Ndandiziva Ndingabalulekanga Kodwa Ndenziwa Umntu

NgoAgasti 1967, xa ndandilusana oluneenyanga eziyi-18, ndaba nefiva embi kakhulu. Ndavuka ngentsasa elandelayo kugevezela imilenze. Ndaya kwisibhedlele saseFreetown eSierra Leone apho ndandihlala khona. Kwafunyaniswa ukuba ndosuleleke yipoliyo. Eso yayisisifo esosulelayo esenza abantu bangakwazi ukuhamba, ingakumbi abantwana abaneminyaka engaphantsi kwemihlanu. Oogqirha abazange bakwazi ukundinceda kwingxaki yam yemilenze. Ekuhambeni kwexesha, kwaya kusiba kubi kakhulu kuba ndandingakwazi ukuma okanye ukuhamba. Utata wayesoloko esithi ndingumntwana ongaphelelanga ngenxa yempilo yam. Kuba ndandikwazi ukukhasa kuphela, ndandiziva ndingabalulekanga, ndingakwazi ukwenza izinto ibe ndimncinci kakhulu.

Ndakhula Ndikhasa

Ndakhulela kwiyadi eyayinamakhaya abantu abaninzi abasokolayo, ndihlala nomama. Nangona abantu babendithanda, oyena mntu ndandifuna andithande ngutata kodwa zange yenzeke lo nto. Abantu babekholelwa ukuba isigulo sam asiqhelekanga ibe sasinento yokwenza nokuthakathwa. Abanye babesithi umama makayondishiya emnyango kwikhaya labantu abakhubazekileyo. Babesithi lo nto iza kumnceda ohlukane nomthwalo wokuhoya mna. Umama zange avume. Wayesebenza nzima ukuze andihoye.

Ngenxa yokuba ndandingakwazi ukuma okanye ukuhamba, ndandikhasa. Kodwa ukukhasa kwakundenza ndonzakale kakhulu. Ndandiye ndinxibe iimpahla ezinkulu ukuze ndingalimali, ndize ndifake izandla zam esihlangwini ukuze ndizikhusele. Ekuhambeni kwexesha ndaye ndasebenzisa amaplanga kuba wona ayezikhusela bhetele izandla zam. Ukuze ndihambe, ndandiye ndibeke amaplanga phantsi ndizame ukubambelela kuwo ndize ndizitsale. Ndandiye ndigobe umqolo ndize nditsale imilenze yam iye kwicala endiya kulo. Ndandimane ndiyiphinda lento de ndiyofika apho ndiya khona nangona kwakunzima. Le nto yayisenza iingalo namagxa am abebuhlungu. Ukuhamba ngoluhlobo kwakungekho lula ibe lo nto yayibangela ukuba ndisoloko ndisekhaya. Ndandingakwazi ukuya esikolweni nokudlala nabanye abantwana. Ndandinexhala lokuba ndingenza njani xa umama wayenokusweleka.

Ndathandaza kuThixo ndimcela ukuba andincede ndingabi ngumthwalo ndisokolise abanye abantu. Ndandiqonda ukuba xa ndinokusondela kuye, ndimkhonze ngendlela ayifunayo wayeza kundihoya. Ngoko ngenye imini ngo-1981 ndazincama kubuhlungu kunjalo ndaphuma eyadini ndisiya kwicawa eyayi kwisitrato esasihlala kuso. Ndandiziva ndingakhululekanga tu ngenxa yendlela abantu ababendijonge ngayo. Umfundisi zange andamkele, ibe wangxolisa umama kuba ndandihleli kwindawo eyayibhatalwe ngabanye abantu. Ndaqonda ukuba soze ndiphinde ndiye apho.

Indlela Endamazi Ngayo Utata Wam Wasezulwini

Ngenye imini ngo-1984 xa ndandina-18, ndaya kwindawo endandiqhele ukuhlala kuyo ngasefestileni. Ndandidla ngokuzibukela phaya izinto ezenzeka phandle. Kodwa ndaqonda uba mandikhe ndiye ezantsi kwindawo engaphandle, ibe pha kwakungaqhelanga kubakho mntu. Ndafika pha ndadibana nabantu ababini ababeshumayela kwindlu ngendlu. Bandixelela ngexesha elizayo apho imeko yam yayiza kutshintsha. Bandifundela uIsaya 33:24 neSityhilelo 21:3, 4. Bandinika nencwadana enemifanekiso, ethi Bunandiphe Ubomi Emhlabeni Ngonaphakade! Bandithembisa ukuba baza kubuya nokuba bazondifundisa nezinye izinto.

Xa babebuya okwesibini, bandixelela ukuba bazoza nomvangeli osanda kufika uPauline, ukuze ndincokole naye. Bayenza lonto, ibe mna noPauline sasondelelana kakhulu, yayingathi ngumama nentombi yakhe. Umama wayendikhuthaza ukuba ndiqhubeke ndifunda iBhayibhile noPauline kuba wayengathi “ngumama wam wesibini”, endibonisa uthando, ezincama, enomonde, enobubele, ebonisa umdla kum ibe wayesoloko ejonga ukuba yonk’ into isahamba kakuhle na. Wandifundisa ukufunda. Esebenzisa incwadi ethi Incwadi Yam Yamabali EBhayibhile,wandazisa kutata onothando endandisoloko ndifuna ukuba naye.

Izinto endandizifunda zandivuyisa kakhulu. Ngenye imini, ndambuza uPauline ukuba ndingahamba naye ukuya kwezinye zeentlanganiso zamaNgqina kaYehova ezaziwa ngeSifundo sencwadi seBandla,a zazingenela kwelinye ikhaya lomnye wamaNgqina kaYehova owayengahlali kude apho ndandihlala khona. UPauline wavuma. Ngolwesibini olandelayo wazo kundilanda, wandilinda ndahlamba ndanxiba saza saya ezintlanganisweni sobabini. Omnye umntu wathi, ndifanele ndixelele uPauline ukuba andibhatalele itaxi, kodwa ndathi, “Ndiza kuzihambela ndisebenzisa amaplanga am.”

Xa sasihamba, umama nabamelwane babesibukele benexhala. Njengoko sasihamba phakathi kwezoo zindlu, omnye wabamelwane wakhwaza uPauline esithi “Uyamnyanzela!”

UPauline wandibuza ngobubele wathi, “Jay, uyafuna ukuza?” Eli yayilixesha lokubonisa uYehova ukuba ndiyamthemba. (IMizekeliso 3:5, 6) Ndathi, “Ewe. Esi sisigqibo sam.” Ngoko abamelwane bathula baza basibukela njengoko sasiya kuphuma ngegeyithi. Ukuphuma kwethu egeyithini basibhabhayisa bevuya.

Ndazonwabela kakhulu ezo ntlanganiso! Zazikhuthaza nyhani! Wonke umntu wandamkela. Akho mntu wayendijongele phantsi. Ndaziva ndikhululekile. Ngoko ndandisiya qho. Kungagqithanga xesha lide, ndabuza ukuba ndingaya na kwiintlanganiso ezaziqhutyelwa kwiHolo YoBukumkani yamaNgqina kaYehova. Kuba ndandisokola, ndandinesihlangu esinye qha neelokhwe ezimbini. Kodwa ndandisazi ukuba andizojongelwa phantsi ngabantu bakaThixo. Ibe nyhani kwaba njalo.

Ukuze ndiyofika eHolweni eyayisezantsi kwentaba, kwakufuneka “ndikhase” ndiye ekupheleni kwesitrato apho ndandiza kufumana khona into yokukhwela. Abazalwana babeye bandifunqule baze bandingenise ngaphakathi eHolweni.

Ndaqonda ukuba ndizibonele nyhani ukuba uYehova ulungile, ngoko ndafuna ukubalekela kuye. Ndazixelela ukuba ndifuna ukuya qho kwiintlanganiso. (INdumiso 34:8) Xa kunetha, ndandiye ndifike ndimanzi ndigcwele udaka, ngoko ndandiye nditshintshe iimpahla ndisakufika eHolweni. Kodwa ndandingazisoli tu!

Ibali lam laphuma Kwincwadi Yonyaka yamaNgqina kaYehova ka-1985. Emva kokuba efunde ibali lam, omnye udade waseSwitzerland, uJosette waye wandithumelela iwheelchair enamavili amathathu. Yayikwazi ukundikhusela eludakeni ibe yayintle. Ndatsho ndahamba ndingenazintloni. Abantwana abancinci babedla ngokuyibuka iwheelchair yam baze bathi bayakuthanda ukundibona ndihamba ngesitulo sam esihle. Ndandingasakhasi phantsi, ndingasiva ndingabalulekanga. Ngoku yayingathi ndingukumkanikazi, ndihlonitshwa ibe ndingasajongelwa phantsi.

Ndenziwa Ndaziva Ndibalulekile

Kwakungekho nzima kum ukumkhonza ngendlela ayifunayo uYehova kuba ndandihleli ndiziphethe kakuhle. Njengokuba ndandinewheelchair, ndandikwazi ukuyo kushumayela, ibe nge-9 ka-Agasti, 1986 ndabhaptizwa. Ukubhaptizwa kwabutshintsha ubomi bam. Bababhetele ngendlela endingazange ndayicinga. Ndandanelisekile ndivuya, ndingasazijongeli phantsi, kuba ngoku ndandinoTata ondithandayo nabantu abaninzi abandikhathaleleyo.

Ndandikhangela iindlela endinokumbulela ngazo uYehova, ngoko ndacinga ngokuba nguvulindlela othe ngxi kodwa ndingaqinisekanga ukuba ndiza kukwazi. (INdumiso 116:12) Ndathandaza ngayo lento ndaza ndaqonda ukuba ndiza kukhe ndizame. Emva koko ndaqalisa ukuba nguvulindlela nge-1 kaJanuwari, 1988, ibe andikayeki nangoku. Lento indenze ndaziva ndisikelelwe nyhani! Ndinabazalwana noodade abandithandayo nabasoloko bendinceda ukuze ndikwazi ukufikelela iiyure ekumele ndizenze ngenyanga. Ndiyibonile indlela uYehova andixhasa ngayo esebenzisa umoya wakhe oyingcwele.—INdumiso 89:21.

Njengokuba ndandinguvulindlela, ndandisoloko ndisendleleni amaxesha amaninzi, ibe loo nto yayiyinceda imilenze yam nangona yayingekomeleli. Emva kwexesha, ndaya kwiKlinikhi eyayisando kuvulwa, kuba ndandinethemba lokuba baza kundinceda ndomeleze imilenze yam ngokujima. Kodwa omnye unesi wandixelela ukuba ndimosha ixesha ngokumane ndisiya phaya, kuba ekugqibeleni sele ndiza kufa. Xa omnye unesi wavumelana naye, ndavele ndatyhafa. Ngoko ndagoduka ndathandaza kuYehova, ndimcela ukuba andincede ndiyeke ukutyhafa ibe ndikwazi ukujima.

Ukuhamba intsimi kwandinceda ndayenza loo nto. Xa ndiye khona ndandiye ndizive ngathi ndijimile nyhani. Emva kweminyaka, omnye wonesi abandixelela ukuba sele ndiza kusweleka wayedlula ngaseHolweni YoBukumkani wandibona. Wothuka nyhani xa ebona ukuba ndisaphila!

Nangona ndinesi sigulo, ndisoloko ndizama ukuhlala ndikhuthele ekukhonzeni uYehova. Abazalwana bayandincoma ngendlela endikhuthele ngayo nangokusoloko ndifika kwangexesha ezintlanganisweni. Ndisoloko ndiyenza loo nto kuba ndifumana ixesha lokubulisa abazalwana noodade nokubabonisa ukuba ndibakhathalele.

Ndibonile ukuba uYehova ulungile, ibe ndiyibonile indlela andisikelele ngayo ebomini bam. Ndincede abantu abathathu babhaptizwa ibe indivuyisa kakhulu loo nto. Omnye wabo uAmelia, sesuka kwiklasi ye-137 yaseGiliyadi. Sendiye kaninzi nakwiSikolo Senkonzo Yobuvulindlela, esililungiselelo likaYehova! UYehova uye wandenza ndangumntu owonwabileyo, ndazixabisa ibe andazijongela phantsi. Ngoku abantu bayandihlonipha ibe andisenazintloni. Ndinabahlobo abalungileyo abakhonza uYehova emhlabeni wonke, hayi nje kuphela eFreetown, apho ndihlala khona.

Sele kuza kuphela iminyaka eyi-40 ndeva ngesithembiso sikaThixo sehlabathi elitsha, apho kungazokubakho mntu ukhubazekileyo. Eso sithembiso sihlala sindikhuthaza, ibe ingathi aside senzeke. Ndilinde ngomonde kuba ndiyamazi uThixo wam uYehova, akasoze alibazise. (Mika 7:7) Ndiye ndasikelelwa kakhulu kuba andingakhe ndivumele izilingo zam zindenze ndincame. UYehova uye wandinceda ndakwazi ukumelana neengxaki ezinzima. Ebesoloko endinceda kanye ngexesha elifanelekileyo. Ndonwabe nyhani ibe ndisoloko ndincumile kuba ndaphakanyiswa phantsi ndikhasa, ibe ngoku ndiphila obona bomi obubhetele endingazange ndabucinga.