Ngaba ‘Sowuyifundile Indlela’ Yokwanela?

1. Kuthetha ntoni ukwanela? Yintoni okungayithethiyo?

NGABA ungumntu owanelayo? Umntu owanelayo uvuyiswa aze axoliswe kukucinga ngezo zinto zintle aziphiwe nguYehova. Akakhathazeki okanye aqumbe kuba kukho izinto angenazo. Sekunjalo, ukwanela akuthethi kuthi asikhathali nokuba kwenzeka ntoni ebomini bethu. Ngokomzekelo, umKristu wenza kakuhle xa esebenzela ukufumana amathuba okumkhonza nangezinye iindlela uYehova. (Roma 12:1; 1 Tim. 3:1) Kodwa akayeki ukuvuya nokuba akakhawulezi ayifumane imisebenzi afuna ukuyenzela uYehova entlanganweni.

2. Kutheni ukungoneli kuyingozi kakhulu?

² Ukungoneli kunokuba nemiphumo emibi kakhulu. Abantu abangoneliyo zizinto abanazo basenokusebenza ixesha elide kakhulu ukuze bafumane izinto abangazidingi nokuzidinga. Into ebuhlungu kukuba amaKristu ambalwa aye eba imali nezinye izinto aye arhalela ukuba nazo. Asenokuba aye azixelela: ‘Ndimele ndibe nayo le nto,’ ‘Kudala ndiyilindile,’ ‘Ndiza kuyibhatala le mali.’ Kodwa umntu obayo, nokuba uyenza njani loo nto, akamvuyisi uYehova, futhi ungcolisa igama lakhe. (IMize. 30:9) Kanti abanye baye baphoxeka kakhulu ngenxa yokuba bengade bazifumane izabelo abebezifuna, kangangokuba bade bayeka nokukhonza uYehova. (Gal. 6:9) Yintoni enokwenza umkhonzi kaYehova ade acinge ukwenza loo nto? Ingxaki isenokuba uye wayeka kancinci kancinci ukwanela.

3. Amazwi akumaFilipi 4:​11, 12 asenza siqiniseke ngantoni?

³ Sonke sinokukwazi ukwanela. Umpostile uPawulos wathi: “Ndifunde ukwanela yiloo nto ndinayo nokuba ndikweyiphi imeko.” (Funda amaFilipi 4:​11, 12.) Loo nto wayibhala esetrongweni. Sekunjalo, zange ayeke ukuvuya. ‘Wayefunde indlela’ yokwanela. Amazwi kaPawulos nezinto ezenzeka kuye anokusiqinisekisa ukuba singakwazi ukwanela, nokuba kubonakala kunzima. Masingalindeli ukuba iza kusuka nje isanelise imeko esikuyo. Kodwa simele sikufunde ukwanela. Njani? Makhe sithethe ngeempawu eziza kusinceda.

ZAMA UKUBA NOMBULELO

4. Ukuba nombulelo kusinceda njani sanele? (1 Tesalonika 5:18.)

⁴ Umntu onombulelo uyanela zizinto anazo. (Funda ama-1 Tesalonika 5:18.) Ngokomzekelo, xa sibulela nyhani ngokuba nezinto esizidingayo ebomini, asizukucinga kakhulu ngezinto esizifunayo esingenazo. Ukuba siyambulela uYehova ngezabelo esinazo ngoku, siza kucinga ngendlela zokuzenza kakuhle kunokuba sihlale sicinga ngeendlela zokufumana izabelo ezithandwa sithi. Yiloo nto iZibhalo zisikhuthaza ukuba simbulele uYehova xa sithandaza. Ukuba sinombulelo, siza kuba “[noxolo] lukaThixo oluyodlulayo indlela yabantu yokucinga.”​—Fil. 4:​6, 7.

5. Ziintoni awayemele ambulele ngazo uYehova amaSirayeli? (Jonga nomfanekiso.)

⁵ Khawucinge ngento eyenziwa ngamaSirayeli. Akhalaza kaninzi kuYehova, esithi awasakufumani ukutya awayekutya eYiputa. (Num. 11:​4-6) Ewe kona, kwakungekho lula entlango. Yintoni ke eyayinokuwanceda anele zizinto awayenazo? Ayemele acinge ngezinto uYehova awayesele ewenzele zona aze ambulele. Xa ayengamakhoboka eYiputa, ayephethwe kakubi kakhulu, kodwa uYehova wawabetha ngezibetho ezilishumi loo maYiputa. Emva kokuba abantu bakwaSirayeli bekhululwe, “bawathathela izinto ezininzi amaYiputa,” isilivere, igolide neempahla. (Eks. 12:​35, 36) Xa baleqwa ngumkhosi kaFaro baza bavaleleka ngakuLwandle Olubomvu, uYehova wenza ummangaliso, wawahlula phakathi amanzi. Naxa babesentlango uYehova wayebondla ngemana yonke imihla. Yayiyintoni ke ingxaki yamaSirayeli? Into eyayiwenza angoneli yayingekokuba ukutya awayenako kwakunganelanga, kodwa ayengenambulelo ngoko ayekuphiwa nguYehova.

6. Ziintoni esinokuzenza ukuze sibe nombulelo?

⁶ Yintoni enokukunceda ube nombulelo? Okokuqala, qho ngosuku ziphe ixesha lokucinga ngezinto ezintle ezikuvuyisayo. Unokude ubhale izinto ezimbini okanye ezintathu onombulelo ngazo. (IZili. 3:​22, 23) Okwesibini, bulela. Yiba ngowokuqala ukubulela abanye ngezinto abakwenzela zona. Kodwa eyona nto ibalulekileyo kukumbulela yonke imihla uYehova. (INdu. 75:1) Okwesithathu, vana kakhulu nabantu abanombulelo. Kaloku ukuba nombulelo kuyosulela; kunjalo ke nokungoneli. (Dut. 1:​26-28; 2 Tim. 3:​1, 2, 5) Xa sihlala sicinga ngokubulela akuzukufane kwenzeke ukuba singoneli zizinto esinazo.

7. Yintoni eyanceda uAci wanombulelo?

⁷ Khawuve into eyenzeka kuAci, udade waseIndonesia. Uthi: “Ngexesha lekhorona ndaqalisa ukuthelekisa iimeko zam nezabanye abazalwana noodade. Loo nto yandenza andonela zizinto endinazo.” (Gal. 6:4) Wancedwa yintoni ukuze atshintshe indlela acinga ngayo? UAci uthi: “Ndaqalisa ukucinga ngezinto uYehova awayendenzela zona suku ngalunye, nangezinto ezininzi endandizifumana ngenxa yokuba ndikwintlangano yakhe. Emva koko, ndandiye ndimbulele uYehova. Loo nto yandinceda ndakwazi ukwanela.” Ukuba iimeko zakho zikwenza ungonwabi, ungakwazi ukulinganisa uAci ukuze nawe ube nombulelo?

THOBEKA

8. Yintoni eyayikhe yenzeka kuBharuki?

⁸ UBharuki, owayengunobhala womprofeti uYeremiya, wayekhe akonela zizinto awayenazo. Wayenomsebenzi onzima wokuncedisa uYeremiya ukuba ase umyalezo kaYehova kuhlanga lwakwaSirayeli olwalungenambulelo. UBharuki wakhe wayeka ukucinga ngomsebenzi uYehova awayemthume wona. Kuyabonakala ukuba endaweni yokuxakeka yile nto wayeyithunywe nguYehova, waqalisa ukucinga kakhulu ngesiqu sakhe nangento awayefuna ukuyenza. Esebenzisa uYeremiya, uYehova wathi kuBharuki: “Uzifunela izinto ezinkulu. Yeka ukuzifunela ezo zinto.” (Yer. 45:​3-5) Ngamanye amazwi wayesithi: “Yanela ziimeko okuzo.” UBharuki wavuma ukulungiswa waza waqhubeka emvuyisa uYehova.

9. Ngokutsho kwama-1 Korinte 4:​6, 7, ukuthobeka kuza kusenza siqonde ntoni? (Jonga nemifanekiso.)

⁹ Ngamanye amaxesha, umKristu usenokucinga ukuba ufanele afumane isabelo esithile. Kusenokwenzeka ukuba zininzi izinto akwaziyo ukuzenza, usebenza nzima, kudala ekhonza uYehova okanye unazo zontathu ezi zinto. Sekunjalo, eso sabelo ebesifuna sinokunikwa abanye abantu. Yintoni anokuyenza? Unokucinga ngento eyabhalwa ngumpostile uPawulos kuma-1 Korinte 4:​6, 7. (Wafunde.) Zonke izabelo esizifumanayo nazo zonke iziphiwo esinazo zivela kuYehova. Akukho nto siyenzileyo ukuze sizifumane. Zonke sizifumene ngenxa yobubele bukaYehova obungasifanelanga.​—Roma 12:​3, 6; Efe. 2:​8, 9; umbhalo osemazantsi.

10. Yintoni esimele siyenze ukuze sithobeke?

¹⁰ Sinokuthobeka xa sicingisisa ngento eyenziwa nguYesu. Khawuve ukuba kwenzeka ntoni ngobusuku awahlamba ngabo iinyawo zabapostile bakhe. Umpostile uYohane wathi: “UYesu [esazi] ukuba [1] uTata wakhe uzinikele ezandleni zakhe zonke izinto, esazi nokuba [2] uvela kuThixo, ibe [3] uza kubuyela kuye, . . . wahlamba iinyawo zabafundi bakhe.” (Yoh. 13:​3-5) UYesu wayesenokucinga ukuba kumele kuhlanjwe ezakhe iinyawo. Kodwa xa wayelapha emhlabeni, zange acinge ukuba, kuba enguNyana kaThixo umele aphile kamnandi kunabanye abantu. (Luka 9:58) UYesu wayethobekile futhi esanela zizinto awayenazo. Wasibonisa into esimele siyenze.​—Yoh. 13:15.

11. Ukuthobeka kuye kwamnceda njani uDennis waziva anelisekile?

¹¹ Omnye umzalwana waseNetherlands, uDennis, uye wazama ukuthobeka njengoYesu, kodwa khange kube lula. Uthi: “Ngamanye amaxesha ndiye ndiqaphele ukuba ndiqalisa ukuba nekratshi okanye ukungoneli, njengaxa omnye umntu efumana isabelo ebendicinga ukuba sindifanele. Xa kusenzeka loo nto, ndiye ndifunde izinto ezithetha ngokuthobeka. KuJW Library ndenze itag endifake kuyo ezinye izibhalo ezithetha ngokuthobeka, ukuze xa ndizifuna ndizifumane lula ndize ndiphinde ndizifunde. Efowunini yam, ndidawunlowude neentetho ezithetha ngokuthobeka futhi ndisoloko ndizimamela.a Ndiye ndafunda ukuba yonke imisebenzi esiyenzayo siyenza ukuze kuzukiswe uYehova, kungazukiswa thina. UYehova uvumela ngamnye wethu ukuba abe nento ayenzayo, kodwa nguye owenza uphumelele umsebenzi esiwenzayo.” Ukuba asikwanelisi isabelo sakho, sebenzela ukuba ngumntu othobekileyo. Loo nto iza kukwenza usondele nakakhulu kuYehova, uze wanele.​—Yak. 4:​6, 8.

CINGISISA NGETHEMBA ONALO

12. Leliphi ithemba esinalo elisenza sizive sanelisekile? (Isaya 65:​21-25)

¹² Ukucingisisa ngethemba esinalo nelimangalisayo kusenza sizive saneliseke kakhulu. Amazwi kaYehova akwincwadi yomprofeti uIsaya abonisa ukuba uyayiqonda indlela obunzima ngayo ubomi esibuphilayo ngoku, asenza siqiniseke nokuba uza kuziphelisa zonke iingxaki esinazo. (Funda uIsaya 65:​21-25.) Siza kuba namakhaya amahle nakhuselekileyo. Siza kuvuyiswa ngumsebenzi esiwenzayo, sitye nokutya okumnandi nokusempilweni. Soze siphinde sibe nexhala lokuba thina okanye abantwana bethu baza kwehlelwa zizinto ezibuhlungu. (Isa. 32:​17, 18; Hez. 34:25) Ithemba esinalo liyamangalisa futhi siqinisekile ngalo.

13. Zeziphi iingxaki esinazo ezinokufuna sicinge kakhulu ngethemba esinalo?

¹³ Eli lixesha lokuba sicinge ngaphezu kokuba besisenza ngethemba esinalo. Kutheni sisitsho? Kaloku siphila ‘kwimihla yokugqibela’ futhi sonke sineengxaki ‘ekunzima ukuzinyamezela.’ (2 Tim. 3:1) Suku ngalunye, uYehova usenza sinyamezele ngokusinika amacebiso, ngokusomeleza nangokusinceda. (INdu. 145:14) Enye into enokusinceda kula maxesha anzima lithemba esinalo. Mhlawumbi kunzima ukufumanela intsapho yakho izinto ezidingayo ezinjengokutya, iimpahla nendawo yokuhlala. Ngaba kuza kuhlala kunjalo? Soze! UYehova uthembise ukuba uza kukunika izinto ozidingayo ngoku, akunike nezininzi eParadesi. (INdu. 9:18; 72:​12-14) Usenokuba utyiwa ziintlungu yonk’ imihla, unedepression, okanye ugula kakhulu. Ngaba obu bubomi oza kuhlala ubuphila ngonaphakade? Akunjalo. Kwihlabathi elitsha likaThixo soze siphinde sigule okanye sife. (ISityhi. 21:​3, 4) Elo themba, lisinceda sizive sanelisekile, singacatshukiswa zizinto ezenzeka kuthi ngoku. Singaziva sanelisekile nokuba siphathwa kakubi, siswelekelwe ngumntu esimthandayo, sinyamezele isigulo okanye sinezinye iingxaki. Kutheni sisitsho? Kaloku siyazi ukuba nokuba zinzima kangakanani iingxaki esinazo ngoku, “ubunzima esijongene nabo buyinto egqithayo,” nokuba kwihlabathi elitsha soze siphinde sibe neengxaki.​—2 Kor. 4:​17, 18.

14. Sinokulomeleza njani ithemba esinalo?

¹⁴ Ekubeni kubalulekile ukuba sibe nethemba ukuze sanele, sinokulomeleza njani ke elo themba? Njengokuba kusenokufuneka umntu afake izipeksi ukuze akwazi ukubona izinto ezikude, nathi kusenokufuneka kubekho izinto esizenzayo ukuze lihlale lithe thaa ezingqondweni zethu ithemba esinalo, sizibone siseParadesi. Xa sixhalatyiswa kakhulu kukungabi namali, sinokuba nombono waxa kungasekho nto ifuna mali, singasenamatyala, kungekho nomnye umntu osokolayo. Ukuba sityhafiswa kukungade sisifumane isabelo esisifunayo, sinokucinga ngendlela engazukubaluleka ngayo loo nto xa singasenasono, kuphele namawaka eminyaka sikhonza uYehova. (1 Tim. 6:19) Ekuqaleni, kusenokuba nzima ukucinga ngexesha elizayo kunokuhoya le meko sikuyo ngoku. Kodwa ngokuya ixesha lihamba, ukucinga ngezinto uYehova asithembise zona kwixesha elizayo kunokude kube yinto ezenzekelayo.

15. Yintoni oyifundayo kwinto ethethwa nguChrista?

¹⁵ Khawuve indlela elimncede ngayo ithemba analo uChrista, inkosikazi kaDennis, ebesikhe sathetha ngaye. Uthi: “Isigulo endinaso sizenza zingomeleli izihlunu zam. Loo nto indenza ndihambe ngewheelchair okanye ndihlale ndisebhedini. Yonke imihla ndiyaqaqanjelwa. Ugqirha wam usand’ ukundixelela ukuba andizukuphila. Uthe akutsho, ndakhawuleza ndazixelela le nto: ‘Lo gqirha, akanawo lo mbono ndinawo ngexesha elizayo.’ Ndicinga ngethemba endinalo. Loo nto indenza ndizole. Ngoku, kusenokufuneka ndinyamezele ukuphila kweli hlabathi, kodwa ndiza konwaba nyhani kwihlabathi elitsha.”

“ABADINGI NTO ABO BAMOYIKAYO”

16. Kwakutheni ukuze uKumkani uDavide athi “abadingi nto” abo boyika uYehova?

¹⁶ Nokuba siyanela bubomi esibuphilayo, siza kuba neengxaki. UKumkani uDavide waba sentlungwini yokuswelekelwa ngabantwana bakhe abathathu. Watyholwa ngezinto awayengazenzanga, wajikelwa, kwadlula neminyaka ezingelwa nguKumkani uSawule, efuna ukumbulala. Sekunjalo, wathi ngoYehova: “Abadingi nto abo bamoyikayo.” (INdu. 34:​9, 10) Kwakutheni ukuze atsho? Kuba, ngoxa thina bantu bakaYehova singalindelanga ukuba siza kuphila ubomi obungenazingxaki, siqinisekile ukuba soze singabi nayo into esiyidinga nyhani. (INdu. 145:16) Sinokuqiniseka ukuba uYehova uza kusinceda sinyamezele zonke iingxaki esinazo. Singakwazi ukwanela, nokuba zinjani iimeko esikuzo.

17. Kutheni uzimisele ukufunda indlela yokwanela?

¹⁷ UYehova ufuna waneliseke. (INdu. 131:​1, 2) Ngoko zimisele ukufunda indlela yokwanela. Ukuba usebenza nzima ukuze ube nombulelo, uthobeke, ukwazi nokomeleza ithemba onalo, uza kukwazi ukuthi “Ndanelisekile.”​—INdu. 63:5.