe ngokholo xa sifumana imiyalelo esuka kwintlangano? (Hebhere 13:17)

¹⁴ Xa sihamba ngokholo, siqinisekile ukuba sikhokelwa nguYehova, nokuba uyazazi iimeko zethu. Ngenxa yaloo nto siyakhawuleza ukuthobela futhi siyenza loo nto sivuya. (Funda amaHebhere 13:17.) Siyaqonda ukuba xa sithobela, ibandla liyamanyana. (Efe. 4:​2, 3) Siyazi ukuba uYehova uza kusisikelela xa sibathobela abazalwana abakhokelayo ngoxa benesono. (1 Sam. 15:22) Ngexesha lakhe uza kuyilungisa nantoni na efuna ukulungiswa.​—Mika. 7:7.

15-16. Yintoni eyanceda omnye umzalwana wahamba ngokholo nangona wayewuthandabuza umyalelo awunikiweyo? (Jonga nomfanekiso.)

¹⁵ Khawucinge ngale nto yenzekayo ebonisa indlela esincedakala ngayo xa sihamba ngokholo. Nangona kwiindawo ezininzi zasePeru kuthethwa iSpanish, abantu abaninzi abahlala khona bathetha iilwimi zakudala. Olunye lwezo lwimi sisiQuechua. Iminyaka emininzi abazalwana noodade abathetha isiQuechua bebedla ngokukhangela abantu abathetha isiQuechua entsimini. Kodwa ukuze kuthotyelwe imithetho karhulumente, kwatshintshwa indlela yokufumana abantu. (Roma 13:1) Loo nto yenza abanye bazibuza ukuba olo tshintsho aluzukuwenza nzima na umsebenzi wasentsimini. Abazalwana bashumayela ngale ndlela intsha, ngoko uYehova wazisikelela iinzame zabo zokufumana abantu abaninzi abathetha isiQuechua.

¹⁶ UKevin ongumdala kwibandla labantu abathetha isiQuechua ngomnye wabantu ababekhathazekile. Uthi: “Ndandizibuza, ‘Siza kubafumana njani abantu abathetha isiQuechua?’” Wenza ntoni uKevin? Uthi: “Ndacinga ngeMizekeliso 3:5. Ndacinga nangoMoses. UYehova wamnika umyalelo wokuba akhuphe amaSirayeli eYiputa awase kuLwandle Olubomvu, apho kwakubonakala kungekho ndlela yokubaleka amaYiputa awayewaleqa. Sekunjalo wathobela, waza uYehova wamsikelela ngendlela engummangaliso.” (Eks. 14:​1, 2, 9-11, 21, 22) UKevin wakulungela ukuyitshintsha indlela ashumayela ngayo. Kwenzeka ntoni? Uthi: “Yandothusa indlela uYehova awasisikelela ngayo. Sasidla ngokuhamba ixesha elide entsimini, sifumane umntu omnye okanye ababini abathetha isiQuechua. Ngoku sihamba kwiindawo ezinabantu abaninzi abasithethayo. Loo nto isenza sincokole nabantu abaninzi, sifumane amabuyelo amaninzi nezifundo zeBhayibhile. Inani labantu abeza kwiintlanganiso linyukile.” Inyaniso kukuba, xa sihamba ngokholo uYehova uhlala esisikelela.

17. Ziintoni ozifundileyo kweli nqaku?

¹⁷ Sithethe ngeendlela esinokuqhubeka sihamba ngazo ngokholo kwizinto ezintathu ezibalulekileyo. Kodwa simele siqhubeke sihamba ngokholo kuzo zonke izinto esizenzayo ebomini, njengaxa sikhetha indlela yokuzonwabisa, naxa sisenza izigqibo ngemfundo okanye ngendlela yokukhulisa abantwana. Kuzo zonke izigqibo esizenzayo asimele sikhokelwe nje yindlela esibona ngayo, kodwa simele sikhokelwe nabubuhlobo bethu noYehova, amacebiso akhe nesithembiso sakhe sokuba uza kusikhathalela. Xa sisenza loo nto, “siza kuhamba egameni likaYehova uThixo wethu ngonaphakade kanaphakade.”​—Mika 4:5.