Ndafunda Inyaniso Yebhayibhile Eromania
NGOKUBALISWA NGUGOLDIE ROMOCEAN
Ngowe-1970, ndatyelela izalamane eRomania okokuqala phantse kwiminyaka engama-50. Abantu babephila phantsi kwengcinezelo yorhulumente wamaKomanisi, yaye ndandisoloko ndilunyukiswa ukuba ndikulumkele oko ndikuthethayo. Ngelo xesha, njengoko ndandimi kwiofisi yaseburhulumenteni kwidolophana yasekhaya, igosa elithile laseburhulumenteni landibongoza ukuba ndilishiye elo lizwe ngokukhawuleza. Ngaphambi kokuba ndicacise isizathu, makhe ndibalise indlela endayifunda ngayo inyaniso yeBhayibhile eRomania.
NDAZALWA ngoMatshi 3, 1903, kwidolophana yaseOrtelec emntla-ntshona Romania kufuphi nedolophu yaseZalău. Sasihlala kwindawo entle. Amanzi ayecwengile kubetha impepho epholileyo. Sasizilimela ukutya yaye singaswele nto. Kwiminyaka yobutsha bam, eli lizwe laliseluxolweni.
Abantu babeluthanda kakhulu unqulo. Eneneni, intsapho yasekhaya yayisiya kwiinkonzo ezintathu ezahlukeneyo. Omnye woomakhulu bam wayelilungu lecawa yamaKatolika obuOthodoki, omnye engumSabatha yaye abazali bam bebengamaBaptizi. Ngenxa yokuba kwakungekho nanye kwiinkonzo zabo endandivumelana nayo, intsapho yasekhaya yayisithi ndandiza kuba ngumntu ongabukholelwayo ubukho bukaThixo. Ndazikisa ukucinga ndathi: ‘Ukuba uThixo mnye, kufanele kubekho inkonzo enye kuphela—zingabi ntathu kwintsapho enye.’
Izinto endandizibona kunqulo zandiphazamisa. Ngokomzekelo, umfundisi wayetyelela amakhaya eqokelela imali yecawa. Xa abantu bengenayo imali, wayethabatha ezona ngubo zabo zixabisekileyo zoboya endaweni yayo. Kwicawa yamaKatolika, ndabukela ixhegokazi liguqe ngamadolo lithandaza phambi komfanekiso kaMariya. Ndazibuza, ‘Kutheni lithandaza kumfanekiso nje?’
Amaxesha Anzima
Ngowe-1912 ubawo waya eUnited States ngenjongo yokuzuza imali yokuhlawula ityala elithile. Kungekudala emva koko kwaqalisa imfazwe, yaye amadoda aloo dolophana yethu aya emfazweni—kwasala abafazi, abantwana namaxhego kuphela. Idolophana yethu yalawulwa yiHungary okwethutyana, kodwa amajoni aseRomania abuya aza ayithabatha le dolophana. Asiyalela ukuba siphume siphele ngokukhawuleza. Noko ke, ngenxa yokudyuduzela nokudideka ngenxa yokulungisa izinto nabantwana, ndasala. Kaloku, ndandingoyena mdala kubantwana abahlanu.
Ndabalekela kummelwane, ixhego elalisele, laza lathi: “Goduka. Utshixe iingcango, uze ungavumeli nabani ukuba angene.” Ngokukhawuleza ndamthobela. Emva kokuba sitye isuphu yenkuku nokutya okuphekwe namagqabi ekhaphetshu okwakusele ngelo xesha lokudyuduzela kundulukwa, ndaguqa ngakumandlalo wam ndaza ndathandaza. Ngokukhawuleza ndalala yoyi.
Xa ndavula amehlo, kwakusemin’ emaqanda ndaza ndathi: “Owu, enkosi Thixo! Ngokuba ndisaphila!” Iindonga zazizele yimingxuma yeembumbulu, ekubeni kwakudutyulwa ubusuku bonke. Xa uMama wafumanisa ukuba ndandingekho kunye nabo kwidolophana elandelayo, wathumela uGeorge Romocean oselula, wandifumana waza wabuya nam. Kungekudala sabuyela kwidolophana yasekhaya saza saphinda sahlala.
Umnqweno Wam Ngenyaniso YeBhayibhile
Umama wayefuna ndibhaptizwe njengelungu laseBaptizi, kodwa ndazalel’ endle kuba ndandingakholelwa ekubeni uThixo oluthando wayeya kutshisa abantu ngonaphakade esihogweni. Ezama ukundicacisela, uMama wathi: “Ukuba abalunganga.” Kodwa ndamphendula ndathi: “Ukuba abalunganga, umele abatshabalalise, angabathuthumbisi. Bendingayi kuyithuthumbisa kwanenja okanye ikati.”
Ndikhumbula ngenye imini ezolileyo ngentwasahlobo, xa ndandineminyaka eli-14 ubudala, uMama wathi mandikhaphele iinkomo. Njengoko ndandilele engceni kufuphi nomlambo, onehlathi ngasemva, ndakhangela esibhakabhakeni ndaza ndathi: “Thixo, ndiyazi ukuba ukho apho; kodwa andithandi nanye kwezi nkonzo. Umele ukuba unayo enye elungileyo.”
Ngokwenene ndiyakholelwa ukuba uThixo wawuva umthandazo wam kuba kwangelo hlobo lowe-1917, aBafundi BeBhayibhile ababini (njengoko amaNgqina kaYehova ayesaziwa njalo ngoko) bafika kwidolophana yethu. Babeziicolporteurs, okanye abalungiseleli bexesha elizeleyo, yaye bangena kwicawa yaseBaptizi kushunyayelwa.
Inyaniso YeBhayibhile Iyanda ERomania
Kwiminyaka embalwa ngaphambili, ngowe-1911, uCarol Szabo noJosif Kiss, ababa ngaBafundi BeBhayibhile eUnited States, babuyela eRomania ukuya kwazisa inyaniso yeBhayibhile apho. Bahlala ngokusisigxina eTîrgu-Mureş, ekumgama ongaphantsi kweekhilomitha ezili-160 kumazantsi empuma yedolophana yethu. Kwiminyaka nje embalwa, ngokoqobo amakhulu abantu asabela kwisigidimi soBukumkani baza baba ngabalungiseleli abangamaKristu.—Mateyu 24:14.
Xa aBafundi BeBhayibhile ababini abaselula bangenayo kwicawa yaseBaptizi kwidolophana yethu yaseOrtelec, uGeorge Romocean, nangona wayeneminyaka eli-18 ubudala, wayeqhuba inkonzo yaye wayezama ukucacisa intsingiselo yamaRoma 12:1. Ekugqibeleni, omnye oselula weecolporteurs waphakama waza wathi: “Bazalwana, zihlobo, uzama ukusixelela ntoni umpostile uPawulos apha?”
Xa ndeva oko, ndaba nemincili! Ndathi, ‘La madoda amele akwazi ukuyicacisa iBhayibhile.’ Kodwa inkoliso yabo babekho yadanduluka isithi: “Abaprofeti bobuxoki! Siyanazi ukuba ningoobani!” Kwalandela isiphithiphithi. Kodwa kwangoko uyise kaGeorge waphakama waza wathi: “Valani loo milomo! Ngumoya onjani lo—ingathi ningamanxila? Ukuba aba bantu banento abafuna ukusixelela yona yaye anifuni kubaphulaphula, ndibamemela kwam. Nabani na ofuna ukuza wamkelekile.”
Ndingakwazi ukuzibamba yimincili, ndagoduka ndaza ndaxelela uMama okwenzekileyo. Ndaba ngomnye wabo bamkela isimemo sokuya kwikhaya likaRomocean. Hayi indlela endavuya ngayo ngaloo ngokuhlwa xa ndafunda eBhayibhileni ukuba akukho sihogo sitshisayo ndaza ndabona igama likaThixo, uYehova, kwiBhayibhile yam buqu yesiRomania! Ezo colporteurs zenza amalungiselelo okuba uMfundi WeBhayibhile atyelele ikhaya likaRomocean rhoqo ngeCawa ukuze asifundise. Kwihlobo elalandelayo, xa ndandineminyaka eli-15 ubudala, ndabhaptizwa ndifuzisela uzahlulelo lwam kuYehova.
Ekuhambeni kwexesha, ngokoqobo intsapho yonke yakwaProdan neyakwaRomocean zamkela inyaniso yeBhayibhile zaza zahlulela ubomi bazo kuYehova. Kwanabanye abaninzi bedolophana yethu balandela ekhondweni, kuquka nesibini esiselula ikhaya laso elalingenela icawa yaseBaptizi. Kamva baliguqulela ekubeni yindawo yesifundo yokuhlanganisana kwaBafundi BeBhayibhile. Inyaniso yeZibhalo yasasazeka ngokukhawuleza kwiidolophana ezikufuphi, yaye ngowe-1920 kwakukho abavakalisi boBukumkani abamalunga ne-1800 eRomania!
Ukuya EUnited States
Sasilangazelela ukwabelana notata ngoko sasikufundile, uPeter Prodan. Kodwa samangaliswa kukuba singekabi nathuba lokumbhalela, safumana ileta evela kuye esixelela ukuba sele waba ngumkhonzi obhaptiziweyo kaYehova. Wafundisisa naBafundi BeBhayibhile eAkron, eOhio, yaye ufuna ukuba sonke siye kuye eUnited States. Noko ke, uMama akazange afune ukushiya iRomania. Ngoko ke, ngowe-1921, ndisebenzisa imali endandiyithunyelelwe nguTata, ndaya kuye eAkron. UGeorge Romocean nomkhuluwa wakhe babesele befudukele eMerika kunyaka ophelileyo.
Xa ndafika ngenqanawa kwiSiqithi saseEllis, eNew York, igosa elalijongana nabantu abafudukayo lalingakwazi ukuguqulela igama lam, uAurelia, ngesiNgesi, ngoko lathi: “UnguGoldie.” Elo yaba ligama lam ukususela ngoko. Kungekudala emva koko, ngoMeyi 1, 1921, ndatshata noGeorge Romocean. Malunga nonyaka kamva, uTata wabuyela eRomania yaye ngowe-1925 wabuyisa udadewethu omncinane uMary, eAkron. Ngoko uTata wabuyela eRomania ukuze abe kunye noMama nentsapho yonke.
Ubulungiseleli Bethu Bokuqala EMerika
UGeorge wayengumkhonzi kaYehova owayenyaniseke gqitha. Phakathi kowe-1922 nowe-1932, sasikelelwa ngamantombazana amane amahle—uEsther, uAnne, uGoldie Elizabeth, noIrene. Ibandla lesiRomania laqalisa eAkron, yaye ekuqaleni iintlanganiso zaziqhutyelwa ekhaya. Ekugqibeleni, rhoqo ngeenyanga ezintandathu ummeli osuka kwikomkhulu lehlabathi laBafundi BeBhayibhile eBrooklyn, eNew York, wayetyelela ibandla lethu aze ahlale nathi.
NgeeCawa ezininzi usuku lonke sasilunikela kumsebenzi wokushumayela. Sasipakisha iingxowa zethu zoncwadi nesidlo sasemini, sikhwelise amantombazana kwiFord eyiModel T size sichithe usuku sishumayela kummandla osemaphandleni. Sandule ke ngokuhlwa, siye kwiSifundo seMboniselo. Amantombazana ethu ayewuthanda umsebenzi wokushumayela. Ngowe-1931, ndandikho eColumbus, eOhio, xa aBafundi BeBhayibhile bamkela igama elikhethekileyo elithi amaNgqina kaYehova.
Isiluleko Endandisifuna
Kwiminyaka embalwa kamva, ndacatshukiswa nguJoseph F. Rutherford, owayengumongameli weWatch Tower Bible and Tract Society ngoko. INgqina elithile elaliselitsha lavakalelwa kukuba uMzalwana uRutherford waqhubana ngokungekho sikweni nalo, ngokungayiphulaphuli kakuhle ingxaki yalo. Ndandivakalelwa kukuba uMzalwana uRutherford wayephosisile. Ngoko, ngenye iCawa udadewethu uMary nomyeni wakhe, uDan Pestrui, basityelela. Emva kwesidlo sasemini uDan wathi: “Masilungele ukuya ezintlanganisweni.”
Ndathi: “Asinakuze siphinde silubeke olwethu ezintlanganisweni, sicatshukiswe nguMzalwana uRutherford.”
UDan wabeka izandla ngemva waza wangqunga esithi: “Ngaba wawumazi uMzalwana uRutherford xa wawubhaptizwa?”
Ndaphendula ndathi: “Hayi, uyazi nje ukuba ndabhaptizwa eRomania.”
Wandibuza: “Kwakutheni ukuze ubhaptizwe?”
Ndathi: “Kungenxa yokuba ndafunda ukuba uYehova nguThixo wokwenyaniso, yaye ndandifuna ukwahlulela ubomi bam ukuze ndimkhonze.”
Wathi: “Ungaze ukulibale oko! Ukuba uMzalwana uRutherford wayeyishiyile inyaniso, wawuya kuyishiya nawe?”
Ndathi: “Unotshe!” Oko kwandibuyisela ezingqondweni, ndaza ndathi: “Masilungiseleleni ukuya ezintlanganisweni sonke.” Yaye asizange siyeke ukususela ngelo xesha. Hayi indlela endimbulela ngayo uYehova ngesiluleko sothando awasilungiselela ngosibali!
Ukuphumelela Ebudeni Bexesha LokuDodobala Kwezoqoqosho
Ebudeni bexesha lokuDodobala Kwezoqoqosho ngowe-1930, kwakunzima. Ngenye imini uGeorge wabuya emsebenzini edakumbile, endixelela ukuba udendiwe emsebenzini kumzi-mveliso werabha. Ndathi: “Mus’ ukuxhala, sinoBawo osisityebi ezulwini, yaye akasayi kusishiya.”
Kwangaloo mini uGeorge wadibana nomnye umhlobo wakhe owayephethe ingobozi eyayinamakhowa. Xa uGeorge wafumana indawo umhlobo wakhe awayewafumana kuyo, wafika namakhowa amaninzi ekhaya. Wandula ke wachitha iidola ezintathu zokugqibela esasinazo ethenga iingobozi ezincinane. Ndambuza, “Ungathini ukwenza into enje, ekubeni sinamantombazanana afuna ubisi?”
Waphendula wathi, “Mus’ ukuxhala, yenza le nto ndikuxelela yona qha.” Kwiiveki ezimbalwa ezalandelayo, saba nomzi-mveliso endlwini yethu, sicoca size sipakishe amakhowa. Sasiwathengisa kwiindawo zokutyela eziphucukileyo size sigoduke nama-30 ukusa kuma-40 eedola ngosuku, yayiyimali eninzi kuthi leyo ngelo xesha. Umlimi owasivumela ukuba sikhe amakhowa kumhlaba wakhe wathi wayehlala apho iminyaka engama-25 yaye akazange awabone amakhowa amaninzi kangako. Kungekudala umzi-mveliso werabha wambiza uGeorge ukuba abuyele emsebenzini.
Ukulondoloza Ukholo Lwethu
Ngowe-1943 safudukela eLos Angeles, eKhalifoniya, yaye kwiminyaka emine kamva sazinza e-Elsinore. Savula ivenkile yokutya apho, yaye intsapho yethu yonke yayibolekisana ngokusebenza kuyo. Ngelo xesha, iElsinore yayiyidolophu encinane eyayinabemi abamalunga nama-2000, yaye sasimele sihambe umgama ongama-30 eekhilomitha sisiya kwenye idolophu ukuze sifumane iintlanganiso zamaKristu. Hayi indlela endavuya ngayo ukubona ibandla elincinane limiselwa e-Elsinore ngowe-1950! Ngoku kukho amabandla ali-13 kwakulo mmandla mnye.
Ngowe-1950 intombazana yethu uGoldie Elizabeth (ngoku eyaziwa ngokuba nguBeth) yaphumelela kwiSikolo seBhayibhile seWatchtower saseGiliyadi eMzantsi Lansing, eNew York, yaza yabelwa eVenezuela njengomvangeli wasemazweni. Ngowe-1955 intombazana yethu eligqibelo, uIrene nomyeni wakhe bamenyelwa ukukhonza njengabalungiseleli abahamba-hambayo kumsebenzi wesiphaluka. Ngoko ngowe-1961, emva kokuya kwiSikolo Sobulungiseleli SoBukumkani eMzantsi Lansing, eNew York, bathunyelwa eThailand. Maxa wambi ndandiwakhumbula amantombazana am kangangokuba ndandikhe ndicuntsule kule nto yabantwana, kodwa ndandule ke ndicinge, ‘Oko koko ndandifuna akwenze.’ Ngoko ndandisuka ndithi hlasi ingxowa yam yeencwadi ndize ndihambe ndiye kushumayela. Ndandisoloko ndigoduka ndonwabile.
Ngowe-1966 umyeni wam endimthandayo, uGeorge, wahlaselwa sistroke. UBeth, owayebuyile eVenezuela ngenxa yempilo enkenenkene, wancedisa ekumnyamekeleni. UGeorge wafa kunyaka olandelayo, yaye ndathuthuzelwa sisibakala sokuba wahlala ethembekile kuYehova yaye wamkela umvuzo wakhe wasezulwini. Emva koko uBeth waya eSpeyin ukuya kukhonza apho kwakukho imfuneko enkulu yabashumayeli boBukumkani. Intombazana yam elizibulo, uEsther, wagula sisifo somhlaza waza wafa ngowe-1977, yaye ngowe-1984, uAnne wabulawa yileukemia. Ngamnye wayengumkhonzi othembekileyo kaYehova bonke ubomi bakhe.
Ngexesha lokufa kuka-Anne, uBeth noIrene babebuyile kwizabelo zabo zokushumayela kwamanye amazwe. Baye bancedisa ekunyamekeleni oodadewabo, yaye sonke sakhathazeka kakhulu. Ekuhambeni kwexesha ndaxelela amantombazana am oku: “Kulungile, kwanele ngoku! Siye sathuthuzela abanye ngamadinga axabisekileyo eBhayibhile. Ngoku masizinike ithuba lokuba sithuthuzelwe. USathana ufuna ukuphanga uvuyo lwethu lokukhonza uYehova, kodwa asinakumvumela.”
Intsapho Yethu Ethembekileyo ERomania
Mna nodadewethu uMary sahamba uhambo esingenakuze silulibale ukuya kutyelela intsapho yethu eRomania ngowe-1970. Omnye woodade wethu wayefile, kodwa sakwazi ukutyelela umntakwethu uJohn nodade wethu uLodovica, abasahlala kwidolophana yaseOrtelec. Ngelo xesha lokutyelela kwethu, uTata noMama babesele befile, emva kokuhlala bethembekile kuYehova. Abaninzi basixelela ukuba uTata wayeyintsika kwelo bandla. Kwanabanye abazukulwana babazukulwana bakhe eRomania ngoku bangamaNgqina. Kwakhona satyelela izalamane ezininzi zentsapho yakulomyeni wam ezazisabambelele nkqi kwinyaniso yeBhayibhile.
Ngowe-1970, iRomania yayilawulwa ngurhulumente okhohlakeleyo wamaKomanisi kaNicolae Ceauşescu, yaye amaNgqina kaYehova ayetshutshiswa ngokukrakra. Unyana womntakwethu uJohn, uFlore, kwanezinye izalamane zam, bachitha iminyaka emininzi kwiinkampu zoxinaniso ngenxa yokholo lwabo lobuKristu, yaye kwaba njalo nangomza womyeni wam, uGábor Romocean. Kungenxa yeso sizathu lento xa kwakufuneka sise imbalelwano kwikomkhulu lamaNgqina kaYehova eNew York, abazalwana bethu baseRomania bathi babeya kuhlala benexhala de beve ukuba siphume sikhuselekile kwelo lizwe!
Xa safumanisa ukuba amaphepha-mvume ethu okungena kwelo lizwe ayephelelwe lixesha, saya kwiofisi karhulumente eOrtelec. KwakungoLwesihlanu emva kwemini, yaye kwakukho igosa elinye kuphela emsebenzini. Lathi lakuqonda umntu ebesimtyelele nokuba umtshana wethu ubethothoza kwiinkampu zoxinaniso, lathi: “Manenekazi, phumani niphele apha!”
Udadewethu waphendula wathi: “Kodwa akukho loliwe uhambayo namhlanje.”
Ngokukhawuleza lathi: “Ayinamsebenzi lo nto. Nakhwela uduladula. Nakhwela uloliwe. Nakhwela iteksi. Enoba nihamba ngeenyawo. Phumani niphele apha ngokukhawuleza!”
Njengoko sasiqalisa ukuhamba, sabizwa saza saxelelwa ukuba uloliwe womkhosi ongenalucwangciso wawuza kufika ngentsimbi yesi–6:00 ngokuhlwa. Hayi indlela ekwangqineka kuluncedo ngayo oko! Kuloliwe nje oqhelekileyo, iincwadi zethu beziya kuhlolwa ngokuphindaphindiweyo, kodwa ekubeni lo loliwe wawukhwelise abasebenzi bomkhosi yaye isithi sobabini kuphela abemi ababekhwele kuye, akakho owacela ukubona iincwadana zethu zokundwendwela. Kusenokuba babecinga ukuba sasingoomakhulu bamanye aloo magosa.
Safika eTimisoara ngentsasa elandelayo, yaye ngoncedo lomhlobo wesalamane, sakwazi ukufumana amaphepha-mvume ethu okungena kwamanye amazwe. Ngosuku olulandelayo sasiphumile kwelo lizwe. Sabuyela ekhaya sineenkumbulo ezingacimekiyo zabazalwana noodade bethu abangamaKristu abanyanisekileyo baseRomania.
Kwiminyaka eyalandela utyelelo lwethu eRomania, seva ngeenkcukacha ezimbalwa ngomsebenzi wokushumayela owenziwa kumazwe angaphaya koMda Owahlukanisa amazwe kulawo obuKomanisi. Sekunjalo, sasinentembelo yokuba abazalwana noodade bethu abangamaKristu babeya kuhlala benyanisekile kuThixo wethu—enoba sekumnyam’ entla. Yaye ngokuqinisekileyo baye benjenjalo! Olunjani lona uvuyo esaba nalo sakufumanisa ukuba amaNgqina kaYehova avunywa ngokusemthethweni njengombutho wonqulo eRomania ngoAprili 1990! Ngehlobo elalandelayo sachukunyiswa ziingxelo ezingeendibano ezaziqhutyelwe eRomania. Kaloku, bangaphezu kwama-34 000 ababekho kwizixeko ezisibhozo, yaye abangama-2260 babhaptizwa! Ngoku bangaphezu kwama-35 000 ababa nesabelo kumsebenzi wokushumayela eRomania, yaye kunyaka ophelileyo bangama-86 034 ababekho eSikhumbuzweni sokufa kukaKristu.
Inyaniso Isaxabisekile Kum
Kangangeminyaka embalwa, ndakhe ndanqumama ekuthabatheni imifuziselo yeSikhumbuzo. Ndabona abazalwana abafaneleka ngakumbi bengathabathi, yaye ndaqiqa ngelithi: ‘Yintoni enokwenza uYehova andinike ilungelo lokuba yindlalifa kunye noNyana wakhe ezulwini ngoxa kukho abanye abazizithethi ezityibilika kangaka?’ Kodwa ndaphazamiseka gqitha ndakuyeka ukuba nenxaxheba. Kwaba ngathi ikho le nto ndingafuni ukuyenza. Emva kokufundisisa ngakumbi nokuthandaza ngokusuka entliziyweni, ndaqalisa ukuthabatha kwakhona. Ndaphinda ndanoxolo novuyo, yaye aluzange luphinde luphele.
Nangona sele ndibona luzizi ndingasenakufunda, yonke imihla ndiphulaphula ikhasethi yeBhayibhile neyephephancwadi IMboniselo noVukani! Kwakhona ndiba nenxaxheba kumsebenzi wokushumayela. Ngokuqhelekileyo ndihambisa amaphephancwadi aphakathi kwangama-60 nali-100 nyanga nganye, kodwa xa sasikwiphulo elikhethekileyo lokuhambisa iphephancwadi uVukani! ngoAprili ophelileyo, ndahambisa angama-323. Ngoncedo endilufumana kumantombazana am, ndiyakwazi kwanokunikela intetho kwiSikolo Sobulungiseleli Sobuthixo. Ndiyavuya kuba ndisakwazi ukuqhubeka ndikhuthaza abanye. Phantse bonke eHolweni yoBukumkani bathi ndinguMakhulu.
Xa ndikhangela emva kwiminyaka ephantse ibe ngama-79 yenkonzo yokuzinikela kuYehova, ndimbulela yonke imihla kuba eye wandivumela ukuba ndazi inyaniso yakhe exabisekileyo ndize ndisebenzise ubomi bam enkonzweni yakhe. Ndinombulelo kakhulu kuba ndiye ndaphila ndabona ukuzaliseka kweziprofeto ezimangalisayo zeBhayibhile ezaxelwa kwangaphambili ngokuhlanganisa kukaThixo ababumvu kule mihla yokugqibela.—Isaya 60:22; Zekariya 8:23.
[Picture On Page 23]
Ngudadewethu uMary noTata abemi ngeenyawo, ize ibe ndim, uGeorge, kunye namantombazana ethu uEsther noAnne
[Picture On Page 24]
Ndikunye namantombazana am uBeth noIrene nomyeni kaIrene namakhwenkwe abo amabini, bonke bakhonza uYehova ngokuthembeka