Imibuzo Yabafundi
Ngaba Ngokwenene UMkhukula Womhla KaNowa Wenzeka Emhlabeni Wonke?
UMkhukula womhla kaNowa wenzeka ngaphezu kweminyaka engama-4 000 eyadlulayo. Ngenxa yoko akakho amangqina okuzibonela anokusibalisela ngawo. Noko ke, ikho ingxelo ebhaliweyo ngaloo ntlekele, amanzi omkhukula agubungela eyona ntaba yayiphakamile ngelo xesha.
Ingxelo equlethe le mbali ifundeka ngolu hlobo: “Yaba ngunogumbe iintsuku ezingamashumi amane emhlabeni . . . Yaye amanzi awongamela umhlaba kakhulu ngokokude azigubungele zonke iintaba ezinde ezazingaphantsi kwamazulu ephela. Azongamela amanzi ukusa kumphakamo weekubhite ezilishumi elinesihlanu zaza zagutyungelwa iintaba.”—Genesis 7:17-20.
Abanye basenokubuza enoba ibali lokugutyungelwa komhlaba wonke ngamanzi yintsomi okanye kukubaxwa kwezinto kusini na. Nakanye! Ewe ukusa kumlinganiselo othile umhlaba usagutyungelwe ngamanzi. Ulwandle lugubungela umhlaba malunga nama-71 ekhulwini. Ngaloo ndlela sinokubona ukuba amanzi omkhukula asekho. Ukuba umkhenkce okwiincam zomhlaba unokunyibilika izixeko ezingenjeNew York neTokyo bezinokugqunywa ngamanzi.
Izazinzulu zomhlaba eziphanda ngokuma komhlaba wasemntla-ntshona weUnited States zikholelwa ekubeni lo mmandla wakhe wagutyungelwa ngamanzi. Zikwakholelwa ekubeni lo mkhukula wafika ngaxeshanye kuloo mmandla amanzi ayelingana neemitha ezingama-600 ukuphakama, ayegubungela iikhilomitha ezili-105 ngeyure—amanzi alingana neekyubhik’ khilomitha ezingama-2 000, anobunzima obungaphezu kwamawaka amabini ezigidi zeetoni. Izinto ezifanayo eziye zafunyaniswa zezinye izazinzulu zazenza zakholelwa ukuba unogumbe womhlaba wonke kunokwenzeka ukuba wawukhe wakho.
Kwabo bakholelwa ukuba iBhayibhile liLizwi likaThixo, unogumbe asiyiyo into ecingelwayo ukuba yenzeka. Yinto yokwenene. UYesu wathi kuThixo: “Ilizwi lakho liyinyaniso.” (Yohane 17:17) Umpostile uPawulos wabhala wathi ukuthanda kukaThixo kukuba “zonke iintlobo zabantu zisindiswe zize zifikelele elwazini oluchanileyo lwenyaniso.” (1 Timoti 2:3, 4) Umpostile uPawulos ebenokubafundisa njani abalandeli bakaYesu inyaniso engoThixo neenjongo zakhe ukuba iLizwi likaThixo lineentsomi?
UYesu akazange nje akholelwe ukuba uMkhukula wabakho kodwa wayekholelwa ekubeni wenzeka ehlabathini lonke. Kwisiprofeto sakhe esidumileyo mayela nobukho bakhe nokuqosheliswa kwale nkqubo yezinto wafanisa ezo ziganeko nexesha likaNowa. (Mateyu 24:37-39) Umpostile uPetros wabhala wathi ngokuphathelele amanzi omkhukula womhla kaNowa: “Ihlabathi langoko latshatyalaliswa xa lakhukuliswa ngamanzi kanogumbe.”—2 Petros 3:6.
Ukuba uNowa nomkhukula yayizizinto zasentsomini, isilumkiso sikaPetros noYesu kwabo baphila kwimihla yokugqibela besingayi kuba nantsingiselo. Kunokuba ibe zizilumkiso, iingcamango ezinjalo beziya kubadida abantu zize zibavalele amathuba okusinda kwimbandezelo enkulu engaphezu koMkhukula kaNowa.—2 Petros 3:1-7.
Ethetha ngokubenzela inceba abantu bakhe, uThixo wathi: “Kanye njengoko ndifungile ukuba amanzi kaNowa akayi kuphinda adlule phezu komhlaba, ngokunjalo ndifungile ukuba andisoze ndikucaphukele okanye ndikukhalimele.” Kanye njengokuba uMkhukula kaNowa wagubungela umhlaba, ububele bothando bukaThixo buya kuba nabo bakholose ngaye.—Isaya 54:9.