Imibuzo Evela Kubafundi

Ngaba ukubukela komKristu imifanekiso engamanyala kubi kangangokuba kungaphumela ekubeni agxothwe kwibandla lamaKristu?

▪ Ewe, kunjalo kanye. Kungenxa yeso sizathu kubalulekile ukukuphepha ngokupheleleyo ukubukeka imifanekiso engamanyala—enoba siyibona kwiincwadi, iincwadana, iifilimu, iividiyo kwanakwi-Intanethi.

Imifanekiso engamanyala inokufumaneka naphi na ehlabathini. Inani labantu abachanabeka ekubukeleni la manyala liya lisanda ngenxa yokuba i-Intanethi yenza kube lula ukuba ifumaneke. Abanye abantu baye bayibona ngempazamo le mifanekiso kwiiWebhsayithi. Abanye baye bazivule ngabom ezi Webhsayithi yaye bakwenza oku bekhululekile ngoxa besemakhayeni okanye kumagumbi abo okusebenza apho bangabonwa mntu. Kutheni ukubukela amanyala kuyingozi kumaKristu?

Isilumkiso sikaYesu sisinika esona sizathu sibalulekileyo: “Wonk’ ubani oqhubeka ekhangela umfazi ngokokude amkhanuke sele emkrexezile entliziyweni yakhe.” (Mat. 5:28) Kambe ke, iintlobano zesini phakathi kwendoda nomfazi abatshatileyo zifanelekile yaye ziyinto isibini esinokuyonwabela. (IMize. 5:15-19; 1 Kor. 7:2-5) Kodwa akubi njalo ngokubukela imifanekiso engamanyala. Yona, ibonisa ukuziphatha kakubi ngokwesini okwenza ukuba umntu abe neengcinga ezimbi ezo uYesu wasilumkisa ngazo. Ngoko kucacile ukuba ukufunda okanye ukubukela amanyala kuchasene nomthetho kaThixo othi: “Bhubhisani, ke ngoko, amalungu enu omzimba asemhlabeni, uhenyuzo, ukungahlambuluki, inkanuko yesini, umnqweno owenzakalisayo, nokubawa, okulunqulo-zithixo.”—Kol. 3:5.

Kuthekani ukuba umKristu uye wabukela amanyala kangangesihlandlo esinye okanye ezibini? Usenokuchanabeka engozini kanye njengomdumisi uAsafu owathi: “Ke mna, iinyawo zam beziphantse zathi gu bucala, ukunyathela kwam bekuphantse kwenziwa kwatyibilika.” UmKristu unokuba nesazela esicocekileyo okanye abe seluxolweni njani noThixo, ukuba wakha wabukela amadoda okanye amabhinqa ahamba ze okanye isibini esihenyuzayo? Unokuvakalelwa njengoAsafu owathi: “Ndiye ndakhathazwa imini yonke, yaye ndilungiswa intsasa nganye.”—INdu. 73:2, 14.

UmKristu obukela imifanekiso engamanyala umele aqonde ukuba oku kuchaphazela ulwalamano lwakhe noYehova yaye umele ancedwe. Uncedo olunjalo luyafumaneka ebandleni: “Ukuba umntu uqutyulwe sisiphoso, nina enineemfaneleko zokomoya zamani ukumlungisa umntu onjalo ngomoya wobulali, nizilumkela ukuba ningahendwa nani.” (Gal. 6:1) Umdala omnye okanye ababini banokumnceda lowo ufuna uncedo, kuba ‘umthandazo wokholo uyamphilisa lowo ungaphilanga, ukuze isono sakhe sixolelwe.’ (Yak. 5:13-15) Abo baye bafumana uncedo lokuyeka ukubukela imifanekiso engamanyala baye babona ukuba ukusondela ngakumbi kuThixo kwenza babe nolwalamano oluhle naye, kanye njengokuba kwaba njalo nangoAsafu.—INdu. 73:28.

Sekunjalo, umpostile uPawulos wathi abanye abonayo abazange baguquke “ekungahlambulukini nakuhenyuzo nakwihambo yabo evakalala.”a (2 Kor. 12:21) Ethetha ngegama lesiGrike elithi “ukungahlambuluki,” uNjingalwazi uMarvin R. Vincent uthi: Eli gama lithetha “ubumdaka okanye ukungcola.” Okubi nangakumbi kukuba eminye imifanekiso engamanyala ingcole ukodlula leyo ibonisa nje amadoda nabafazi abahenyuzayo. Le mifanekiso ibonisa ukungcola okungathethekiyo, okubandakanya imifanekiso engamanyala yamafanasini (iintlobano zesini phakathi kwabantu besini esifanayo), iintlobano zesini ezenziwa ngabantu abangaphezu kwababini, iintlobano zesini ezenziwa nezilwanyana, imifanekiso engamanyala enabantwana, ukudlwengulwa komntu liqela labantu, ukuphathwa kwamabhinqa ngenkohlakalo, nokuba neentlobano zesini nomntu obotshelelweyo okanye ukungcungcuthekiswa kwabantu. Abanye ngexesha likaPawulos ‘ababesebumnyameni ngengqondo babengasaziva konke konke ngokuziphatha, [yaye] bazinikela kwihambo evakalala ukuze basebenze ukungahlambuluki kwalo lonke uhlobo bebawa.’—Efe. 4:18, 19.

Kwakhona kwincwadi yabaseGalati 5:19, uPawulos ukhankanya ‘ukungahlambuluki.’ Omnye umphengululi waseBritani wathi “ukungahlambuluki” kubhekisela kwiminqweno engeyoyamvelo. Ngoko akakho umKristu onokuyikhanyela into yokuba zonke iintlobo zemifanekiso engamanyala esixubushe ngazo apha zingcolile yaye zenza abantu babe neminqweno engeyoyamvelo. Kwincwadi yabaseGalati 5:19-21, uPawulos waqukumbela ngelithi: ‘Abo baqhelisela ukungcola okunjalo abayi kubudla ilifa ubukumkani bukaThixo.’ Ngenxa yoko, ukuba umntu uqhubeka nomkhwa wokubukela le mifanekiso yenyanyekayo yamanyala nethob’ isidima, mhlawumbi kangangexesha elide, yaye akaguquki aze atshintshe, akanakuhlala kwibandla lamaKristu. Umele akhutshelwe ngaphandle kwebandla ukuze ligcinwe licocekile.—1 Kor. 5:5, 11.

Kuyavuyisa ukwazi ukuba abanye abaye babukela imifanekiso engamanyala, baye bafumana uncedo lokomoya kubadala baza batshintsha ngokukhawuleza. UYesu wabongoza amaKristu eSardesi wathi: ‘Zomeleze izinto eziseleyo, ebeziza kufa, qhubeka ukhumbula indlela owamkele ngayo nendlela ove ngayo, uze uqhubeke uyigcina, uguquke. Ukuba akuvuki, akusayi kulazi konke konke ilixa endokufikela ngalo.’ (ISityhi. 3:2, 3) Sinako ukuguquka size siphephe iingozi zemifanekiso engamanyala.—Yude 22, 23.

Ngoko, kubaluleke ngokwenene ukuba ngamnye kuthi, aqiniseke ukuba umela kude kwimifanekiso engamanyala. Ewe, simele siqiniseke ngokupheleleyo ukuba siyayiphepha naziphi na iindidi zemifanekiso engamanyala!

[Umbhalo osemazantsi]

[Amagama acatshulweyo akwiphepha 30]

UmKristu obukela imifanekiso engamanyala umele aqonde ukuba oku kuchaphazela ulwalamano lwakhe noYehova yaye umele ancedwe