Qiniseka Ukuba UYehova Uza Kukuthuthuzela

1. Babunjani ubomi bamaYuda awayethinjelwe eBhabhiloni?

KANGANGEMINYAKA emininzi amaYuda ayeman’ engamthobeli uYehova. Ngenxa yaloo nto, uYehova wavumela amaBhabhiloni ukuba alitshabalalise ilizwe lawo aze awathimbele eBhabhiloni. Kwakunjani ukuphila apho? (2 Kron. 36:​15, 16, 20, 21) Ayevumelekile kona ukuba aphile ubomi obuqhelekileyo. (Yer. 29:​4-7) Kodwa kwakungekho lula kuba ayengaphili ubomi awayenokukhetha ukubuphila. Yayiwenza azive njani loo nto? Omnye waloo maYuda wathi: “Sahlala phantsi ngasemilanjeni yaseBhabhiloni. Salila xa sakhumbula iZiyon.” (INdu. 137:1) AmaYuda atyhafileyo ayekudinga nyhani ukuthuthuzelwa, kodwa ayeza kuthuthuzelwa ngubani?

2-3. (a) Yintoni uYehova awawenzela yona amaYuda awayethinjiwe? (b) Siza kuthetha ngantoni kweli nqaku?

² UYehova ‘nguThixo wayo yonke intuthuzelo.’ (2 Kor. 1:3) Ekubeni uYehova ebathanda abantu bakhe, uyafuna ukubathuthuzela. Wayesazi ukuba amanye amaYuda awayethinjiwe ayeza kusamkela isohlwayo awayewanika sona. (Isa. 59:20) Ngoko kwiminyaka engaphezu kweyi-100 ngaphambi kokuba athinjwe, uYehova waphefumlela umprofeti uIsaya ukuba abhale incwadi ebizwa ngegama lakhe. Kwakutheni? UIsaya uthi: “‘Bathuthuzeleni, thuthuzelani abantu bam,’ utsho uThixo wenu.” (Isa. 40:1) Ngoko izinto uYehova awaphefumlela lo mprofeti ukuba azibhale, zaziza kuwathuthuzela amaYuda athinjiweyo.

³ Njengaloo maYuda ayethinjiwe, ngamany’ amaxesha nathi siyakudinga ukuthuthuzelwa. Kweli nqaku siza kuthetha ngezi ndlela zintathu uYehova awawathuthuzela ngazo: (1) Wathembisa ukuba uza kuwaxolela aguqukayo, (2) wenza abantu bakhe banethemba, waza (3) wabanceda bayeka ukoyika. Njengoko siza kuthetha ngezi zinto zintathu, khawujonge ukuba zinokusinceda njani thina.

UYEHOVA ONENCEBA UYASIXOLELA

4. UYehova wabonisa njani ukuba unguThixo onenceba? (Isaya 55:7)

⁴ UYehova ‘nguTata onenceba.’ (2 Kor. 1:3) Wayibonakalisa xa wathembisa amaYuda aguqukileyo ukuba uza kuwaxolela. (Funda Isaya 55:7.) Wathi: “Ukuhlala kwam ndikuthanda ngokungagungqiyo kundenza ndibe nenceba kuwe ngonaphakade.” (Isa. 54:8) UYehova wayeza kubonisa njani ukuba unenceba? Nangona amaYuda kwakuza kufuneka ajongane nemiphumo yezinto azenzileyo, uYehova wawathembisa ukuba ayengazukuhlala eseBhabhiloni. (Isa. 40:2) Loo nto imele ukuba yawathuthuzela nyhani amaYuda awayeguqukile nawayefuna ukumvuyisa!

5. Kutheni sinezizathu ezininzi zokuyixabisa inceba kaYehova kunamaYuda awayethinjiwe?

⁵ Yintoni esiyifundayo? UYehova ukufuna kakhulu ukubaxolela abakhonzi bakhe. Thina sinezizathu ezininzi zokuyixabisa loo nto kunamaYuda awayethinjiwe. Kutheni sisitsho? Kaloku siyayazi into uYehova ayenzileyo ukuze akwazi ukusixolela. Kumakhulu eminyaka emva kwesiprofeto sikaIsaya, uYehova wathumela uNyana wakhe emhlabeni ukuze azokufela bonke aboni abaguqukayo. Ngenxa yaloo nto, uYehova uyazicima izono zethu. (IZe. 3:19; Isa. 1:18; Efe. 1:7) Unenceba nyhani uThixo esimkhonzayo!

6. Kunokusinceda njani ukucinga ngendlela anenceba ngayo uYehova? (Jonga nomfanekiso.)

⁶ Amazwi kaYehova akuIsaya 55:7 anokusithuthuzela xa singade sizixolele. Abanye bethu basenokuhlala betyiwa sisazela ngenxa yeempazamo abazenzayo nasemva kokuba beguqukile. Loo nto isenokwenziwa kukuba betsala nzima ngenxa yezo mpazamo. Kodwa ukuba siye sazixela izono zethu saza satshintsha, sinokuqiniseka ukuba uYehova usixolele. Xa esixolele, uye akhethe ukungazikhumbuli izono zethu. (Thelekisa uYeremiya 31:34.) Ngoko ukuba akahlali ecinga ngezono esazenzayo, kutheni thina siza kuhlala sicinga ngazo? UYehova akahlali ejonge iimpazamo esazenzayo, eyona nto ayijongayo yinto esiyenzayo ngoku. (Hez. 33:​14-16) Kungabanga xesha lide, uTata wethu onenceba uza kusikhulula ngokupheleleyo kwiingxaki ezibangelwe ziimpazamo esazenzayo.

7. Yintoni enokusenza siyokuxelela abadala xa siye senza isono esinzulu?

⁷ Yintoni esifanele siyenze xa sityiwa sisazela ngenxa yokufihla isono esinzulu esisenzileyo? IBhayibhile isikhuthaza ukuba sicele abadala basincede. (Yak. 5:​14, 15) Kusenokungabi lula kona ukubaxelela into esiyenzileyo. Kodwa masikhumbule ukuba uYehova usebenzisa la madoda ukuze asincede, futhi aza kuba nenceba njengaye. Ukuba siyayikhumbula loo nto futhi siguqukile, kuza kuba lula ukuyokuthetha nawo. Nanku umzekelo wendlela uYehova awabasebenzisa ngayo abadala ukuze bathuthuzela umzalwana onguArthur.a Wayetyiwa sisazela ngenxa yento erongo awayeyenzile. Uthi: “Malunga nethuba elingangonyaka, ndandibukela iphonografi. Kodwa emva kokumamela intetho ethetha ngesazela, ndaxelela umfazi wam nabadala. Ndaziva bhetele kakhulu emva kokuba ndithethe nabo, kuba ndandingasatyiwa sisazela, kodwa ndandisazisola ngento endiyenzileyo. Abadala bandikhumbuza ukuba uYehova akandilahlanga. Kaloku usiqeqesha kuba esithanda. Into abayithethayo yandinceda ndabona ukuba uYehova undixolele.” Sithetha nje, uArthur unguvulindlela, ukwasiso nesicaka solungiselelo. Kuthuthuzela nyhani ukwazi ukuba uYehova uba nenceba kuthi xa siguqukile!

UYEHOVA USENZA SIBE NETHEMBA

8. (a) UYehova wawathembisa ntoni amaYuda awayethinjiwe? (b) Ngokutsho kukaIsaya 40:​29-31, ukuba nethemba kwakuza kuwanceda njani amaYuda aguqukileyo?

⁸ Emehlweni abantu kwakungekho nto yayinokuwanceda amaYuda awayethinjiwe. Kaloku iGunya Lehlabathi LaseBhabhiloni lalingabakhululi abantu elibathimbileyo. (Isa. 14:17) Kodwa uYehova wabenza banethemba abantu bakhe. Wabathembisa ukuba wayeza kubakhulula futhi kwakungekho nto yayinokumnqanda. (Isa. 44:26; 55:12) KuYehova iBhabhiloni yayifana nesuntswana lothuli. (Isa. 40:15) Wayenokusuka nje alivuthele elo suntswana lothuli lingabikho. Elo themba laliza kuwanceda njani amaYuda athinjiweyo? Laliza kuwathuthuzela. Kodwa ikhona nenye into elalinokuyenza. UIsaya wathi: “Abo bathembela kuYehova baza kuphinda bahlaziyeke.” (Funda uIsaya 40:​29-31.) Elo themba laliza kubenza baphinde babe namandla, ‘bandande ngamaphiko oku kweenkozi.’

9. Sesiphi isizathu esasinokwenza amaYuda amthembe uYehova ukuba uza kuzenza izinto awathembise zona?

⁹ UYehova wenza amaYuda anesizathu sokuzithemba izinto awayewathembise zona. Wayenza njani loo nto? Cinga ngeziprofeto ezazisele zenzekile. Ayesazi ukuba ama-Asiriya ayeboyisile ubukumkani bezizwe ezilishumi zakwaSirayeli, aza athimba abantu bakhona. (Isa. 8:4) Abona xa amaBhabhiloni oyisa iYerusalem aza athimba abantu ababehlala khona. (Isa. 39:​5-7) Ayesazi nokuba ukumkani waseBhabhiloni wamtyhaphaza amehlo uKumkani uZedekiya waza wamsa eBhabhiloni. (Yer. 39:7; Hez. 12:​12, 13) Yenzeka yonke into uYehova awayethe iza kwenzeka. (Isa. 42:9; 46:10) Zonke ezi zinto zimele ukuba zawenza aqiniseka nyhani amaYuda awayethinjiwe ukuba uYehova wayeza kuwakhulula!

10. Yintoni enokulenza lihlale liqinile ithemba esinalo kule mihla yokugqibela?

¹⁰ Yintoni esiyifundayo? Xa sityhafile, ithemba linokusithuthuzela size siphinde sibe namandla. Siphila kumaxesha anzima, neentshaba esinazo zinamandla. Kodwa masingatyhafi kakhulu. UYehova usenze sanethemba elimangalisayo lokuphila ngonaphakade siseluxolweni futhi sikhuselekile. Elo themba limele lihlale lithe thaa ezingqondweni nasezintliziyweni zethu. Kungenjalo, linokuba luzizi kuthi njengaxa umntu ebuka ummandla omhle kwifestile emdaka. Yintoni esinokuyenza ukuze ithemba lethu lihlale lithe thaa kuthi, kube ngathi siyayiklina loo festile? Sinokuhlala sizipha ixesha lokucinga ngendlela ekuza kuba mnandi ngayo kwihlabathi elitsha. Sinokufunda amanqaku, sibukele iividiyo size simamele neengoma ezithetha ngethemba esinalo. Sinokude sithandaze nokuthandaza, sixelele uYehova ngezinto asithembise zona esizijonge ngamehlo abomvu.

11. Yintoni enceda omnye udade ogula kakhulu aphinde abe namandla?

¹¹ Khawucinge ngendlela eliye lamthuthuzela laza lamomeleza ngayo ithemba uJoy, udade ogula kakhulu. Uthi: “Xa ndineengxaki ezininzi, ndiye ndivulele uYehova yonke intliziyo yam, ndisazi ukuba uyayiqonda indlela endiziva ngayo. Yena uYehova uye andiphe amandla angaqhelekanga.” (2 Kor. 4:7) UJoy uye azibone ekwihlabathi elitsha, apho ‘kungekho mhlali wakhona oza kuthi: “Ndiyagula.”’ (Isa. 33:24) Nathi sinokuphinda sibe namandla ukuba sivulela uYehova iintliziyo zethu size sicinge ngethemba esinalo.

12. Zeziphi izizathu esinazo zokuzithemba izinto esizithenjiswe nguYehova? (Jonga nomfanekiso.)

¹² Njengoko wenzayo kumaYuda awayethinjiwe, nathi uYehova usinike izizathu ezininzi zokuzithemba izinto asithembise zona. Cinga ngeziprofeto ezenzeka phambi kwamehlo ethu. Ngokomzekelo, sibona igunya lehlabathi ‘elineendawo ezomeleleyo nezithambileyo.’ (Dan. 2:​42, 43) Siva ‘nangeenyikima ezikwiindawo ngeendawo’ futhi sishumayela kubantu bazo “zonke iintlanga.” (Mat. 24:​7, 14) Ezi ziprofeto, nezinye ezininzi, ziyalomeleza ukholo esinalo kwizinto ezithuthuzelayo esizithenjiswe nguYehova.

UYEHOVA USENZA SINGOYIKI

13. (a) Zeziphi iingxaki awayeza kuba nazo amaYuda ngexesha lokukhululwa kwawo? (b) KuIsaya 41:​10-13 uYehova wawathuthuzela njani amaYuda awayethinjiwe?

¹³ Nangona uYehova wawathuthuzela ngethemba elimangalisayo amaYuda awayethinjiwe, wayesazi ukuba ayeseza kuba neengxaki ngexesha lokukhululwa kwawo. UYehova waprofeta ukuba ngelo xesha kwakuza kubakho ukumkani onamandla, owayeza kuzoyisa iintlanga ezazikufutshane neBhabhiloni aze nayo ayihlasele. (Isa. 41:​2-5) Ngaba kwakuza kufuneka amaYuda oyike? Kwiminyaka emininzi ngaphambi kokuba kwenzeke loo nto, uYehova wabathuthuzela abantu bakhe esithi: “Sukoyika, kuba ndinawe. Sukuba nexhala kuba ndinguThixo wakho.” (Funda uIsaya 41:​10-13.) Wayethetha ukuthini xa wayesithi “ndinguThixo wakho”? Wayengakhumbuzi amaYuda ukuba amkhonze, kuba leyo yayicacile. Kodwa wayewakhumbuza ukuba wayeseza kuwanceda.​—INdu. 118:6.

14. Yeyiphi enye indlela uYehova awawanceda ngayo amaYuda ayeka ukoyika?

¹⁴ Enye indlela uYehova awawanceda ngayo amaYuda ayeka ukoyika, kukuwakhumbuza ngamandla akhe nangolwazi analo olungenakulinganiswa nanto. Wathi mawajonge iinkwenkwezi ezisezulwini. Wawaxelela ukuba zange aphelele nje ekuzidaleni iinkwenkwezi, kodwa zonke uzazi ngamagama. (Isa. 40:​25-28) Ukuba uwazi kangako amagama eenkwenkwezi, ngokuqinisekileyo wazi nawabo bonke abakhonzi bakhe. Enye into, ukuba wayenamandla okudala iinkwenkwezi, ngokuqinisekileyo unawo nawokunceda abantu bakhe. Ngoko amaYuda awayethinjiwe ayengenasizathu sokoyika.

15. Yintoni eyenziwa nguYehova ukuze abantu bakhe balungele into eyayiseza kwenzeka?

¹⁵ UYehova wanceda abantu bakhe balungela into eyayiseza kwenzeka. Kwisahluko 26 sencwadi kaIsaya, uThixo wathi kubantu bakhe: “[Ngenani] kumagumbi enu afihlakeleyo, nivale iingcango. Zimelani okomzuzwana de udlule umsindo wam.” (Isa. 26:20) Kusenokwenzeka ukuba ekuqaleni into ethethwa kule vesi yenzeka xa uKoreshi woyisa iBhabhiloni. Omnye umbhali-mbali wakudala ongumGrike uthi xa uKoreshi wangena eBhabhiloni, “wayalela [amajoni akhe] ukuba abulale nabani na amfumanayo phandle.” Khawuyicinge indlela abamele ukuba babesoyika ngayo abantu baseBhabhiloni! Inoba zange abulawe wona amaYuda awayethinjiwe, kuba ayenza into uYehova awayewayalele yona.

16. Kutheni singamele siyoyike kakhulu into eza kwenzeka ngentlungu engathethekiyo? (Jonga nomfanekiso.)

¹⁶ Yintoni esiyifundayo? Kungabanga xesha lide, kuza kuqalisa intlungu engathethekiyo. Abantu abaninzi baza koyika, bangazi nokuba benze ntoni. Ayizukwenzeka kodwa loo nto kubantu bakaThixo. Siyazi ukuba uYehova nguThixo wethu. Siza kuma nkqo, sisazi ukuba ‘sesiza kusindiswa.’ (Luka 21:28) Naxa sihlaselwa nguGogi omela iqela leentlanga, asizukuyeka ukuthembela ngoYehova. (Hez. 38:18) UYehova uza kusebenzisa iingelosi ukuze asikhusele, asinike nemiyalelo eza kusindisa ubomi bethu. Siza kuyifumana njani thina loo miyalelo? Asikayazi. Kodwa kungenzeka siyifumane emabandleni. Asenokumela ‘amagumbi afihlakeleyo’ esiza kukhuseleka kuwo. Sinokuyilungela njani into eseza kwenzeka? Kufuneka sithi nca kubazalwana noodade, sithobele imiyalelo yentlangano size siqiniseke ukuba ikhokelwa nguYehova.​—Heb. 10:​24, 25; 13:17.

17. Yintoni enokukwenza umthembe uYehova ukuba uza kukuthuthuzela?

¹⁷ Nangona babungazukuba lula ubomi bamaYuda eBhabhiloni, uYehova wayeza kuwathuthuzela. Uza kusithuthuzela ke nathi. Ngoko nokuba kungenzeka ntoni ebomini bakho kwixesha elizayo, hlala umthemba uYehova ukuba uza kukuthuthuzela. Yithembe inceba anayo. Hlala uqinisekile ngethemba onalo. Ungaze ulibale nokuba akukho nto umele uyoyike, kuba unoThixo onguYehova.