Abazalwana Ababini Abatsha BeQumrhu Elilawulayo
KWINTLANGANISO yonyaka eyayinge-5 kaOktobha 2024, kwenziwa esi saziso sikhethekileyo: UMzalwan’ uJody Jedele noJacob Rumph bamiselwe ukuba bakhonze kwiQumrhu Elilawulayo LamaNgqina KaYehova. Bobabini aba bazalwana baye bamkhonza bethembekile uYehova iminyaka emininzi.
UJody Jedele nenkosikazi yakhe uDamaris
UMzalwan’ uJedele wazalelwa eMissouri, eUnited States. Wakhuliswa ngabazali abangamaNgqina. Intsapho yakokwabo yayihlala ngakumhlaba ekwakungafane kushunyayelwe kuwo. Ngoko wadibana nabazalwana noodade abaninzi abasuka kwiindawo ezahlukahlukeneyo zelo lizwe, ababeye kunceda kumsebenzi wokushumayela. Wayithanda kakhulu indlela ababemanyene nababethandana ngayo. Wabhaptizwa esengumfanyana nge-15 kaOktobha 1983. Wayeyithanda intsimi. Emva kokuba egqibe imfundo yamabanga aphakamileyo, ngoSeptemba 1989, waba nguvulindlela othe ngxi.
Esemncinci, abazali bakhe babedla ngokuhamba naye nodadewabo baye kubona iBheteli. Loo nto yenza yena nodadewabo bazimisela ukuya kukhonza eBheteli. Baya kukhonza khona ke nyhani. UMzalwan’ uJedele wafika kwiBheteli yaseWallkill ngoSeptemba 1990. Waqala wasebenza kwiSebe lokuKlina emva koko waya kwelezoNyango.
Kanye ngelo xesha kwakukho amabandla eSpanish awayekhula nawayedinga abazalwana. Ngoko uMzalwan’ uJedele waya kukhonza kwelinye lawo waza waqalisa ukufunda iSpanish. Kungekudalanga efikile apho, kwisiphaluka awayekuso wadibana nodade owayenguvulindlela, uDamaris. Ekuhambeni kwexesha batshata, baza bakhonza kunye eBheteli.
Ngo-2005 bemka eBheteli baya kuhoya abazali babo ababethembekile. Ngelo xesha baba ngoovulindlela abathe ngxi. UMzalwan’ uJedele wafundisa kwiSikolo SeNkonzo Yobuvulindlela, wakwiKomiti Yokunxibelelana Nezibhedlele nakwiKomiti Yokwakha Yenqila.
Ngo-2013 uMzalwana noDade Jedele baphinda babizwa eBheteli, bebizelwa umsebenzi wokwakha eWarwick. Ezinye iindawo abakhonze kuzo ukususela ngoko kusePatterson naseWallkill. UMzalwan’ uJedele uye wasebenza kwiSebe Lasekuhlaleni Lokwakha Nelenza Iiplani nakwiSebe Lenkcazelo Yezibhedlele. NgoMatshi 2023 uye wamiselwa ukuba ancedise kwiKomiti Yenkonzo. Xa ecinga ngezabelo azenzileyo uthi: “Xa ufumana isabelo esitsha, ngamanye amaxesha uye woyike. Lelo xesha kanye ke omele ukhumbule ukuthembela ngoYehova, kuba nguye obangela kubekho.”
UJacob Rumph nenkosikazi yakhe uInga
UMzalwan’ uRumph wazalelwa eCalifornia, eUnited States. Esemncinci, umama wakhe wayepholile, kodwa wayezama ukumfundisa inyaniso eseBhayibhileni. Qho ngonyaka, uMzalwan’ uRumph wayesiya kubona umakhulu wakhe owayeliNgqina elithembekileyo. Umakhulu wakhe wamnceda wanomdla enyanisweni, waza xa wayena-13 wacela ukufundelwa iBhayibhile. Nge-27 kaSeptemba 1992 wabhaptizwa. Okuvuyisayo kukuba, umama wakhe wavuselelwa waza utata nabantwana bakowabo babhaptizwa.
Esengumfana, wayeyibona indlela abonwabe ngayo oovulindlela. Ngoko emva kokuba egqibe imfundo yamabanga aphakamileyo, waba nguvulindlela, ngoSeptemba 1995. Ngo-2000 waya kuhlala e-Ecuador ukuze akhonze kwindawo eyayidinga abavakalisi. Apho wadibana nodade waseKhanada owayenguvulindlela, uInga, baza ekuhambeni kwexesha batshata. Emva kokuba betshatile baya kuhlala kwidolophu ese-Ecuador eyayineqela elincinci labavakalisi. Ngoku kuloo dolophu kukho ibandla elinabavakalisi abakhutheleyo.
Ekuhambeni kwexesha uMzalwana noDade Rumph baba ngoovulindlela abakhethekileyo, emva koko bakumsebenzi wesiphaluka. Ngo-2011 bamenyelwa kwiklasi ye-132 yaseGiliyadi. Emva kokuba bephumelele kuloo klasi, bakhonza kumazwe ahlukahlukeneyo, baza bavuyela iintlobo ezahlukeneyo zenkonzo, njengenkonzo yaseBheteli, ukuba ngabathunywa bevangeli nomsebenzi wesiphaluka. UMzalwan’ uRumph waba nayo nenyhweba yokufundisa kwiSikolo Sabavangeli BoBukumkani.
Ngenxa yekhorona, uMzalwana noDade Rumph babuyela eUnited States. Babizwa kwiBheteli yaseWallkill, apho uMzalwan’ uRumph waqeqeshwa kwiSebe Lenkonzo. Baye babuyela kwisebe lase-Ecuador, waza uMzalwan’ uRumph wakhonza kwiKomiti yeSebe. Ngo-2023 bathunyelwa eWarwick. NgoJanuwari 2024, uMzalwan’ uRumph wamiselwa ukuba ancedise kwiKomiti Yenkonzo. Xa ecinga ngeendawo akhonze kuzo uthi, “Asiyondawo eyenza isabelo sibaluleke, kodwa ngabantu oye usebenze nabo.”
Siyayibulela indlela abasebenza nzima ngayo aba bazalwana, futhi ‘sihlala sibaxabisa abantu abanjengabo.’—Fil. 2:29.