1925​​​—Kwiminyaka Elikhulu Eyadlulayo

ITHEMBA ELIBANJEZELWEYO

ABafundi BeBhayibhile abaninzi babelindele ukuba ngo-1925 umhlaba wawuza kuba yiParadesi. Kwakutheni? UMzalwana uAlbert Schroeder, owaba kwiQumrhu Elilawulayo wathi: “Kwakucingwa ukuba ngaloo nyaka abalandeli bakaKristu abathanjisiweyo ababesesemhlabeni babeza kuya ezulwini, bayokuba ngookumkani kuBukumkani BukaThixo, nokuba amadoda akudala awayethembekile anjengoAbraham, uDavide nabanye ayeza kuvuswa, abe ziinkosana ezilawula emhlabeni phantsi koBukumkani BukaThixo.” Njengoko unyaka wawusiya uhamba, nezinto ababezilindele zingenzeki, abanye abazalwana noodade baphoxeka.​—IMize. 13:12.

Bephoxeke benjalo, aBafundi BeBhayibhile abaninzi zange bayeke ukuxakeka ngumsebenzi wokushumayela. Baqonda ukuba ukushumayela ngoYehova kwakuyeyona nto ibalulekileyo ababemele bayenze. Ngokomzekelo, khawucinge ngomsebenzi abawenzayo wokusasaza inyaniso kwiindawo ezikude.

UKWANDA KWEZITISHI ZEREDIYO

Ngenxa yokuba ngo-1924 babebaninzi abantu ababemamela isitishi serediyo iWBBR, aBafundi BeBhayibhile bakha esinye ekwakusithiwa yiWORD, kodwa ngoku ngaseChicago, eIllinois. Omnye wabantu ababesakha eso sitishi, uRalph Leffler, wathi: “Ebusika xa kubanda ebusuku, abantu abaninzi ababehlala kwiindawo ezikude babemamela iWORD.” Ngokomzekelo, enye intsapho eyayihlala ePilot Station eAlaska, eyayikumgama oziikhilomitha ezingaphezu kwe-5 000 yamamela enye yeenkqubo zokuqala ezasasazwayo. Emva kokuba imamele, yabhalela abantu ababesebenza kweso sitishi, ibabulela ngenkqubo yeBhayibhile ekhuthaza ngolo hlobo.

Ichaza indlela ezazininzi ngayo iindawo esasimanyelwa kuzo esi sitishi, iMboniselo kaDisemba 1, 1925, yathi: “I-WORD sesinye sezona zitishi zihamba phambili eUnited States. Sivakala kakuhle kwiindawo ezikwimpuma nentshona yeUnited States, eCuba nakwezona ndawo zisemantla eAlaska. Abantu abaninzi abangazange bayiva inyaniso baye banomdla wokuyiva ngenxa yaso.”

Kwangelo xesha, aBafundi BeBhayibhile babexakekile, bezama ukuba iindaba ezilungileyo zishunyayelwe ngerediyo naseKhanada. Ngo-1924 kwakhiwa isitishi serediyo iCHUC eSaskatoon, eSaskatchewan. Yaba sesinye sezitishi zokuqala zenkonzo eKhanada. Ngo-1925 esi sitishi sincinci kwafuneka sisiwe kwenye indawo. Ngoko saba kwigama leWatch Tower Society, yaza yasisa kwiRegent Building, iholo endala yemidlalo yeqonga eyayiseSaskatoon neyayithengiwe yaza yalungiselelwa ukusasaza.

Abantu abaninzi abahlala kwiidolophana nakwiilali zaseSaskatchewan baqala ukuva iindaba ezilungileyo kweso sitishi. Ngokomzekelo, emva kokumamela inkqubo eyayisasazwa, uNkskz. Graham othile owayehlala kwidolophu eyayisemaphandleni, wabhala ecela iincwadi ezithetha ngeBhayibhile. Umzalwana uGeorge Naish uthi: “Isikhalo sakhe esasisithi ‘Sifundiseni!’ kwabonakala ukuba sivakale kakhulu kuba sayithumela yonke imiqulu yencwadi ethi Studies in the Scriptures.” Kungabanga xesha lide, uNkskz. Graham wasasaza umyalezo woBukumkani nakwiindawo ezikude.

SAFUNDA INYANISO EBALULEKILEYO

IMboniselo kaMatshi 1, 1925, yayinenqaku elibalulekileyo elalinomxholo othi “Ukuzalwa Kohlanga.” Lalibaluleke ngantoni eli nqaku? Kaloku kangangexesha aBafundi BeBhayibhile babesazi ukuba uSathana unentlangano yakhe, nekukho kuyo iidemon, iinkonzo zobuxoki, oosomashishini neepolitiki zeli hlabathi. Sekunjalo, ‘ikhoboka elithembekileyo neliyingqondi’ lasebenzisa elo nqaku ukuze lincede abazalwana noodade baqonde ukuba noYehova unentlangano yakhe, eyahluke mpela kwekaSathana nengasebenzisaniyo nayo. (Mat. 24:45) Enye into, ikhoboka lacacisa ukuba ngo-1914 kwamiselwa uBukumkani BukaThixo, kwangaloo nyaka, kwabakho ‘imfazwe ezulwiniʼ waza uSathana needemon zakhe bagxothwa ezulwini. Ngoku balapha emhlabeni.​—ISityhi. 12:​7-9.

Kwakunzima kwabanye ukuyamkela le ndlela intsha ziqondwa ngayo izinto. Ngoko eli nqaku lathi: “Ukuba kukho abafundi beMboniselo abangavumelaniyo nento ethethwa apha, kucetyiswa ukuba bazole, bathembele kuYehova, bangayeki nokumkhonza.”

Kodwa uTom Eyre waseBritani, nowayeyicolporteur (ngoku ekuthiwa nguvulindlela) wayichaza kanje indlela ababeziva ngayo aBafundi BeBhayibhile abaninzi ngeli nqaku: “Abazalwana bayivuyela le ndlela sicaciswa ngayo iSityhilelo 12. Sathi sakuqonda ukuba uBukumkani babumiselwe ezulwini, sakukhuthalela nyhani ukuxelela abantu ngezo ndaba zilungileyo. Ngokuqinisekileyo loo nto yasenza sashumayela kakhulu kunangaphambili, saza sayibona nendlela uYehova abakhokelela ngayo kwizinto ezinkulu abantu bakhe.”

UKUNGQINELA UYEHOVA

Namhlanje, amaNgqina KaYehova aqhelene kakhulu namazwi akuIsaya 43:10 athi: “‘Ningamangqina am,’ utsho uYehova, ‘ningumkhonzi wam endimkhethileyo.’” Kodwa ngaphambi konyaka ka-1925, esi sibhalo kwakungafane kuthethwa ngaso kwiincwadi zethu. Yayiza kutshintsha ke loo nto. Ngo-1925, kwathethwa ngoIsaya 43:10 no-​12 kwiiMboniselo eziyi-11.

Ekupheleni kuka-Agasti 1925, aBafundi BeBhayibhile baba nendibano eIndianapolis, eIndiana. Kumyalezo wokubamkela owawubhalwe kucwangciso lwaloo ndibano, uJoseph F. Rutherford wathi: “Kule ndibano size kufumana . . . amandla eNkosini ukuze sibuyele entsimini sihlaziyelwe ukuba ngamaNgqina ayo.” Kuloo ndibano yeentsuku eziyi-8, abantu ababekuyo bakhuthazwa ukuba bangqinele uYehova nanini na kuvela ithuba.

NgoMgqibelo, nge-29 ka-Agasti, uMzalwana uRutherford wanikela intetho eyayinomxholo othi: “Ubizo Lokwenza Umsebenzi.” Kule ntetho, wachaza indlela ekubaluleke ngayo ukushumayela, esithi: “UYehova uthi kubantu bakhe . . . : ‘Nina ngokwenu ningamangqina am, ukuba ndinguThixo.’ Emva koko, eqinisekile ubanika lo myalelo ucacileyo: ‘Misani imbasa, nezizwe zitsho ziqonde.’ Okuphela kwabantu abanokumisa imbasa emhlabeni, nezizwe zitsho ziqonde, ngabo iNkosi ibakhokela ngomoya wayo, kuba bangamangqina ayo.”​—Isa. 43:12; 62:10.

Emva kwentetho kaMzalwana uRutherford, bonke abantu ababekho bamkela isigqibo esasinomxholo othi “Isigidimi Sethemba,” esasibonisa ukuba uBukumkani BukaThixo bukuphela kwethemba esinalo lokufumana “iintsikelelo zoxolo, impumelelo, impilo, ubomi, inkululeko nolonwabo olungasoze luphele.” Ekuhambeni kwexesha, saguqulelwa kwiilwimi ezininzi saza saprintwa. Kwasasazwa amaphecana aso amalunga ne-40 miliyon.

Kwadlula iminyaka aBafundi BeBhayibhile bengade babizwe ngokuba bangamaNgqina KaYehova. Sekunjalo, babesiya bewuqonda umsebenzi ababenawo wokuba ngamangqina akhe.

UKUBUYELA KUBANTU ABANOMDLA

Njengoko inani laBafundi BeBhayibhile lalisiya lisanda emhlabeni wonke, bakhuthazwa ukuba babuyele kubantu ababenomdla kwiindaba ezilungileyo. Emva kwephulo lokuhambisa iphecana elithi Isigidimi Sethemba, iBulletina yathi: “Lungiselelani ukubuyela kumakhaya ekungashiywanga ncwadi kuwo, kodwa ekuye kwashiywa iphecana elithi Isigidimi Sethemba.”

KwiBulletin kaJanuwari 1925 kwakukho le ngxelo yomnye waBafundi BeBhayibhile wasePlano, eTexas: “Sivuyiswa kukuba intsimi ekuye kwabuyelwa kaninzi kuyo idla ngokuba bhetele kunentsimi eqalwayo. Kwidolophu encinci ekwintsimi yethu, kuye kwabuyelwa kayi-5 kule minyaka iyi-10 idlulileyo. . . . Kutshanje, uDade Hendrix nomama baye babuyela kuyo baza bahambisa iincwadi ezininzi kunakuqala.”

Nakwilizwe lasePanama, enye icolporteur yathi: “Abantu abaninzi abaye bandigxothe xa ndisemnyango emakhayeni abo bayatshintsha xa ndibuyela okwesibini okanye okwesithathu. Kulo nyaka bendixakeke kakhulu kukubuyela kubantu endiye ndashumayela kubo. Zindivuyisa kakhulu izinto eziye zenzeka kwabanye babo.”

IZINTO EZAZIZA KWENZEKA KUNYAKA OLANDELAYO

Kwileta yonyaka awayibhalela zonke iicolporteur, uMzalwana uRutherford wachaza izinto ezazenziwe kumsebenzi wokushumayela kuloo nyaka, wathetha nangezinto ezazimele zenziwe kunyaka olandelayo. Wathi: “Kulo nyaka uphelayo niye nanenyhweba yokuthuthuzela abantu abaninzi abebekhathazekile. Lo msebenzi uye wanivuyisa . . . Kulo nyaka nijongene nawo niza kufumana amathuba okungqinela uThixo noBukumkani bakhe, nokumisa imbasa, nezizwe zitsho ziqonde. . . . Masiqhubeke simanyene, sisebenzisa amazwi ethu ekudumiseni uThixo noKumkani wethu.”

Ekupheleni kuka-1925 abazalwana babesenza iiplani zokwandisa izakhiwo zaseBrooklyn. Ngo-1926 intlangano yayiza kuqalisa umsebenzi wokwakha, owawuza kuba mkhulu ngendlela engazange ibekho ngaphambili.