Ingozi Exhalabisa Abazali
UHEATHER noScott ngamaqhakraqhakra yaye basisibini esitshatileyo esonwabileyo. Ngabazali benkwenkwe ekrelekrele, esempilweni neneminyaka emithathu ubudala.a Bamnyamekela kakuhle unyana wabo. Kweli hlabathi lanamhlanje, lowo asingomsebenzi ulula. Uquka iingxaki neembopheleleko eziliqela. Abantwana kufuneka bafundiswe izinto ezininzi! UHeather noScott bayiphaphele gqitha into yokuba umntwana wabo angaxhatshazwa ngokwesini. Ngoba?
UHeather uthi: “Utata wayengenabubele, enxila yaye endlongondlongo. Wayengandibethi wayendibhulel’ amasaka yaye wayesixhaphaza ngokwesini mna noodade wethu.”b Kuyavunywa ukuba ukuxhatshazwa ngolo hlobo kunokuyishiya intliziyo ilihlwili. Ngenxa yoko, uHeather uzimisele ukumkhusela unyana wakhe! UScott naye uvakalelwa ngendlela efanayo.
Abazali abaninzi baxhalabile ngenxa yokuba abantwana bayaxhatshazwa. Mhlawumbi nawe uxhalabile. Ngokungafaniyo noScott noHeather, usenokuba akuzange uxhatshazwe okanye ujamelane nemiphumo yako kodwa ukhe uve ngeengxelo ezihlasimlis’ umzimba zokuxhatshazwa kwabantwana. Ehlabathini lonke abazali ababathandayo abantwana babo abonwabi xa besiva ngoko kuye kwenzeka kumntwana othile kummandla abahlala kuwo.
Omnye umphandi ophanda ngokuxhatshazwa ngokwesini uthi ukuxhatshazwa kwabantwana “yeyona nto idimazayo kweli xesha siphila kulo.” Eneneni ziindab’ ezimbi ezo, kodwa ngaba oko kusishiya sibamb’ ongezantsi? Asingomnqa lowo kubantu abafund’ iBhayibhile. ILizwi likaThixo lithi siphila kumaxesha anzima ekuthiwa “yimihla yokugqibela,” xesha elo baya kwesamela abantu ‘abaziindlobongela,’ “abazithandayo” nabangenawo “umsa wemvelo.”—2 Timoti 3:1-5.
Ukuxhatshazwa ngokwesini kuhlasimlis’ umzimba. Abazali balala bephaphama xa becinga ngendlela abakhohlakele ngayo abantu abaxhaphaza abantwana. Noko ke, ngaba abazali bangakwazi ukuyisingatha le ngxaki? Okanye ngaba ikho into abanokuyenza abazali ukuze bakhusele abantwana babo? Amanqaku alandelayo aza kuyiphendula le mibuzo.
[Imibhalo esemazantsi]
a Amagama akula manqaku atshintshiwe.
b Umntwana uxhatshazwa ngokwesini xa umntu omdala esabelana naye ngesondo. Ngokufuthi kubandakanya oko iBhayibhile ikubiza ngokuba luhenyuzo okanye ipor·neiʹa. Oku kuquka ukuphathaphatha amalungu esini omnye umntu, iintlobano zesini, ukuba neentlobano zesini emlonyeni okanye ezimpundu. Ezinye izenzo zokuxhaphaza njengokucofa amabele, iindlela ezingqalileyo zokukhuthaza ukuziphatha okubi, ukubonisa umntwana izinto ezingamanyala, ukutyhila amalungu esini omntwana nokumhluba ngokungafanelekanga kusenokuba koko iBhayibhile ithi ‘yihambo evakalala’ “ukungahlambuluki” . . . ‘nokubawa.’—Galati 5:19-21; Efese 4:19.