Ungakwazi Ukumelana Nokungabikho Kokusesikweni!
NGABA ukho umntu ongekaze aphathwe ngokungekho sikweni? Ngoxa ezinye izenzo zokungekho sikweni sisiva nje ngazo okanye sizicingela, ezinye zenzeka ngokoqobo.
Nanini siphathwa ngokungekho sikweni, siba buhlungu ibe oko kunokuchaphazela ulwalamano lwethu noThixo. Sisenokufuna ukuyilungisa loo meko. Ngoba? Esinye isizathu sikukuba uMdali wethu, uYehova uThixo, ‘ongenabo kwaphela ubugqwetha,’ wasidala safuna okusesikweni. (Duteronomi 32:4; Genesis 1:26) Noko ke, kukho iimeko apho sisenokuvakalelwa kukuba izinto azenziwa ngokusesikweni. Esinye isilumko sakha sathi: “Ndabuya ke ndazibona zonke izenzo zengcinezelo ezenziwayo phantsi kwelanga, yaye, khangela! iinyembezi zabo bacinezelweyo, kodwa bengenamthuthuzeli; yaye kwicala labacinezeli kwakukho amandla, khon’ ukuze bangabi namthuthuzeli.” (INtshumayeli 4:1) Yintoni ke esinokuyenza ukuze sikwazi ukuhlangabezana nokungabikho kokusesikweni?
Kuyintoni Kanye Kanye Okungekho Sikweni?
Okungekho sikweni kukwaphulwa ngabom kwemilinganiselo yokusesikweni. Yiyiphi imilinganiselo yokusesikweni yabantu? Kucacile ukuba, uMdali wethu olilungisa nongaguqukiyo unegunya lokusibekela imilinganiselo yokusesikweni nokungekho sikweni. Ngokwembono yakhe, ukuhamba ‘kwimimiselo yobomi’ kuthetha ‘ukungakwenzi okungekho sikweni.’ (Hezekile 33:15) Ngoko xa uYehova wayedala umntu wokuqala, wamfaka isazela—ilizwi elingaphakathi elimnceda ahlule okulungileyo kokubi. (Roma 2:14, 15) Ukongezelela koko, kwiLizwi lakhe iBhayibhile, uYehova ukuchaza kakuhle okusesikweni nokungekho sikweni.
Kuthekani xa sivakalelwa ukuba siye sadlelw’ indlala? Kuhle ukuqala siwuhl’ amahlongwane umbandela ukuze sibone enoba kunjalo kusini na. Ngokomzekelo, cinga ngemeko awaba kuyo umprofeti ongumHebhere uYona. UYehova wamthuma ukuba alumkise abantu baseNineve ngentlekele eyayiza kubehlela. Ekuqaleni uYona wasaba engawenzanga umsebenzi wakhe. Noko ke, ekugqibeleni wada waya eNineve, elumkisa abantu balapho ngaloo ntlekele. Ngenxa yokusabela kwabo kakuhle, uYehova wagqiba ekubeni asisindise eso sixeko nabantu baso. Wavakalelwa njani uYona koko? “Oku kwakungamkholisi kakhulu uYona, yaye wavutha ngumsindo.” (Yona 4:1) Wayevakalelwa kukuba uYehova akenzi ngokusesikweni.
Kucacile ukuba, uYehova okwaziyo ukufunda iintliziyo ‘nongumthandi wobulungisa nokusesikweni,’ wayengaphazami. (INdumiso 33:5) Yena uYona wayemele afunde ukuba eso sigqibo sikaYehova sasisesikweni ngokupheleleyo. Xa sivakalelwa kukuba asikhange siphathwe kakuhle, sisenokuzibuza oku, ‘Ngaba akunakuthi kanti uYehova uwubona ngenye indlela lo mbandela?’
Xa Ujamelene Nokungekho Sikweni
IBhayibhile ichaza iziganeko ezininzi zabantu abaye baphathwa ngokungekho sikweni. Sinokukufunda lukhulu xa sihlola indlela abajamelana ngayo neengxaki. Khawucinge nje ngoYosefu, owathengiswa ngabantakwabo abanomona ukuze abe likhoboka eYiputa. Elapho eYiputa, umfazi wenkosi yakhe wazama ukumhenda, kodwa wathi akungavumi, lo mfazi wamtyhola ngokufuna ukulala naye. Ngenxa yoko, uYosefu wavalelwa entolongweni. Kodwa, ukholo lwakhe lwalomelele kunaloo matyathanga wayebotshwe ngawo. Akazange adinyazwe kokungekho sikweni okanye ayeke ukukholosa ngoYehova.—Genesis 37:18-28; 39:4-20; INdumiso 105:17-19.
Enye indoda eyaphathwa ngokungekho sikweni nguNabhoti. Waba lixhoba leyelenqe elaqulunqwa nguIzebhele, umfazi kaKumkani uAhabhi wakwaSirayeli. Lo kumkani wayenqwenela isidiliya esasililifa likaNabhoti esasikufuphi nebhotwe. Kwakungavumelekanga ukuba umSirayeli athengise ngomhlaba olilifa lakhe, ngenxa yoko uNabhoti wala ukuthengisela ukumkani umhlaba. (Levitikus 25:23) Kwakuba njalo, umfazi ongendawo ka-Ahabhi wafuna amangqina obuxoki, awatyhola uNabhoti ngokuqalekisa uThixo nokumkani. Oko kwambulalisa uNabhoti noonyana bakhe. Unokuyicinga indlela awayeziva ngayo uNabhoti njengoko wayexulutywa ngamatye.—1 Kumkani 21:1-14; 2 Kumkani 9:26.
Yonke le mizekelo iba mincinane gqitha xa uyithelekisa noko kwenzeka kuKristu Yesu. Isigwebo sokufa kwakhe sakhutshwa phantsi kobuxoki nokuthethwa kwetyala ngokungekho mthethweni. Irhuluneli yaseRoma eyayichophele elo tyala yasilela ukumela inyaniso eyayizicacele. (Yohane 18:38-40) Ngokwenene, uSathana waphatha uKristu Yesu ngokungekho sikweni, ngendlela engazange ibonwe nakubani na.
Ngaba le mizekelo yokungekho kokusesikweni ibonisa ukuba uYehova ukuthabatha lula okungekho sikweni? Nakanye! UYehova akazange azijonge ngokwembono yabantu ezo ziganeko. (Isaya 55:8, 9) Ukuthengiswa kukaYosefu ebukhobokeni, kwamenza wakwazi ukunceda intsapho yakowabo. Waba ngumabi wokutya eYiputa ngaphambi kwendlala enkulu eyabetha nentsapho yakowabo. Ukuba uYehova wayengazange akuvumele oko kungabikho kokusesikweni, uYosefu wayengayi kuvalelwa entolongweni. Kaloku kulapho entolongweni apho watolika amaphupha amabanjwa amabini, laza elinye lawo laxelela uFaro ngoYosefu, nto leyo eyakhokelela ekubeni uYosefu abe ngumabi wokutya.—Genesis 40:1; 41:9-14; 45:4-8.
Kuthekani ngoNabhoti? Nakulo umba, zama ukuba nembono kaYehova. Ekubeni uYehova enokubavusa abafileyo, uNabhoti wayefana nophilayo, nakuba isidumbu sakhe sasiqungquluze emhlabeni. (1 Kumkani 21:19; Luka 20:37, 38) UNabhoti umele alinde de kufike ixesha lokuba uYehova amvuse, kodwa elo xesha lifana noqhwanya nje kuba abafileyo abazi nto. (INtshumayeli 9:5) Enye into, uYehova wamphindezelela uNabhoti ngokohlwaya uAhabhi nendlu yakhe.—2 Kumkani 9:21, 24, 26, 35, 36; 10:1-11; Yohane 5:28, 29.
Yena uYesu wafa, kodwa uThixo wamvusa waza wamphakamisa “waba ngaphezulu lee kwabo bonke oorhulumente negunya namandla nobukhosi nalo lonke igama elibizwayo.” (Efese 1:20, 21) Okungekho sikweni okwenziwa nguSathana kuKristu Yesu akuzange kumthintele uYehova ekuvuzeni uNyana wakhe. UYesu wayeqinisekile ukuba xa uYehova ethanda, wayenokumkhulula njengoko wayebanjwe ngokungekho sikweni. UKristu wayesazi nokuba uYehova unexesha lokuzalisekisa iZibhalo nelokulungisa nakuphi na ukungabikho kokusesikweni.
Yinyaniso ukuba, uSathana namahlakani akhe baye bawaphatha kabuhlungu amalungisa, kodwa uYehova uye wawulungisa umonakalo, yaye useza kuwulungisa ngokupheleleyo. Ngoko, simele silindele kuThixo ukuba alungise okungekho sikweni.—Duteronomi 25:16; Roma 12:17-19.
Isizathu Esinokwenza UYehova Avumele Okungekho Sikweni
UYehova usenokuba nezizathu zokungangeneleli kwimeko ethile. Ngenjongo yokusiqeqesha njengamaKristu, usenokuvumela ukuba siphathwe ngokungekho sikweni. Kakade ke, ‘uThixo akalingi namnye umntu ngezinto ezimbi.’ (Yakobi 1:13) Sekunjalo, usenokuyeka imeko ethile iqhubeke engangeneleli, aze abomeleze abo balwamkelayo olo qeqesho. IBhayibhile isiqinisekisa isithi: “Emva kokuba nibandezeleke okwethutyana, uThixo wabo bonke ububele obungasifanelanga . . . uya kulugqiba ngokwakhe uqeqesho lwenu, uya kuniqinisa, uya kunomeleza.”—1 Petros 5:10.
Enye into, ukuvumela kukaYehova okungekho sikweni okuthile kusenokuvulela aboni ithuba lokuguquka. Kwiiveki nje ezimbalwa ebulewe uYesu, kumaYuda athile awayephulaphule isibongozo sikaPetros “kwathi xhokro entliziyweni.” Alamkela ngokusuka entliziyweni ilizwi likaThixo aza abhaptizwa.—IZenzo 2:36-42.
Kuyavunywa ukuba, asingabo bonke aboni abaya kuguquka. Abanye basenokuya beqatsela kwizenzo zokungekho sikweni. Kodwa, IMizekeliso 29:1 ithi: “Umntu owohlwaywa ngokuphindaphindiweyo kodwa ayenze lukhuni intamo yakhe uya kwaphulwa ngequbuliso, aze angaphiliswa.” Ekugqibeleni, uYehova uya kungenelela aze atshabalalise bonke abo baqhubeka beziphatha kakubi.—INtshumayeli 8:11-13.
Enoba kuthabath’ ixesha elingakanani na ukuchacha, siqinisekile ukuba uYehova uyayazi indlela yokusinceda. Uza kuwulungisa nakanjani na wonke umonakalo esiye sawufumana kule nkqubo yezinto ingendawo. Ngaphezulu, usithembisa umvuzo wokugqibela, ubomi obungunaphakade kwihlabathi elitsha “apho kumi ubulungisa.”—2 Petros 3:13.
[Umfanekiso okwiphepha 16, 17]
Umele ukuba wayevakalelwa njani uNabhoti njengoko wayebulawa ngokungekho sikweni?