IWatchtower LAYBRARI EKWI-INTANETHI
IWatchtower
LAYIBRARI EKWI-INTANETHI
IsiXhosa
  • IBHAYIBHILE
  • IINCWADI
  • MEETINGS
  • w88 5/1 iphe. 15-20
  • Abantu Abahamba Emanyathelweni KaYesu

No video available for this selection.

Sorry, there was an error loading the video.

  • Abantu Abahamba Emanyathelweni KaYesu
  • IMboniselo Evakalisa UBukumkani BukaYehova—1988
  • Imixholwana
  • Amanqaku Afanayo
  • Ubungcwele Begazi
  • Ukuziphatha Okuhle
  • Ubundilele
  • Ekhaya
  • Ukuthobela Ngenxa Yothando
  • Ucelomngeni Lokulandela Emanyathelweni Akhe
    IMboniselo Evakalisa UBukumkani BukaYehova—1988
  • ‘Zamani Ngandlela Zonke Ukumlandela’
    IMboniselo Evakalisa UBukumkani BukaYehova (Efundwayo)—2021
  • Ukwaziwa Ngehambo Yethu
    AmaNgqina KaYehova—Abavakalisi Bobukumkani BukaThixo
  • Amanyathelo Okuqala Okuhamba NoThixo
    IMboniselo Evakalisa UBukumkani BukaYehova
Khangela Okunye
IMboniselo Evakalisa UBukumkani BukaYehova—1988
w88 5/1 iphe. 15-20

Abantu Abahamba Emanyathelweni KaYesu

“Asihambanga moyeni mnye, yini na? Asihambanga mkhondo mnye [emanyathelweni afanayo, NW], yini na?”—2 KORINTE 12:18.

1. Kutheni le nto ngokufuthi kungeyonto enzima ukuphawula omnye wamaNgqina kaYehova?

“NJENGEQELA, bachubekile, bathembekile yaye baqhuba kakuhle esikolweni. Akunjalo ngamanye amaqela.” Yatsho njalo inqununu yesikolo sabaqalayo eUnited States. Yayithetha ngoobani? Yayithetha ngabantwana bamaNgqina kaYehova ababefunda kwisikolo sayo. Eneneni, abaninzi baye baphawula ukuba ngokufuthi amaNgqina kaYehova, kuquka abantwana bawo, ayafana namanye amaNgqina kwiinkalo ezithile. Kwiminyaka edluleyo iye yacaca ngokwandayo into yokuba amanyene ngokuphawulekayo ngokuphathelele iinkolelo nehambo. Ngoko amaNgqina akunzima ukuwaphawula.

2. Luluphi uphawu olwafanisa ibandla lamaKristu okuqala, yaye uPawulos wathini ngako oku?

2 Umanyano lwamaNgqina kaYehova luyinto engaqhelekanga kweli hlabathi lingamanyananga. Kodwa akunzima ukukuqonda oko ukuba sithi sikhumbule ukuba onke azabalazela ukuhamba emanyathelweni kaYesu. (1 Petros 2:21) Kwakhona umanyano olunjalo lwaluluphawu olwafanisa amaKristu enkulungwane yokuqala. Ngesinye isihlandlo, uPawulos waluleka ibandla laseKorinte esithi: “Ke kaloku, ndiyaniyala, bazalwana, ngalo igama leNkosi yethu, uYesu Kristu, ukuba nithethe nto-nye nonke, nokuba kungabikho zahlukahlukano kuni; ke nibe ngabalungisiweyo, nigqibelele ngqiqweni-nye, nasicamangweni sinye.” (1 Korinte 1:10) Kwakhona uPawulos wanikela isiluleko esiphefumlelweyo ngendlela yokuqhubana nabantu abangavumiyo ukulondoloza umanyano lobuKristu.—Bona abaseRoma 16:17; 2 Tesalonika 3:6.

3, 4. UPawulos wayichaza njani indlela awayemanyene ngayo noTito, yaye olu manyano lwalusekelwe enini?

3 Malunga nonyaka wama-55 C.E., uPawulos wathuma uTito eKorinte ukuya kunceda ekuqokeleleni iminikelo yokunceda abazalwana abasweleyo belakwaYuda yaye mhlawumbi nokubona indlela ibandla elalisabela ngayo kwisiluleko sikaPawulos. Xa wathi kamva wabhalela ibandla laseKorinte, uPawulos wabhekisela kutyelelo olwalusandul’ ukwenziwa nguTito waza wabuza oku: “Wanidla na ke uTito? Asihambanga moyeni mnye, yini na? Asihambanga mkhondo mnye [emanyathelweni afanayo, NW], yini na?” (2 Korinte 12:18) Wayethetha ukuthini uPawulos ngokuhamba kwabo “moyeni mnye” ‘nasemanyathelweni afanayo’?

4 Wayebonisa indlela awayemanyene ngayo noTito. UTito wayeliqabane elalikhenketha noPawulos ngamathuba athile, ibe alithandabuzeki elokuba wafunda lukhulu kuPawulos ngale ndlela. Kodwa umanyano lwaba babini lwalusekelwe kwinto eyayomelele ngakumbi kunoko. Lwalusekelwe kulwalamano lwabo oluhle noYehova nakwisibakala sokuba bobabini babelandela emanyathelweni kaKristu. UTito waxelisa uPawulos kanye njengokuba uPawulos waxelisa uKristu. (Luka 6:40; 1 Korinte 11:1) Ngoko babehamba emoyeni kaYesu nasemanyathelweni akhe.

5. Yintoni namhlanje enokulindelwa ebantwini abaxelisa uPawulos noTito njengoko behamba “moyeni mnye” ‘nasemanyathelweni afanayo’?

5 Ngoko, akumangalisi ukuba amaKristu ale nkulungwane yama-20, áhamba “moyeni mnye” ‘nasemanyathelweni afanayo’ noPawulos noTito, abe anandipha umanyano olungenakulinganiswa nanto. Enyanisweni, ukungamanyani kwabo bangamaKristu ngegama kubonisa ukuba bangamaKristu enkohliso, abahambi emanyathelweni eNkokeli abathi bayayilandela. (Luka 11:17) Lo mahluko uphawulekayo uphakathi kwamaKristu okwenyaniso nabo bangamaKristu ngegama unokuzekeliswa ngeendlela ezahlukahlukeneyo. Masikhankanye ezine.

Ubungcwele Begazi

6, 7. (a) Yiyiphi imbono efanelekileyo ngegazi ebandakanyekileyo ekuhambeni emanyathelweni kaYesu? (b) Uyintoni umahluko phakathi kwamaNgqina kaYehova nabanye namhlanje abathi bangavumi ukutofela igazi?

6 Malunga nonyaka wama-49 C.E., iqumrhu elilawulayo lebandla lenkulungwane yokuqala lathumela incwadi eyayiphendula umbuzo othi: Ngaba amaKristu angengomaYuda afanele awuthobele uMthetho kaMoses? Le ncwadi yayisithi: “Kwabonakala kulungile kuye uMoya oyiNgcwele, nakuthi, ukuba kungabekwa phezu kwenu mthwalo ungaphezu kwezi ndawo zifunekayo: zokuba nizile izinto ezibingelelwe kwizithixo, negazi, nento ekrwitshiweyo, nombulo.” (IZenzo 15:28, 29) Phawula ukuba phakathi kwezi “ndawo zifunekayo” yayikukuzila igazi. Ukuhamba emanyathelweni kaYesu kwakuya kuthetha ukungalifaki igazi emzimbeni enoba kungokulitya okanye kungayo nayiphi na enye indlela.

7 Lo mgaqo uye wavukelwa ngokuphandle yiNgqobhoko ngokuthi iqhelisele ukutofela igazi. Liyinyaniso elokuba, kwiminyaka yakutshanje abantu abaliqela baye bayiqonda indlela ukutofelwa kwegazi okuyingozi ngayo empilweni yaye baye bakwala oko ngenxa yezizathu ezingokwezamayeza. Oku kuyinyaniso ngokukhethekileyo ekubeni abaninzi beye baba neAIDS ngenxa yokutofelwa igazi. Kodwa ngoobani ababugcinayo ubungcwele begazi ngenxa yokuhlonela umthetho kaThixo yaye bekwenza oko njengeqela? Xa umntu ogulayo esala ukutofelwa igazi, ngokuzenzekelayo ugqirha uye acinge ukuba uyintoni? Ngaba ugqirha akadli ngokuthi: ‘Umele ukuba ube ungomnye wamaNgqina kaYehova’?

8. Elinye iNgqina laseItali lasikelelwa njani ngokuzimisela kwalo ukugcina umthetho kaThixo kule nkalo?

8 UAntonietta uhlala eItali. Malunga neminyaka esibhozo edluleyo wayegula kakhulu, yaye igazi lakhe lalilincinane kangangokuba oogqirha bazingisa besithi kwakufuneka atofelwe igazi ukuze kusindiswe ubomi bakhe. Wala waza wachaswa ngoogqirha nazizalamane. Kwanamakhwenkwana akhe amabini ambongoza esithi: “Mama, ukuba usithanda ngokwenene, lamkele igazi.” Kodwa uAntonietta wayezimisele ukuhlala ethembekile yaye okuvuyisayo kukuba akazange afe. Sekunjalo, imeko yakhe yayingaginyisi mathe kangangokuba ugqirha wathi: “Asazi ukuba kwenzeka njani ukuba abe usaphila.” Kodwa xa kwathi kwaqaliswa uhlobo olungachasekanga lonyango, wachacha ngokukhawuleza kangangokuba omnye ugqirha wathi: “Sisimanga esi—ngewungakhange uphile ngexesha nje elifutshane kangaka, nditsho nokuba besikufake igazi imini yonke.” Sithetha nje, unguvulindlela othe ngxi, yaye oonyana bakhe ababini, ngoku abane-12 ne-14 leminyaka, baqhuba kakuhle kakhulu enyanisweni. UAntonietta wayigqala ngenkalipho loo ‘ndawo ifunekayo,’ ubungcwele begazi. Onke amaNgqina kaYehova anembono efanayo njengoko ehamba emanyathelweni kaYesu.

Ukuziphatha Okuhle

9. Yiyiphi enye ‘indawo efunekayo’ ebandakanyekileyo ekulandeleni emanyathelweni kaYesu, yaye kwenzeka ntoni kwabo bangakugqaliyo oku?

9 Enye ‘indawo efunekayo’ eyabalaseliswa kuloo ncwadi eyayivela kwiQumrhu Elilawulayo lenkulungwane yokuqala ‘kukuzila umbulo.’ Kwincwadi yakhe yokuqala eya kwabaseKorinte, uPawulos wongezelela okungakumbi koku, esithi: “Abenza umbulo, nabakhonzi bezithixo, nabakrexezi, nezifebe, namadoda alalanayo . . . abayi kubudla ilifa ubukumkani bukaThixo.” (1 Korinte 6:9, 10) AmaKristu anceda abantu abanomnqweno wokukhonza uYehova ukuba bahlukane nolu qheliselo lungcolileyo. Kwanamalungu ebandla athi abanjiswe lulo ayancedwa ukuba azenze nyulu ukuba ayabuya aze aguquke. (Yakobi 5:13-15) Kodwa ukuba nawuphi na umKristu uthi awele ekuziphatheni okungcolileyo okunjalo aze angavumi ukuguquka, kusetyenziswa umthetho weBhayibhile ongqalileyo. UPawulos waphefumlelwa nguThixo ukuba athi: “Maningazidibanisi nosukuba enegama lokuba ngumzalwana, ukanti wenza umbulo. . . . Ize nimnyothule kuni nina lowo ungendawo.”—1 Korinte 5:11, 13.

10, 11. (a) Ngoobani ababekek’ ityala ngemilinganiselo ephantsi yokuziphatha kweNgqobhoko, yaye ngoba? (b) Amava endoda yakwiiPhilippines abonisa njani ukuba, njengeqela, amaNgqina kaYehova alondoloza imilinganiselo ephakamileyo yokuziphatha?

10 Phezu kwayo nje le mfundiso icacileyo, iNgqobhoko intyumpantyumpeka ekuziphatheni okubi. Abefundisi abayigalela amanzi imilinganiselo kaThixo bafanele babekw’ ityala ngenxa yale meko, njengabo banikela inkonzo yomlomo kwimilinganiselo yeBhayibhile kodwa besilela ukuyibethelela ngenkalipho emabandleni abo. Sekunjalo, nakuko oku, amaNgqina kaYehova njengeqela labantu ahamba emanyathelweni kaYesu.

11 Qwalasela uJose, ohlala kwiiPhilippines. Kubudala beminyaka eli-17 wayesel’ esaziwa njengomqhwayi wenkathazo nomngcakazi. Wayengumahlal’ eshushu, eziphethe kakubi yaye wayequqa entolongweni ngenxa yobusela. Wandula ke wadibana namaNgqina kaYehova. Uthi, “Isifundo seBhayibhile sabuguqula ngokupheleleyo ubomi bam. Andisaseli yaye andisatshayi, ibe ndiye ndafunda ukuwulawula umsindo endinawo. Ngoku ndinesazela esimsulwa, ndinomfazi omnye kuphela. Nabamelwane bam batsho bandihlonela, ababedla ngokundibiza ngokuthi ‘Jose, odume kakubi’ nangokuthi ‘Jose, osisithunzela.’ Ngoku bandibiza ngokuthi ‘Jose, oliNgqina likaYehova.’ Unyana wam nomtshana wam bazizicaka zolungiselelo kwibandla ngoku endikhonza kulo njengomdala nanjengovulindlela othe ngxi.” UJose namanye amawakawaka amaNgqina kaYehova angamaKristu bahamba emanyathelweni kaYesu njengamaKristu aziphethe ngokucocekileyo.

Ubundilele

12. Sisiphi isimo sengqondo samaKristu okwenene uYesu awasibalaselisayo kumthandazo wakhe obhalwe kuYohane isahluko 17?

12 Kumthandazo omde owenziwa nguYesu ngobusuku bokugqibela ekunye nabafundi bakhe, wakhankanya enye indlela abalandeli bakhe ‘ababeya kuhamba ngayo emanyathelweni akhe.’ Ethetha ngabafundi bakhe, wathi: “Abangabo abehlabathi, njengokuba nam ndingenguye owehlabathi.” (Yohane 17:16) Oku kuthetha ukuba amaKristu angoondilele. Kunokuba abe nenxaxheba kwezobupolitika okanye kungquzulwano lobuhlanga, axelela abanye ngoBukumkani bukaThixo, obukuphela kwesicombululo kwiingxaki zeli hlabathi.—Mateyu 6:9, 10; Yohane 18:36.

13, 14. (a) INgqobhoko yahluke njani kumaNgqina kaYehova kumbandela wobundilele? (b) Ukuhlala kwelinye iNgqina laseJapan lingundilele kwezobupolitika kwabanceda njani bonke abazalwana?

13 Lo mgaqo wobundilele uye walityalwa ngamalungu amaninzi eNgqobhoko, kuba kuwo ukuphanda ngemvelaphi yobuhlanga kudla ngokuba yinto ebaluleke ngakumbi kunokuphanda ngemvelaphi yomanyano olungokonqulo. Umbhali wemihlathi yamaphephandaba aliqela uMike Royko ubonisa ukuba “amaKristu” akazange “azithiye iimfazwe ezazigquba phakathi kwamanye amaKristu,” utsho esongezelela ngelithi: “Ukuba ayekwenzile oko, inkoliso yeemfazwe ezimanyumnyezi ezaliwa eYurophu ngezingazange ziqhambuke.” Yaziwa kakuhle into yokuba amaNgqina kaYehova alondoloza ubundilele bobuKristu ngokungqongqo ngamaxesha eemfazwe. Kodwa njengoko elandela emanyathelweni kaYesu, akwangoondilele nakwimicimbi yezentlalo neyezobupolitika. Ngaloo ndlela, akukho nto iphazamisa umanyano lwawo olubalaseleyo lwazwenibanzi.—1 Petros 2:17.

14 Maxa wambi ukuba ngoondilele kwawo kuzisa imiphumo engalindelekanga. Ngokomzekelo, kwisithili saseTsugaru esisemantla eJapan unyulo lujongwa njengento ebaluleke kakhulu. Kodwa uToshio, ongumncedisi womphathi weSebe lezeMali kwiofisi yaseburhulumenteni yasekuhlaleni, ngenxa yesazela sakhe wakwala ukuzibandakanya kwiphulo lokunyulwa kwakhona kwesibonda sedolophu. Oku kwaphumela ekubeni athotyelwe kwisikhundla esingaphantsi kwiSebe elijongene naManzi amdaka. Phofu ke, emva konyaka esi sibonda sedolophu sabanjwa saza sayekiswa nakwisikhundla saso ngenxa yokuqhelisela ubuqhetseba. Kwanyulwa isibonda sedolophu esitsha. Xa sathi seva ngokuthotywa kukaToshio, samphakamisela kwisikhundla esiphakamileyo sokulawula yaye oku kwazisa iintsikelelo kubazalwana bakaToshio abangamaKristu. Ngayiphi indlela? UToshio ucacisa ngelithi kunzima kakhulu ukufumana imvume yokusebenzisa iiholo zokuqhelisela umthambo ukwenzela iintlanganiso ezingezizo eziphathelele ezemidlalo. Kodwa kwisikhundla akuso ngoku, “uYehova uye wandisebenzisa, ukuze sikwazi ukusebenzisa ezo holo zokuqhelisela umthambo ukwenzela iindibano zesithili ezintathu neendibano zesiphaluka ezine”—xa sicaphula amazwi kaToshio ubuqu. Uqukumbela ngelithi: “Ukuba sihlala sithembekile, uYehova uya kusisebenzisa ngeendlela esingenakuzithelekelela.”

Ekhaya

15. UYesu wabashiya nawuphi umzekelo abo balandela emanyathelweni akhe ngokuphathelele umbandela ongolwalamano lwentsapho?

15 Enye inkalo athi amaKristu ‘alandele ngayo emanyathelweni kaYesu’ kusekhaya. IBhayibhile yandlala umzekelo kaYesu njengomfuziselo wokubakho komanyano ekhaya xa isithi: “Nilulamelana ngokoyika uThixo. Nina bafazi, walulameleni awenu amadoda, ngokokululamela iNkosi; ngokuba indoda le iyintloko yomfazi, njengokuba naye uKristu eyintloko yebandla eli . . . Ke, kwanjengokuba ibandla eli limlulamela uKristu, mabathi ngokunjalo nabafazi bawalulamele awabo amadoda ezintweni zonke. Nina madoda, bathandeni abafazi benu, njengokuba naye uKristu walithandayo ibandla, wazinikela ngenxa yalo.”—Efese 5:21-25.

16, 17. (a) Yiyiphi imeko embi ekhoyo kwiNgqobhoko ngokuphathelele ulwalamano lwekhaya? (b) Yiyiphi ekuphela kwendlela olunokuthi ulwalamano lwekhaya luphuculwe ngayo, njengoko kuboniswe kumava esibini esitshatileyo saseBrazil?

16 Ubukhulu becala iNgqobhoko namhlanje iyasityeshela esi siluleko yaye ngenxa yesi sizathu izaliswe ziintsapho eziqhekekileyo. Ukuqhekeka kwamakhaya kuyinto eqhelekileyo, yaye ukubakho kweengxwabangxwaba phakathi kwabazali nabantwana ngokufuthi kuya kuthabath’ unyawo. “Intsapho iyaqhekeka,” watsho njalo unjingalwazi wezengqondo kwiminyaka eliqela eyadlulayo. Izazi ngengqondo yabantwana, abaluleki kwimicimbi yomtshato noogqirha bezifo zengqondo banempumelelo elinganiselweyo ekugcineni iintsapho eziwohlokileyo zimanyene. Kodwa amaNgqina kaYehova azama ngamandla ukusebenzisa imigaqo yeBhayibhile ibe aphawulwa ngokuba nolwalamano lwentsapho olubalaseleyo.

17 Ngokomzekelo, uAldemar wayeyinjengele yamapolisa ezomkhosi eBrazil ibe wayeneengxaki zentsapho. Umfazi wakhe wamshiya waza wafuna imvume engokwasemthethweni yokwahlukana naye. UAldemar waqalisa ukuzinkcinkca ngotywala wada wazama nokuzibulala. Kamva, izalamane zakhe, ezingamaNgqina kaYehova, zathetha naye ngeBhayibhile. Wakuthanda oko wakuvayo waza waqalisa ukufundisisa. Efuna ukuvisisanisa ubomi bakhe nokuba nesimo sengqondo sokuba ngundilele nto leyo amaNgqina kaYehova aphawulwa ngayo, wafaka isicelo sokurhoxa emkhosini. UAldemar nomfazi wakhe bazicombulula iingxaki zabo zomtshato ngokuthi basebenzise imigaqo yeBhayibhile uAldemar awayeyifunda. Ngoku, balandela emanyathelweni kaYesu, bekhonza uYehova kunye njengoovulindlela abathe ngxi.

Ukuthobela Ngenxa Yothando

18. (a) Kutheni le nto amaNgqina kaYehova esikelelwa ngokomoya namhlanje? (b) Ngoku uIsaya 2:2-4 uzaliseka njani?

18 Licacile elokuba amaNgqina kaYehova ahamba ngokumanyeneyo emoyeni nasemanyathelweni kaKristu Yesu. Njengabantu ngabanye nanjengeqela, afumana intsikelelo engokomoya ngokwenjenjalo. (INdumiso 133:1-3) Ubungqina obucacileyo bendlela uThixo awasikelela ngayo buye bashukumisa inyambalala yabantu abantliziyo zinyanisekileyo ukuba benze ngokuvisisana nesiprofeto esikuIsaya 2:2-4. Kwiminyaka nje emihlanu edluleyo, bangama-987 828 abantu abaye bathabatha amanyathelo afanelekileyo okuzahlulela baza ke babonakalisa ngobhaptizo lwamanzi. Ngokunothando, uYehova akamiselanga miqathango ingqongqo ngokuphathelele inani labantu abanokwenza oku ngaphambi kokuba kuqhambuke “imbandezelo enkulu”!—ISityhilelo 7:9, 14.

19. (a) Ukukhonza uYehova kunokuphumela kwiziphi iingenelo zokwenene, yaye zifanele zigqalwe njani? (b) Siyintoni isizathu esisisiseko sokuba sithobele imithetho kaYehova?

19 Njengoko amava angasentla ebonisa, iintsikelelo ezingokomoya ezinanditshwa ngabantu bakaThixo ngokufuthi ziphelekwa ziingenelo zokwenene. Ngokomzekelo, ngokuyeka ukutshaya, ngokuphila ubomi bokuziphatha okuhle nangokuhlonela ubungcwele begazi, basenokusinda ekubeni ngamaxhoba ezifo ezithile. Okanye ngenxa yokuphila ngokuvisisana nenyaniso, basenokungenelwa kwezoqoqosho, kwezentlalo okanye kwezekhaya. Naziphi na iingenelo zokwenene ezinjalo zigqalwa njengentsikelelo evela kuYehova yaye zinikela ubungqina kwindlela eluncedo ngayo imithetho kaYehova. Kodwa into yokuba sisenokufumana iingenelo eziluncedo yona ngokunokwayo ayisosizathu sokuthobela imithetho kaThixo. AmaKristu okwenyaniso amthobela uYehova ngenxa yokuba emthanda, ngenxa yokuba ekufanelekele ukunqulwa ngawo nangenxa yokuba ukwenza ukuthanda kwakhe kuphela kwento elungileyo. (1 Yohane 5:2, 3; ISityhilelo 4:11) NguSathana ophikisa ngelokuba abantu bamkhonza uThixo kuphela ngenxa yeengenelo zokuzingca.—Bona uYobhi 1:9-11; 2:4, 5.

20. AmaNgqina kaYehova anamhlanje ahamba njani moyeni mnye namangqina amathathu angamaHebhere athembekileyo amaxesha amandulo?

20 AmaNgqina kaYehova anamhlanje ahamba moyeni mnye namangqina amathathu angamaHebhere aselula athembekileyo omhla kaDaniyeli. Xa atyityinjiselw’ umnwe ngelokuba ayeza kuphoswa ezikweni elivutha umlilo, athi: “Ukuba uThixo wethu esimbusayo unako, wosisindisa ezikweni elivutha umlilo, nasesandleni sakho, kumkani. Ke, ukuba akunjalo, [oko kukuthi, nokuba uyasivumela ukuba sife] makwazeke kuwe, kumkani, ukuba asiyi kubabusa oothixo bakho, asiyi kuqubuda kumfanekiso wegolide owumisileyo.” (Daniyeli 3:17, 18) Zingakhathaliseki iingenelo zokwenene okanye imiphumo ethi ibekho kwangoko, amaNgqina kaYehova aya kuqhubeka elandela ngokusondeleyo emanyathelweni kaYesu, esazi ukuba ubomi obungunaphakade kwihlabathi likaThixo elitsha buyinto eqinisekileyo! Njengabantu abamanyeneyo, aya kuqhubeka ehamba “moyeni mnye” ‘nasemanyathelweni afanayo,’ nokuba sekumnyam’ entla!

Ngaba Unokuchaza Ukuba:

◻ Kungani amaNgqina kaYehova emanyene?

◻ Kungaziphi iinkalo athi amaNgqina kaYehova ahluke ngazo kwabo bangamaKristu ngegama?

◻ Siyintoni isizathu esiyintloko sokuba amaKristu okwenyaniso akhonze uYehova?

◻ Abantu bakaThixo bazigqala njani iingenelo eziba ngumphumo wokuthobela uYehova?

[Umfanekiso okwiphepha 16]

Xa umntu ogulayo esala ukutofelwa igazi, kudla ngokucingwa ukuba ungomnye wamaNgqina kaYehova

[Umfanekiso okwiphepha 18]

Abaninzi abathi bangamaKristu abakhange bakuthiye ukuvusa imfazwe phakathi kwabo—esikelelwe ngabefundisi babo

    Iimpapasho ZesiXhosa (1986-2025)
    Log Out
    Log In
    • IsiXhosa
    • Share
    • Zikhethele
    • Copyright © 2025 Watch Tower Bible and Tract Society of Pennsylvania
    • Imiqathango
    • Umthetho Wezinto Eziyimfihlo
    • Privacy Settings
    • JW.ORG
    • Log In
    Share