AmaNgqina KaYehova

Ingcaciso: Libutho labantu abangamaKristu azwenibanzi athi ngokukhutheleyo anikele ubungqina ngoYehova uThixo neenjongo zakhe ezichaphazela uluntu. Iinkolelo zawo azisekele ngokupheleleyo eBhayibhileni.

Ziziphi iinkolelo zamaNgqina kaYehova eziwenza ahluke kwezinye iinkonzo?

(1) IBhayibhile: AmaNgqina kaYehova akholelwa kwelokuba yonke iBhayibhile iliLizwi eliphefumlelwe nguThixo, ibe endaweni yokunamathela kwimfundiso esekelwe kwisithethe sabantu, abambelela eBhayibhileni njengomlinganiselo wazo zonke iinkolelo zawo.

(2) UThixo: Anqula uYehova njengokuphela koThixo oyinyaniso aze ngokukhululekileyo athethe nabanye ngaye neenjongo zakhe ezithandekayo ngoluntu. Nabani na othi ekuhleni anikele ubungqina ngoYehova kudla ngokuthiwa ngoweqela elinye—“AmaNgqina kaYehova.”

(3) UYesu Kristu: Akakholelwa ukuba uYesu Kristu uyinxalenye kaBathathu Emnye, kodwa akholelwa ukuba, njengoko iBhayibhile isitsho, unguNyana kaThixo, ingqalo yendalo kaThixo; akholelwa ukuba wayekho ngaphambi kokuba abe ngumntu ibe nobomi bakhe bafuduswa ukusuka ezulwini basiwa kwisibeleko sentombi enguMariya; akholelwa nakwelokuba ubomi bakhe bobuntu obufezekileyo awabunikela njengedini bubangela kube nokwenzeka ukusindiselwa kubomi obungunaphakade kwabo banokholo; yaye akholelwa kwelokuba uKristu ngokukhutheleyo uyalawula njengoKumkani, enegunya alinikwe nguThixo phezu kwawo wonke umhlaba ukususela ngowe-1914.

(4) UBukumkani bukaThixo: Akholelwa kwelokuba uBukumkani bukaThixo bukuphela kwethemba loluntu; yaye bungurhulumente wokwenene; ibe kungekudala buza kutshabalalisa inkqubo yezinto engendawo nekhoyo, kuquka bonke oorhulumente babantu, ibe kungekudala buza kuvelisa inkqubo entsha apho ubulungisa buya kwesamela khona.

(5) Ubomi basezulwini: Akholelwa kwelokuba i-144 000 lamaKristu athanjiswe ngomoya liya kwabelana noKristu kuBukumkani bakhe basezulwini, lilawule njengookumkani kunye naye. Awakholelwa kwelokuba izulu lingumvuzo wakhe nabani na “olungileyo.”

(6) Umhlaba: Akholelwa kwelokuba injongo kaThixo yangaphambili ngomhlaba iya kuzalisekiswa; ibe umhlaba uya kumiwa ngokupheleleyo ngabanquli bakaYehova yaye aba baya kukwazi ukunandipha ubomi obungunaphakade kwimfezeko yabantu; kwaye nabafileyo baya kuvuswa ukuze bafumane ithuba lokuzuza ezi ntsikelelo.

(7) Ukufa: Akholelwa kwelokuba abafileyo akukho nto bayaziyo; ibe abeva ntlungu okanye luyolo kummandla othile wokomoya; yaye akukho ndawo bakhoyo kuyo ngaphandle kokubakho kwinkumbulo kaThixo, ngoko ithemba lobomi babo bekamva lixhomekeke ekuvusweni kwabo kwabafileyo.

(8) Imihla yokugqibela: Akholelwa kwelokuba ngoku siphila, ukususela ngowe-1914, kwimihla yokugqibela yale nkqubo engendawo yezinto; ibe abathile abazibonayo iziganeko zowe-1914 kwakhona baya kubona ukutshatyalaliswa okupheleleyo kwehlabathi elikhoyo elingendawo; yaye abathandi bobulungisa baya kusindela kumhlaba ocociweyo.

(9) Ukwahluka ehlabathini: Ngokunyanisekileyo azabalazela ukungabi yonxalenye yehlabathi, njengoko uYesu Kristu wathi kwakuya kuba njalo kubalandeli bakhe. Abonakalisa uthando lobuKristu bokwenyaniso ngabamelwane bawo, kodwa akabi nasabelo kwiipolitiki okanye kwiimfazwe zalo naluphi na uhlanga. Alungiselela iimfuno zokuphathekayo zeentsapho zawo kodwa ayakuphepha ukuzisukela ngamandla nangokwehlabathi izinto eziphathekayo nodumo lobuqu nokuzifica ngokugqith’ emgceni kwalo kwiziyolo.

(10) Ukusebenzisa isiluleko seBhayibhile: Akholelwa kwelokuba kubalulekile ukusebenzisa isiluleko seLizwi likaThixo kubomi bamihla le ngoku—ekhaya, esikolweni, kwezoshishino, kwibandla lawo. Kungakhathaliseki ukuba injani na indlela yobomi yomntu usenokuba ngomnye wamaNgqina kaYehova ukuba uyalutyeshela uqheliselo olugxekwayo liLizwi likaThixo aze asebenzise isiluleko salo sokuhlonel’ uThixo. Kodwa ukuba nabani na emva koko uyakuqhelisela ukukrexeza, uhenyuzo, ubufanasini, ukusebenzisa kakubi iziyobisi, ukunxila, ukuxoka, okanye ukuba, uya kususwa kubudlelane bentlangano.

(Uludwe olungasentla ngokufutshane luchaza iinkolelo ezithile ezibalaseleyo zamaNgqina kaYehova kodwa ezi asizizo zonke iingongoma ezenza iinkolelo zawo zahluke kwamanye amaqela. Isizinzi esingokweZibhalo seenkolelo ezingasentla sinokufunyanwa ngokusebenzisa iSalathisi sale ncwadi.)

Ngaba amaNgqina kaYehova alunqulo lwaseMerika

Angabameli boBukumkani bukaThixo, ingengabo abameli benkqubo yobupolitika, yezoqoqosho, okanye yezentlalo yalo naliphi na ilizwe leli hlabathi lidala.

Kuyinyaniso ukuba amaNgqina kaYehova namhla aqalisa eUnited States. Indawo yekomkhulu lawo lehlabathi apho iye yanceda ukubangela kube nokwenzeka ukushicilelwa nokuthunyelwa koncwadi lweBhayibhile kwezona ndawo zikude zehlabathi. Kodwa amaNgqina akakhethi olunye uhlanga kunolunye; afumaneka phantse kuzo zonke iintlanga, ibe aneeofisi kwiindawo ezininzi zomhlaba ukuze kulawulwe umsebenzi wawo kuloo mimandla.

Qwalasela: UYesu njengomYuda wazalelwa ePalestina, kodwa ubuKristu abulonqulo lwasePalestina, akunjalo na? Indawo awazalelwa kuyo uYesu njengomntu asiyona nto ibalulekileyo emele iqwalaselwe. Okwafundiswa nguYesu kwakuvela kuYise, uYehova uThixo, oqhubana ngokungakhethi buso bamntu nabantu bazo zonke iintlanga.—Yoh. 14:10; IZe. 10:34, 35.

Uxhaswa njani umsebenzi wamaNgqina kaYehova ngemali?

Uxhaswa ngeminikelo yokuzithandela, njengoko kwakunjalo ngamaKristu okuqala. (2 Kor. 8:12; 9:7) Akuqokelelwa nkongozelo kwiintlanganiso zawo; akangqibi. Nayiphi na iminikelo evela kubantu abanomdla isetyenziselwa ukuhambisela phambili umsebenzi owenziwa ngamaNgqina wokufundisa iBhayibhile ehlabathini lonke.

AmaNgqina akahlawulwa ngokuya kwawo kwindlu ngendlu okanye ukunikela kwawo uncwadi lweBhayibhile ezitratweni. Ukuthanda kwawo uThixo nommelwane kuwashukumisela ukuthetha ngamalungiselelo kaThixo athandekayo ngoluntu.

IWatch Tower Bible and Tract Society of Pennsylvania, engumbutho wonqulo ongokwasemthethweni osetyenziswa ngamaNgqina kaYehova, yasekwa ngowe-1884 ngokuvisisana noMthetho Wombutho Ongenzi Ngeniso WeCommonwealth YasePennsylvania, eUnited States. Ngaloo ndlela ngokomthetho, lo asingombutho owenza ingeniso, ibe ungenakuba njalo, yaye nabantu abenzi ngeniso ngalo Mbutho. Umgaqo-siseko woMbutho uthi: “[UMbutho] awucingi ngakufuna ngeniso okanye inzuzo yemali, ngayo nayiphi na indlela, kumalungu awo, kubalathisi okanye kumagosa.”

Ngaba amaNgqina kaYehova alihlelo okanye alunqulo lwesithethe?

Bambi ihlelo balichaza njengelithetha iqela eliqhekeke kunqulo olukhulu. Abanye eli gama balisebenzisa kwiqela elilandela inkokeli okanye umfundisi othile ongumntu. Eli gama lidla ngokusetyenziswa ngendlela engathandekiyo. AmaNgqina kaYehova akalosebe lecawa ethile, kodwa aquka abantu bazo zonke iindidi zobomi ibe nabaphuma kwiimvelaphi zonqulo ezininzi. Akakhangeli kuye nawuphi na umntu, kodwa kunoko akhangela kuYesu Kristu njengenkokeli yawo.

Unqulo lwesithethe lunqulo ekuthiwa alunamithetho iqhelekileyo okanye lubalaselisa ukuzinikela ngokwesithethe esimiselweyo. Iinkonzo ezininzi zesithethe zilandela inkokeli engumntu ephilayo, ibe ngokufuthi abalandeli bazo bahlala ngokwamaqela ahlukileyo kwibutho. Noko ke, umlinganiselo woko kumiselweyo, umele ube liLizwi likaThixo ibe amaNgqina kaYehova anamathela ngokungqongqo eBhayibhileni. Unqulo lwawo luyindlela yawo yobomi, kungekhona ukuzinikela ngokwesithethe. Akalandeli mntu ibe engazinxwemi nakulo lonke ibutho. Aphila aze asebenze phakathi kwabanye abantu.

Ludala kangakanani unqulo lwamaNgqina kaYehova?

Ngokutsho kweBhayibhile, ungcelele lwamangqina kaYehova lufikelela emva kuAbheli othembekileyo. AmaHebhere 11:4–12:1 athi: “Ngokholo uAbheli wasondeza kuye uThixo umbingelelo ogqithileyo kunokaKayin, . . . Ngokholo uNowa, ehlatyelwe nguThixo ngazo izinto ebezingekabonwa, wathi ngokoyika uThixo wawakha umkhombe . . . Ngokholo uAbraham wathi, akubizwa, wakululamela ukuba aphume, aye kuloo ndawo abeza kuyamkela ukuba ibe lilifa; . . . Ngokholo uMoses uthe, akuba mkhulu, akavuma ukubizwa ngokuthi ungunyana wentombi kaFaro; enyula kanye ukuba aphathwe kakubi, ndawonye nabantu bakaThixo, kunokuba axhamle izono okomzuzwana; . . . Ngako oko ke, sinelifu elingakanana nje elisingqongileyo lamangqina, masithi nathi, siwubekile nxamnye wonke umthwalo, naso isono esinokusirhawula ngokusisulu, silubaleke ngomonde ugqatso olubekwe phambi kwethu.”

Ithetha ngoYesu Kristu, iBhayibhile ithi: “Utsho uAmen, ingqina elithembekileyo, eliyinyaniso, ingqalo yayo indalo kaThixo.” Wayelingqina likabani? Wathi wayelibonakalalisile igama likaYise. Wayelelona ngqina liphambili likaYehova.—ISityhi. 3:14; Yoh. 17:6.

Okubangel’ umdla kukuba, amaYuda athile abuza enoba umsebenzi kaYesu wawumela ‘imfundiso entsha’ na. (Marko 1:27) Kamva, wambi amaGrike ayecinga ukuba umpostile uPawulos wayengenisa ‘imfundiso entsha.’ (Ize. 17:19, 20) Yayintsha ezindlebeni zabo babeyiphulaphule, kodwa into ebalulekileyo yayikukuba yayiyinyaniso, ivisisana ngokupheleleyo neLizwi likaThixo.

Imbali yanamhla yamaNgqina kaYehova yaqalisa ngokuyilwa kweqela lezifundo zeBhayibhile eAllegheny, ePennsylvania, eUnited States., ekuqalekeni kweminyaka yee-1870. Ekuqalekeni ayesaziwa njengabaFundi BeBhayibhile, kodwa ngowe-1931 amkela igama elingokweZibhalo lamaNgqina kaYehova. (Isa. 43:10-12) Iinkolelo noqheliselo lwawo asizozinto zitsha kodwa kukubuyiselwa kobuKristu benkulungwane yokuqala.

Ngaba amaNgqina kaYehova akholelwa ukuba unqulo lwawo lulo kuphela olufanelekileyo?

IBhayibhile ayivisisani nembono yanamhla yokuba kukho iindlela ezininzi ezamkelekileyo zokunqula uThixo. AmaEfese 4:5 athi “inye iNkosi, lunye ukholo.” UYesu wathi: “Limxinwa isango, icuthene nendlela, esa ebomini; bambalwa ke abalifumanayo. . . . Asingabo bonke abathi kum, Nkosi, Nkosi, abaya kungena ebukumkanini bamazulu; ngokwenzayo ukuthanda kukaBawo osemazulwini.”—Mat. 7:13, 14, 21; bona kwaneyoku-1 yabaseKorinte 1:10.

Ngokuphindaphindiweyo iZibhalo zibhekisela kwintlanganisela yeemfundiso zamaKristu okwenyaniso ‘njengenyaniso’ ibe ubuKristu kuthethwa ngabo ‘njengendlela yenyaniso.’ (1 Tim. 3:15; 2 Yoh. 1; 2 Pet. 2:2) Ngenxa yokuba amaNgqina kaYehova ezisekele eBhayibhileni zonke iinkolelo zawo, imilinganiselo yawo yokuziphatha, neenkqubo ezingokwentlangano eziseBhayibhileni, ukholo lwawo eBhayibhileni njengeLizwi likaThixo luwanika inkoloseko yokuba anako ngokwenene kuyinyaniso. Ngoko isimo sengqondo sawo asisiso esokuzigwagwisa kodwa sibonakalisa intembelo yawo yokuba iBhayibhile ingumlinganiselo ofanelekileyo wokuthelekisa unqulo lukabani. Akazingci kodwa ayakulangazelela ukwabelana ngeenkolelo zawo nabanye.

Ngaba ezinye iinkonzo nazo aziyilandeli iBhayibhile?

Ezininzi ziyayisebenzisa ukusa kumlinganiselo othile. Kodwa ngaba ngokwenene ziyakufundisa zize zikuqhelisele oko ikuthethayo? Qwalasela oku: (1) Kwiinguqulelo zazo ezininzi zeBhayibhile zilishenxisile igama loThixo oyinyaniso kangangezihlandlo ezingamawakawaka. (2) Imfundiso kaBathathu Emnye, ingcamango yazo kaThixo, iphuma kwimithombo yabahedeni ibe yaveliswa yaba kwimo ekuyo ngoku kwiinkulungwane emva kokugqitywa kokubhalwa kweBhayibhile. (3) Inkolelo yazo yokungafi komphefumlo womntu njengesizinzi sobomi obuqhubekayo ayiphumi eBhayibhileni; iphuma kwiBhabhiloni yamandulo. (4) Umxholo wokushumayela kukaYesu yayibuBukumkani bukaThixo, ibe wathuma abafundi bakhe ukuba bathethe ngokobuqu nabanye ngabo; kodwa iicawa zanamhlanje kunqabile ukuba zibukhankanye obo Bukumkani ibe amalungu azo akawenzi umsebenzi wokushumayela “ezi ndaba zilungileyo zobukumkani.” (Mat. 24:14) (5) UYesu wathi abalandeli bakhe bokwenyaniso banokufaniswa kakuhle ngokuthandana kwabo ngohlobo lokuzincama. Ngaba oku kuyenzeka kwiinkonzo zeNgqobhoko xa iintlanga zisilwa emfazweni? (6) IBhayibhile ithi abafundi bakaKristu babengayi kuba ngabehlabathi, ibe ilumkisa ngelokuba nabani na ofuna ukuba sisihlobo nehlabathi uzenza utshaba lukaThixo; kodwa iicawa zeNgqobhoko namalungu azo abandakanyeke ngokunzulu kwimicimbi yobupolitika yeentlanga. (Yak. 4:4) Ngenxa yengxelo enjalo, ngaba ngokunyanisekileyo kunokutshiwo ukuba ngokwenene zinamathela eBhayibhileni?

AmaNgqina kaYehova ayifikelela njani ingcaciso yawo yeBhayibhile?

Into eyintloko yeyokuba amaNgqina ngokwenene akholelwa kwelokuba iBhayibhile iliLizwi likaThixo nokuba ekuquletheyo kubhalelwe ukufundisa thina. (2 Tim. 3:16, 17; Roma 15:4; 1 Kor. 10:11) Ngoko akabheneli kwiimpikiswano zentanda-bulumko ukuze aphephe amazwi ayo acacileyo angenyaniso okanye akathetheleli indlela yobomi yabantu abatyeshele imilinganiselo yayo yokuziphatha.

Ukubonisa intsingiselo yolwimi lokomfuziselo oluseBhayibhileni, avumela iBhayibhile inikele ingcaciso eyiyeyayo, kunokuba anikele iingcamango ezizezawo ngokubhekisele kwintsingiselo yoko. (1 Kor. 2:13) Iingcaciso zentsingiselo yamabinzana okomfuziselo zidla ngokufumaneka kwezinye iinxalenye zeBhayibhile. (Ngokomzekelo, bona ISityhilelo 21:1; ngoko, ngokubhekisele kwintsingiselo ethi “ulwandle,” funda uIsaya 57:20. Ukuze uyazi “iMvana” ekubhekiselwe kuyo kwiSityhilelo 14:1, bona uYohane 1:29 neyoku-1 kaPetros 1:19.)

Ngokubhekisele kwinzaliseko yesiprofeto, asebenzisa oko uYesu wakuthethayo ngokuphaphela iziganeko ezidibana nokwaxelwa kwangaphambili. (Luka 21:29-31; thelekisa eyesi-2 kaPetros 1:16-19.) Ngokunyanisekileyo abonisa ezo ziganeko aze atsalele ingqalelo koko iBhayibhile ithi zithetha kona.

UYesu wathi emhlabeni wayeya kuba ‘nomkhonzi othembekileyo noqondayo’ (abalandeli bakhe abathanjisiweyo abajongwa njengeqela), awayeya kuthi ngaye alungiselele ukutya kokomoya kwabo babumba abendlu yokholo. (Mat. 24:45-47) AmaNgqina kaYehova ayaligqala elo lungiselelo. Njengoko kwakunjalo kumaKristu enkulungwane yokuqala, akhangela kwiqumrhu elilawulayo lolu didi ‘lomkhonzi’ ukuze liphendule imibuzo enzima—kungekhona ngobulumko babantu, kodwa ngokudimbaza ulwazi lwabo lweLizwi likaThixo neenkqubano zakhe nabakhonzi bakhe, nangoncedo lomoya kaThixo, lo awuthandazela ngokunyanisekileyo.—Ize. 15:1-29; 16:4, 5.

Kutheni le nto bekukho iinguqulelo kwiminyaka edlulileyo kwiimfundiso zamaNgqina kaYehova?

IBhayibhile ibonisa ukuba uYehova wenza abakhonzi bakhe bayiqonde injongo yakhe ngokwamabakala. (IMize. 4:18; Yoh. 16:12) Ngaloo ndlela, abaprofeti ababephefumlelwe nguThixo ukubhala amacandelo eBhayibhile babengayiqondi intsingiselo yazo zonke izinto abazibhalayo. (Dan. 12:8, 9; 1 Pet. 1:10-12) Abapostile bakaYesu Kristu babeqonda ukuba yayininzi into ababengayiqondi kwixesha labo. (Ize. 1:6, 7; 1 Kor. 13:9-12) IBhayibhile ibonisa ukuba ulwazi lwenyaniso lwaluya kwanda gqitha ebudeni ‘bexesha lokuphela.’ (Dan. 12:4) Ulwazi olwandileyo ludla ngokufuna uhlengahlengiso kwindlela ubani acinga ngayo. AmaNgqina kaYehova akuvuma ngokuthobekileyo ukwenza uhlengahlengiso olunjalo.

Kutheni le nto amaNgqina kaYehova eshumayela kwindlu ngendlu?

UYesu wawuxela kwangaphambili lo msebenzi njengowawuza kwenziwa kumhla wethu: “Ezi ndaba zilungileyo zobukumkani ziya kuvakaliswa kulo elimiweyo liphela, zibe bubungqina kuzo zonke iintlanga; kwandule ke ukufika ukuphela.” Kwakhona wayalela abalandeli bakhe wathi: “Hambani ngoko niye kuzenza abafundi zonke iintlanga.”—Mat. 24:14; 28:19.

Xa uYesu wathuma abafundi bakhe bokuqala, wabayalela ukuba baye emakhayeni abantu. (Mat. 10:7, 11-13) Umpostile uPawulos wathi ngobulungiseleli bakhe: “Andinifihlelanga nto, ndanityela onke amalungelo; ndanifundisa ekuhleni nakwizindlu ngezindlu.”—Ize. 20:20, 21; bona kwaneZenzo 5:42.

Isigidimi amaNgqina asivakalisayo siquka ubomi babantu; akuphaphele ukufikelela wonk’ ubani. (Zef. 2:2, 3) Amatyelelo awo ashukunyiswa luthando—okokuqala ukuthanda uThixo, kwanokuthanda ummelwane wawo.

Kwinkomfa yeenkokeli zonqulo eSpeyin kwathethwa oku: “Mhlawumbi [iicawa] ziyilibele kakhulu eyona nto exakekisa ngokuyintloko amaNgqina—ukutyelela amakhaya, okuyindlela yabapostile eyayisetyenziswa kwicawa yokuqala. Xa iicawa, amaxesha amaninzi, zizisikel’ umda ngokwakha iicawa zazo, zikhalisa iintsimbi zazo ukutsala abantu yaye zishumayela ngaphakathi kweendawo zazo zokunqula, [amaNgqina] asalandela indlela yabapostile yokuya kwizindlu ngezindlu nokusebenzisa onke amathuba okunikela ubungqina.”—El Catolicismo, Bogotá, Colombia, Septemba 14, 1975, iphe. 14.

Kodwa kutheni le nto amaNgqina ewatyelela ngokuphindaphindiweyo kwanamakhaya abantu abangenalukholo olufana nolwawo?

Isigidimi sawo akasinyanzelisi kwabanye. Kodwa ayazi ukuba abantu bafudukela kwiindawo ezintsha zokuhlala ibe neemeko zabantu ziyaguquka. Namhlanje umntu usenokuxakeka gqitha ukuba angaphulaphula; ngelinye ixesha ngovuyo ixesha lakhe usenokulinikela koko. Elinye ilungu lendlu lisenokungabi namdla, kodwa amanye asenokuba nomdla. Abantu bayaguquguquka; iingxaki ezinzulu ebomini zisenokubashukumisela ukuba bayiqonde intswelo yokomoya.—Bona kwanoIsaya 6:8, 11, 12.

Kutheni le nto amaNgqina kaYehova etshutshiswa kuze kuthethwe kakubi ngawo?

UYesu wathi: “Ukuba ihlabathi linithiyile, yazini ukuba lindithiye kuqala kunani. Ukuba beningabehlabathi, ihlabathi linge likuthanda okwalo; ke ngokuba ningengabehlabathi, ndaninyulayo mna kulo ihlabathi, ngenxa yoko linithiyile ihlabathi.” (Yoh. 15:18, 19; bona kwaneyoku-1 kaPetros 4:3, 4.) IBhayibhile ibonisa ukuba lonke ihlabathi lilele kulawulo lukaSathana; ungumphembeleli oyintloko wentshutshiso.—1 Yoh. 5:19; ISityhi. 12:17.

Kwakhona uYesu waxelela abafundi bakhe oku: “Nithiywe ngabantu bonke, ngenxa yegama lam.” (Marko 13:13) Igama elithi ‘igama’ apha lithetha oko uYesu akuko ngokwasemthethweni, uKumkani onguMesiya. Intshutshiso ibakho ngenxa yokuba amaNgqina kaYehova imiyalelo yakhe ayibeka ngaphambi kwaleyo yakhe nawuphi na umlawuli wasemhlabeni.

Ukuba Ubani Uthi—

‘Kutheni le nto bantundini ningabandakanyeki nje ekwenzeni izinto ukuze nincedise ekwenzeni ihlabathi (indawo) libe lelihle ngakumbi nekunokuhlaliwa kulo?’

Usenokuphendula uthi: ‘Iimeko ezikule ndawo ngokucacileyo zibalulekile kuwe, ibe nakum zinjalo. Makhe ndikubuze, Yiyiphi ingxaki onoluvo lokuba imele ibe phakathi kwezokuqala kwezifuna ingqalelo?’ Mhlawumbi usenokongeza uthi: ‘Kutheni unoluvo lokuba oku kuye kwaba yimfuneko enkulu gqitha? . . . Ngokucacileyo, isenzo esikhawulezileyo kulo mcimbi sinokuba sesengenelo, kodwa ndiqinisekile ukuba uya kuvuma ukuba sithanda ukubona uphuculo oluya kuhlala ithuba elide. Leyo yindlela esiwuvela ngayo lo mcimbi njengamaNgqina kaYehova. (Cacisa esikwenzayo ukunceda abantu basebenzise imigaqo yeBhayibhile kubomi babo ukuze bafikelele kwingcambu yomcimbi ongokobuqu; kwakhona, oko uBukumkani bukaThixo buya kukwenza, nesizathu sokuba oku kube kuya kuyicombulula ngokusisigxina ingxaki yoluntu.)’

Okanye unokuthi: ‘(Emva kokugubungela iingongoma ezithile kwimpendulo eyandulelayo . . .) Bambi abantu bafak’ isandla ekuphuculeni indawo ngokunikela ngemali; abanye benjenjalo ngokunikela ngokusebenza. AmaNgqina kaYehova azenza zombini ezi zinto. Makhe ndikucacisele.’ Mhlawumbi usenokongeza uthi: (1) ‘Ukuze abe ngomnye wamaNgqina kaYehova, umntu umele azihlawule eqhutywa sisazela iirhafu zakhe; eyinika urhulumente imali yokulungiselela iinkonzo ezifunekayo.’ (2) ‘Sigqithela ngaphaya koko, sityelela emakhayeni abantu, sizinikela ukuba sifundisise iBhayibhile nabo ngesisa. Xa beqhelana noko kuthethwa yiBhayibhile, bafunda ukusebenzisa imigaqo yeBhayibhile baze ke bahlangabezane neengxaki zabo.’

Enye indlela: ‘Kuyandivuyisa ukuba ube uwuphakamisile lo mcimbi. Abantu abaninzi abazange babuze ukufumanisa oko amaNgqina ngokwenene akwenzayo kwimicimbi yendawo. Ngokucacileyo zininzi iindlela zokunikela uncedo.’ Mhlawumbi usenokongeza uthi: (1) ‘Bambi bakwenza ngokumisela amaziko—izibhedlele, amakhaya abalupheleyo, amaziko okuhlaziywa kwengqondo yamakhoboka eziyobisi, njalo njalo. Abanye basenokuzinikela ngokuya kanye emakhayeni abantu baze banikele uncedo olufanelekileyo njengoko benako. Oko koko amaNgqina kaYehova akwenzayo.’ (2) ‘Siye sabona ukuba kukho into enokuguqula yonke imbono yomntu ngobomi, ibe oko kukwazi oko iBhayibhile ikubonisa kuyinjongo yokwenene yobomi noko kuqulethwe likamva.’

Icebiso elongezelelekileyo: ‘Ndiyawuvuyela lo mbuzo. Siyathanda ukubona iimeko ziphucuka, akunjalo na? Makhe ndikubuze, Uvakalelwa njani ngoko uYesu Kristu wakwenzayo? Ngaba ubungathi indlela awaqhuba ngayo ekuncedeni abantu yayisebenziseka? . . . Sizama ukulandela umzekelo wakhe.’

‘AmaKristu kumele ukuba abe ngamangqina kaYesu, angabi ngamaNgqina kaYehova’

Usenokuphendula uthi: ‘Uphakamise ingongoma ebangel’ umdla. Ibe uchanile xa usithi sinembopheleleko yokunikela ubungqina ngoYesu. Kungoko indima kaYesu kwinjongo kaThixo ibethelelwa kwiimpapasho zethu. (Kusenokufuneka usebenzise incwadi ekhoyo okanye iphephancwadi elikhoyo ukubonisa oku.) Kodwa nantsi into esenokuba yinto entsha kuwe. (ISityhi. 1:5) . . . UYesu ‘wayeliNgqina elithembekileyo’ likabani? (Yoh. 5:43; 17:6) . . . UYesu wamisela umzekelo esimele siwuxelise, akunjalo na? . . . Kutheni le nto kubaluleke kangaka ukwazi uYesu noYise? (Yoh. 17:3)’