Zinikele Ngomphefumlo Uphela Kwinkonzo Yakho
1 Njengabafundi bakaYesu, sinesabelo sokushumayela iindaba ezilungileyo zoBukumkani bukaThixo nokwenza abafundi bakaYesu Kristu. (Mat. 24:14; 28:19, 20) Awukho omnye umsebenzi kulo mhlaba ongxamiseke nobaluleke njengalo. Kubandakanyeke ubomi bezigidi zabantu. Kufuneka sizibhokoxe kangangoko kuwo. Isiluleko sikaPawulos sisebenza kakuhle: “Konke enisukuba nikwenza, kusebenzeni ngokwasemphefumlweni [“ngomphefumlo uphela,” NW ].” (Kol. 3:23) Igama elithi “ngomphefumlo uphela” lichazwa ngokuthi “kukuzinikela ngenzondelelo nangehlombe okanye ngengqondo iphela.” Ngaba uzinikele ngomphefumlo uphela kwinkonzo yakho?
2 Yintoni efunekayo kuthi ukuze sibe sizinikele ngomphefumlo uphela? UYehova wabhekisela kwinkonzo eyamkelekileyo njengesishumi. (Mal. 3:10) Kunokumela isimbuku esithile, isishumi simela ixesha nomgudu esiwunikela enkonzweni kaYehova njengembonakaliso yothando lwethu ngaye yaye sivuma ukuba sizahlulele kuye. (wXO92 12/1 iphe. 15) Umsebenzi wethu ufanele ubonise ubunzulu bokuzahlulela nothando lwethu ngoYehova. Umntu ozinikele ngomphefumlo uphela uziva enyanzelekile ukukhonza uYehova ngokuzele kangangoko kunokwenzeka ukusa kumkhamo impilo neemeko zakhe ezimvumela ngawo.
3 UPawulos wathetha ngoxabiso ngamaKristu ‘asebenza nzima nabulalekayo’ ngenxa yethemba. (1 Tim. 4:10, NW ) Afumana umvuzo wentsikelelo kaYehova, ‘ewatyebisayo.’ (IMize. 10:22) Ngokwahlukileyo koko, abo banikela ngokuvimba okanye kabuhlungu abalufumani uyolo olufumaneka ngokupha. (IZe. 20:35) Ukukutyeshela ukunikela ngokona kulungileyo esinako kukumqhatha uYehova “kwizishumi” amele azifumane.—Mal. 3:8.
4 Ukunikela Ngokona Kulungileyo Esinako: Xa sisiba nesabelo kwinkonzo yasentsimini size sifake ingxelo yethu, ngaba loo ngxelo ichanile? Incwadi Ubulungiseleli Bethu, kwiphepha 104, ithi: “Ixesha lakho lenkonzo yasentsimini limele liqalise xa uqalisa umsebenzi wakho wokunikela ubungqina lize liphele xa ugqibezela utyelelo lwakho lokugqibela kwisihlandlo ngasinye unikela ubungqina. Ixesha elisetyenziselwa ukuphumla okanye izidlo ebudeni benkonzo yasentsimini alimele libalwe.” Kufuneka ukuceba kakuhle nomgudu ukuze sifeze lukhulu ebudeni bexesha esilichithela enkonzweni yasentsimini.
5 Ukunikela ngokona kulungileyo esinako kuthetha ukwenza okuninzi kangangoko sinako xa sinesabelo enkonzweni. Lowo uzinikele ngomphefumlo uphela akayi kuthi ngabom ukushumayela kwakhe akuphelelisele kubungqina obungacwangciswanga ngamaxesha athile kunokuba nesabelo kumsebenzi wendlu ngendlu. Umvakalisi oselula ongekabhaptizwa ozinikele ngomphefumlo uphela, akayi kuphuma aye kushumayela kuphela xa abazali bakhe besithi makenjenjalo, ebonakalisa umdla omncinane wokuya ezindlwini zabantu okanye ekubeni nesabelo ekushumayeleni.
6 UPawulos uyasibongoza ukuba sihlale sikhuthele ukuze singanqeni. (Heb. 6:11, 12) Olunjani lona uvuyo okululo ukukwazi ukuhlola inkonzo yethu yobuqu size singabi nasizathu sakuba nazintloni—kuba besizinikela ngomphefumlo uphela! (2 Tim. 2:15) Siya kuvuya kakhulu xa sibona phakathi kwabo baya kusinda kwimbandezelo enkulu abo bantu siye sabanceda ngokobuqu. Ngokuqinisekileyo, uYehova uya kubavuza ngokutyebileyo abo bamkhonza ngomphefumlo uphela.