Imibuzo Elishumi Edla Ngokubuzwa Ngesondo Iyaphendulwa

1 Ngaba isono sokuqala esenziwa nguAdam noEva kumyezo wase-Eden sasibandakanya isondo?

▪ Impendulo: Abantu abaninzi bacinga ukuba isiqhamo somthi esalelweyo sase-Eden sinento yokwenza nesini. Noko ke, loo nto ayifundiswa yiBhayibhile.

Khawuqwalasele oku: Kwangaphambi kokuba uEva adalwe, uThixo wayalela uAdam ukuba angawudli “umthi wokwazi okulungileyo nokubi.” (Genesis 2:15-18) Ekubeni uAdam wayeyedwa, lo mthetho wawungenakubhekisela ekwabelaneni ngesondo. Ukongezelela koko, uThixo wanika uAdam noEva umthetho ocacileyo wokuba ‘baqhame bande bawuzalise umhlaba.’ (Genesis 1:28) Ngaba uThixo onothando ebeya kuyalela esi sibini sokuqala ukuba ‘siwuzalise umhlaba.’—nto leyo ebiza kufuna ukuba babe neentlobano zesini—aze kwayena abagwebele ukufa kuba beye bathobela umyalelo wakhe?—1 Yohane 4:8.

Ukoleka koko, wayengekho umyeni kaEva xa wathabatha “eziqhameni zawo waza wadla. Emva koko wanika nendoda yakhe isakuba kunye naye yaza nayo yadla.”—Genesis 3:6.

UAdam noEva abazange bathintelwe ukuba nabantwana ngenxa yesono sabo. (Genesis 4:1, 2) Kucacile ukuba isiqhamo somthi uAdam noEva abasityayo asinanto yakwenza nokwabelana ngesondo kunoko yayisisiqhamo qha.

2 Ngaba iBhayibhile iyakwalela ukuba neentlobano zesini?

▪ Impendulo: Incwadi yokuqala yeBhayibhile ibonisa ukuba nguThixo owadala “indoda nebhinqa” lokuqala. UThixo wathi indalo yakhe “ilunge gqitha.” (Genesis 1:27, 31) Kamva, umbhali weBhayibhile ophefumelweyo wanika amadoda lo myalelo: ‘Yiba nemihlali ngumfazi wobutsha bakho . . . Amabele akhe makakuyobe ngamaxesha onke.’ (IMizekeliso 5:18, 19) Ngaba ezi vesi zivakala njengezithintela ukwabelana ngesondo?

Ukongezelela ekuveliseni abantwana ngala malungu okuzala, uThixo wawadalela ukuba indoda nomfazi bakwazi ukubonisa uthando olunzulu omnye komnye. Ukwabealana ngesondo kwanelisa indoda nomfazi ngokweemvakalelo.

3 Ngaba iBhayibhile iyakuvumela ukuhlalisana?

▪ Impendulo: IBhayibhile itsho phandle ukuba “uThixo uya kubagweba abahenyuzi.” (Hebhere 13:4) Igama lesiGrike elithetha ukuhenyuza, uPor·neiʹa, linentsingiselo ebanzi ethetha ukuwasebenzisa kakubi amalungu esini abo bangatshatanga.a Ngenxa yoko, kuphosakele emehlweni kaThixo ukuhlalisana, nokuba kuza kutshatwa kamva.

Nokuba uthando lwendoda nebhinqa luyavutha, uThixo ufuna batshate kuqala ngaphambi kokuba babelane ngesondo. NguThixo owasidala sakwazi ukuba nothando. Olona phawu lukaThixo lubalaseleyo luthando. Ngoko ke, unesizathu esihle sokufuna ukuba isondo lixhanyulwe ngabantu abatshatileyo kuphela, njengokuba inqaku elilandelayo liza kuchaza.

4 Ngaba samkelekile isithembu?

▪ Impendulo: Kangangethuba elithile, uThixo waye wasivumela isithembu. (Genesis 4:19; 16:1-4; 29:18–30:24) Kodwa uThixo akazange asiqale ngokwakhe. UAdam wamenzela umfazi omnye kuphela.

UThixo wagunyazisa uYesu Kristu ukuba abuyisele umlinganiselo wakhe wokuqala wokuba indoda ibe nomfazi omnye. (Yohane 8:28) Xa wabuzwa ngomtshato, uYesu wathi: “Anizange nifunde na ukuba lowo wabadalayo ukususela ekuqaleni wabenza baba yindoda nebhinqa, waza wathi, ‘Ngenxa yesi sizathu indoda iya kumshiya uyise nonina ize inamathele emfazini wayo, baze abo babini babe nyama-nye.’”—Mateyu 19:4, 5.

Kamva omnye wabafundi bakaYesu waphefumlelwa ukuba abhale athi: “Ndoda nganye mayibe nowayo umfazi yaye umfazi ngamnye abe neyakhe indoda.” (1 Korinte 7:2) IBhayibhile iphinda yaleke ithi indoda etshatileyo esetyenziswayo kwibandla lamaKristu imele ibe ‘yindoda yamfazi mnye.’—1 Timoti 3:2, 12.

5 Ngaba kuphosakele ngabantu abatshatileyo ukucwangcisa?

▪ Impendulo: UYesu akazange ayalele abalandeli bakhe ukuba babe nabantwana. Kungazange kubekho namfundi kaYesu owayalela oko. NeBhayibhile ayithethi ngokucacileyo ngokuthintelwa kwenzala.

Ngenxa yoko, izibini ezitshatileyo zinenkululeko yokuzikhethela ukuba nabantwana okanye ukungabi nabo. Zisenokugqiba ukuba bangaphi abantwana ezifuna ukuba nabo nangexesha ezifuna ukuba nabo ngalo. Ukuba nje indoda nomfazi bakhetha ukusebenzisa izinto ezithintela inzala ezingenanto yakwenza nokuqhomfa kuba bengafuni ukukhulelwa, eso sisigqibo sabo.b Akakho umntu unelungelo lokubaxelela into amabayenze.—Roma 14:4, 10-13.

6 Ngaba kuphosakele ukuqhomfa?

▪ Impendulo: Ubomi bungcwele kuThixo, kwanembumba esesesuswini uyijonga njengento ephilayo. (INdumiso 139:16) UThixo wathi umntu uya kuphenduliswa ngokwenzakalisa umntwana ongekazalwa. Emehlweni akhe ukubulala umntwana ongekazalwa, bubugebenga.—Eksodus 20:13; 21:22, 23.

Kuthekani ukuba xa umntwana ezalwa imeko ibangela ukuba kufuneke kukhethwe ukuba ngubani oza phila phakathi komntwana nonina? Kwimeko elolo hlobo kuya kufuneka isibini sigqibe ngobomi obufanele busindiswe.c

7 Ngaba iBhayibhile iyaluvumela uqhawulo mtshato?

▪ Impendulo: IBhayibhile iyakuvumela ukuqhawula umtshato. Noko ke, uYesu wachaza isizathu esinye kuphela esamkelekileyo sokuqhawula umtshato, esisesi: “Nabani na oqhawula umtshato nomfazi wakhe, ngaphandle kwangesizathu sohenyuzo [ukwabelana ngesondo nomntu ongatshatanga naye], aze atshate nomnye uyakrexeza.”—Mateyu 19:9.

UThixo uluthiyile uqhawulo mtshato olwenziwe ngobuqhophololo. UThixo akazukubayeka abo bashiya amaqabane abo ngobuqhophololo, ngokukodwa xa loo nto beyenza kuba befuna elinye iqabane.—Malaki 2:13-16; Marko 10:9.

8 Ngaba uThixo uyabamkela ubufanasini?

▪ Impendulo: IBhayibhile iyakugxeka ukuziphatha okubi, okuquka ubufanasini. (Roma 1:26, 27; Galati 5:19-21) Ngoxa iBhayibhile iligxeka ikhondo elinjalo lobomi, siyazi ukuba “uThixo walithanda kakhulu ihlabathi kangangokuba wanikela ngoNyana wakhe okuphela kwamzeleyo, ukuze wonk’ ubani obonisa ukholo kuye angatshabalali kodwa abe nobomi obungunaphakade.”—Yohane 3:16.

Nangona amaKristu okwenyaniso engabukhuthazi ubufanasini, anobubele kubo bonke abantu. (Mateyu 7:12) UThixo ufuna ‘sibeke abantu bazo zonke iintlobo.’ Ngoko amaKristu okwenyaniso akabacaphukeli abantu abangamafanasini.—1 Petros 2:17.

9 Ngaba siphosakele isini esenziwa ngefowuni (iphone sex, “isexting” okanye icybersex)?

▪ Impendulo: Isini esenziwa ngefowuni siquka ukuncokola efowunini nomnye umntu ngesini ukuze wanelise inkanuko. “Isexting” kukuthumela imifanekiso nemiyalezo evuselela inkanuko ngeselifowuni. ICybersex kukuncokola ngesini kwi-intanethi ukuze kwaneliswe inkanuko.

IBhayibhile ayithethi ngokungqalileyo ngezi ndlela zikhoyo ngoku zokuziphatha okubi. Kodwa ithi: “Uhenyuzo nako konke ukungahlambuluki nokubawa makungakhe kukhankanywe kwaukukhankanywa phakathi kwenu, kanye njengoko kubafaneleyo abantu abangcwele; kwanehambo elihlazo nentetho yobudenge nokuqhula okungamanyala, zinto ezo ezingafanelekanga.” (Efese 5:3, 4) Ezi ndlela zokuziphatha okubi ngokwesini zikhankanywe ngasentla ziyayigqwetha indlela esifanele sijongwe ngayo isini yaye zikhuthaza abantu ukuba banandiphe uyolo lwesini ngaphandle komtshato. Kunokuba zincede abantu balawule inkanuko yabo, zikhuthaza ukuzingca.

10 Ithini iBhayibhile ngokuphulula amaphambili?

▪ Impendulo: IBhayibhile ayithethi ngokungqalileyo ngokuphulula amaphambili—okwanelisa inkanuko yesini. Noko ke, iLizwi likaThixo liyalela amaKristu lisithi: “Bhubhisani, ke ngoko, amalungu enu omzimba asemhlabeni, uhenyuzo, ukungahlambuluki, inkanuko yesini. “—Kolose 3:5.

Ukuphulula amaphambili kukhuthaza imbono egqwethekileyo nokuzingca. IBhayibhile iyasiqinisekisa ukuba uThixo unokubanika “amandla angaphaya koko kuqhelekileyo” abo bazama ngokunyanisekileyo ukwahlukana nalo mkhwa.—2 Korinte 4:7; Filipi 4:13.

[Imibhalo esemazantsi]