Ukudumisa UYehova Ngengoma
1 Nceda uvule iculo lakho kwiphepha elisekugqibeleni. Yintoni oyibonayo? Iqela leemvumi ezingabaLevi zisetempileni engcwele kaYehova, imilomo yazo ivulekile, zivuma ngokunehlombe. Ukuvuma kwakuyinxalenye ebalulekileyo yonqulo lokwenyaniso kwitempile kaYehova. Ebudeni bexesha likaKumkani uDavide, abangaphezu kwe-10 ekhulwini babo babekhonza etempileni babenesabelo sokudumisa uYehova ngomculo. Yaye kwelo nani, abangama-288 babeziimvumi eziqeqeshiweyo, “bonke beziincutshe.” Unokuqiniseka ukuba babewuxabisile umculo.—1 Kron. 23:3, 5; 25:7, NW.
2 Xa sisiza kumaxesha obuKristu, siva ukuba uYesu nabapostile bakhe bavuma ingoma ekuqukumbeleni iSidlo seNkosi Sangokuhlwa. (Marko 14:26) Yaye ngokuphindaphindiweyo umpostile uPawulos usixelela ukuba sivumele uThixo wethu iindumiso. KwabaseKolose 3:16 wabhala: “Ilizwi likaKristu malihlale ngaphakathi kwenu ngokobutyebi; nifundisana, nilulekana ngabo bonke ubulumko; nithi, ngeendumiso neengoma nezango ezizezomoya, nivume kamnandi entliziyweni yenu kuyo iNkosi.”—Bona kwaneyabase-Efese 5:19, 20.
3 Ukuvuma iingoma zoBukumkani kuyenye yeendlela esimdumisa ngazo uYehova. KuBulungiseleli Bethu BoBukumkani bukaFebruwari 1990, sakhuthazwa ukuphucula umculo wethu. Iingxelo zibonisa ukuba amabandla aliqela aye alisebenzisa icebiso lokuqhelisela umculo emva kwesifundo seMboniselo. Oku kuye kwaphumela ekuphuculeni umculo kwezinye zeendibano zethu zesithili. Noko ke, uya kuvuma ukuba kusekho imfuneko yokuphucula koku. Yintoni engakumbi enokwenziwa ukuphucula umculo wethu?
4 Sincomela ukuba onke amabandla abe nethuba lokuqhelisa umculo emva kwesifundo seMboniselo. Abo banyanzelekileyo ukuba bahambe banokukhululwa baze abanye bavume ingoma enye nokuba zimbini. Umdala okanye isicaka solungiselelo esifanelekileyo sifanele songamele kweli xesha lokuqhelisela umculo. Ukuba olu qheliselo luqaliswa zisuka nje emva kwesifundo seMboniselo, oku kuya kuthabatha nje kuphela imizuzu embalwa yexesha lethu veki nganye. Eli lungiselelo linokuqhutywa de bonke babe baqhelene neengoma.
5 Amabandla acula ngaphandle kokusebenzisa naziphi na izixhobo zomculo ayakhuthazwa ukuba asebenzise amacwecwe okanye iikhasethi zoMbutho. Oku kuya kwenza ukuba sonke siqhelane nesingqi esifanelekileyo nendlela yokuvuma iingoma zethu. Ukuba ukufumanisa kunzima ukuvuma neekhasethi okanye amacwecwe omculo, qhubeka uqhelisela de ukwazi. Ngale ndlela sonke siya kukwazi ukuvuma ngokuyondeleleneyo nabazalwana bethu bomhlaba wonke. Abadala bayakhuthazwa ukuba balixhase ngokupheleleyo eli lungiselelo.
6 Ukuba sivuma ngokuzimisela sidumisa uYehova. Uyaphulaphula xa simvumela kanye njengokuba esenjenjalo ngemithandazo yethu. Xa sivuma ngokuvakalayo, oku kunokubavuyisa nabanye, yaye nathi siyangenelwa.
7 Khawunikel’ ingqalelo kumazwi amyoli eengoma zethu. Enyanisweni oku kuluncedo ‘ekufundisaneni nasekululekaneni.’ Esinjani sona ukuba sihle isiluleko esiqulethwe ziingoma zethu! Ngokusithabatha nzulu eso siluleko, sinokuncedwa ukuze sihlakulele isiqhamo somoya size sizilinde nxamnye nokuqutyulwa ziimpembelelo zenyama nezehlabathi. ‘Ukuvuma entliziyweni’ kusikhuthaza ukuba simkhonze uYehova ngokungafihlisi nangokunovuyo.
8 Ukuze siqalise ngomculo omhle ezintlanganisweni, usihlalo unokwazisa kungekuphela nje inombolo yengoma kodwa kwanomxholo wayo. Usenokuthi ngamaxesha athile anikele neSibhalo esekelwe kuso aze athi gqaba-gqaba ngendlela ehambelana ngayo nombandela onikelwayo.
9 Ngokuphindaphindiweyo iZibhalo zisikhumbuza ngemfanelo yethu yokudumisa uBawo wethu wasezulwini onothando ngengoma. Masenjenjalo ngomphefumlo uphela. Ngaloo ndlela sinokunikela ubungqina obufudumez’ intliziyo kubantu basemzini abaphakathi kwethu. Ewe, masimvumele size simculele uYehova, kanye njengokuba uDavide wakudala wenjenjalo.—INdu. 108:1-3.