Ungayiphucula Njani Imithandazo Yakho?

1-2. (a) Yintoni enokusenza singamxeleli yonke into esentliziyweni uYehova? (b) Sazi njani ukuba uYehova uyimamela kakuhle imithandazo yethu?

NGABA ngamanye amaxesha uye uqaphele ukuba xa uthandaza uphindaphinda into enye okanye imithandazo yakho ayisuki ntliziyweni? Ukuba kunjalo, awukho wedwa. Ngenxa yokuba sixakekile, sisenokuthandaza singxamile. Okanye kusenokuba nzima ukuchazela uYehova yonke into esentliziyweni kuba siziva ngathi asikufanelanga ukuthetha naye.

² IBhayibhile iyasiqinisekisa ukuba eyona nto ibalulekileyo kuYehova ayikokuba sithandaza kamnandi kangakanani, kodwa kukuba sizithobe, nemithandazo yethu isuke entliziyweni. ‘Uyasiva isicelo sabalulamileyo.’ (INdu. 10:17) Kuba enomdla nyhani kuthi, uyimamela kakuhle yonke into esiyithethayo xa sithandaza.​—INdu. 139:​1-3.

3. Yeyiphi imibuzo eza kuphendulwa kweli nqaku?

³ Sisenokuzibuza: Kutheni sinokuthandaza sikhululekile kuYehova? Yintoni esinokuyenza ukuze imithandazo yethu isisondeze kuye? Ukufunda ngemithandazo eseBhayibhileni kunokusinceda njani siphucule imithandazo yethu? Yintoni esinokuyenza xa singakwazi ukuchazela uYehova indlela esiziva ngayo ngenxa yokuba sikhathazeke kakhulu? Makhe sithethe ngeempendulo zale mibuzo.

THANDAZA KUYEHOVA UKHULULEKILE

4. Yintoni enokusinceda sithethe noYehova sikhululekile? (INdumiso 119:145)

⁴ Xa siqonda ukuba uYehova ngumhlobo wethu esinokumthemba nofuna izinto zisihambele kakuhle, siza kubona ukuba sinokuthetha naye sikhululekile. Umbhali weNdumiso 119 wazama ukuba nobuhlobo obunjalo noYehova. Ubomi bakhe babungekho lula. Kwakukho abantu ababexoka ngaye. (INdu. 119:​23, 69, 78) Wayetyhafiswa nazizinto awayengazenzi kakuhle. (INdu. 119:5) Sekunjalo, zange oyike ukuxelela uYehova indlela aziva ngayo.​—Funda iNdumiso 119:145.

5. Kutheni simele singavumeli nantoni na isenze singathandazi? Yenza umzekelo.

⁵ UYehova ukhuthaza nabo benze iimpazamo ezinkulu ukuba bathandaze kuye. (Isa. 55:​6, 7) Ngoko asimele sivumele nantoni na isenze singathandazi. Ngokomzekelo, umntu oqhuba inqwelo-moya uyazi ukuba xa edinga uncedo unokufowunela eairport. Ngaba umele oyike ukufowunela khona kuba eneentloni zokuba elahlekile okanye enze impazamo? Hayi! Ngokufanayo, nokuba ngamanye amaxesha siziva silahlekile okanye siye sona, sinokuthandaza kuYehova sikhululekile.​—INdu. 119:​25, 176.

THANDAZA NGENDLELA EKUSONDEZA KUYEHOVA

6-7. Ukucinga ngeempawu zikaYehova kusinceda njani sithandaze ngendlela eza kusinceda sisondele kuye? Yenza umzekelo. (Jonga nombhalo osemazantsi.)

⁶ Xa sithetha noYehova sikhululekile, ngokumxelela ezona zinto sizicingayo neyona ndlela siziva ngayo, imithandazo yethu iza kusisondeza kuye. Sinokuyenza njani le nto?

⁷ Cinga ngeempawu zikaYehova.a Xa sisoloko sicinga ngeempawu zakhe, kuza kuya kusiba lula ukumxelela indlela esiziva ngayo. (INdu. 145:​8, 9, 18) Cinga ngodade onguKristine, owayenotata ondlongondlongo. Uthi: “Kwakungekho lula ngam ukuthetha noYehova ngendlela ebendinokuthetha ngayo notata. Ndandicinga ukuba iimpazamo zam zaziza kwenza uYehova ayeke ukundithanda.” Loluphi uphawu lukaYehova olumncedileyo? Uthi: “Uthando lukaYehova olungagungqiyo lundenza ndizive ndikhuselekile. Ndiyazi ukuba akazukundishiya. Kuba endithanda, naxa ndisiwa, uza kundiphakamisa. Le nto indinceda ndimchazele ezona zinto zindivuyisayo nezona zinto zindikhathazayo.”

8-9. Kusinceda njani ukucinga ngento esiza kuyithetha ngaphambi kokuba sithandaze? Yenza umzekelo.

⁸ Cinga ngento oza kuyithetha. Ngaphambi kokuba uthandaze, kukho imibuzo osenokuzibuza yona. Ngokomzekelo: ‘Zeziphi iingxaki endinazo ngoku? Ukhona umntu ekufuneka ndimxolele? Ngaba kukho into esand’ ukutshintsha ubomi bam, endidinga ukuba uYehova andincede kuyo?’ (2 Kum. 19:​15-19) Sinokulinganisa noYesu ngokucinga ngezinto esinokuzicela kuYehova, ezinento yokwenza negama Lakhe, uBukumkani Bakhe nokuthanda Kwakhe.​—Mat. 6:​9, 10.

⁹ Xa udade onguAliska wafumanisa ukuba umyeni wakhe unecancer yengqondo eza kumbulala, kwakunzima kuye ukuthandaza. Uthi: “Ndandikhathazeke kakhulu kangangokuba ndandingayazi into emandiyithethe xa ndithandaza.” Uncedwe yintoni? Ucacisa athi: “Ngaphambi kokuba ndithandaze, ndiye ndiqale ndicinge ngezinto endiza kuzithetha. Loo nto indinceda ndingathethi ngam ndodwa. Ngoku ndiyazola ndize ndithethe noYehova ngezinto ezahlukeneyo xa ndithandaza.”

10. Kutheni simele sizame ukuthi chu xa sithandaza? (Jonga nemifanekiso.)

¹⁰ Yithi chu xa uthandaza. Ngoxa imithandazo emifutshane isenokusisondeza kuYehova, kukuthatha ixesha lethu xa sithandaza okunokusinceda simxelele eyona ndlela siziva ngayo.b UElijah, umyeni ka-Aliska uthi: “Ndiye ndizame ukuthandaza kaninzi ngosuku, kodwa kukuthi chu xa ndithandaza okuye kwandisondeza kuYehova. Imithandazo yam ayimkruquli, imenze afune ndikhawuleze ndigqibe. Ngoko ndinokuthatha ixesha lam.” Khawuzame le nto: Khetha ixesha nendawo ongazukuphazanyiswa kuyo. Unokude uthandaze ngokuvakalayo, uyenze isiqhelo into yokuthi chu xa uthandaza.

CINGA NGEMITHANDAZO ESEBHAYIBHILENI

11. Kunokukunceda njani ukucinga ngemithandazo ebhalwe eBhayibhileni? (Jonga nebhokisi ethi: “Ngaba Uziva Njengabo?”)

¹¹ Kunokukunceda ukucinga ngemithandazo, iingoma okanye iindumiso eziseBhayibhileni. Njengoko ubona ukuba abakhonzi bakaThixo babeyichaza njani eyona ndlela abaziva ngayo, uza kutsho ufune ukumxelela le nto isentliziyweni uYehova. Kwimithandazo yabo usenokufumana neendlela ezintsha zokumdumisa. Usenokude ufumane imithandazo edibana nemeko yakho.

12. Yeyiphi imibuzo esinokuzibuza yona xa sifunda umthandazo oseBhayibhileni?

¹² Njengoko ufunda umthandazo oseZibhalweni, zibuze: ‘Ngubani owayethetha la mazwi, futhi kwakusenzeka ntoni ebomini bakhe? Ngaba kulo mthandazo kuchazwa indlela endiziva ngayo nam? Ndifunda ntoni kuwo?’ Kusenokufuneka uphande ukuze ufumane iimpendulo zale mibuzo, kodwa soze uzisole. Cinga ngale mizekelo imbalwa.

13. Yintoni esinokuyifunda kuHana ngomthandazo? (1 Samuweli 1:​10, 11) (Jonga ongaphandle.)

¹³ Funda u-1 Samuweli 1:​10, 11. Xa uHana wayesenza lo mthandazo, wayeneengxaki ezimbini ezinkulu. Wayengakwazi ukukhulelwa, nomnye umfazi wendoda yakhe emphilisa kabuhlungu. (1 Sam. 1:​4-7) Ukuba unengxaki engapheliyo, yintoni onokuyifunda kumthandazo kaHana? Ukuthi chu xa ethandaza nokuxelela uYehova le nto yayisentliziyweni yakhe, kwamenza waziva bhetele. (1 Sam. 1:​12, 18) Nathi sinokuziva bhetele xa ‘siwuphosela kuYehova umthwalo wethu,’ ngokumchazela indlela esiziva ngayo ngeengxaki esinazo.​—INdu. 55:22.

14. (a) Yintoni enye esiyifundayo kuHana? (b) Ukucingisisa ngezinto esizifunda eZibhalweni kunokuyiphucula njani imithandazo yethu? (Jonga umbhalo osemazantsi.)

¹⁴ Emva kweminyaka embalwa uSamuweli ezelwe, uHana wamsa kuMbingeleli Omkhulu uEli. (1 Sam. 1:​24-28) Umthandazo wakhe owawusuka entliziyweni wabonisa ukuba wayeqinisekile ukuba uYehova uyabakhusela kwaye uyabakhathalela abantu abamkhonza bengagungqi.c (1 Sam. 2:​1, 8, 9) Iingxaki zakhe zasekhaya zazingekapheli, kodwa wacinga ngendlela uYehova awayemsikelele ngayo. Sifunda ntoni ke thina? Ukucinga ngendlela uYehova aye wasinceda ngayo de kwangoku, kunokusinceda sikwazi ukunyamezela iingxaki ezingapheliyo.

15. Xa siphethwe kakubi, yintoni esinokuyifunda kumthandazo kaYeremiya? (Yeremiya 12:1)

¹⁵ Funda uYeremiya 12:1. Umprofeti uYeremiya wakha wakhathazwa kukubona abantu abangalunganga bephumelela. Wayetyhafiswa nayindlela amaSirayeli awayemphethe ngayo. (Yer. 20:​7, 8) Sinokuziva ngendlela efanayo xa sibona abantu abangalunganga bephumelela okanye kuhlekiswa ngathi. Nangona uYeremiya wamxelelayo indlela ezazimcaphukisa ngayo ezi zinto, zange athandabuze ukuba uThixo unobulungisa. Xa wabona uYehova ebohlwaya abantu Bakhe abangathobeliyo, umele ukuba waqiniseka ukuba nyhani unobulungisa. (Yer. 32:19) Nathi sinokumchazela sikhululekile uYehova izinto ezisicaphukisayo, siqinisekile ukuba ngexesha lakhe uza kuzilungisa.

16. Xa iimeko zethu zingasivumeli ukuba simkhonze ngendlela esiyifunayo uYehova, yintoni esinokuyifunda kumLevi owayesekuthinjweni? (INdumiso 42:​1-4) (Jonga nemifanekiso.)

¹⁶ Funda iNdumiso 42:​1-4. Le ngoma yabhalwa ngumLevi owayesekuthinjweni nowayengakwazi ukuya kukhonza namanye amaSirayeli. Indumiso yakhe ibonisa indlela awayeziva ngayo. Sinokuziva njengaye ukuba asikwazi ukuphuma emakhayeni ethu okanye sivalelwe etrongweni ngenxa yokholo lwethu. Indlela esiziva ngayo inokutshintshatshintsha, kodwa senza kakuhle xa siyichaza kuYehova. Le nto inokusinceda sihlolisise indlela esiziva ngayo, size siyijonge ngendlela eyahlukileyo imeko esikuyo. Ngokomzekelo, lo mLevi wabona ukuba wayeza kuba neendlela ezintsha zokudumisa uYehova. (INdu. 42:5) Wacinga nangendlela uYehova awayemkhathalele ngayo. (INdu. 42:8) Ukuthandaza ngokusuka entliziyweni kunokusinceda siyiqonde kakuhle indlela esivakalelwa ngayo, siyijonge ngendlela efanelekileyo imeko esikuyo, size sibe namandla okunyamezela.

17. (a) Sifunda ntoni kumthandazo kamprofeti uYona? (Yona 2:​1, 2) (b) Zinokusinceda njani ezinye izinto ezikwiiNdumiso xa sineengxaki? (Jonga umbhalo osemazantsi.)

¹⁷ Funda uYona 2:​1, 2. Lo mthandazo umprofeti uYona wawenza esesiswini sentlanzi enkulu. Wayeqinisekile ukuba uYehova wayeza kuwumamela umthandazo wakhe ngoxa wayengazange amthobele. Izinto ezininzi awazithetha xa wayethandaza ziyafana nezo zikwiiNdumiso.d Kusenokwenzeka ukuba wayezazi kakuhle ezi Ndumiso. Ukucingisisa ngazo kwamnceda waqiniseka ukuba uYehova wayeza kumnceda. Ngendlela efanayo ke, xa sizama ukwazi ezinye iZibhalo ngentloko, sisenokuzikhumbula zize zisithuthuzele xa sithandaza kuYehova ngamaxesha anzima.

HLALA UTHANDAZA UKUZE USONDELE KUYEHOVA

18-19. Ukuba kukhe kube nzima ukuxelela uYehova indlela esiziva ngayo, amaRoma 8:​26, 27 asenza siqiniseke ngantoni? Yenza umzekelo.

¹⁸ Funda amaRoma 8:​26, 27. Ngamanye amaxesha sisenokuba nexhala kakhulu side singakwazi ukumxelela uYehova indlela esiziva ngayo. Sekunjalo sinokulufumana uncedo. Kungaloo maxesha kanye apho ‘usicelela’ khona umoya oyingcwele kaThixo. Usicelela njani? Ngomoya wakhe uYehova uye wenza imithandazo emininzi yabhalwa eBhayibhileni. Xa singayazi into emasimxelele yona uYehova, usenokwenza ezinye izicelo ezikulo mithandazo ibe ngathi zezethu aze azamkele.

¹⁹ Ukucinga ngale ndlela kwanceda omnye udade waseRashiya, uYelena. Wabanjelwa ukuthandaza nokufunda iBhayibhile. Wayekhathazeke kakhulu kangangokuba kwakunzima nokuthandaza. Uthi: “Ndakhumbula ukuba xa ndinexhala kakhulu ndingazi nokuba mandithandazele ntoni, uYehova uzokwenza eminye imithandazo ephefumlelweyo yabakhonzi bakhe bakudala ibe ngathi . . . yeyam aze ayamkele. . . . Le nto yandithuthuzela kakhulu ngexesha ekwakunzima kakhulu ngalo kum.”

20. Xa sinestres ziintoni esinokuzenza ngaphambi kokuba sithandaze?

²⁰ Xa sinestres, sisenokucinga ngezinye izinto ngoxa sithandaza. Sinokuncedwa kukumamela iiNdumiso ezirekhodiweyo ngaphambi kokuba sithandaze. Sinokuzama nokwenza into eyenziwa nguKumkani uDavide, siyibhale phantsi yonke indlela esiziva ngayo. (INdu. 18, 34, 142; imibhalo esemantla.) Kakade ke, akukho mithetho ibekiweyo yezinto emasizenze ngaphambi kokuba sithandaze. (INdu. 141:2) Yenza loo nto ikusebenzelayo.

21. Kutheni simele sithandaze ngentliziyo yethu yonke?

²¹ Kuyasithuthuzela ukwazi ukuba uYehova uyiqonda singekamxeleli nokumxelela indlela esiziva ngayo. (INdu. 139:4) Sekunjalo, uyavuya xa simxelela, ebona nendlela esimthembe ngayo. Ngoko ungaze uthandabuze ukuthandaza kuTata wakho osezulwini. Funda kwimithandazo ebhalwe kwiLizwi lakhe. Thandaza ngentliziyo yakho yonke. Mxelele ngezinto ezikuvuyisayo nezikukhathazayo. UYehova ngumhlobo wakho, akasoze akushiye!