Imibuzo Evela Kubafundi
Ngaba umKristu unokuba nesazela esicocekileyo ukuba umsebenzi wakhe ubandakanya ukuphatha izixhobo?
Ehlabathini lonke amaNgqina kaYehova ayithabatha nzulu imbopheleleko ayinikwe nguThixo yokunyamekela iintsapho zawo ngezinto eziphathekayo. (1 Timoti 5:8) Noko ke, kukho iintlobo zomsebenzi ezingqubana ngokucacileyo nemigaqo yeBhayibhile ibe zimele ziphetshwe. Ezi ntlobo ziquka imisebenzi enokuthanani nokungcakaza, ukusetyenziswa kakubi kwegazi nokukhuthaza ukusetyenziswa kwecuba. (Isaya 65:11; IZenzo 15:29; 2 Korinte 7:1; Kolose 3:5) Nakuba ezinye iintlobo zomsebenzi zingakhatywa ngokuthe ngqo yiBhayibhile, zona zinokusonakalisa isazela sikabani okanye isazela sabanye.
Ukwenza umsebenzi ofuna ubani aphathe umpu okanye olunye uhlobo lwesixhobo ngumbandela wobuqu. Kodwa ukusebenza uxhobile kubeka ubani esichengeni sokuba netyala legazi xa eye wabulala. Ngoko ke, umKristu kufuneka acingisise ngomthandazo enoba uya kukwazi na ukwenza isigqibo esingxamisekileyo kumbandela ophathelele ubomi bomntu. Umntu oxhobileyo uphinda abe sesichengeni sokwenzakaliswa okanye sokubulawa xa abantu behlasela okanye beziphindezela.
Nabanye basenokuphazamiseka seso sigqibo. Ngokomzekelo, eyona mbopheleleko yomKristu kukushumayela iindaba ezilungileyo zoBukumkani bukaThixo. (Mateyu 24:14) Ngaba uya kukwazi ukufundisa abanye “ukuba noxolo nabantu bonke,” ngoxa yena ephila ngokuphatha isixhobo? (Roma 12:18) Kuthekani ngabantwana okanye amanye amalungu entsapho? Ngaba ukuhlala nompu endlwini akuyi kububeka esichengeni ubomi bawo? Ngapha koko, ngaba abanye abayi kukhutyekiswa koku?—Filipi 1:10.
Kule ‘mihla yokugqibela,’ baya besanda abantu ‘abaziindlobongela abangathandi kulunga.’ (2 Timoti 3:1, 3) Ekubeni ekwazi oku, ngaba umntu unokuhlala ‘engenakumangaleleka’ ukuba ukhetha umsebenzi ofuna aphathe isixhobo esinokukhokelela ekubeni angquzulane nabantu abanjalo? (1 Timoti 3:10) Unotshe. Ngenxa yoku, ibandla aliyi kukwazi ukugqala umntu onjalo ‘njengongenakukhalazeleka’ ukuba uqhubeka ephatha isixhobo nasemva kokuba eye wachazelwa ngobubele isiluleko seBhayibhile. (1 Timoti 3:2; Tito 1:5, 6) Ngoko, indoda okanye ibhinqa elinjalo aliyi kufanelekela nawaphi na amalungelo akhethekileyo ebandleni.
UYesu waqinisekisa abafundi bakhe ngelithi ukuba babeka izilangazelelo zoBukumkani kwindawo yokuqala, abayi kuba nasizathu sakuxhalabela ngokugqithiseleyo izinto eziyimfuneko ebomini. (Mateyu 6:25, 33) Enyanisweni, ukuba sithembela ngokupheleleyo kuYehova, ‘yena uya kusixhasa. Akayi kuliyekela ilungisa lishukunyiswe.’—INdumiso 55:22.