“Qinani Ningagungqi”

1-2. UmKristu unokufana njani nesakhiwo eside kakhulu? (1 Korinte 15:58)

NGO-1978 kwakhiwa isakhiwo eside kakhulu eTokyo, eJapan. Abantu babezibuza ukuba siza kumelana njani neenyikima ezazixhaphakile kuloo dolophu. Yayiza kwenzeka njani ke loo nto? Oononjineli babeza kusakha somelele, kodwa sibe bhetyebhetye xa kukho inyikima. AmaKristu afana neso sakhiwo. Njani?

² UmKristu umele azazi ukuba umele aqine nini aze abe bhetyebhetye nini. Umele aqine xa kufuneka ebambelele kwimithetho kaThixo. (Funda Ama-1 Korinte 15:58.) ‘Ukulungele ukuthobela’ futhi akagungqi. Kodwa umele abe ‘bhetyebhetye’ xa kufuneka loo nto. (Yak. 3:17) UmKristu ofunde ukuphila ngale ndlela, akazukuba ngqongqo ngokugqithisileyo okanye ayekelele ngokugqithisileyo. Kweli nqaku siza kuthetha ngezinto esinokuzenza ukuze singagungqi. Siza kuthetha nangeendlela eziyi-5 uSathana azisebenzisayo xa ezama ukusityhafisa, size sithethe ngezinto esinokuzenza ukuze singatyhafi.

ZIINTONI ESINOKUZENZA UKUZE SIQINE?

3. Yeyiphi imithetho asinika yona uYehova kwiZenzo 15:28, 29?

³ UYehova ngOyena umele asinike imithetho futhi imithetho asinika yona akukho nzima ukuyiqonda. (Isa. 33:22) Ngokomzekelo, ngexesha labapostile iqumrhu elilawulayo lathetha ngezinto ezintathu amaKristu awayemele angagungqi kuzo: (1) ayemele angakhonzi izithixo, akhonze uYehova qha, (2) awuthobele umthetho kaThixo othi igazi lingcwele, aze (3) athobele nemithetho eseBhayibhileni yendlela amele aziphathe ngayo. (Funda iZenzo 15:28, 29.) Namhlanje amaKristu anokwenza ntoni ukuze angagungqi kwezi zinto zintathu?

4. Sibonisa njani ukuba sikhonza uYehova qha? (iSityhilelo 4:11)

⁴ Asizikhonzi izithixo, sikhonza uYehova qha. Wayalela amaSirayeli ukuba amele akhonze yena qha. (Dut. 5:6-10) NoYesu, xa wayelingwa nguMtyholi wayenza yacaca into yokuba nguYehova qha omele akhonzwe. (Mat. 4:8-10) Ngoko asizikhonzi izithixo. Akukho mntu simphatha ngokungathi unguthixo, nokuba ngumfundisi, inkokheli yepolitiki, umntu othandwayo wezemidlalo, odlala kwiimuvi okanye imvumi. Simela uYehova futhi sikhonza lowo “wadala zonke izinto” qha.​—Funda iSityhilelo 4:11.

5. Kutheni sibambelela kumthetho kaYehova othi ubomi negazi zingcwele?

⁵ Sibambelele nkqi kumthetho kaThixo othi ubomi negazi zingcwele. Kutheni? Kaloku uYehova uthi igazi limela ubomi, obusisipho esixabisekileyo esivela kuye. (Lev. 17:14) Ukuqala kwakhe ukuvumela abantu ukuba batye inyama, wathi mabangalityi igazi. (Gen. 9:4) Wayiphinda loo nto xa wayenika amaSirayeli uMthetho owawubhalwe nguMoses. (Lev. 17:10) Nangexesha labapostile, wayalela iqumrhu elilawulayo ukuba lixelele onke amaKristu ukuba amele ‘aliphephe igazi.’ (IZe. 15:28, 29) Asigungqi kulo mthetho xa sisenza izigqibo ngendlela esifuna ukunyangwa ngayo.b

6. Ziintoni esizenzayo ukuze sithobele imithetho kaThixo yendlela esimele siziphathe ngayo?

⁶ Siyayithobela imithetho kaThixo yendlela esimele siziphathe ngayo. (Heb. 13:4) UPawulos uthi ‘masiyitshabalalise’ iminqweno yamalungu emizimba yethu. Le nto ithetha ukuzama yonke into esinokukwazi ukuyenza ukuze siyikhuphe ezingqondweni zethu iminqweno yokwenza izinto ezirongo. Asijongi okanye senze nantoni na enokusenza siziphathe kakubi ngesondo. (Kol. 3:5; Yobhi 31:1) Xa silingwa ukuba senze into erongo, sikhawuleza siyeke ukucinga nantoni na esiyicingayo okanye sikuphephe ukwenza into enokusenza siyeke ukuba ngabahlobo bakaThixo.

7. Yintoni esimele sizimisele ukuyenza? Ngoba?

⁷ UYehova ulindele ukuba ‘simthobele ngokusuka entliziyweni.’ (Roma 6:17) Izinto asicebisa zona zihlala zisinceda, nemithetho yakhe asinakuyitshintsha. (Isa. 48:17, 18; 1 Kor. 6:9, 10) Sizama konke okusemandleni ukwenza izinto ezimvuyisayo nokufana nomdumisi, owathi: “Ndiye ndazimisela ukuthobela imithetho yakho ngamaxesha onke, ukuya kutsho kowokugqibela.” (INdu. 119:112) Sekunjalo, uSathana uza kuzama ukusityhafisa. Ngawaphi amaqhinga awasebenzisayo?

USATHANA UZAMA NJANI UKUSITYHAFISA?

8. Zeziphi iindlela asiphatha kakubi ngazo uSathana kuba efuna sityhafe?

⁸ Ukuphathwa kakubi. USathana uzama ukusityhafisa ngokwenza abantu bakhe basibethe, basoyikise nokusoyikisa. Eyona nto ayifunayo ‘kukusiqwenga,’ ngamanye amazwi ufuna ukusiyekisa ukuba ngabahlobo bakaYehova. (1 Pet. 5:8) Ngexesha labapostile amaKristu ayesoyikiswa, ebethwa, ebulawa nokubulawa ngenxa yokuba ayezimisele ukungagungqi. (IZe. 5:27, 28, 40; 7:54-60) Nanamhlanje uSathana usabaphethe kakubi abantu bakaThixo. Le nto siyibona kwinkohlakalo eyenziwa kubazalwana noodade baseRashiya nakwamanye amazwe apho abantu abangamfuniyo uYehova babaphethe kakubi abazalwana noodade ngeendlela ezahlukeneyo.

9. Khawenze umzekelo obonisa ukuba simele siyilumkele ingcinezelo ekungekho lula ukuyibona.

⁹ Ingcinezelo ekungekho lula ukuyibona. Enye into uSathana ayisebenzisayo ngamaqhinga. (Efe. 6:11) Khawucinge ngento eyenzeka kuBob, owayeza kwenziwa utyando oluyingozi. Waxelela oogqirha ukuba nokuba sekumnyam’ entla, bangamtofeli igazi. Ugqirha owayeza kumtyanda wavuma. Kodwa kubusuku bangaphambi kokuba atyandwe, omnye ugqirha waya kuye emva kokuba bemkile abantu bakowabo. Wathi akaqondi ukuba baza kumtofela igazi, kodwa liza kubakhona, ukwenzela xa linokufuneka. Mhlawumbi lo gqirha wayecinga ukuba uBob uza kusitshintsha isigqibo sakhe xa bengekho abantu bakowabo. Kodwa uBob zange agungqe, wamxelela ukuba akafuni gazi, nokuba kungenzeka ntoni.

10. Kutheni iyingozi indlela abacinga ngayo abantu abangenaxesha lemithetho kaYehova? (1 Korinte 3:19, 20)

¹⁰ Indlela abacinga ngayo abantu abangenaxesha lemithetho kaYehova. Xa sicinga njengabo, sisenokungayihoyi imithetho kaThixo. (Funda ama-1 Korinte 3:19, 20.) “Ubulumko beli hlabathi” budla ngokwenza abantu bangayithobeli imithetho kaThixo. Amanye amaKristu asePergamo naseTiyatira ayecinga ngendlela ababecinga ngayo abantu bezo ndawo ababeziphethe kakubi, bekhonza oothixo bobuxoki. UYesu wawakhalimela kabukhali loo mabandla ngenxa yokuba ayenyamezela ukuziphatha kakubi ngesondo. (ISityhi. 2:14, 20) Nanamhlanje, abantu basenokuzama ukusenza sicinge ngendlela engafanelekanga njengabo. Abantu esizalwa nesizalana nabo, kunye nabahlobo, basenokusenza sicinge ukuba singqongqo kakhulu baze basikhuthaze ukuba singayithobeli imithetho kaThixo. Ngokomzekelo, basenokuthi akukho nto ibaluleke kangako ngokuziphatha kakuhle, nemithetho yeBhayibhile iphelelwe lixesha.

11. Njengokuba singagungqi, yintoni esimele siyilumkele?

¹¹ Ngamanye amaxesha, sisenokucinga ukuba umyalelo esiwunikwa nguYehova awucacanga ncam. Sisenokude sifune ‘ukugqitha kwizinto ezibhaliweyo.’ (1 Kor. 4:6) Babeyenza ke loo nto abefundisi ngexesha likaYesu. Babebathwalisa umthwalo onzima abantu kuba babesongeza neyabo imithetho kuMthetho owabhalwa nguMoses. (Mat. 23:4) UYehova usinika imiyalelo ecacileyo esebenzisa iBhayibhile nentlangano yakhe. Asinasizathu sokongeza kwizinto asiyalela zona. (IMize. 3:5-7) Ngoko asigqithi kwizinto ezibhalwe eBhayibhileni okanye sibekele abazalwana noodade imithetho ngezinto ezingabhalwanga kuyo.

12. USathana ‘ubaqhatha’ njani abantu?

¹² Uyabaqhatha abantu. USathana ‘uyabaqhatha’ abantu aze asebenzise ‘izinto ezisisiseko zeli hlabathi’ ukuze abalahlekise aze abenze bangavani. (Kol. 2:8) Ngexesha labapostile, wayesebenzisa iimfundiso zezilumko zehlabathi, iimfundiso zamaYuda ezingasuki Zibhalweni nemfundiso yokuba amaKristu ayemele athobele uMthetho owabhalwa nguMoses. Baqhatheka nyhani abantu, batsho abamhoya Oyena mntu unobulumko, uYehova. Kule mihla, uSathana usebenzisa iTV, irediyo neewebhsayithi zokuncokola ukuze asasaze izinto ezingekhoyo ezisuka kwiinkokheli zepolitiki. Le nto siyibone kakuhle ngexesha lekhorona.c AmaNgqina KaYehova abemamela izinto ezithethwa yintlangano yethu, khange oyikiswe zizinto ebezithethwa ngabantu abamamela ubuxoki.​—Mat. 24:45.

13. Kutheni simele sizilumkele izinto ezinokusiphazamisa?

¹³ Izinto eziphazamisayo. Masihlale sisenza ‘ezona zinto zibalulekileyo.’ (Fil. 1:9, 10) Izinto eziphazamisayo zinokusenza sichithe ixesha namandla ethu kwizinto ezingazukusinceda kangako. Izinto ezifana nokutya, ukusela, ukuzonwabisa nokuphangela zinokusiphazamisa ukuba sizenza zibe zezona zibalulekileyo ebomini bethu. (Luka 21:34, 35) Yonke imihla siva iindaba ezithetha ngeetoyi-toyi nezinto zepolitiki. Masingazivumeli ezi zinto zisiphazamise. Ukuba asilumkanga, sinokuzibhaqa sesithatha icala ezingqondweni nasezintliziyweni. USathana usebenzisa zonke ezi zinto sesithethe ngazo ukuze asityhafise, sitsho siyeke ukuzimisela ukwenza izinto ezilungileyo. Makhe sibone ukuba yintoni esinokuyenza ukuze ezi zinto zingasigungqisi.

SINGAHLALA NJANI SINGAGUNGQI?

14. Yintoni enokusinceda singagungqi ekumeleni uYehova?

¹⁴ Khumbula ukuba kwakutheni ukuze uzinikele uze ubhaptizwe. Ezi zinto wazenza kuba ufuna ukumela uYehova. Khawucinge ngento eyakwenza waqiniseka ukuba uyifumene inyaniso. Wafunda ngoYehova, wabona ukuba unguTata wakho osezulwini. Loo nto yakwenza wamhlonipha waza wamthanda. Waba nokholo olwakwenza waguquka. Waziyeka izinto ezingalunganga owawuzenza waza wenza ezithandwa nguThixo. Wathi wakubona ukuba uYehova ukuxolele, wathuthuzeleka. (INdu. 32:1, 2) Waya kwiintlanganiso emva koko waxelela abanye ngezinto ezivuyisayo ozifundileyo. Ngoku ungumKristu obhaptiziweyo, uhamba kwindlela eya ebomini futhi uzimisele ukungayishiyi.​—Mat. 7:13, 14.

15. Kusinceda njani ukufunda nokucingisisa?

¹⁵ Funda iLizwi likaThixo uze ucingisise ngento oyifundileyo. Umthi oneengcambu ezitshone emhlabeni awuwi. Ukuba lunjalo nokholo lwethu, asizukugungqa. Njengokuba umthi ukhula, neengcambu zawo ziya zitshona futhi zinabe. Xa sifunda size sicingisise ngezinto esizifundayo, siya siqiniseka ukuba iindlela zikaThixo zezona zilungileyo. (Kol. 2:6, 7) Cinga ngendlela eyabanceda yaza yabakhusela ngayo imiyalelo kaYehova abakhonzi bakhe bakudala. Ngokomzekelo, cinga ngendlela uHezekile awayeyijonge kakuhle ngayo ingelosi eyayisembonweni, njengoko yayimeta itempile. Lo mbono wamqinisa uHezekile. Kuwo sifunda indlela esinokubambelela ngayo kwimithetho kaYehova esixelela indlela afuna ukukhonzwa ngayo.d (Hez. 40:1-4; 43:10-12) Nathi kuyasinceda ukufunda nokucingisisa ngezinto ezinzulu ezikwiLizwi LikaThixo.

16. Ukuba nentliziyo engagungqiyo kwamkhusela njani uBob? (INdumiso 112:7)

¹⁶ Mayingagungqi intliziyo yakho. UKumkani uDavide wabonisa ukuba soze ayeke ukumthanda uYehova xa wathi: “Intliziyo yam ayigungqi, Thixo wam.” (INdu. 57:7) Nathi sinokuba neentliziyo ezingagungqiyo, simthembe ngokupheleleyo uYehova. (Funda iNdumiso 112:7.) Khawuve indlela eyamnceda ngayo le nto uBob ekuthethwe ngaye kwiziqendu ezidlulileyo. Xa la gqirha wamxelela ukuba igazi liza kubakho, ukwenzela xa linokufuneka, ngoko nangoko uBob wathi, xa esitsho uza kuhamba yena kweso sibhedlele. Uthi: “Ndandingayithandabuzi le nto, ndingenalo nexhala lokuba yintoni esenokwenzeka.”

17. Yintoni esiyifundayo kuBob? (Jonga nomfanekiso.)

¹⁷ Into eyanceda uBob akagungqa kukuba isigqibo sokungatofeli gazi wasenza kudala, engekazukuya nasesibhedlele. Okokuqala, wayefuna ukuvuyisa uYehova. Okwesibini, wayeyifundisise kakuhle into ethethwa yiBhayibhile naziincwadi zethu ngokuba ngcwele kobomi negazi. Okwesithathu, wayeqinisekile ukuba uYehova uza kumsikelela xa ethobela umthetho wakhe. Nezethu iintliziyo zinokuhlala zingagungqi nokuba zeziphi iingxaki esisenokuba nazo.

18. Yintoni esiyifunda kuBharaki ngokuthemba uYehova? (Jonga umfanekiso ongaphandle.)

¹⁸ Mthembe uYehova. Khawucinge ngoBharaki. Woyisa emfazweni ngenxa yokuba wayithemba into awayeyixelelwe nguYehova. Ngelo xesha, amaSirayeli ayengenazo izixhobo zokulwa. Kodwa uYehova waxelela uBharaki ukuba makayokulwa nomkhosi kaSisera owawunezixhobo ezininzi. (ABagwe. 5:8) Umprofekitazi uDebhora waxelela uBharaki ukuba makehle entabeni, ayokulwa ethafeni nomkhosi kaSisera owawuneenqwelo zokulwa eziyi-900. Ngoxa kwakuza kuba nzima ukuba amaSirayeli oyise umkhosi oonenqwelo ezibaleka ngesantya esiphezulu ethafeni, uBharaki wavuma. Xa amajoni ayesehla kwiNtaba YeTabhore, uYehova wenza kwanetha izantyalantyala zemvula. Iinqwelo zokulwa zikaSisera zaxinga edakeni, waza uYehova wenza uBharaki woyisa. (ABagwe. 4:1-7, 10, 13-16) Nathi, ukuba siyamthemba uYehova nezinto asixelela zona esebenzisa intlangano yakhe, uza kusenza soyise.​—Dut. 31:6.

ZIMISELE UKUHLALA UNGAGUNGQI

19. Kutheni ufuna ukuhlala ungagungqi?

¹⁹ Ekubeni sisaphila kweli hlabathi, kuza kufuneka sizimisele ukuhlala singagungqi. (1 Tim. 6:11, 12; 2 Pet. 3:17) Masingavumi ukugungqiswa kukuphathwa kakubi, yingcinezelo ekungekho lula ukuyibona, yindlela abacinga ngayo abantu abangenaxesha lemithetho kaThixo, kukuqhathwa nguMtyholi nazizinto eziphazamisayo. (Efe. 4:14) Kodwa masihlale siqinile, singagungqi ekuzinikeleni kuYehova nasekuthobeleni imithetho yakhe. Nangona kunjalo, simele sibe bhetyebhetye. Kwinqaku elilandelayo siza kubona ukuba kutheni uYehova noYesu bengabona bantu sinokufunda kubo ukuba bhetyebhetye.