Ngaba Ubusazi?

Wayethetha ukuthini uYesu xa esithi hamba iimayile zibe mbini?

▪ KwiNtetho yakhe yaseNtabeni edumileyo, uYesu wanikela olu khuthazo: “Ukuba uthile onegunya ukunyanzela ukuba wenze inkonzo yemayile enye, hamba naye iimayile zibe mbini.” (Mateyu 5:41) Kusenokwenzeka ukuba abaphulaphuli bakaYesu babewaqonda loo mazwi ngokubhekisela kwinkonzo yesinyanzelo, enokufunwa ngabasemagunyeni ukuba yenziwe ngabemi belizwe elo.

Ngenkulungwane yokuqala Yexesha Eliqhelekileyo, uSirayeli wayephantsi kolawulo lwamaRoma. Ayengathi kusasa xa kufuneka enyanzele abantu okanye izilwanyana ukuba basebenze okanye asebenze ukuze aphumeze inkonzo yaseburhulumenteni. Ngokomzekelo, amajoni amaRoma anyanzela uSimon waseKirene ukuba athwale isibonda sentuthumbo sikaYesu asise kwindawo awayeza kubulawelwa kuyo. (Mateyu 27:32) Ukutsalisa abantu ubunzima obulolo hlobo kwakucinezela, kungathandwa ngamaYuda.

Ubungakanani bomgama onokuhanjwa ngumntu xa ethwele umthwalo awaziwa. Sekunjalo, kumele ukuba babengavumi ukuhamba umgama ongaphezu kwalowo banyanzelekileyo ukuba bawuhambe. Ngoko ke, xa uYesu wabongoza abaphulaphuli bakhe ukuba bahambe nemayile yesibini, ukuba besinokutsho benze okungakumbi, wayesithi mabayenze ngaphandle kokukrikriza nayiphi na inkonzo efunwa ngabasemagunyeni.—Marko 12:17.

Ngubani uAnas ekuthethwa ngaye kwiingxelo zeVangeli?

▪ Ngexesha letyala likaYesu, uAnas (Ananus) kuthiwa ‘wayengumbingeleli oyintloko.’ (Luka 3:2; Yohane 18:13; IZenzo 4:6) Ngeliphandle, wayengumkhwe kaKayafa, naye wayekhe wakhonza njengombingeleli oyintloko malunga nowe-6 okanye owe-7 de kwangowe-15 C.E., ukuyekiswa kwakhe kwesi sigxina ngumphathi waseRoma uValerius Gratus. Nakuba kunjalo njengombingeleli oyintloko, uAnas waqhubeka enamandla angathethekiyo kwimicimbi yakwaSirayeli. Oonyana bakhe abahlanu nomkhwenyana wakhe nabo bakhonza njengababingeleli abaziintloko.

Ngalo lonke ixesha uSirayeli ezimele geqe, umbingeleli oyintloko wayekhonza kwesi sigxina ubomi bakhe bonke. (Numeri 35:25) Noko ke, xa ayephantsi kwamaRoma, umbingeleli oyintloko wayemiselwa ziirhuluneli zawo, ookumkani bona babemiselwa eRoma, yaye ngawo kuphela awayenokumshenxisa esikhundleni sakhe. Umbhali-mbali uFlavius Josephus unikela ingxelo yokuba uQuirinius, irhuluneli engumRoma eyayilawula eSiriya, yashenxisa indoda ethile egama linguJoazar kububingeleli obuyintloko malunga nowesi-6 okanye owe-7 Ngexesha Eliqhelekileyo yaza yamisela uAnas kweso sikhundla. Kubonakala ngathi, aba balawuli babahedeni babebakhetha ababingeleli abatsha abaziintloko phakathi kwababingeleli abakhoyo.

Intsapho ka-Anas yayidume ngokunyoluka yaye ityebe kakhulu. Yaba zizityebi kuba yayisongamela izinto ezazithengiswa xa kuza kwenziwa amadini etempileni, ezinjengamahobe, iigusha, ioli newayini. UJosephus uthi Ananus (Ananias), unyana ka-Anas, “wayenezicaka ezazingenambeko ezazisohlutha izishumi kubabingeleli; nabani na ongavumiyo ukuzinika izishumi zazimbetha.”