Umsebenzi WamaNgqina KaYehova Kula Maxesha

IRomania

Oontamnani, abazalwana bobuxoki, ukuthuthunjiswa, ukuvalelwa entolongweni nokusetyenziswa nzima—ezi zezinye iindlela ezazisetyenziswa nguSathana ekudimazeni amaNgqina kaYehova nasekupheliseni intlangano yawo eRomania. Funda ngoloan, owathandaza phambi kwamajoni ngokuvakalayo. Yiva okuthethwa ngoTeodor, owacula iingoma zoBukumkani ekunye namanye amaNgqina ngoxa kwakusiwa imvula yeebhombu ecaleni kwabo. Nikel’ ingqalelo njengoko ufunda ngabazalwana ababetha ngezikaTshiwo umgama omalunga neekhilomitha ezili-100 besiya ezintlanganisweni. Uze uzame ukubona isizathu sokuba enye inkwenkwana itsho la mazwi, “Tata, unuka njengencwadana yetekisi!”

IZambia

Ukuvalwa komsebenzi ngurhulumente, ukugxothwa kwabavangeli basemazweni nokunikw’ uphum’ aphele esikolweni—olu lucelomngeni ababejamelene nalo abazalwana baseZambia. Kule ngxelo uza kufunda ngentombazana yesikolo eyazithethelela ngenkalipho iindaba ezilungileyo kwinkundla yamatyala, imbacu enesiphene ‘eyayinamendu angaphezu kwaweenkozi,’ nangokutyakatywa komnye uMfundi weBhayibhile. Funda nge-Land Rover eyatsha yangamalahle, isiduli seentubi esaqhekezwayo kwanendawo yokuhlanganisana eyayingathi lihashe elimnyama. Iingcongconi, iinyoka neengonyama ziyinxalenye yebali elibonisa indlela abazalwana ababezibhokoxa ngayo ukuze bavakalise iindaba ezilungileyo kweli lizwe lihle laseAfrika.