Ngaba Uya Kubunikela Ubungqina Obungacwangciswanga?
1 Phakathi kwezinto esiqhele ukuzenza kubomi bethu kukuthetha nabantu ngoYehova ngamathuba acwangcisiweyo. Sibekela bucala ixesha lokunikela ubungqina obucwangcisiweyo kwindlu ngendlu, ukwenza amabuyelo nokuqhuba izifundo zeBhayibhile. Noko ke, kukho ezinye izihlandlo ezingacwangciswanga kangako esinokuzisebenzisela ukuxelela abantu ngenyaniso. Olu hlobo lokushumayela sithi kukunikela ubungqina obungacwangciswanga.
2 Bambi abavakalisi bafumana amathuba amaninzi okubandakanyeka kolu hlobo lobulungiseleli. Cinga ngeendlela zokunikela ubungqina kwiindwendwe, izalamane, abo siphangela nabo, esifunda nabo, abantu esidibana nabo kwiindawo esithenga kuzo nakwabo sidibana nabo endleleni xa sikwinkonzo yasentsimini. Ngaba uya kuwasebenzisa kakuhle la mathuba ukuze unikele ubungqina obungacwangciswanga?
3 Ceba Kusengaphambili: Ukulungiselela nokucinga kusengaphambili kuya kusinceda sikwazi ukunikela ubungqina ngendlela ephumelelayo. Ngokuphathelele oku, sixhotyiswe kakuhle ngeempapasho ezahlukahlukeneyo zokusinceda ekwenzeni oku. Ukongezelela kwiMboniselo noVukani!, sinamaphecana aliqela abalaselisa imixholo exhokonx’ iingcinga yokuvuselela umdla. Kukho iincwadana ezinemifanekiso nezinomtsalane kubantu abaneemvelaphi neenkonzo ezahlukahlukeneyo. Sikwaneencwadi ezilingene ipokotho ezixubusha ngemibandela abanomdla kuyo ngoku abantu. Ziziphi iimpapasho okufumanisa kulula ukuzisebenzisa? Cingani ngezi zinto njengentsapho. Nandule ke nenze uqheliselo loko niya kukuthetha xa kuvela ithuba elifanelekileyo lokwenjenjalo.
4 Ngoxa Ukwikhefu: Elona xesha lihle lokunikela ubungqina obungacwangciswanga kuxa ukwikhefu. Ngaba uceba ukuhamba ngenqwelo-moya, ngololiwe okanye ngoduladula? Ngoko phatha iBhayibhile nenye yeempapasho ezikhankanywe ngasentla. Ukufunda iimpapasho ezinjalo ngoxa ukwisithuthi sikawonke wonke kudla ngokuvula amathuba encoko. Ukuba uhamba ngenqwelo-mafutha, cinga ngoko unokukuthetha xa umise kwindawo yokugalela ipetroli okanye kwivenkile yokutyela okanye ngoxa uhlala ehotele. Ngezihlandlo ezinjalo, unokuhlala uphethe isixa esincinane samaphecana ukuze uwanike abantu abanomdla. Ukuba uhleli kunxweme okanye ipaki entle, usenokuqalisa ukunikel’ ubungqina emntwini ngokumbuza: “Ngaba bekungayi kuba kuhle ukuba wonke umhlaba ubunje?”
5 Kwizalamane: Ngokuqhelekileyo izalamane zethu ezingakholwayo ziyasazi ukuba singamaNgqina kaYehova. Zisenokufun’ ukwazi ngoko sikukholelwayo okanye ngezinto esizenzayo kodwa zibe mathidala ukubuza kuba zingafuni ‘kushunyayezwa’ okanye ukungena kwingxubusho ende. Kutheni ungathethi okuthile ngenyaniso uze ke unike isalamane ithuba lokuqhubeka nengxubusho ukuba siyathanda? Okanye usenokusuka nje ukhankanye indawo ebinendibano yokugqibela obuye kuyo uze usibonise enye yeencwadi ezintsha ezikhutshiweyo. Izalamane zidla ngokubaphulaphula abantwana.
6 Ngamaxesha onke sifanele siwaphaphele amathuba okunikela ubungqina obungacwangciswanga. Noko ke, ungakulibali ukubaluleka kokubonakalisa ubuhlobo nomdla wokwenene komnye umntu. (IMize. 15:23; 1 Pet. 3:15) Le ndlela yokushumayela ixakatha isiqhamo yaye abakhonzi bakaYehova bafanele bayisebenzise. NjengoYesu, ngamana uthando lwethu ngabanye abantu lungasishukumisela ukuba sithethe ngazo zonke izihlandlo ezifanelekileyo!—Mat. 5:14-16.