Umzekelo Esimele Siwulandele Ngokusondeleyo
1 Ngokungathandabuzekiyo uYesu wayengoyena mntu ubalaseleyo wakha waphila. Wamisela umzekelo ogqibeleleyo kubafundi bakhe. Nangona singenakuyifikelela imilinganiselo yakhe efezekileyo, sibongozwa ukuba ‘silandele emkhondweni wakhe.’ (1 Pet. 2:21) Sifanele sinqwenele ukuba njengoYesu kangangoko sinako, ngenzondelelo sabelane nabanye ngenyaniso.
2 UYesu wayengengomshumayeli nje kuphela; wayengumfundisi obalaseleyo. “Zakhwankqiswa iindimbane kukufundisa kwakhe.” (Mat. 7:28) Kutheni wayephumelela kangaka nje? Makhe siqwalasele ngokusondeleyo “ukufundisa kwakhe.”
3 Indlela Esinokumlandela Ngayo UYesu: UYesu wayefundiswe nguYise. (Yoh. 8:28) Intshukumisa yakhe yayikukubeka uYehova nokuzukisa igama Lakhe. (Yoh. 17:4, 26) Ekushumayeleni nasekufundiseni kwethu, neyethu intshukumisa ifanele ibe kukubeka uYehova kungekhona ukutsalela ingqalelo kwiziqu zethu.
4 Yonke into uYesu awayeyifundisa yayisekelwe eLizwini likaThixo. Ngokuqhubekayo wayebhekisela koko kubhalwe kwiZibhalo eziphefumlelweyo. (Mat. 4:4, 7; 19:4; 22:31) Kufuneka salathisele abaphulaphuli bethu eBhayibhileni; ngaloo ndlela sibenza babone ukuba esikushumayelayo nesikufundisayo kusekelwe kwelona gunya liphakamileyo.
5 UYesu wasebenzisa amazwi amafutshane, asebenzisekayo, nangantsonkothanga. Ngokomzekelo, xa wayecacisa indlela esinokuxolelwa ngayo nguThixo, wasikhuthaza ukuba nathi sibaxolele abanye. (Mat. 6:14, 15) Sifanele sizame ukucacisa isigidimi soBukumkani ngamazwi alula nangqalileyo.
6 Ngobuchule uYesu wasebenzisa imizekeliso nemibuzo ukukhuthaza abanye bacinge. (Mat. 13:34, 35; 22:20-22) Imizekeliso engezinto eziqhelekileyo nezemihla ngemihla inokunceda abantu baqonde iimfundiso zeBhayibhile ezintsonkothileyo. Sifanele sibuze imibuzo ekhuthaza abaphulaphuli bethu ukuba bacinge ngoko bakuvayo. Imibuzo ekhokelayo inokubanceda benze izigqibo ezifanelekileyo.
7 UYesu wachitha ixesha ecacisa imibandela enzima kwabo babefuna ukwazi okungakumbi. Abo babenomdla ngokwenene, njengabafundi bakhe, babekwazi ukuqonda oko uYesu wayekufundisa. (Mat. 13:36) Nathi ngokufanayo sifanele sibe luncedo xa kubuzwa imibuzo ngokunyanisekileyo. Ukuba asizazi iimpendulo, sinokuwuphanda loo mbandela size sibuyele nenkcazelo kwixa elizayo.
8 UYesu wayefundisa nangezenzo zokoqobo. Umzekelo woku kuxa wahlamba iinyawo zabafundi bakhe, nangona wayeyiNkosi yabo. (Yoh. 13:2-16) Ukuba sibonisa umoya wokuthobeka, abo sibafundisayo baya kushukunyiselwa ukuba basebenzise oko bakufundayo.
9 UYesu wayezichukumisa iintliziyo zabantu nothando lwabo ngobulungisa. Nathi kufuneka sifikelele iintliziyo. Sizama ukuchukumisa umnqweno abantu bonke abazalwa benawo wokunqula umntu ophakamileyo nokuhlala nabanye ngoxolo nangolonwabo.
10 Ebudeni bukaDisemba sinokwabelana nabanye ngezinto esizifunde ngoYesu ngokunikela incwadi ethi Oyena Mntu Ubalaseleyo Wakha Waphila. Ukuxelisa kwethu iimpawu zokufundisa zikaYesu kusenokushukumisa abantliziyo zinyanisekileyo baphulaphule njengokuba sibachazela awakufundisayo.—Mat. 10:40.