ULUTSHA LUYABUZA
Yintoni Endinoyenza Ukuze Abantu Bangafuni Ukwazi Yonke Into Ngam?
Kutheni abazali befuna ukwazi yonke into ngabantwana babo?
Abazali bakho bathi banexhala, kodwa wena kwelinye icala ubona ngathi bafuna ukwazi yonke into yakho. Ngokomzekelo:
UErin osemtsha uthi: “UTata wayethatha ifowuni yam, andinyanzele ukuba ndiyivule, aze afunde imiyalezo yam. Xa ndingafuni ukumnika wayecinga ukuba kukho into endiyifihlayo.”
UDenise, okwiminyaka yee-20, ukhumbula ukuba umama wakhe wayejonga iinamba ebeziye zafowunelwa. “Wayebuza ukuba ngoobani abobantu bendithetha nabo ibe besithetha ngantoni.”
UKayla osemtsha, uthi umama wakhe waye wafunda enye yeencwadi zakhe. “Ndandibhala indlela endiziva ngayo ngezinto zonke—kuquka naye! Emva kokuba ndimbonile ukuba uyifundile, ndaye ndayeka ukubhala.”
Eyonanto siyithethayo kukuba: Abazali bakho ngumsebenzi wabo ukuqiniseka ukuba zonke izinto uzenza kakuhle, ibe awunakuyilawula indlela abakhetha ukuwenza ngayo loo msebenzi. Ngaba ngamanye amaxesha kuzobonakala ngathi bayazibaxa izinto? Mhlawumbi. Kodwa okuvuyisayo kukuba zikhona izinto onokuzenza wena ukuze ungaziva ngolohlobo.
Into onokuyenza
Nyaniseka. IBhayibhile isikhuthaza “ukuziphatha ngokunyaniseka kuzo zonke izinto.” (Hebhere 13:18) Khawukhe uzame ukuyenza lento kubazali bakho. Xa ubachazela yonke into ibe unyanisekile kubo, mhlawumbi basenokuvumela ukuba uzenzele izinto zakho, bangafuni ukwazi yonke into oyenzayo.
Khawucinge ngalento: Uthembeke kangakanani? Ngaba uyalibamba ixesha ekuthiwe ubuye ngalo? Ngaba unabahlobo obafihlayo? Ngaba awuzichazi zonke izinto ozenzayo?
Ndiye ndibaxelele zonke izinto ezenzekayo ebomini bam. Xa befuna ukwazi into ndiyabaxelela, ngenxa yaloo nto bayandithemba ibe abasoloko befuna ukwazi yonke into endiyenzayo.”—UDelia.
Yiba nomonde. IBhayibhile ithi: “Hlalani nizihlola ukuba ningabantu abanjani.” (2 Korinte 13:5) Kuye kuthathe ixesha ukuze abantu bakuthembe, kodwa kuyanceda.
Cinga ngalento: Abazali bakho nabo babekhe balingana nawe. Xa ucinga ngaloo nto inoba yintoni ebenza babenomdla ebomini bakho?
“Ndicinga ukuba abazali baye bakhumbule iimpazamo ababekhe bazenza, ibe loo nto ibenza bangafuni ukuba abasebatsha benze iimpazamo abazenzayo.”—UDaniel.
Bacingele. Khawukhe uzame ukuzibona ngendlela abazijonga ngayo izinto abazali bakho. IBhayibhile ithi umama “uzijongile izinto ezenzekayo entsatsheni yakhe” ibe utata ozenza kakuhle izinto ukhulisa abantwaba bakhe “ngokubaqeqesha nangokubafundisa ngendlela kaYehova.” (IMizekeliso 31:27; Efese 6:4) Ukuze bakwazi ukuyenza loo nto, abazali bakho kufuneka bazazi izinto ezenzeka ebomini bakho, ayikho enye indlela.
Cinga ngalento: Ukuba ubungumzali—ibe usazi izinto ozaziyo ezenziwa ngabantu abasebatsha ngoku—ubunokumvumela unyana okanye intombi yakho izenzele nokuba yintoni na efuna ukuyenza nangona wena ungazi kwanto ibe ungayibuzi imibuzo?
Kodwa ngoku sendikhulile ndiyabona ukuba kwakutheni ukuze abazali bam bayenze loo nto. Babebonisa ukuba bayandithanda.”—UJames.