Lutsha—Nyathelani Ngobuchule
1 UBawo wethu, uYehova, unomdla kwinkqubela yokomoya yabantu abaselula. Ngokuyiphulaphula ngobulumko imiyalelo yakhe yothando, ulutsha alupheleli nje ekuvuyiseni intliziyo yakhe kodwa kwakhona luyifumanela ukuphumla imiphefumlo yalo. (IMize. 27:11; Mat. 11:28-30) Luvumela uYehova alunyathelise ngobuchule.—IMize. 16:9.
2 UKristu Yesu xa wayesemtsha wamisela umzekelo ngokuzuza inkoliseko kaThixo neyabantu. (Luka 2:52) Namhlanje ulutsha lufanele luzabalazele ukwenjenjalo. Ukunyathela ngobuchule komntu oselula kufanele kubonakale kusukelo lwakhe lwezinto zokomoya. Xa wayeneminyaka eli-12 ubudala, uYesu wayesaziwa ngomnqweno wakhe wokuthetha nabanye ngoYehova. (Luka 2:46, 47) Abantu abaselula namhlanje babonise umnqweno ofanayo wokuchaza ukholo lwabo kwabanye.—wXO90 7/1 iphe. 29-30; wXO87 12/1 iphe. 21.
3 Nina baselula yintoni eninokuyenza ngoku ngokukodwa ebudeni bezi nyanga zizayo, kuquka ixesha lenu lekhefu lesikolo, ‘ekuzukiseni uYehova ngobuncwane benu’? (IMize. 3:9) Kutheni ningalandisi nje ixesha enilichitha ngokuqhelekileyo kumsebenzi wokushumayela nasekufundiseni ngeendaba ezilungileyo, mhlawumbi nide nibe ngoovulindlela abangabancedani? Nisenokumangaliswa luvuyo olongezelelekileyo nazezinye iingenelo ezifumaneka ngokuzenzekelayo kwisabelo esongezelelekileyo kubulungiseleli. Kwakhona oku kuya kuninika ithuba lokusebenza nabavakalisi abaninzi abahlukahlukeneyo kwinkonzo yasentsimini. Usenokukwazi ukuqalisa ngoku ngokumema umvakalisi onamava okanye ababini basebenze nawe kule mpela-veki.
4 Abazali banokunikela ukhuthazo noncedo olukhulu kubantwana babo ngokusebenzisa amathuba okuqhelisela ukongezelela kulawo okuhamba nabo kubulungiseleli. Abanye abaqolileyo ebandleni banokubacela kuqala abaselula ukuba bahambe nabo kubulungiseleli bendlu ngendlu nakumsebenzi wamabuyelo nowezifundo zeBhayibhile. Ukunxulumana nabavakalisi abomelele ngolo hlobo ngokomoya kuya kubakha abaselula kuze kubancede ‘baqhubele kwelokukhula.’—Heb. 6:1.
5 UmKristu ngamnye kufuneka aphucule ubuchule bakhe bokufundisa. Nakwabaselula oku kuyafuneka. Nina baselula ngaba nizilungiselela kakuhle izabelo enisenokuba nelungelo lokuzifumana kwiSikolo Sobulungiseleli Sobuthixo? Ngaba ninocwangciso oluthe rhoqo lokufunda nelofundisiso lobuqu kunye nelokucamngca? Ngaba niyawusebenzisa kuni loo mbandela niwuqwalaselayo? Ngaba nizilungiselela kakuhle iintlanganiso ukuze niwuqonde ngokupheleleyo umbandela nize nikulungele ukugqabaza? Ngaba niyaziphawula iingongoma eziluncedo ezithethiweyo ebudeni beentlanganiso nize nizame ukusebenzisa amacebiso andlalwe kuBulungiseleli Bethu BoBukumkani?
6 Musani ukuwayeka amathuba okuba nesabelo ekucoceni iHolo yoBukumkani nasekuncedeni abazalwana noodade abalupheleyo okanye abagulayo kwimisetyenzana okanye ngezinye iindlela eziluncedo. Musani ukukutyeshela ukwenza iminikelo yobuqu ethe rhoqo ukunceda ekunyanyekelweni kweendleko zeHolo yoBukumkani nezomsebenzi woMbutho wehlabathi lonke.
7 Ukuba ‘siqhubeka sizigcina ngokwelizwi likaYehova’ size simvumele alathise amanyathelo ethu, uya kusikhokelela kulonwabo nakumalungelo enkonzo awongezelelekileyo.—INdu. 119:9.