Abadala Abalusa Umhlambi

XA WAYESHUMAYELA emhlabeni, uYesu wazibonakalisa ukuba ‘ungumalusi olungileyo.’ (Yoh. 10:11) Xa wabona abantu abaninzi bemlandela ‘wabasizela, kuba babephethwe kakubi, bengahoywanga oku kweegusha ezingenamalusi.’ (Mat. 9:36) UPetros nabanye abapostile bayibona indlela uYesu abathanda ngayo abantu. Wayohlukile kubalusi bobuxoki bakwaSirayeli, ababengawuhoyanga umhlambi, babewuyeka ulahleke ibe bengawufundisi ngoThixo. (Hez. 34:7, 8) Ukujonga indlela uYesu awazifundisa waza wazikhathalela ngayo izimvu de wazifela, kwabanceda abapostile bafunda indlela yokunceda abantu abanokholo babuyele kuYehova, ‘umalusi okhusela ubomi babo.’​—1 Pet. 2:25.

² Ngenye imini xa uYesu wayethetha noPetros, wakubethelela kakhulu ukubaluleka kokondla nokwalusa izimvu. (Yoh. 21:15-17) UPetros wazimisela ukuyenza le nto wade waxelela abadala bexesha labapostile ukuba bayenze. Wathi: “Waluseni umhlambi kaThixo eniwuphathisiweyo, niwukhathalele ngokuzithandela phambi koThixo, hayi kuba ninyanzelwa okanye ninyolukile, kodwa kuba nifuna nyhani; ningazenzi abalawuli babo balilifa likaThixo, kodwa yibani yimizekelo kumhlambi.” (1 Pet. 5:1-3) Amazwi kaPetros ayasebenza nakubadala namhlanje. NjengoYesu, abadala abasebenzi kuba benyanzelwa, bangumzekelo kumhlambi ibe bayakhokela ekukhonzeni uYehova.​—Heb. 13:7.

³ Siyavuya kuba sinabadala abamiselwe ngomoya oyingcwele ebandleni. Basinceda ngezinto ezininzi ngenxa yokuba basikhathalele. Ngokomzekelo, abadala bayasikhuthaza baze bahoye wonke umntu ebandleni. Qho ngeveki, baziqhuba kakuhle iintlanganiso zebandla ezomeleza ukholo. (Roma 12:8) Bakhusela umhlambi kuyo nantoni na enokuwenzakalisa, njengabantu abenza izinto ezimbi. (Isa. 32:2; Tito 1:9-11) Xa besibakho baze bakhokele entsimini, bayasinceda nathi sikukhuthalele ukushumayela iindaba ezilungileyo qho ngenyanga. (Heb. 13:15-17) UYehova usebenzisa ezi ‘zipho zingabantu’ ukuze alakhe ibandla.​—Efe. 4:8, 11, 12.

IIMFANELEKO ZABADALA

⁴ Amadoda amiselwa ukuba abe ngabadala amele afaneleke ngendlela echazwe kwiLizwi LikaThixo ukuze akwazi ukulikhathalela kakuhle ibandla. Kuxa befaneleka kuphela apho kunokuthiwa bamiselwe ngomoya oyingcwele. (IZe. 20:28) Kuyavunywa ukuba imilinganiselo eseZibhalweni efunwa kubadala iphakamile, kaloku ukuba ngumdala ngumsebenzi obalulekileyo. Kodwa ke ayiphakamanga ukuba ingade ingafikelelwa ngamadoda amthandayo uYehova nakufunayo ukusetyenziswa nguye. Ifanele icace kubo bonke ebandleni ukuba abadala ngabantu abasebenzisa isiluleko seBhayibhile ebomini babo.

⁵ Kwincwadi yakhe yokuqala eyayisiya kuTimoti, nakwincwadi yakhe eyayisiya kuTito, umpostile uPawulos wachaza iimfaneleko zeZibhalo zabadala. Kweyoku-1 kuTimoti 3:1-7, sifunda la mazwi: “Ukuba umntu uzimisele ukuba ngumdala, unqwenela umsebenzi omhle. Umdala ufanele angakhalazeleki, abe nomfazi omnye, angabaxi xa esenza izinto, abe nengqondo ephilileyo, abe nocwangco, athande iindwendwe, akwazi ukufundisa, angabi lonxila, angabi ndlongondlongo, kodwa abe bhetyebhetye, angathandi ngxabano, angathandi mali, abe ngumntu oyikhokela kakuhle intsapho yakhe, abe nabantwana abathobelayo nabazimiseleyo (kuba, ukuba umntu wohlulwa kukukhokela intsapho yakhe, angakwazi njani ke ukuhoya ibandla likaThixo?), angabi ngumntu osanda kuguquka, kuba hleze akhukhumale likratshi aze afumane umgwebo ofanayo nokaMtyholi. Ngaphezu koko, nabantu abangakholwayo bafanele bathethe kakuhle ngaye, ukuze angahlazeki aze arhintyelwe nguMtyholi.”

⁶ UPawulos wabhalela uTito esithi: “Ndakushiya apho eKrete ukuze ulungise izinto ezingahambi kakuhle, nokuze umisele abadala kwizixeko ngezixeko, njengokuba ndakuyalelayo ndisithi: Umdala umele abe yindoda engenakumangaleleka, indoda enomfazi omnye, enabantwana abakholwayo, abangamangalelwa ngokuziphatha kakubi okanye ukungalawuleki. Njengomntu osebenzela uThixo, umdala umele angabi nakumangaleleka, angabi ngumntu owenza unothanda, angakhawulezi ukucaphuka, angabi lonxila, angabi ngumntu obetha abanye, anganyoluki, kodwa makathande iindwendwe, athande izinto ezilungileyo, aphile engqondweni, abe lilungisa, anyaniseke, akwazi nokuzibamba, aqiniseke ukuba ubambelela nkqi kwilizwi elithembekileyo xa efundisa, ukuze akwazi ukukhuthaza ngemfundiso eyakhayo nokululeka abo baphikisayo.”​—Tito 1:5-9.

⁷ Nangona ekuqaleni iimfaneleko zabadala ezichazwe kwiZibhalo zisenokuvakala ngathi zixhome kakhulu, asikho isizathu sokuba amadoda angamaKristu angafuni ukuwenza lo msebenzi. Xa abadala beneempawu ezintle zamaKristu, bakhuthaza ibandla ukuba nalo libe nazo. UPawulos wathi ezi ‘zipho zingabantu’ siziphiwe “ukuze kuqeqeshwe abo bangcwele, benze umsebenzi kaThixo, bakhe umzimba kaKristu, de sonke simanyane elukholweni nakulwazi oluchanileyo olungoNyana kaThixo, sikhule sibe kwizinga lomntu omdala, sikhule ngokupheleleyo njengoKristu.”—Efe. 4:8, 12, 13.

⁸ Abadala ayingobantwana okanye abantu abasanda kuguquka. Kunoko ngabantu abanamava endlela yokuphila yamaKristu, abayazi kakuhle iBhayibhile, abayiqonda kakuhle, nabalithandayo ibandla. Banesibindi sokuthetha xa kukho into eyonakalayo, ngaloo ndlela bekhusela umhlambi kuye nabani na onokuwuxhaphaza. (Isa. 32:2) Bonke abantu ebandleni bamele babone ukuba abadala ngamadoda amthandayo uThixo nawukhathaleleyo umhlambi wakhe.

⁹ Abo bamiselwa njengabadala babonakalisa ubulumko kubomi babo. Ukuba batshatile, kufuneka banamathele kwimilinganiselo yamaKristu yomtshato, ngamanye amazwi, umdala abe nomfazi omnye, kwaye ayikhokele kakuhle intsapho yakhe. Ukuba unabantwana abakholwayo, abathobelayo nabazimiseleyo, abangamangalelwa ngokuziphatha kakubi okanye ukungalawuleki, abantu ebandleni banokuya kuloo mdala baze bacele amacebiso ezinto ezahlukeneyo ngobomi bentsapho nobamaKristu. Umdala ufanele angakhalazeleki, angabi nakumangaleleka, nabantu abangakholwayo bafanele bathethe kakuhle ngaye. Akufanele kubekho isityholo sento embi ayenzileyo eza kungcolisa igama lebandla. Akafanele abe ngosandokululekwa yikomiti egwebayo ngenxa yesono asenzileyo. Xa kunjalo, nabanye ebandleni baza kufuna ukuxelisa umzekelo wakhe omhle, baze bamthembe ukuba uza kubanceda bamkhonze kakuhle uThixo.​—1 Kor. 11:1; 16:15, 16.

¹⁰ Amadoda afaneleka ngolo hlobo ayakwazi ukukhonza ibandla lamaKristu njengoko babesenza abadala bakwaSirayeli abachazwa ‘njengabalumkileyo, abaqondayo nabanamava.’ (Dut. 1:13) Loo nto ayithethi kuthi abadala abangamaKristu abanasono, kodwa baziwa ebandleni nasekuhlaleni njengamadoda alungileyo nawoyika uThixo aye abonisa kangangexesha elide ukuba aphila ngokuvisisana nemigaqo kaThixo. Xa emsulwa aba nenkululeko yokuthetha ebandleni.​—Roma 3:23.

¹¹ Amadoda afanelekela ukumiselwa njengabadala afanele angabaxi xa esenza izinto nakwindlela aqhubana ngayo nabanye. Afanele aphile ubomi obulungeleleneyo kwaye azibambe. Angabaxi xa esitya, esela, ezonwabisa okanye esenza ezinye izinto. Afanele angasebenzisi utywala ngendlela ebaxiweyo ukuze angamangalelwa ngokunxila okanye ukuba linxila. Kumntu onxilileyo kuba nzima ukuzibamba kwaye akakwazi ukunyamekela ibandla.

¹² Ukuvelela imicimbi yebandla kufuna indoda ekwaziyo ukwenza izinto ngocwangco ngomlinganiselo othile. Oku kubonakala kwindlela enxiba nezilungisa ngayo, ikhaya layo nezinto ezenzayo. Indoda enjalo ayilibazisi ukwenza izinto; iyakwazi ukubona into efunekayo ize icebe ngendlela efanelekileyo. Inamathela kwimigaqo emiselwe nguThixo.

¹³ Umdala umele abe bhetyebhetye. Umele akwazi ukusebenzisana ngomanyano nabanye abadala. Ufanele ayazi indawo yakhe aze angafuni izinto ezingaphaya kwamandla abanye. Ekubeni ebhetyebhetye, umdala akanyanzelisi iimbono zakhe, ecinga ukuba eyona nto inengqondo yethethwa nguye kunethethwa ngabanye abadala. Abanye abadala basenokuba babhetele kunaye kwiimpawu ezithile okanye kubuchule yena angenabo. Umdala ubonisa ukuba ubhetyebhetye xa esekela izigqibo zakhe kwiZibhalo aze azame ukuxelisa umzekelo kaYesu Kristu. (Fil. 2:2-8) Akafanele abe ngumntu othanda ingxabano okanye ondlongondlongo, kunoko umele abahloniphe abanye, ebajonga njengababhetele kunaye. Akenzi unothanda, esoloko enyanzelisa ukuba kuviwe ngaye. Akakhawulezi ukucaphuka, kunoko uqhubana ngoxolo nabanye.

¹⁴ Kwakhona umntu ofanelekela ukuba ngumdala ufanele abe nengqondo ephilileyo. Le nto ithetha ukuba ufanele azinze engqondweni, angatyhuthuzeli. Uyiqonda kakuhle imigaqo kaYehova nendlela esebenza ngayo. Umntu ophilileyo engqondweni usamkela lula isiluleko nolwalathiso yaye akangomhanahanisi.

¹⁵ UPawulos wakhumbuza uTito ukuba umdala ngumntu othanda izinto ezilungileyo. Umele abe lilungisa yaye anyaniseke okanye angagungqi. Ezi mpawu ziza kubonakala xa eqhubana nabanye aze angagungqi xa emela into elungileyo nentle. Akagungqi ekukhonzeni uYehova kwaye uza kusoloko ebambelela kwimigaqo yobulungisa xa esenza izigqibo. Uyakwazi ukugcina iimfihlo. Uthanda iindwendwe yaye unikela ngamandla, ngexesha nangezinto zakhe ukuze ancede abanye.​—IZe. 20:33-35.

¹⁶ Ukuze umdala aphumelele, umele akwazi ukufundisa. UPawulos wathi kuTito, umdala umele “aqiniseke ukuba ubambelela nkqi kwilizwi elithembekileyo xa efundisa, ukuze akwazi ukukhuthaza ngemfundiso eyakhayo nokululeka abo baphikisayo.” (Tito 1:9) Umdala ufanele akwazi ukucacisa kakuhle, achaze ubungqina, aphendule abaphikisayo, kwaye asebenzise iZibhalo ngendlela eza kwenza abanye beyiseke kwaye ukholo lwabo lomelele. Umdala ufanele akwazi ukufundisa ngobuchule, xa iimeko zivuma naxa zinzima. (2 Tim. 4:2) Unomonde ofunekayo ukuze amluleke ngobulali umntu ophambukayo okanye eyisele othandabuzayo aze amncede enze imisebenzi elungileyo esekelwe elukholweni. Xa umdala ekwazi ukufundisa eqongeni okanye ukufundisa umntu omnye, ubonisa ukuba uyayifikelela le mfaneleko ibalulekileyo.

¹⁷ Kubalulekile ukuba abadala bayikhuthalele intsimi. Kufanele kucace ukuba nangale ndlela bazama ukuxelisa uYesu, owayewuxabise gqitha umsebenzi wokushumayela iindaba ezilungileyo. UYesu wayenomdla kubafundi bakhe, ebanceda ukuba babe ngabavangeli abanempumelelo. (Marko 1:38; Luka 8:1) Ukuzimisela kwabadala ukushumayela ixesha elingakumbi entsimini nangona benocwangciso oluxakekileyo kwenza lonke ibandla likhuthale. Xa abadala neentsapho zabo nabanye ebandleni beshumayela, ‘bayakhuthazana.’​—Roma 1:11, 12.

¹⁸ Iyonke le nto isenokubonakala ngathi ingaphaya kwamandla omdala. Kakade ke, akakho umdala onokuyifikelela ngokugqibeleleyo imilinganiselo ephakamileyo echazwe eBhayibhileni, kodwa akakho umdala omiselweyo ebandleni ofanele asilele kakhulu kwenye yezi mfaneleko kangangokuba ukusilela kwakhe kubonakale kuyinto embi kakhulu. Abanye abadala banokuba neempawu ezithile ababalaseleyo kuzo, ngoxa abanye besenokugqwesa kwezinye. Ekugqibeleni lonke iqumrhu liza kuba nazo zonke iimpawu ezintle eziyimfuneko, ukuze livelelwe ngendlela efanelekileyo ibandla likaThixo.

¹⁹ Xa iqumrhu labadala lincomela amadoda aza kumiselwa njengabadala, lifanele likhumbule la mazwi ompostile uPawulos athi: “Ndithi kuni ngamnye wenu makangazicingeli kakhulu, kodwa makacinge ngendlela ebonisa ukuba uyisebenzisa kakuhle ingqondo, kuba nguThixo oncede ngamnye wenu wanokholo.” (Roma 12:3) Umdala ngamnye ufanele azigqale njengoyena uphantsi. Akukho mntu ufanele abe “lilungisa kakhulu” xa kuhlolwa iimfaneleko zomnye. (INtshu. 7:16) Licinga ngeemfaneleko ezibekelwe abadala kwiZibhalo, iqumrhu labadala lifanele lijonge ukuba umzalwana ohlolwayo uyifikelela ngendlela eyamkelekileyo na imilinganiselo. Abadala baza kukhumbula ukuba abantu abafezekanga, kwaye abazukukhetha buso okanye bahanahanise xa bencomela abantu. Loo nto iza kubonisa ukuba bayayihlonipha imilinganiselo kaYehova yobulungisa, kwaye bacinga ngokulungelwa kwebandla. Baza kuthandaza xa beza kuncomela umntu baze balandele ulwalathiso lomoya oyingcwele kaThixo. Lo ngomnye umsebenzi obalulekileyo abamele bawenze ibe bamele bawenze becinga ngamazwi kaPawulos athi: “Uze ungabeki nabani na izandla ngokungxama.”—1 Tim. 5:21, 22.

ISIQHAMO SOMOYA

²⁰ Amadoda afanelekela ukuba ngabadala abonisa ngendlela aphila ngayo ukuba alathiswa ngumoya oyingcwele ibe anesiqhamo somoya. UPawulos uchaza iinxalenye ezisithoba zesiqhamo somoya, “uthando, uvuyo, uxolo, umonde, ububele, ukulunga, ukholo, ukululama, ukuzibamba.” (Gal. 5:22, 23) Abadala abanjalo bayabahlaziya abazalwana ibe banceda ibandla limanyane njengoko likhonza uYehova. Indlela abaziphatha ngayo kunye nemiphumo yokusebenza nzima kwabo iza kubonisa ukuba bamiselwe ngomoya oyingcwele.​—IZe. 20:28.

AMADODA AKHUTHAZA UMANYANO

²¹ Kubalulekile ukuba abadala basebenzisane ukuze kubekho umanyano ebandleni. Basenokuba nobuntu obungafaniyo, kodwa ke bagcina iqumrhu limanyene ngokumamelana ngembeko nangona besenokungavumelani ngento yonke abayixoxayo. Ukuba nje akophulwa mgaqo weBhayibhile, ngamnye ufanele akulungele ukurhoxa aze axhase isigqibo sequmrhu. Xa umntu erhoxa aze amkele iimbono zabanye, ubonisa ukuba ukhokelwa ‘bubulumko obuvela emazulwini obudala uxolo nobubhetyebhetye.’ (Yak. 3:17, 18) Akukho mdala ufanele acinge ukuba mkhulu kunabanye, kwaye akukho mdala ufanele azenze ingqwayingqwayi phezu kwabanye. Abadala basebenzisana noYehova xa besebenzisana njengequmrhu ukuze kungenelwe ibandla.—1 Kor., isahlu. 12; Kol. 2:19.

ZIMISELE UKUBA NGUMDALA

²² Amadoda angamaKristu aqolileyo afanele anqwenele ukuba ngabadala. (1 Tim. 3:1) Noko ke, ukuba ngumdala kuthetha ukusebenza nokuzincama. Kuthetha ukuzenza ufumaneke ukuze usebenzele abazalwana, ubancede baqhubeke bekhonza uYehova. Ukuzimisela ukuba ngumdala kuthetha ukuzama ukufikelela iimfaneleko ezichazwe kwiZibhalo.

IIMEKO ZOMNTU ZISENOKUTSHINTSHA

²³ Umzalwana okhonze kangangexesha elide usenokugula okanye abe ngumlwelwe. Mhlawumbi ngenxa yokwaluphala usenokungakwazi ukwenza imisebenzi yabadala. Kwanaxa kunjalo, ufanele ahlonelwe yaye agqalwe njengomdala logama nje esamiselwe. Akuyi kuba yimfuneko ukuba ayeke ukuba ngumdala ngenxa nje yokuba engasakwazi ukwenza izinto ezithile. Usafanelwe yimbeko ephindiweyo, enikwa bonke abasebenza nzima ukuze baluse umhlambi.

²⁴ Kodwa ukuba umzalwana uvakalelwa kukuba kubhetele ayeke ukuba ngumdala ngenxa yeemeko zakhe ezitshintshileyo ezimenza angakwazi ukusebenza, unokuyeka. (1 Pet. 5:2) Sekunjalo ufanele ahlonitshwe. Usalinceda ibandla, nangona engasayenzi imisebenzi enikwa abadala.

IMISEBENZI YABADALA EBANDLENI

²⁵ Abadala banemisebenzi eyahlukahlukeneyo ebandleni. Kukho umnxibelelanisi wequmrhu labadala, unobhala, umveleli wenkonzo, umqhubi weSifundo SeMboniselo nomveleli weNtlanganiso Yobomi BamaKristu. Abadala abaninzi, bakwangabaveleli bamaqela. Akubekwa xesha abaza kuyeka ngalo ukwenza le misebenzi. Kakade ke, ukuba umdala uyafuduka, akakwazi ukwenza imisebenzi yakhe ngenxa yempilo, okanye akasafaneleki ngenxa yokuba engazifikeleli iimfaneleko ezichazwe eZibhalweni, kukhethwa omnye umdala ukuba enze loo msebenzi. Kumabandla anabadala abambalwa, kusenokufuneka umdala enze umsebenzi ongaphezu komnye, de kubekho abazalwana abafanelekayo ukuba bamiselwe njengabadala.

²⁶ Umnxibelelanisi wequmrhu labadala uba ngusihlalo kwiintlanganiso zequmrhu labadala. Ngokuthobeka, usebenza nabanye abadala ekunyamekeleni umhlambi kaThixo. (Roma 12:10; 1 Pet. 5:2, 3) Ufanele akwazi ukulungelelanisa nokukhokela kakuhle.—Roma 12:8.

²⁷ Unobhala usebenza ngeengxelo zebandla kwaye uyabaxelela abadala xa kukho iileta nezinye izinto ezibalulekileyo abamele bazazi. Ukuba kuyimfuneko, kusenokubakho omnye umdala okanye isicaka solungiselelo esimncedisayo.

²⁸ Amalungiselelo entsimi nezinye izinto ezinokwenza nenkonzo zenziwa ngumveleli wenkonzo. Wenza ucwangciso lokutyelela onke amaqela entsimini, ukuze qho ngenyanga abe nempela-veki aya ngayo kwiqela elahlukileyo. Kumabandla amancinci apho kukho amaqela ambalwa, unokutyelela iqela ngalinye kabini ngonyaka. Ngempela-veki yotyelelo lwakhe, uza kusebenza nelo qela entsimini aze ancede abavakalisi kumabuyelo abo nakwizifundo zabo zeBhayibhile.

ABAVELELI BAMAQELA

²⁹ Omnye umsebenzi obalulekileyo ebandleni ngowomveleli weqela. Nazi ezinye izinto amele azenze: Umele (1) abe nomdla wokunceda mntu ngamnye oseqeleni lakhe aqinise ukholo lwakhe; (2) ancede mntu ngamnye ukuba aye qho entsimini, azimisele aze onwabe; (3) ancede aze aqeqeshe izicaka zolungiselelo eziseqeleni lakhe ukuba zizimisele ukuba ngabadala ebandleni. Liqumrhu labadala eligqibayo ukuba ngoobani abafanelekayo ukuwenza wonke lo msebenzi.

³⁰ Ngenxa yezinto amele azenze, umveleli weqela ufanele abe ngumdala ukuba kunokwenzeka. Isicaka solungiselelo esifanelekayo sinokuwenza lo msebenzi kude kubekho umdala onokuwenza. Isicaka solungiselelo esenza lo msebenzi sibizwa ngokuba sisicaka seqela, kuba asinguye umdala ebandleni. Kunoko, sisebenza phantsi kolwalathiso lwabadala.

³¹ Inxalenye ebalulekileyo yomsebenzi womveleli weqela kukukhokela entsimini. Ukubakho qho, ukuzimisela nokuba nehlombe kuza kubakhuthaza abo bakwiqela lakhe. Ekubeni abavakalisi beluxabisa ukhuthazo noncedo lokusebenza kunye, kuza kuba kuhle ukwenza ucwangciso lokushumayela kweqela oluza kulungela abantu abaninzi. (Luka 10:1-16) Umveleli kufuneka aqinisekise ukuba kusoloko kukho intsimi eyaneleyo. Ngokuqhelekileyo, nguye oqhuba intlanganiso yenkonzo yasentsimini aze abe abavakalisi. Ukuba akazukubakho, ufanele acele omnye umdala okanye isicaka solungiselelo. Ukuba bobabini abafumaneki, unokucela umvakalisi ofanelekayo, ukuze abavakalisi bakwazi ukufumana ulwalathiso.

³² Umveleli weqela ufanele acebe kwangaphambili xa umveleli wenkonzo eza kutyelela, azise iqela lakhe ngolo tyelelo aze alenze likhangele phambili kulo. Xa bonke abaseqeleni besaziswa kakuhle ngamalungiselelo, banokukwazi ukuluxhasa.

³³ Iqela ngalinye kufuneka libe nabantu abambalwa. Oku kwenza umveleli weqela aqhelane kakuhle nabo bonke abo bakwiqela lakhe. Njengomalusi onothando, unomdla kumvakalisi ngamnye. Uzama ukunceda nokukhuthaza umvakalisi ngamnye ukuba abekho entsimini nakwiintlanganiso zebandla. Kwakhona uzama ukwenza konke okusemandleni ukuze ancede umvakalisi ngamnye ahlale enokholo olomeleleyo. Abagulayo okanye abacinezelekileyo banokuncedwa ngokutyelelwa emakhayeni abo. Icebiso okanye ukhuthazo lunokunceda abanye ukuba bazimisele ukusebenza ngakumbi ebandleni, baze bancede abazalwana babo. Ubukhulu becala umveleli weqela uza kuzama ukunceda abo bakwiqela lakhe. Kodwa njengomdala nomalusi, umele ahoye bonke abasebandleni yaye akulungele ukunceda nabani na ofuna uncedo.​—IZe. 20:17, 28.

³⁴ Omnye umsebenzi womveleli weqela kukuqokelela iingxelo zenkonzo yasentsimini zabo bakwiqela lakhe. Ezi ngxelo zinikwa unobhala. Abavakalisi banokumncedisa umveleli weqela ngokufaka iingxelo zabo zenkonzo yasentsimini ngokukhawuleza. Bayenza le nto ngokuzinika umveleli weqela ekupheleni kwenyanga nganye, okanye ngokuzifaka kwibhokisi eyenzelwe ingxelo yenkonzo yasentsimini kwiHolo YoBukumkani.

IKOMITI YENKONZO YEBANDLA

³⁵ Kukho imisebenzi eyenziwa yiKomiti Yenkonzo Yebandla. Kule komiti kubakho umnxibelelanisi wequmrhu labadala, unobhala nomveleli wenkonzo. Ngokomzekelo, yikomiti yenkonzo evumayo ukuba iHolo YoBukumkani ingasetyenziselwa umtshato okanye umngcwabo, igqibe nokuba umvakalisi uza kuba kweliphi iqela lentsimi. Yile komiti evuma izicelo zokuba ngoovulindlela abathe ngxi nabangabancedani nezinye izicelo zenkonzo. Ikomiti yenkonzo isebenza phantsi kolwalathiso lwequmrhu labadala.

³⁶ Eminye imisebenzi yekomiti yenkonzo, eyomqhubi weSifundo SeMboniselo, umveleli weNtlanganiso Yobomi BamaKristu, neyabanye abadala abakwiqumrhu, ichazwa yiofisi yesebe.

³⁷ Iqumrhu labadala liba neentlanganiso emva kwexesha elithile ukuze lithethe ngezinto eziza kunceda ibandla likhonze uThixo kakuhle. Xa kukho utyelelo, abadala baba nentlanganiso nomveleli wesiphaluka. Malunga neenyanga ezintathu emva kotyelelo, baba nenye intlanganiso. Kakade ke, abadala banokuba nentlanganiso nanini na iimeko zifuna babe nayo.

BATHOBELENI

³⁸ Abadala abafezekanga; sekunjalo wonke umntu ebandleni ufanele abathobele, kuba kaloku eli lilungiselelo likaYehova. Uza kubaphendulisa abadala ngezinto abazenzayo. Bamela yena nolawulo lwakhe. AmaHebhere 13:17 athi: “Bathobeleni abo bakhokelayo phakathi kwenu nize nizithobe kubo, kuba bahlala benigadile kuba beza kuphenduliswa, ukuze bangawenzi umsebenzi wabo bekhathazekile kodwa bawenze bevuya. Kaloku ukuba bangawenza bekhathazekile, loo nto ingenzakalisa kwanina.” Kanye njengokuba uYehova esebenzisa umoya oyingcwele ukuze amisele umdala, ukwasebenzisa lo moya mnye ukuze amyekise, xa engabonisi ukuba unesiqhamo somoya naxa engazifikeleli iimfaneleko ezichazwe eZibhalweni.

³⁹ Ngaba asikuxabisi ukusebenza nzima kwabadala ebandleni, abazenza kakuhle izinto ukuze sifunde kubo? Xa wayebhalela ibandla laseTesalonika, uPawulos wathi: “Bazalwana, siyanicela ukuba nibe nembeko kwabo basebenza nzima phakathi kwenu, abanikhokelayo kumsebenzi weNkosi nabanicebisayo; nibahloniphe kakhulu yaye nibathande ngenxa yokusebenza kwabo nzima.” (1 Tes. 5:12, 13) Ukusebenza nzima kwabadala ebandleni kwenza kube lula yaye kube mnandi ukukhonza uThixo. Kwakhona, kwincwadi yakhe yokuqala eyayisiya kuTimoti, uPawulos uthetha ngesimo sengqondo abafanele babe naso abantu abasebandleni ngabadala, esithi: “Abadala abakhokela kakuhle bafanelwe yimbeko ephindiweyo, ingakumbi abo basebenza nzima ekuthetheni nasekufundiseni.”​—1 Tim. 5:17.

EMINYE IMISEBENZI EYENZIWA NGABADALA KWINTLANGANO

⁴⁰ Ngamanye amaxesha, kuye kukhethwe abadala abamiselwa ukuba bakhonze kuMaqela Atyelela Abagulayo. Abanye bakhonza kwiiKomiti Zokunxibelelana Nezibhedlele baze batyelele izibhedlele noogqirha ukuze babakhuthaze ukuba baqhubeke benyanga amaNgqina KaYehova ngaphandle kokutofelwa igazi. Abanye abadala baxhasa uBukumkani ngokuncedisa ekwakheni nasekulungiseni iiHolo ZoBukumkani nezeendibano, okanye babe kwiiKomiti ZeNdibano. Ukuzimisela kwaba bazalwana nokukulungela kwabo ukuzinikela ngale ndlela kuxatyiswa kakhulu nguye wonke umntu kwintlangano. Ngokwenene, ‘sihlala sibaxabisa abantu abanjalo.’​—Fil. 2:29.

UMVELELI WESIPHALUKA

⁴¹ IQumrhu Elilawulayo liye lilungiselele ukuba kumiselwe abadala abafanelekayo ukuba babe ngabaveleli besiphaluka. Bachazelwa yiofisi yesebe ukuba batyelele amabandla akwiziphaluka zabo, ngokuqhelekileyo kabini ngonyaka. Kwakhona, bamane betyelela noovulindlela abakhonza kwintsimi ekwanti. Bayaluceba utyelelo lwabo baze bachazele ibandla ngalinye kuselithuba, ukuze utyelelo lwabo luncede ngakumbi.

⁴² Umnxibelelanisi wequmrhu labadala uyakhokela ekulungiseleleni izinto ukuze utyelelo luqinise ukholo lwabantu bonke. (Roma 1:11, 12) Emva kokuba efumene isaziso ngotyelelo yaye efumene inkcazelo ngeemfuno zomveleli wesiphaluka nenkosikazi yakhe (ukuba utshatile), umnxibelelanisi wequmrhu labadala, encediswa ngabazalwana abahlukahlukeneyo, wenza amalungiselelo okuba kufunyanwe indawo yokuhlala nezinye izinto eziza kufuneka. Uyaqiniseka ukuba wonke umntu, nomveleli wesiphaluka, uyachazelwa ngala malungiselelo.

⁴³ Umveleli wesiphaluka uza kuthetha nomnxibelelanisi wequmrhu labadala ngocwangciso lweentlanganiso, kuquka iintlanganiso zenkonzo yasentsimini. Ezi ntlanganiso zimele zicetywe kusetyenziswa amacebiso omveleli wesiphaluka nolwalathiso oluvela kwiofisi yesebe. Wonke umntu umele aziswe kusengaphambili ngamaxesha eentlanganiso zebandla, iintlanganiso zoovulindlela, ezabadala nezicaka zolungiselelo, baziswe ngeendawo nangamaxesha eziza kuqhutywa ngawo iintlanganiso zenkonzo yasentsimini.

⁴⁴ NgoLwesibini emva kwemini, umveleli wesiphaluka uza kuhlola iNgxelo Yomvakalisi Webandla ngamnye, ingxelo yoziwo lweentlanganiso, iingxelo zentsimi neengxelo zemali yebandla. Oku kuza kumenza abe nofifi ngeemfuno zebandla, atsho aqonde nendlela anokubanceda ngayo abasebenza ngezi ngxelo. Umnxibelelanisi wequmrhu labadala ufanele aqiniseke ukuba ezi ngxelo zifunyanwa kwangethuba ngumveleli wesiphaluka.

⁴⁵ Ebudeni botyelelo lwakhe, umveleli wesiphaluka uye aziphe ixesha lokuthetha nomvakalisi ngamnye kangangoko anako, kwiintlanganiso, entsimini, ngexesha lesidlo nangamanye amaxesha. Ukongezelela, uba nentlanganiso nabadala nezicaka zolungiselelo ukuze athethe nabo ngokusuka eZibhalweni, abanike amacebiso aze abakhuthaze ukuze bawenze kakuhle umsebenzi wokwalusa umhlambi abawuphathisiweyo. (IMize. 27:23; IZe. 20:26-32; 1 Tim. 4:11-16) Uphinda abe nentlanganiso noovulindlela ukuze abakhuthaze kumsebenzi wabo kwaye abancede kuzo naziphi na iingxaki abasenokudibana nazo entsimini.

⁴⁶ Ukuba kukho ezinye iingxaki ezifuna ukulungiswa, umveleli wesiphaluka uza kunceda kangangoko anako ebudeni baloo veki yotyelelo. Ukuba azigqitywanga ebudeni beveki, unokunceda abadala okanye abantu ababandakanyekileyo ukuba baphande kwiZibhalo ukuze bafumane ulwalathiso abanokulusebenzisa. Ukuba kuza kufuneka iofisi yesebe incedise, umveleli wesiphaluka nabadala bamele bayithumelele ingxelo epheleleyo.

⁴⁷ Xa etyelele ibandla, umveleli wesiphaluka ubakho kwiintlanganiso zebandla. Ezi ntlanganiso zinokutshintshwa ngamanye amaxesha ngokolwalathiso oluvela kwiofisi yesebe. Uza kunikela iintetho ezilungiselelwe ukukhuthaza, ukufundisa nokomeleza ibandla. Uza kukhuthaza ibandla ukuba limthande uYehova, uYesu Kristu nentlangano.

⁴⁸ Enye yeenjongo eziphambili zotyelelo lomveleli wesiphaluka kukukhuthaza abantu ukuba bayithande intsimi nokunika abavakalisi amacebiso asebenzayo. Abaninzi ebandleni banokulungisa iimeko zabo ukuze babe khona entsimini kuloo veki, mhlawumbi babe ngoovulindlela abangabancedani kuloo nyanga iza kuba notyelelo. Abo banqwenela ukusebenza naye okanye nenkosikazi yakhe banokuchaza kusengaphambili. Kuza kusinceda ukuhamba nomveleli wesiphaluka nenkosikazi yakhe xa sisiya kwizifundo zeBhayibhile nakumabuyelo ebudeni botyelelo. Ukuzimisela kwakho ngaphezu kwendlela eqhelekileyo ukuxhasa iveki yotyelelo kuxatyiswa kakhulu.​—IMize. 27:17.

⁴⁹ Nyaka ngamnye kubakho iindibano zesiphaluka ezimbini. Ngumveleli wesiphaluka oqinisekisa ukuba yonke into ihamba kakuhle kumalungiselelo azo. Umveleli wesiphaluka umisela umveleli wendibano nesekela lakhe. Bamele basebenze kunye naye ekulungiseleleni indibano. Oku kuza kunceda umveleli wesiphaluka enze umsebenzi wakhe oyintloko, ukujonga ucwangciso lwendibano. Umveleli wesiphaluka uye akhethe namanye amadoda afanelekayo ukuba asebenze kumasebe ahlukahlukeneyo. Kwakhona ulungiselela ukuba kuhlolwe iingxelo zemali yesiphaluka emva kwendibano nganye. Kwenye yeendibano zesiphaluka, nyaka ngamnye, kubakho umzalwana ovela kwiofisi yesebe oba sisithethi esityeleleyo. Ngenxa yemigama emide okanye ngenxa yeendawo ezincinci ekubanjelwa kuzo iindibano, ezinye iziphaluka ziyahlulwa zibe ngamacandelo, zize iindibano ziqhutywe kwicandelo ngalinye.

⁵⁰ Ekupheleni kwenyanga nganye, umveleli wesiphaluka uthumela ingxelo yakhe yentsimi kwiofisi yesebe. Ukuba kukho imali aye wadleka yona, mhlawumbi ngenxa yokuhamba, ukutya, indawo yokulala nezinye izinto ezifunekayo ukuze awenze kakuhle umsebenzi wakhe, yaye ibandla alikwazanga kuyihlawula, unokucela iofisi yesebe imbuyekeze. Abameli abahambahambayo baqinisekile ukuba xa bebeka uBukumkani BukaYehova kuqala, izinto abazidingayo ziza kulungiselelwa, njengoko uYesu wathembisayo. (Luka 12:31) Amabandla aza kufuna ukulisebenzisa ilungelo analo lokubenzela ububele aba badala bazinikeleyo ekuwakhonzeni.​—3 Yoh. 5-8.

IKOMITI YESEBE

⁵¹ Kuzo zonke iiofisi zamasebe zamaNgqina KaYehova ezisehlabathini lonke, kubakho abazalwana abathathu okanye abangaphezulu abafanelekayo, abakhonza kwiKomiti Yesebe, ukuze bavelele umsebenzi wokushumayela kwelo lizwe okanye kumazwe aphantsi kwelo sebe. Omnye wabo uba ngumnxibelelanisi weKomiti Yesebe.

⁵² Abo bakhonza kwiKomiti Yesebe bajongene nemicimbi ephathelele onke amabandla aphantsi kwentsimi yesebe. Le komiti ikhokela umsebenzi wokushumayela iindaba ezilungileyo zoBukumkani ezishunyayelwa kuyo yonke intsimi yesebe, ize iqiniseke ukuba kusekwa amabandla neziphaluka ukuze ukhokelwe kakuhle lo msebenzi. IKomiti Yesebe ijonge nomsebenzi wabathunywa bevangeli, woovulindlela abakhethekileyo, woovulindlela abathe ngxi nowoovulindlela abangabancedani. Ikwayile komiti elungiselela iindibano ezincinci nezinkulu, nekhupha izabelo ukuze ‘zonke izinto zenzeke ngesidima nangocwangco.’—1 Kor. 14:40.

⁵³ IKomiti Yelizwe iyamiselwa kumazwe athile aphantsi kolwalathiso lweKomiti Yesebe ekwelinye ilizwe. Oku kwenza kube lula ukwalathisa umsebenzi kuloo ndawo ikhonza kuyo iKomiti Yelizwe. Inyamekela iKhaya LaseBheteli kunye neeofisi, iileta neengxelo, nezinye izinto eziphathelele intsimi. IKomiti Yelizwe isebenzisana neKomiti Yesebe kumsebenzi wokuxhasa uBukumkani.

⁵⁴ LiQumrhu Elilawulayo elimisela abazalwana abakwiiKomiti Zamasebe neeKomiti Zamazwe.

ABAMELI BEKOMKHULU

⁵⁵ Emva kwexesha elithile, iQumrhu Elilawulayo liye lilungiselele ukuba kubekho abazalwana abatyelela isebe ngalinye ehlabathini lonke. Umzalwana owenza lo msebenzi ubizwa ngokuba ngummeli wekomkhulu. Owona msebenzi wakhe kukukhuthaza intsapho yaseBheteli, nokunceda iKomiti Yesebe kwiingxaki okanye imibuzo enayo ngomsebenzi wokushumayela nowokwenza abafundi. Lo mmeli wekomkhulu uye adibane nabaveleli besiphaluka abathile nabathunywa bevangeli. Uthetha nabo ngeengxaki nangeemfuno zabo, abakhuthaze ekwenzeni umsebenzi wabo obaluleke gqitha, ukushumayela ngoBukumkani nokwenza abafundi.

⁵⁶ Ummeli wekomkhulu unomdla gqitha kumsebenzi wokushumayela ngoBukumkani owenziwa kwintsimi yesebe, nakweminye imisebenzi eyenziwa ngamabandla. Ukuba unalo ithuba, unokutyelela iiofisi zokuguqulela. Xa ummeli wekomkhulu etyelela isebe, uba khona kangangoko kunokwenzeka kumsebenzi wokushumayela ngoBukumkani.

UKUKHOKELA NGOTHANDO

⁵⁷ Asinceda kakhulu la madoda angamaKristu asebenza nzima, asithandayo nasikhathaleleyo. Njengoko siqhubeka sibathobela abadala abanikwe umsebenzi wokwalusa umhlambi, simanyana neNtloko yebandla, uYesu Kristu. (1 Kor. 16:15-18; Efe. 1:22, 23) Ngenxa yoko, umoya kaThixo uye usebenze emabandleni ehlabathini lonke, neLizwi LikaThixo lincede kumsebenzi owenziwa emhlabeni wonke.—INdu. 119:105.