Badala—Wuthantamiseni Umhlambi KaThixo!
“Thina ke sisuke sathantamisa phakathi kwenu njengomdlezana osukuba ebagcinile abakhe abantwana.”—1 TESALONIKA 2:7.
1. Kutheni le nto onke amaNgqina kaYehova anyanisekileyo enokuziva enqabisekile?
UYEHOVA unguMalusi Omkhulu. Ubalungiselela intabalala abakhonzi bakhe abanjengezimvu aze abakhokelele ‘kumendo wobulungisa’ ngenxa yegama lakhe elingcwele. Ngenxa yoko, abo benza ukuthanda kwakhe akuyomfuneko ukuba boyike ububi yaye banokukhangela kuThixo wabo onenceba ukuze abathuthuzele. Eneneni, iNgqina ngalinye likaYehova elinyanisekileyo linesizathu esivakalayo sokuba lizive linqabisekile ngenxa yokunyamekelwa ngokunothando nguThixo.—INdumiso 23:1-4.
2. Njengobengezelo lobuqaqawuli bukaThixo, ziziphi iimpawu ezibonakaliswa nguYesu?
2 UYesu Kristu ‘ulubengezelo lobuqaqawuli [bukaThixo], nombhalo wenkqu yakhe.’ (Hebhere 1:1-4) Ngoko uYesu, uMalusi Olungileyo, naye ukwabonakalisa uthando nenceba. (Yohane 10:14, 15) Ngokomzekelo, ngesinye isihlandlo “wabona isihlwele esikhulu; wasikwa yimfesane ngabo, ngokuba babenjengezimvu ezingenamalusi; waqala ukubafundisa iindawo ezininzi.”—Marko 6:34.
3. (a) NjengoYehova uThixo noYesu Kristu, ziziphi iimpawu ezifanele ziboniswe ngabalusi abangaphantsi abangamaKristu? (b) Sisiphi isiluleko nesilumkiso esanikelwa ngumpostile uPawulos kubaveleli?
3 Onke amaKristu afanele ‘axelise uThixo aze aqhubeke ehamba eluthandweni kanye njengokuba uKristu wawathandayo.’ (Efese 5:1, 2) Ngoko afanele abe nothando nenceba. Bafanele babe njalo ngokukhethekileyo abalusi abangaphantsi bomhlambi kaThixo. Umpostile uPawulos wathi: “Zilumkeleni ngoko, nawo wonke umhlambi, athe uMoya oyiNgcwele wanimisa ukuba ngabaveleli bawo, ukuba nilaluse ibandla likaThixo, awazizuzelayo ngelilakhe [“ngeloNyana wakhe,” NW] igazi. Kuba mna ndiyakwazi oku, ukuba emva kokumka kwam, kuya kungena phakathi kwenu iingcuka ezibawayo, zingawucongi [“zingawuthantamisi,” NW] umhlambi. Nakuni ngokwenu kuya kuvela amadoda athetha izinto ezigwenxa, ukuba abarhole abafundi emva kwawo.”—IZenzo 20:28-30.
4. (a) Ekuhambeni kwexesha, yintoni eyenzekayo ngokuvisisana nesilumkiso sikaPawulos esikwiZenzo 20:29, 30? (b) Ngoku yiyiphi imibuzo efanele iqwalaselwe?
4 Ekuhambeni kwexesha, kwavela ‘iingcuka ezibawayo’ ezingabawexuki ibe ‘azizange ziwuthantamise umhlambi.’ Kodwa hayi indlela esiziva sinemincili ngayo kuba abadala abaphakathi kwamaNgqina kaYehova bengaqheliseli ubuzwilakhe obunjalo! Kanti, luhlobo olunjani lwempatho olunokulindelwa ngamakholwa angoowabo kwaba baveleli bamiselwe nguMoya? Ibe abo bamiselwe ngolo hlobo banokukubonakalisa njani ukuzithantamisa izimvu zikaYehova?
Mabangawugagameli Umhlambi
5. (a) Iinkokeli zehlabathi zidla ngokubaphatha njani abalawulwa bazo? (b) Wabonisa njani uYesu ukuba ubuzwilakhe abunandawo phakathi kwabalandeli bakhe?
5 Sinokulindela ngokufanelekileyo ukuba abadala abangamaKristu basiphathe ngenceba. Abafani nabalawuli behlabathi, abadla ngokugagamela abalawulwa babo. Ngokomzekelo, kunikelwa ingxelo yokuba ukumkani wamaFrenki uCharlemagne (owayelawula ngowe-768-814 C.E.) “wawanyanzela amaSaxon, ewacinezelela ukuba afe ukuba ayafa, ukuba abhaptizwe, wabagweba ngezohlwayo eziqatha abaphuli boMthetho wokuZila, ibe kuyo yonke indawo wayenyanzela kunokuba abongoze.” (The History of the Christian Church, nguWilliam Jones) Ubuzwilakhe abunandawo phakathi kwabalandeli bakaYesu, kuba wathi: “Niyazi ukuba ezintlangeni abo balawulayo banobukhosi; nabo bazizikhulu zazo benza ngegunya. Kodwa ke ze kungabi njalo phakathi kwenu. Ofuna ukuba mkhulu phakathi kwenu, makabe ngumkhonzi wenu; nofuna ukuba ngowokuqala kuni, makabe sisicaka senu; abe njengaye uNyana woLuntu yena ongezanga kukhonzwa, koko oweza kukhonza nokuncama ubomi bakhe bube yintlawulelo yokukhulula abaninzi.”—Mateyu 20:25-28, ITestamente ENtsha Yenguqulelo Entsha YeBhayibhile YesiXhosa.
6. (a) Mayela nabadala, ngabaphi oothunywashe abasisiseko abamele babalasele? (b) Ibandla linesizathu sokulindela ntoni ngabadala, ibe la madoda afanele azigqale njani?
6 Indoda engumKristu ‘ezabalazela isikhundla sokuba ngumveleli inqwenela umsebenzi omhle.’ (1 Timoti 3:1, NW) Xa siqwalasela oku nesiluleko sikaYesu esisandul’ ukuchazwa, naba oothunywashe ababalaseleyo: (1) Abadala abangamaKristu abamele babe ngoozwilakhe kwabanye; (2) abo bathwele imbopheleleko phakathi kwabalandeli bakaYesu bamele babe ngabakhonzi babo, kungekhona iinkosi zabo; nokuba (3) amadoda azabalazela isikhundla sokuba ngabaveleli amele asigqale ‘njengomsebenzi omhle,’ kungekhona njengesikhundla esiphakamileyo. (IMizekeliso 25:27; 1 Korinte 1:31) Ibinzana elithi “umdala” aliphakamisi nawuphi na umntu phakathi kwabanye abanquli bakaYehova. Kunoko, ibandla linesizathu sokulindela ukuba bonke abadala babe ngamadoda akhulileyo ngokomoya, anamava nathobekileyo akhokelayo kwinkonzo engcwele. Eneneni, abadala bafanele bazigqale njengabakhonzi abathobekileyo bakaYehova uThixo, bakaYesu Kristu namaKristu akhonza nabo.—Roma 12:11; Galati 5:13; Kolose 3:24.
7. (a) Abadala bafanele bayisebenzise njani eyesi-2 yabaseKorinte 1:24 ekuqhubaneni nabanye? (b) Abadala bafanele benze ntoni ngemiyalelo abayifumana kwiQumrhu Elilawulayo?
7 Ukukhonza abanye ngokuthobekileyo ngokuqhelekileyo kuyamthintela umdala ekuzameni ‘ukubagagamela.’ Ibe hayi indlela ekukuhle ngayo ukuba abo bangabaveleli kuthi babonakalise isimo sengqondo esifanayo neso sikaPawulos! Waxelela amaKristu aseKorinte oku: ‘Asigagameli elukholweni lwenu, ngokuba singabasebenza nani uvuyo lwenu.’ (2 Korinte 1:24) Ngokuvisisana noko, abo bavelela ngothando abawacinezeli amakholwa akhonza nabo ngemithetho yabantu engeyomfuneko. Kunoko, abaveleli abaphakathi kwamaNgqina kaYehova balawulwa yimigaqo engokweZibhalo yaye banikela inkonzo yobubele neluncedo. Bakwabonakalisa inkxalabo enzulu ngomhlambi kaThixo ngokuyisebenzisa ngokukhawuleza imiyalelo abayifumana kwiQumrhu Elilawulayo lamaNgqina kaYehova.—IZenzo, isahluko 15.
8. UPawulos wayenesimo sengqondo esinjani kumakholwa awayekhonza nawo, ibe sona sifanele sibachaphazele njani abadala bale nkulungwane yama-20?
8 Ngenxa yokuba uPawulos wayewuthantamisa umhlambi kaThixo, wayenokuwaxelela oku amaKristu aseTesalonika: “Thina ke sisuke sathantamisa phakathi kwenu njengomdlezana osukuba ebagcinile abakhe abantwana; ngokunjalo sinilangazelela nje, kwakholeka kuthi ukuba singaneli kunabela iindaba ezilungileyo zikaThixo nje kodwa, sinabele nobomi bethu, ngenxa enokuba naba ziintanda kuthi.” (1 Tesalonika 2:7, 8) UPawulos waba njengomdlezana, obathanda ngokunzulu abantwana bakhe ngokokude abeke phambili izilangazelelo zabo kunezakhe aze abathantamise. Hayi indlela oku okufanele kubashukumise ngayo abadala bale nkulungwane yama-20 ukuba bawuthantamise umhlambi kaThixo!
Imithombo Ebangela Imvakalelo Yokukhululeka Nehlaziyayo
9. Ziziphi iimeko ezaxelwa kwangaphambili kuIsaya 32:1, 2 ngabantu bakaYehova abakhoyo namhla?
9 Esalatha kulo mhla wolawulo loBukumkani bukaYesu Kristu, umprofeti uIsaya waxela kwangaphambili ukuba ukumkani wayeya ‘kulawula ngobulungisa’ baze “abathetheli” bona balawule ‘ngokusesikweni.’ Ngenxa yoko, abadala abakwintlangano yanamhla yolawulo lobuthixo banyamekela izilangazelelo zoBukumkani basezulwini obumiselweyo—nto leyo ngokwenene eyenza inkonzo yabo ibe yeyabathetheli! Amazwi kaIsaya angakumbi esiprofeto, abhekisela kula madoda anembopheleleko: “Umntu abe njengendawo yokuzimela umoya, neyokusithela esiphangweni; abe njengemijelo yamanzi emqwebedwini, njengomthunzi wengxondorha enkulu ezweni elibharhileyo.”—Isaya 32:1, 2.
10. Umdala ngamnye phakathi kwamaNgqina kaYehova ufanele abe ngumthombo wantoni?
10 Ngokungafaniyo neenkokeli zonqulo lweNgqobhoko ezicinezelayo, abadala abaphakathi kwamaNgqina kaYehova bayimithombo ebangela imvakalelo yokukhululeka nehlaziyayo. Njengoko bengamaqumrhu abunjwe ngamadoda amakhulu, bakhuthaza uxolo, inzolo nonqabiseko phakathi kwabantu bakaYehova. Ngokomntu ngamnye, umdala ngamnye unokuba negalelo kule meko intle ngokuwuthantamisa umhlambi kaThixo.
Ngokusesikweni Nangobulungisa
11. (a) Yiyiphi imeko eyayikho ngokubanzi phakathi kwamaKristu enkulungwane yokuqala eyesameleyo kumabandla amaninzi amaNgqina kaYehova namhlanje? (b) Yiyiphi imbopheleleko abanayo abaveleli ebandleni, ibe ngoba?
11 Nangona kwavela iingxaki kumabandla athile amaKristu enkulungwane yokuqala, imeko eyayikho kuwo ngokubanzi yayiyeyoxolo, umanyano novuyo. (1 Korinte 1:10-12; 3:5-9; Efese 1:2; Yakobi 2:1-9; 3:2-12; 4:11, 12; 1 Yohane 1:3, 4) Kukwakho imeko entle ngokomoya kumabandla amaninzi amaNgqina kaYehova namhlanje ngenxa yentsikelelo kaThixo, ukhokelo lukaKristu nomsebenzi wokuthembeka owenziwa ngabaveleli abamiselweyo. Ukuze aqinisekise ngobukho boxolo, umanyano novuyo ebandleni, la madoda afuna uncedo lukaThixo aze akuzabalazele ngenkuthalo ukugcina ibandla likaThixo licocekile, ngokokuziphatha nangokomoya. (Isaya 52:11) Intlangano enamabibi ayinakuze ibe noxolo ize ibe yevuyayo, ibe ngokuqinisekileyo ayisayi kuze ibe yekholekileyo kuThixo ize ifumane intsikelelo yakhe. ‘Ungohlambulukileyo emehlweni, ukuba angayikhangeli into embi,’ ukuba anyamezele isono. (Habhakuki 1:13) Ngoko, phakathi kwezinye izinto, abadala balindelwe ukuba banyamekele imicimbi yokugweba ngendlela ethe tye nengokweZibhalo. Kodwa ngabaphi oothunywashe abathile abamele babakhumbule xa besingatha iimeko ezinjalo?
12. Nangona abadala kungafuneki baqwalasele imicimbi engenakuthanani nokwaphulwa kwemithetho okanye imigaqo yeBhayibhile, yintoni efanele yenziwe ngenxa yamaGalati 6:1?
12 Phakathi kwezinye izinto, kwiimeko ezibandakanya iiyantlukwano zobuqu, kusenokwenzeka ngabo bantu ukuba bazinzise imicimbi ngasese. (Mateyu 18:15-17) Ekubeni abadala ‘bengengabo abagagamelayo elukholweni lwethu,’ abalindelekanga ukuba baqwalasele imicimbi ebonakala nakubani na ukuba yeyobuqu nengabandakanyi ukwaphulwa okunzulu kwemithetho okanye imigaqo yeBhayibhile. Ngokuqhelekileyo, ukuba kukho ubungqina bokuba umntu uye ‘waqutyulwa sisiphoso,’ abo baneemfaneleko zokomoya bafanele ‘bazame ukumluleka lowo benomoya wobulali.’—Galati 6:1.
13. IZibhalo zibonisa njani ukuba abadala bafanele bathabathe inyathelo kuphela ngobungqina obunikelwayo ngesono, kungekhona ngondiva?
13 Abadala bamele bakhonze ngendlela ‘yokusesikweni,’ ngalo lonke ixesha bengakhethi buso. Ngoko bafanele bathabathe inyathelo ngobungqina obunikelwayo ngesono, kungekhona nje ngondiva. UPawulos waluleka esithi: “Ukumangalelwa kwendoda enkulu musa ukukwamkela, kungabangakho mangqina mabini nokuba mathathu.” (1 Timoti 5:19) Ngokomlinganiselo kaYehova, kuSirayeli wamandulo umntu omangalelwa ngesono esikhulu wayemele abulawe ‘ngomlomo wamangqina amabini okanye amathathu, kungekhona ngelinye.’ Ngaphezu koko, kuyabonakala ukuba ummangalelwa wayeba nethuba lokujongana nabo bammangalelayo, ibe ukuba ubungqina babanele, ‘kwakufika kuqala isandla samangqina okumbulala.’—Duteronomi 17:6, 7.
14. (a) Yintoni uDiyotrefe awazama ukuyenza ngokungafanelekanga? (b) Yintoni uThixo abalindele ukuba bayenze abadala xa besingatha imicimbi enokuthanani nokugweba?
14 Kumele kubekho isizinzi esivakalayo esingokweZibhalo ngenyathelo lokugweba elithatyathwayo. Hayi indlela esiziva sinemincili ngayo kuba abaveleli bamabandla bengafani noDiyotrefe owayenekratshi wenkulungwane yokuqala yeXesha Eliqhelekileyo! Wathi ngokungafanelekanga wazama ‘ukubakhuphela ngaphandle’ abo babenqwenela ukwamkela ngobubele abazalwana abahambahambayo. Umpostile uYohane akazange akugqale kancinane oku nezinye iziphoso kodwa walumkisa: “Ukuba ndithe ndafika, ndomkhumbuza imisebenzi yakhe ayenzayo.” (3 Yohane 9, 10) Ngaloo ndlela, ikomiti egwebayo yanamhlanje imele iqiniseke ukuba kukho isizinzi esingokweBhayibhile ngalo naliphi na inyathelo lokususa kubudlelane elithabathayo.a Kakade ke, uThixo ulindele ukuba abadala abangamaKristu benze ngokusesikweni ekuqhubaneni nabanye. Eneneni, abo balungiselelayo kwimicimbi yentlangano kaYehova yasemhlabeni bamele babe ‘ngamadoda anobunkunkqele ekuthetheni amatyala, amoyikayo uThixo, amadoda anyanisileyo.’—Eksodus 18:21.
15. Yiyiphi indima ofanele ube nayo umthandazo kwimicimbi enokuthanani nokugweba?
15 Zonke iikomiti ezigwebayo zamaKristu zifanele zifune uncedo lukaYehova ngomthandazo osuk’ entliziyweni. Intlanganiso eqhutywa nomzalwana okanye nodade obekwa isityholo ngesono esinzulu ifanele ivulwe ngomthandazo. Enyanisweni, bekuya kuba kokufanelekileyo ukuthandaza ngalo naliphi na ixesha ebudeni bengxubusho ukuba nje kukho imfuneko ekhethekileyo yoncedo lukaThixo.—Yakobi 5:13-18.
16. Abadala bafanele bayisingathe njani imicimbi enokuthanani nokugweba, ibe ngoba?
16 Abadala bayazi ukuba ikholwa abakhonza nalo elibekwa isityholo ngesono ‘liyimvu’ yomhlambi kaThixo ibe lifanele lithantanyiswe. (Thelekisa uHezekile 34:7-14.) Izimvu zokoqobo zifuna ukuthantanyiswa ngenyameko, kuba zizidalwa ezithambileyo ezixhomekeke kumalusi wazo ukuze zikhuseleke. Ngoko, kuthekani ngezimvu zokomfuziselo ezikwibandla lasekuhlaleni? Ngokungathandabuzekiyo ziziva zinqabisekile ekunyamekelweni nguMalusi Omkhulu, uYehova uThixo, noMalusi Olungileyo, uYesu Kristu. Kodwa abalusi abangaphantsi bomhlambi bamele benze izinto ngeendlela ezibangela uxolo lwangaphakathi nemvakalelo yonqabiseko kubakhonzi bakaYehova abanjengezimvu. Ngoko, ukuba ungumalusi ongaphantsi ongumKristu, ngaba abazalwana noodade bakho baziva benqabisekile yaye bekwimekobume yenzolo ngendlela obanyamekela ngayo? Kuyinyaniso ukuba, abadala bamele bayiphakamise ngokuqinileyo imithetho nemigaqo yeBhayibhile. Kodwa ngokusekelwe kwiZibhalo kufuneka baqhubane nezimvu ngendlela yothando nokuba bayisingathe ngendlela ezolileyo, yocwangco, yobubele neyokubonakalisa uvelwano imicimbi enokuthanani nokugweba.
17. Ziziphi iingongoma ezingokweZibhalo abafanele abadala bazikhumbule, ngokukodwa ebudeni bemicimbi enokuthanani nokugweba?
17 Ekubeni singafezekanga, “siyakhubeka kaninzi sonke” koko sikuthethayo. (Yakobi 3:2) Ngamnye kuthi ufuna inceba kaThixo ‘nedini elisisicamagushelo’ likaKristu. (1 Yohane 1:8–2:2; INdumiso 130:3) Ngoko umalusi ongaphantsi ongumKristu umele azigqale njengalowo ongabalulekanga. Ukwafanele akhumbule la mazwi kaYesu: “Enithanda ukuba abantu benze ngako kuni, yenzani nani kwangokunjalo kubo.” (Luka 6:31) Esi siluleko simele sisetyenziswe ngokukodwa ebudeni bemicimbi enokuthanani nokugweba. Amadoda afanelekayo ngokomoya afanele azame ukumluleka umKristu onxaxhayo ‘enomoya wobulali; ezilumkela ukuba angahendwa nawo.’—Galati 6:1; 1 Korinte 10:12.
18. (a) Yintoni enokuba ngumphumo ukuba abadala babaphathe rhabaxa abanye ebudeni bemicimbi enokuthanani nokugweba? (b) Ngenxa kaMarko 9:42, yintoni abadala namanye amaKristu abafanele bazilinde nxamnye nokuyenza?
18 Ukuba abadala bebeya kubaphatha rhabaxa abanye ebudeni bemicimbi enokuthanani nokugweba, oku kusenokuba nomphumo owenzakalisayo kwabo bantu. Kodwa kwanokuba umphumo wokwenzakala ngokweemvakalelo okanye ngokwasemzimbeni awubanga kho, kunokubakho ukwenzakala okunzulu ngokomoya, ibe abaveleli banokuthandabuzeka ukuba banazo iimfaneleko. (Thelekisa uYakobi 2:13.) Ngenxa yoko, ebudeni bemicimbi enokuthanani nokugweba ibe nangazo zonke ezinye izihlandlo, abadala bafanele babe nobubele yaye bamele bazilinde nxamnye nokukhubekisa abanye. Kambe ke, onke amaKristu amele abe neliso kule nkalo, kuba uYesu wathi: “Nothe wakhubekisa noko amnye wabancinane abakholwayo kum, ngekumlungele kanye ukuba ubegangxwe ilitye lokusila entanyeni yakhe, waphoswa elwandle.” (Marko 9:42) Ilitye eliphezulu lokusila lalinokuba likhulu kangangokuba kwakuye kufuneke amandla esilwanyana ukuze libe nokushukuma, ibe akukho mntu unokuphoselwa elwandle enomthwalo onzima kangako ogangxwe entanyeni yakhe owayenokusinda. Ngoko, ngokuqinisekileyo, umdala ufanele akulumkele ukukhubekisa okunokubangela ukwenzakala ngokomoya okuhlala kuhleli kuye nakuye nawuphi na umntu osenokuba uye wakhutyekiswa.—Filipi 1:9-11.
Qhubekani Nithantamisa
19. Sisiphi isiluleko uPetros awasinika abadala ababekhonza naye, ibe ukusabela kwabo ngokufanelekileyo kuso kwakunokuthanani namathemba abo?
19 Umpostile uPetros wabonisa abaveleli awayekhonza nabo indlela ababemele bawaluse ngayo umhlambi xa wabhala wenjenje: “Waluseni umhlambi kaThixo ophakathi kwenu, niwuvelela, kungengakunyanzelwa, makube ngokokuzithandela; kungengenxa yenzuzo embi, makube ngokuthumekelela; kungabi njengababazigagamelayo izahlulo zawo, yibani yimizekelo kumhlambi. Nothi akubonakala uMalusi oyintloko, nisifumane isithsaba salo uzuko esingabuniyo.” (1 Petros 5:2-4) Kuphela kungokusebenzisa eso siluleko nangokuthantamisa umhlambi kaThixo abanokuthi abaveleli abathanjisiweyo bafumane umvuzo wabo wasezulwini njengezidalwa zomoya ezingafiyo nabanokuthi abadala abanethemba lokuphila emhlabeni bafumane ubomi obungunaphakade kwiParadisi ezayo yomhlaba wonke.
20. (a) Abalusi abangaphantsi abangamaKristu bamele baqhubane njani namakholwa abakhonza nawo? (b) Uvakalelwa njani ke wena ngenkonzo engumzekelo nokuthantamisa kwabadala abanothando?
20 UYehova uThixo noYesu Kristu bangaBalusi abanothando nabanenceba. Ngoko ngoxa abalusi abangaphantsi abangamaKristu beyiphakamisa ngokuqinileyo imilinganiselo kaThixo, bamele babonise uthando nenceba ekuqhubaneni namakholwa angoowawo anjengezimvu. Ngokuqinisekileyo, onke amaNgqina kaYehova anyanisekileyo ayixabisa ngokunzulu inkonzo engumzekelo yabadala abanjalo abazincamayo nabayinyamekelayo imbopheleleko yabo baze bawuthantamise umhlambi kaThixo. Olo xabiso, ndawonye nentlonelo efanelekileyo, ezo zinto zinokubonakaliswa ngokuthi sibathobele abo basikhokelayo.
[Umbhalo osemazantsi]
a Umntu unokwenza isibheno kwisigqibo sokususwa ebudlelaneni ukuba ukholelwa kwelokuba kwenziwe impazamo enzulu ekugwebeni.
Ubungathini?
◻ Wabonisa njani uYesu Kristu ukuba ubuzwilakhe abunandawo phakathi kwabalandeli bakhe?
◻ Abadala bafanele benze ntoni xa befumana imiyalelo kwiQumrhu Elilawulayo?
◻ NgokukaIsaya 32:1, 2, abadala bafanele babe yimithombo yantoni?
◻ IZibhalo zibonisa njani ukuba abadala abafanele bathabathe inyathelo nje ngondiva?
◻ Abalusi abangaphantsi abangamaKristu bafanele bawuphathe njani umhlambi?
[Umfanekiso okwiphepha 18]
Umthandazo osuka entliziyweni ubalulekile xa ikomiti egwebayo iqhuba intlanganiso nekholwa ekhonza nalo