“LelikaYehova Idabi”

Ingxaki yaqala ngo-1999, xa urhulumente waseFransi wathi iofisi yesebe mayirhafele iminikelo eyayiyifumene ukususela ngo-1993 ukuya kutsho ngo-1996. Saya kumangala kwiinkundla zaseFransi, kodwa asaphumelela. Emva kokuba lisichithile ityala kwinkundla yesibheno, urhulumente watsala imali engaphezu kweeyuro eziyi-4 500 000 kwimali yeofisi yesebe esebhankini. Ithemba lethu lokugqibela laliyiECHR. Ngaphambi kokuba imamele ityala lethu, iECHR yathi masidibane namagqwetha karhulumente waseFransi nommeli weNkundla yaseYurophu, ukuze sibone ukuba akukho nto sinokuvumelana ngayo na ngaphambi kokuba ityala lethu lixoxwe.

Sasilindele ukuba ummeli weNkundla yaseYurophu wayeza kufuna siyibhatale imali eyayifunwa ngurhulumente waseFransi, nokuba asiyibhatalanga yonke. Sasiqonda kakuhle ukuba ukubhatala neyuro nje enye kwakungavumelani nemigaqo yeBhayibhile. Iminikelo yabazalwana noodade yayiyeyokuncedisa kumsebenzi woBukumkani, yayingeyiyo ekarhulumente. (Mat. 22:21) Sekunjalo, saya kule ntlanganiso kuba sasihlonipha imithetho yeNkundla yaseYurophu.

Intlanganiso yaqhutywa kwelinye lamagumbi amahle ale Nkundla. Ayizange iqale kakuhle. Zisuka nje, ummeli weNkundla yaseYurophu wathi kufuneka ibe khona imali amaNgqina KaYehova ayikhuphayo kwirhafu eyayifunwa ngurhulumente waseFransi. Saziva sinyanzelekile ukuba simbuze, “Ubusazi ukuba kwimali yethu esebhankini, urhulumente sele etsale iiyuro ezingaphezu kweziyi-4 500 000?”

Wayebonakala apha ebusweni ukuba wothukile. Yatshintsha mpela ke nendlela awayelijonga ngayo ngoku eli tyala, xa amagqwetha karhulumente avumayo ukuba yenzeke nyhani loo nto. Wawangxolisa waza wayiphelisa ngoko nangoko loo ntlanganiso. Ndakhawuleza ndaqonda ukuba uYehova wayetshintshe yonke into ngendlela esasingayilindelanga ukuze siphumelele kwelo tyala. Saphuma sivuya nyhani kuloo ntlanganiso, singayikholelwa ncam nale yayisand’ ukwenzeka.

Nge-30 kaJuni, 2011, yonke iECHR yama ngakwicala lethu. Yathi irhafu eyayifunwa ngurhulumente yayingekho semthethweni, futhi wayemele ayibuyise inenzala imali ayithathe kuthi. De kube namhlanje, amaNgqina KaYehova aseFransi amkhonza kakuhle uYehova ngenxa yeso sigwebo. Laa mbuzo mnye, esasingawulungiselelanga nokuwulungiselela, wafana nelitye elangena kwintloko kaGoliyati, wayitshintsha imiphumo yelo tyala. Kwakutheni ukuze siphumelele? Kungenxa yokuba “lelikaYehova idabi,” njengokuba uDavide watshoyo kuGoliyati.​—1 Sam. 17:​45-47.

Eli ayililo lodwa ityala esiye saphumelela kulo. Ngoxa kukho oorhulumente neecawa ezingasifuniyo, ukuza kutsho ngoku, siye saphumelela amatyala ayi-1 225 kwezona nkundla ziphakamileyo zamazwe ayi-70 nakwiiNkundla Eziphakamileyo Zamazwe Ngamazwe ezahlukeneyo. Ukuphumelela la matyala kuye kwakhusela amalungelo ethu, njengelungelo lokuba amaNgqina KaYehova abe lunqulo olusemthethweni, elokushumayela ebantwini, elokungancedisi kwimibhiyozo yelizwe nelokungavumi ukutofela igazi.

Kwenzeka njani ukuba ndiye kuxoxa ityala eYurophu, ngoxa ndikhonza kwiKomkhulu Lehlabathi LamaNgqina KaYehova eNew York, eU.S.A?

NDAKHULISWA NGABAZALI ABABEYIKHUTHALELE INTSIMI

Abazali bam, uGeorge noLucille, baphumelela kwiklasi ye-12 yaseGiliyadi baza baya kukhonza e-Ethiopia. Ndazalwa belapho ke mna ngo-1956. Bandithiya igama lomvangeli owayekhonza ngexesha labapostile, uPhilip. (IZe. 21:8) Ngonyaka olandelayo, urhulumente wawuvala umsebenzi wethu. Ngoxa ndandisemncinci kakhulu, ndiyikhumbula kakuhle into yokuba intsapho yasekhaya yayikhonza ngeendlela ezifihlakeleyo. Kuba ndandingumntwana, yayimnandi kum loo nto. Into eyaba buhlungu kukuba ngo-1960 abasemagunyeni basigxotha kwelo lizwe.

Xa intsapho yasekhaya yaya kuhlala eWichita, eKansas, eUnited States, abazali bam baqhubeka beyithanda intsimi, kanye njengokuba babenjalo xa babengabathunywa bevangeli. Babemthanda ngeentliziyo zabo zonke uYehova. Bafundisa mna, usisi wam uJudy, nomninawa wam uLeslie, nabo abazalelwa e-Ethiopia, ukuthanda uYehova nokumkhonza ngentliziyo yonke. Xa ndandineminyaka eyi-13 ndabhaptizwa. Emva kweminyaka emithathu, intsapho yasekhaya yaya kukhonza kwindawo eyayidinga abavakalisi, eArequipa, ePeru.

Ngo-1974, xa ndandineminyaka nje eyi-18, isebe lasePeru lamisela mna nabanye abazalwana abayi-4 ukuba sibe ngoovulindlela abakhethekileyo. Sasiza kushumayela kwiindawo ekungazange kwashunyayelwa kuzo, phezulu kwimimandla yeeNtaba ZeCentral Andes. Le nto yayithetha ukuba sasiza kushumayela nakubantu abathetha isiQuechua nesiAymara. Sasihamba ngemoto eyayifana nekharavani, nesasisithi nguMkhombe ngenxa yendlela eyayime ngayo. Ndiyavuya xa ndicinga ngendlela esasiyisebenzisa ngayo iBhayibhile ukuze sincede abantu balapho babone ukuba uYehova sele eza kuphelisa ukusokola, ukugula nokufa. (ISityhi. 21:​3, 4) Ngenxa yaloo nto, abaninzi baba ngabakhonzi bakaYehova.

NDAYA KUKHONZA KWIKOMKHULU LEHLABATHI

Ngo-1977 xa uAlbert Schroeder owayengomnye wabazalwana abakwiQumrhu Elilawulayo LamaNgqina KaYehova wayetyelele isebe lasePeru, wandikhuthaza ukuba ndifake isicelo sokuya kukhonza kwikomkhulu lehlabathi. Ndasifaka ke nam. Kungadlulanga xesha lide, nge-17 kaJuni, 1977, ndaqalisa ukukhonza kwiBheteli eyayiseBrooklyn. Kwiminyaka emine ndifikile apho, ndasebenza kwisebe lokuklina nelokulungisa.

NgoJuni 1978, ndadibana noElizabeth Avallone kwindibano yezizwe ngezizwe eyayiseNew Orleans, eLouisiana. Naye wayekhuliswe ngabazali ababefana nabam, ababemthanda ngeentliziyo zabo zonke uYehova. UElizabeth wayeneminyaka eyi-4 enguvulindlela othe ngxi, efuna nokuba kwinkonzo yexesha elizeleyo ubomi bakhe bonke. Saqhubeka sincokola. Kungadlulanga xesha lide, saye sazana bhetele saza sathandana kakhulu. Satshata nge-20 kaOktobha, 1979, saza sakhonza kunye eBheteli.

Abazalwana noodade bebandla esaqala kulo, iBrooklyn Spanish, babesithanda kakhulu. Siye sakhonza nakwamanye amabandla amathathu anabazalwana noodade abasithandayo, abaye basikhuthaza ukuba singayiyeki inkonzo yaseBheteli. Siyayibulela indlela abaye basinceda ngayo. Sibulela abahlobo neentsapho zethu ezisincede sakwazi ukukhathalela abazali bethu abebesiya besiba badala, bedinga noncedo.

UMSEBENZI WAM KWISEBE LEZOMTHETHO

NgoJanuwari 1982 ndothuswa kukufumana isabelo esitsha sokukhonza kwiSebe Lezomthetho eBheteli. Emva kweminyaka emithathu, ndacelwa ukuba ndiye kufundela ukuba ligqwetha eyunivesithi. Esikolweni ndothuka xa ndafumanisa ukuba amalungelo angabalulekanga kangako kubantu abaninzi baseUnited States nabakwamanye amazwe, bawafumana ngenxa yamatyala aye aphunyelelwa ngamaNgqina KaYehova. La matyala abalulekileyo kwakufundiswa kakhulu ngawo eklasini.

Xa ndandina-30 ngo-1986 kwathiwa mandibe ngumveleli weSebe Lezomthetho. Ndayibona iyinyhweba leyo, kodwa ndandisazi nokuba asizukuba lula sona eso sabelo, kuba kwakungekho nto ingako endandiyazi ngaso.

Ngo-1988 ndaba ligqwetha, kodwa ndandingaboni ukuba le nto iye yabeka ukholo lwam engozini. Imfundo ephakamileyo inokwenza umntu aziphakamise, acinge ukuba, kuba yena enolwazi abangenalo abanye abantu, ubhetele kunabo. UElizabeth wandinceda. Wandinceda ndenza izinto eziqinisa ukholo, endandizenza ngaphambi kokuba ndiye esikolweni. Emva kwexesha, lwaphinda lwaqina. Ukuba nolwazi olukhethekileyo akuyiyo eyona nto ibalulekileyo ebomini. Ndiyazi apha kum loo nto. Eyona nto ibalulekileyo kukuba ngumhlobo kaYehova, umthande kakhulu yena nabantu bakhe.

UKUTHETHELELA IINDABA EZILUNGILEYO NOKUZAMA UKUBA ZIBE SEMTHETHWENI

Ukugqiba kwam eyunivesithi, eyona nto yayisengqondweni yam kukunceda isebe endandikulo lijongane nezinto zomthetho ezidingekayo eBheteli, nokukhusela intlangano kaYehova nelungelo lethu lokushumayela iindaba ezilungileyo. Ukuncedisa kwintlangano yethu ehamba ngokukhawuleza, ekhulayo nesoloko inezinto ezitshintshayo, kwakuvuyisa kodwa kunazo neengxaki. Ngokomzekelo, ngo-1991 iSebe Lezomthetho lacelwa ukuba likhangele indlela ekunokuyekwa ngayo ukuhambisa iincwadi zethu ngemali. Nyhani ke emva koko amaNgqina KaYehova ahambisa iincwadi mahala. Le nto iwenza lula umsebenzi wethu waseBheteli nasentsimini, futhi nanamhlanje yenza singabhataliswa irhafu ngokungekho mthethweni. Abanye abantu babecinga ukuba olu tshintsho luza kusenza singabi namali ingako luze luphazamise umsebenzi wethu wokushumayela. Kodwa kwenzeka into eyahlukileyo apho. Ukususela ngo-1990, inani labantu abakhonza uYehova liye laphindaphindeka ngaphezu kwesibini. Enye into, ngoku abantu bayakwazi ukufumana ukutya okuqinisa ukholo bengakhuphanga nesenti. Ndiye ndazibonela ngala wam amehlo ukuba, ngenxa yamandla kaYehova nangenxa yolwalathiso esilufumana kwikhoboka elithembekileyo alisebenzisayo, olu tshintsho nezinye izinto ezininzi ezitshintshwa yintlangano zinokuphumelela.​—Eks. 15:2; Mat. 24:45.

Amatyala esiwaphumelela ezinkundleni asiwaphumeleli kuphela ngenxa yokuba sinamagqwetha awazi kakuhle umsebenzi wawo. Into edla ngokwenza abasemagunyeni basincede yindlela esiziphatha ngayo. Loo nto ndayibona ngo-1998, xa abazalwana abathathu beQumrhu Elilawulayo nabafazi babo babeye kwiindibano ezikhethekileyo eCuba. Kunayo nantoni na esasiyithethe kwiintlanganiso zethu nabasemagunyeni, eyona nto yenza babona ukuba asithathi cala kwezopolitiko, yindlela aba bazalwana nabafazi babo ababenobubele nababenembeko ngayo.

Xa kunzima ukulungisa izinto ezidibene nomthetho, siya enkundleni ukuze ‘sithethelele iindaba ezilungileyo, sizame ukuba zibe semthethweni.’ (Fil. 1:7) Ngokomzekelo, kangangeminyaka emininzi, abasemagunyeni eYurophu nakuMzantsi Korea babengavumi sisebenzise ilungelo lethu lokungayi emkhosini. Ngenxa yaloo nto, abazalwana abamalunga ne-18 000 eYurophu nabangaphezu kwe-19 000 kuMzantsi Korea baye bavalelwa ejele kuba bengafuni ukuya emkhosini ngenxa yesazela sabo.

Ekugqibeleni, nge-7 kaJulayi, 2011, iECHR yenza isigqibo kwityala likaBayatyan nxamnye neArmenia, esasivumela bonke abantu baseYurophu ukuba benze eminye imisebenzi yelizwe, xa bengavumi ukuya emkhosini ngenxa yezinto abazikholelwayo. Nge-28 kaJuni, 2018, neNkundla Yomgaqo-siseko yaseMzantsi Korea yenza isigqibo esifanayo. Sasingasoze siphumelele ukuba kwakukho nokuba bambalwa kubazalwana bethu abasebatsha ababeye bathatha icala.

ISebe Lezomthetho elikwikomkhulu nalawo akwiiofisi zamasebe ezisemhlabeni wonke, asebenza nzima ukuze athethelele ilungelo lethu lokukhonza uYehova nokushumayela ngoBukumkani. Kuyinyhweba kuthi ukubamela abazalwana noodade abachaswa ngurhulumente. Nokuba siyaphumelela enkundleni okanye asiphumeleli, loo matyala asinceda sikwazi ukushumayela kubalawuli, kookumkani nakwiintlanga. (Mat. 10:18) Iijaji, abameli bakarhulumente, oonondaba nabantu basekuhlaleni, kuye kufuneke bacinge ngezibhalo esiye sizifake kumaphepha esiwasa enkundleni, nesiye sizisebenzise xa sizithethelela. Abantu abaneentliziyo ezinyanisekileyo baye bawazi amaNgqina KaYehova, bazi nokuba izinto esizikholelwayo zisuka eBhayibhileni. Abanye kubo baye baba ngabazalwana noodadewethu.

ENKOSI YEHOVA!

Kule minyaka iyi-40 idlulileyo, ndiye ndanenyhweba yokusebenza neeofisi zamasebe ezisemhlabeni wonke ngezinto zomthetho, eyokuma phambi kweenkundla eziphakamileyo ezahlukeneyo neyokuthetha namagosa amaninzi abalulekileyo. Ndiyabathanda futhi ndiyabahlonipha abazalwana noodade endisebenza nabo kwiSebe Lezomthetho kwikomkhulu lehlabathi, nabo bakumasebe ezomthetho asemhlabeni wonke. Ndiye ndasikelelwa nyhani futhi ndaneliseke kakhulu.

Kule minyaka iyi-45 idlulileyo, xa bekunzima naxa bekumnandi, uElizabeth uye waqhubeka enyanisekile, endithanda futhi endinceda. Ndiyamncoma kuba yonke le nto ebeyenza ngoxa enesigulo esibulala amajoni akhe omzimba, nesimenza aphelelwe ngamandla.

Siye sazibonela ukuba ayingomandla ethu nobuchule esinabo obusenze saphumelela. Kodwa njengokuba watshoyo uDavide, “UYehova ungamandla okusindisa abantu bakhe.” (INdu. 28:8) Nyhani “lelikaYehova idabi.”