UYehova Usinceda Njani Sinyamezele?

1. Kutheni kufuneka sinyamezele? Ngubani onokusinceda? (1 Petros 5:10)

KULE mihla yokugqibela inzima, abantu bakaYehova badinga ukunyamezela. Abanye banezigulo ezinganyangekiyo. Abanye basentlungwini yokuswelekelwa ngumntu abamthandayo. Kanti abanye bachaswa ziintsapho zabo okanye ngamagosa karhulumente. (Mat. 10:​18, 36, 37) Nokuba yeyiphi ingxaki onayo, qiniseka ukuba uYehova uza kukunceda ukwazi ukunyamezela.​—Funda u-1 Petros 5:10.

2. Siwafumana kubani amandla okunyamezela?

² Ukunyamezela kukukwazi ukuhlala uthembekile kuYehova nokungaphelelwa lithemba ngoxa uneengxaki, utshutshiswa okanye ulingwa. Ukukwazi kwethu ukunyamezela akuxhomekekanga kumandla ethu, kodwa kuxhomekeke kuYehova, osinika ‘amandla angaqhelekanga.’ (2 Kor. 4:7) Kweli nqaku siza kuthetha ngeendlela eziyi-4 uYehova asilungiselele zona ukuze asincede sinyamezele. Siza kubona nokuba sinokuzisebenzisa njani ukuze sincedakale.

UMTHANDAZO

3. Kutheni sisithi uyamangalisa umthandazo?

³ UYehova usilungiselele into emangalisayo enokusinceda sikwazi ukunyamezela. Wenze sakwazi ukuthetha naye ngoxa sinesono. (Heb. 4:16) Khawufan’ ucinge: Singathandaza kuYehova nanini na sithethe naye ngayo nantoni na. Nokuba sithetha oluphi ulwimi, siphi, sisodwa okanye sivalelwe etrongweni, uyakwazi ukusiva. (Yona 2:​1, 2; IZe. 16:​25, 26) Naxa sinexhala kakhulu side singakwazi ukumxelela indlela esiziva ngayo, uyayazi eyona nto besifuna ukumxelela yona. (Roma 8:​26, 27) Umangalisa nyhani umthandazo.

4. Kutheni sisithi ukucela uYehova asincede sinyamezele kuvumelana nokuthanda kwakhe?

⁴ KwiLizwi lakhe, uYehova uyasiqinisekisa ukuba “uyasiva xa sicela nantoni na evumelana nokuthanda kwakhe.” (1 Yoh. 5:14) Singamcela ukuba asincede sinyamezele? Ewe! Kaloku loo nto ivumelana nokuthanda kwakhe. Kutheni sisitsho? Xa sinyamezela iingxaki esinazo uYehova utsho akwazi ukuphendula uSathana uMtyholi omgxekayo. (IMize. 27:11) Enye into, iBhayibhile ithi uYehova ukufuna nyhani ‘ukubonisa amandla akhe ngenxa yabo bantliziyo zipheleleyo kuye.’ (2 Kron. 16:9) Ngoko sinokuqiniseka ukuba uYehova uyafuna ukusinceda sinyamezele, unawo namandla okuyenza loo nto.​—Isa. 30:18; 41:10; Luka 11:13.

5. Umthandazo unokusinceda njani sizole? (Isaya 26:3)

⁵ IBhayibhile ithi xa sithandaza ngokusuka entliziyweni, sixelele uYehova ngeengxaki esinazo, ‘uxolo lukaThixo oluyodlulayo indlela yabantu yokucinga, luza kuzikhusela iintliziyo neengqondo zethu.’ (Fil. 4:7) Khawuyicinge ukuba ithetha ukuthini le nto. Xa abantu abangamkhonziyo uYehova beneengxaki baye benze izinto ezahlukahlukeneyo ukuze bazole. Ngokomzekelo, abanye benza into ekuthiwa yimeditation ukuze bangacingi kwanganto, nkqu neengxaki zabo. Kodwa ukwenza le nto kuyingozi kakhulu kuba kunokwenza ingqondo yomntu ilawulwe ziidemon. (Thelekisa uMateyu 12:​43-45.) Lona uxolo esilufumanayo xa sithandaza lulodlula lee olo umntu anokulufumana xa esenza loo meditation. Xa sithandaza kuYehova sibonisa ukuba simthemba ngokupheleleyo, aze asenze ‘sihlale sinoxolo.’ (Funda uIsaya 26:3.) Enye indlela ayenza ngayo loo nto kukusinceda sikhumbule izibhalo ezithuthuzelayo esiye sazifunda kwiLizwi lakhe. Ezo zibhalo zizenza zizole iingqondo neentliziyo zethu, kuba siyazi ukuba uYehova usikhathalele futhi ufuna zisihambele kakuhle izinto.​—INdu. 62:​1, 2.

6. Ungenza ntoni ukuze umthandazo ukuncede kangangoko kunokwenzeka? (Jonga nomfanekiso.)

⁶ Yintoni onokuyenza? Ngoxa unyamezele ingxaki, “wuphosele kuYehova umthwalo wakho” uze umcele akuncede uzole. (INdu. 55:22) Mcele akunike ubulumko ukuze uyazi into omawuyenze. (IMize. 2:​10, 11) Xa umcela akuncede ukwazi ukunyamezela, ungalibali nokumbulela ngezinto akwenzele zona. (Fil. 4:6) Khangela izinto ezibonisa ukuba uyakunceda, uze umbulele. Ungayivumeli ingxaki onayo ikwenze ungaziboni iindlela asele ekusikelele ngazo.​—INdu. 16:​5, 6.

ILIZWI LIKATHIXO

7. Ukufunda iBhayibhile kungasinceda njani sikwazi ukunyamezela?

⁷ Ukuze uYehova asincede sinyamezele, usinike iLizwi lakhe. IBhayibhile ineevesi ezininzi ezisiqinisekisa ukuba uYehova uza kusinceda. Nank’ umzekelo. UMateyu 6:8 uthi: “UTata wenu uzazi ningekaziceli izinto enizidingayo.” La mazwi ayethethwa nguYesu, oyena mntu umazi bhetele kakhulu kunathi uYehova. Ngoko asinasizathu sakuthandabuza ukuba uYehova uyazazi izinto esizidingayo xa sineengxaki, futhi uza kusinceda. IBhayibhile inazo nezinye iivesi ezininzi ezisithembisa ukuba uYehova uza kusinika amandla ukuze sikwazi ukunyamezela.​—INdu. 94:19.

8. (a) Yenza umzekelo womgaqo weBhayibhile onokusinceda sinyamezele. (b) Yintoni enokusinceda siyikhumbule imigaqo yeBhayibhile xa siyidinga?

⁸ Imigaqo yeBhayibhile inokukwazi ukusinceda sinyamezele. Kuyo, sifumana ubulumko obusinceda senze izigqibo ezifanelekileyo. (IMize. 2:​6, 7) Ngokomzekelo, iBhayibhile isikhuthaza ukuba sihoye usuku lube lunye ngexesha, kunokuzikhathaza ngento esenokwenzeka okanye ingenzeki ngomso. (Mat. 6:34) Ukuba siyifunda yonke imihla iBhayibhile, size sicingisise ngezinto esizifundayo, kuza kuba lula ukuyikhumbula imigaqo yeBhayibhile xa siyidiga.

9. Ukufunda ngabantu abaseBhayibhileni kunokusinceda njani siqiniseke ukuba uYehova uza kusinceda?

⁹ IBhayibhile ithetha nangabantu bokwenene abafana nathi abaye bathembela ngoYehova waza wabanceda. (Heb. 11:​32-34; Yak. 5:17) Xa sicinga ngabo, siya siqiniseka ukuba uYehova “uyindawo yokubalekela namandla ethu, uncedo olufumaneka ngokukhawuleza xa sisentlungwini.” (INdu. 46:1) Xa sibona indlela ababethembeke ngayo abakhonzi bakaYehova bakudala, siye sifune ukuba nokholo nokunyamezela njengabo.​—Yak. 5:​10, 11.

10. Ungenza ntoni ukuze iLizwi likaThixo likuncede kangangoko kunokwenzeka?

¹⁰ Yintoni onokuyenza? Funda iBhayibhile yonke imihla uze ugcine iivesi obona ukuba zingakunceda. Abantu abaninzi babone ukuba ukufunda itekisi yosuku ekuseni kubanceda babe nento ekhuthazayo abaza kucinga ngayo esuka eBhayibhileni. Udade onguMariea wabona ukuba yinyani leyo xa kwafunyaniswa ukuba banecancer bobabini abazali bakhe. Yintoni eyamnceda wakwazi ukunyamezela ngoxa wayebahoyile kwiinyanga zabo zokugqibela? Uthi: “Qho ekuseni ndandiye ndifunde umbhalo ethathwe kuwo itekisi yosuku, kwincwadana ethi Ukuhlolisisa IZibhalo Imihla Ngemihla,​ ndize ndicingisise ngawo. Ukwenza loo nto yonke imihla kwandinceda ndacinga ngoYehova nangezinto asifundisa zona ezikwiLizwi lakhe kunokucinga ngeengxaki endandinazo.”​—INdu. 61:2.

ABAZALWANA NOODADE

11. Kutheni kusikhuthaza ukwazi ukuba asizinyamezelanga sodwa iingxaki?

¹¹ Ukuze uYehova asincede sinyamezele, uye wasinika abazalwana noodade abasemhlabeni wonke. Ukwazi nje ukuba “behlelwa bubunzima obufanayo bonke abazalwana [bethu] emhlabeni wonke” kusenza siqiniseke ukuba asikho sodwa. (1 Pet. 5:9) Nyhani ke sinokuqiniseka ukuba nokuba sineyiphi ingxaki, bakhona nabanye abantu abakha banayo baza bayinyamezela. Loo nto ithetha ukuba nathi singakwazi ukunyamezela!​—IZe. 14:22.

12. Banokusinceda njani abazalwana noodade? Thina sinokubanceda njani? (2 Korinte 1:​3, 4)

¹² Njengoko sinyamezele, abazalwana noodade banokusikhuthaza. Wayibona kuye umpostile uPawulos loo nto. Kwiileta zakhe, uPawulos wayedla ngokubabulela abantu ababemnceda xa wayelibanjwa elivalelwe endlini, echaza namagama abo. Bamthuthuzela, bamkhuthaza baza bamnceda nangezinto awayezidinga. (Fil. 2:​25, 29, 30; Kol. 4:​10, 11) Kunokwenzeka into efanayo nakuthi namhlanje. Xa kunzima, abazalwana noodade banokusinceda sikwazi ukunyamezela, nathi sinokwenza loo nto kubo.​—Funda ama-2 Korinte 1:​3, 4.

13. Yintoni eyanceda uMaya wakwazi ukunyamezela?

¹³ UMaya ongudade waseRashiya wakhuthazwa kakhulu ngabazalwana noodade. Ngo-2020 kwagqogqwa ikhaya lakhe, kwaza kwafuneka avele enkundleni ngenxa yokushumayela ebantwini. Uthi: “Ngelo xesha ndandidiniwe, ndisoyika futhi ndibuhlungu, kodwa abazalwana noodade babendibhalela bendifowunela nokundifowunela ukuze bandiqinisekise ukuba bayandithanda. Bendisoloko ndisazi ukuba ndinentsapho enkulu endithandayo, kodwa ndiye ndayibona kakuhle le nto ukususela ngo-2020.”

14. Ukuze abazalwana noodade basincede sikwazi ukunyamezela, yintoni esimele siyenze? (Jonga nomfanekiso.)

¹⁴ Yintoni onokuyenza? Xa unyamezele ingxaki, hlala ukunye nabazalwana noodade. Ungonqeni nokucela abadala bakuncede. ‘Banjengekhusi emoyeni, indawo yokuzifihla kwisiphango.’ (Isa. 32:2) Enye into omele uyikhumbule kukuba nabanye abazalwana noodade banyamezele iingxaki. Xa ubenzela izinto ezintle abazidingayo abantu, uza konwaba utsho ukwazi ukunyamezela neyakho ingxaki.​—IZe. 20:35.

ITHEMBA ESINALO

15. Lamnceda njani ithemba uYesu? Libanceda njani abakhonzi bakaYehova abathembekileyo namhlanje? (Hebhere 12:2)

¹⁵ Ukuze uYehova asincede sinyamezele, usinike ithemba esiqinisekileyo ngalo. (Roma 15:13) Khumbula indlela elamnceda ngayo uYesu wakwazi ukunyamezela olona suku lwalunzima kuye emhlabeni. (Funda amaHebhere 12:2.) Wayesazi ukuba, ukuba uhlala ethembekile, loo nto yayiza kuthethelela igama likaYehova. Wayekhangele phambili ekubuyeleni kuTata wakhe, aze ekuhambeni kwexesha alawule ezulwini nabathanjiswa abayi-144 000. Ngendlela efanayo, ithemba lethu lokuphila ngonaphakade kwihlabathi elitsha likaThixo lisinceda sinyamezele nayiphi na ingxaki esidibana nayo kwihlabathi likaSathana.

16. Ithemba limncede njani omnye udade wakwazi ukunyamezela? Ufunda ntoni wena kwinto ayithethayo?

¹⁶ Khawuve indlela elamnceda ngayo ithemba loBukumkani omnye udade waseRashiya, uAnna. Umyeni wakhe wayevalelwe, kulindwe ukuxoxwa kwetyala lakhe. Xa yenzekayo le nto, uAnna wathi: “Ukuthandaza ngethemba esinalo nokucingisisa ngalo kundinceda ndingatyhafi kakhulu. Ndiyazi ukuba akuzukuhlala kunje. UYehova uza kuzoyisa iintshaba zakhe aze asisikelele.”

17. Yintoni esinokuyenza ukuze sibonise ukuba siyalixabisa ithemba esinalo? (Jonga nomfanekiso.)

¹⁷ Yintoni onokuyenza? Ziphe ixesha, ucinge ngethemba elimangalisayo uYehova asinike lona. Zibone ukwihlabathi elitsha likaThixo, uzibone zisenzeka nezinto athe uza kusenzela zona. Nayiphi na ingxaki onayo ngoku iza kubonakala ‘iyinto egqithayo nencinci.’ (2 Kor. 4:17) Enye into onokuyenza kukuxelela nabanye abantu ngethemba onalo. Inoba kunjani kubo ukunyamezela iingxaki zeli hlabathi likaSathana, bengazazi nezinto uThixo aza kusenzela zona kwixesha elizayo? Nencoko nje emfutshane nabo inokubenza babe nomdla kwithemba esinalo loBukumkani.

18. Kutheni sinokumthemba uYehova ukuba uza kuzenza izinto asithembise zona?

¹⁸ Emva kokuba enyamezele iingxaki ezininzi, uYobhi wathi kuYehova: “Ngoku ndiyazi ukuba akukho nto ungenakukwazi ukuyenza, nokuba akukho nto inokukuxaka xa ucinge ukuyenza.” (Yobhi 42:2) UYobhi wafunda ukuba akukho nto inokuzinqanda zingenzeki izinto uYehova azimisele ukuzenza. Loo nto inokusinceda nathi sinyamezele. Ngokomzekelo, cinga ngebhinqa eligulayo nelityhafiswe kukuba oogqirha abaninzi bengakwazanga ukulinyanga. Kodwa xa ugqirha othenjwayo elixelela ukuba yintoni eligulisayo aze alichazele indlela aza kulinyanga ngayo, liyavuya nangona kuza kudlula ixesha ngaphambi kokuba liphile. Ithemba elinalo eli bhinqa lokuba liza kuphila, lilinceda likwazi ukunyamezela. Ngendlela efanayo, nathi siyakwazi ukunyamezela kuba siqinisekile ukuba iParadesi iza kufika.

19. Ziintoni esizidingayo ukuze sinyamezele?

¹⁹ Njengoko sesibonile, ukuze uYehova asincede sinyamezele usebenzisa umthandazo, iLizwi lakhe, abazalwana noodade nethemba esinalo. Ukuba senza yonke into elindelekileyo kuthi ukuze zisincede ezi zinto, uYehova uza kuba nathi kuzo zonke iingxaki esinokuba nazo, de kufike imini apho ziza kube zingasekho iingxaki zehlabathi likaSathana.​—Fil. 4:13.