Nikelani Ingqalelo Kwilizwi Lesiprofeto
1 “Sinelizwi lesiprofeto elenziwa laqiniseka ngakumbi.” (2 Pet. 1:19, NW) Kwakutheni ukuze uPetros athethe oku? Iziprofeto zoBukumkani ezikwiZibhalo zesiHebhere nezo zazivela kuYesu Kristu zaziqinisekiswe, okanye ‘zenziwa zaqiniseka ngakumbi,’ koko kwabonwa kwaza kwaviwa nguPetros nabanye abafundi ababini kumbono wokwenziwa kumila kumbi kwiminyaka engama-32 ngaphambilana. Lo mbono uphawulekayo wabaqinisekisa ukuba uYesu Kristu wayeya kubuya ngokwenene esemandleni oBukumkani ekuzuko olunobuqaqawuli yaye exhaswa ngokupheleleyo nguYise. AmaKristu ngenkulungwane yokuqala ‘ayesenza kakuhle ukunikela ingqalelo kwilizwi lesiprofeto elinjengesibane esikhanyisa endaweni emnyama,’ kuba ukuba ayengenjinjalo iintliziyo zawo zaziya kuba mnyama. Ukunikela ingqalelo kwilizwi lesiprofeto elikhanyisayo kwakuya kuwagcina ephaphile yaye ekhanyiselwe kude kube ngesifingo sokusa, xa “ikhwezi,” uKristu, laliya kuvela likuzuko loBukumkani.—2 Pet. 1:16-19; Mat. 17:1-9.
2 Sasingekho kunye noPetros ukuze sibone oku kwenziwa kumila kumbi kuzukileyo. Ukanti, amaKristu kwesi sizukulwana athe anikela ingqalelo kwilizwi lesiprofeto aye ajizekwa ngelungelo eliphakamileyo lokubona, kungekhona ukubona kusengaphambili uBukumkani bukaKristu, kodwa ubungqina obeyisayo bokuba lo Kumkani uzukileyo uyalawula ngokwenene! Nyaka ngamnye odlulayo ukususela ngowe-1914, eli lizwi lesiprofeto lenziwa liqiniseke ngakumbi njengokuba sibona ukuzaliseka kweenkalo ezahlukeneyo ‘zomqondiso’ ophawulekayo uYesu awawunikelayo ‘ongobukho’ bakhe basebukhosini. Inxalenye ebalulekileyo yalo mqondiso yeyokuba kwaziswe zonke iintlanga ngorhulumente wakhe, okanye uBukumkani ngaphambi kokuba lo Kumkani aphelise le nkqubo yezinto. Phantsi kolwalathiso lukaKristu, umsebenzi wokushumayela uBukumkani ngoku wenziwa kumazwe angama-231 ngomlinganiselo ongazange ucingwe ngaphambili. (Mat. 24:3-14) Ngaphezu koko, njengokuba ixesha ‘lembandezelo enkulu’ lisondela, uKumkani osetroneni ubehlanganisa “isihlwele esikhulu” ‘esiphuma kuzo zonke iintlanga’ esinokholo “egazini leMvana” lentlawulelo.—ISityhi. 7:9, 10, 14.
3 Ekubeni “ikhwezi” sele liphumile, oko kukuthi, uKristu sele esemandleni oBukumkani, ngaba sisekho isizathu sokunikela ingqalelo kwilizwi lesiprofeto? Ewe! UYesu Kristu ozukisiweyo wanika umpostile uYohane ungcelele lwemibono ebumba incwadi yeSityhilelo. Nangona le yayilukhuthazo yaye iyimfundiso kumaKristu okuqala, ibaluleke ngokukhethekileyo kwabo baphila “ngemini eyeyeNkosi,” esikuyo ngoku. (ISityhi. 1:10) Kungenxa yoko amabandla abantu bakaYehova ngoku esenza ufundisiso olubhekele phaya lwencwadi ethi Incopho YeSityhilelo.
4 “Unoyolo lowo uwalesayo, kwanabo bawevayo amazwi aso isiprofeto esi, bazigcine izinto ezibhaliweyo kuso; kuba ixesha likufuphi.” (ISityhi. 1:3) Ukuze sonwabe, simele siyiqonde, ewe, siyilandele ngokwenene le mibono yesiprofeto. Yintoni efunekayo koku? Kufuneka ukuyiphindaphinda ukuze similisele ezintliziyweni zethu imbaluleka yengxelo yeSityhilelo. Umpostile uPetros, ilungu lequmrhu elilawulayo lenkulungwane yokuqala, wakuqonda ukubaluleka kokuphindaphindwa kweenyaniso ezisisiseko ukuze ‘avuse’ abazalwana bakhe ngokomoya. (2 Pet. 1:12, 13) ‘Umkhonzi othembekileyo noqondayo’ wanamhlanje ngokufanayo usinceda sihlale sinoxabiso ngokutsalela ingqalelo yethu ngokuphindaphindiweyo kwilizwi lesiprofeto.—Mat. 24:45-47.
5 Indlela Yokunikela Ingqalelo: Luhlobo luni lwengqalelo efunwa lilizwi lesiprofeto elikwiSityhilelo? Umpostile uPawulos usikhumbuza ukuba uThixo akathethanga namaKristu ngezithunywa zezulu okanye abaprofeti njengokuba wayenxibelelana nabakhonzi bakhe bexesha langaphambi kobuKristu. Kunoko, uYehova uye wanxibelelana nathi ngoNyana wakhe amthanda kunene, awammisa “wayindlalifa yeento zonke.” (Heb. 1:1, 2) “Ngenxa yoko, simelwe kukuzinyamekela [“kukunikela ingqalelo,” NW] ngokugqithiseleyo izinto esazivayo, hleze sikhukuliswe simke kuzo.” (Heb. 2:1) Ewe, simele sinikele ingqalelo kwiLizwi likaThixo yaye ngokukodwa kwilizwi lesiprofeto eliza ngoYesu Kristu. Sinokuyinikela njani ingqalelo ekhethekileyo kufundisiso lwethu lweSityhilelo?
6 Okokuqala, kubaluleke gqitha ukubakho veki nganye kwiSifundo Sencwadi Sebandla. Liyinyaniso elokuba kuninzi lwethu, esi iya kuba sisihlandlo sesithathu sifundisisa incwadi ethi Incopho YeSityhilelo. Ngaloo ndlela, abanye basenokukuthabatha lula ukubakho esifundweni sencwadi, bevakalelwa kukuba enoba bayaphoswa yile ntlanganiso, sebewazi kakuhle umbandela wayo. Noko ke, ekupheleni konyaka ngamnye, le nkcazelo yesiprofeto iba yesebenza nesexesheni ngakumbi kunokuba yayinjalo ngowe-1989 xa sasiqala ukufunda incwadi ethi Incopho YeSityhilelo. Sonke kufuneka sizazi iziganeko zanamhlanje eziye zathabath’ unyawo ezizalisekisa iziprofeto zeSityhilelo. Ngoko sinokulungela ukwenza ngokuvisisana nokuthanda kukaYehova. Kwenze usukelo lwakho lobuqu ukuba ungaphoswa nasesinye isifundo sencwadi, ukuba unako, ebudeni boku kuqwalaselwa kubalulekileyo kweSityhilelo.
7 Okwesibini, silungiselele kakuhle isifundo. Hlola izibhalo ezibonisiweyo uze uqwalasele indlela eziyixhasa ngayo ingcaciso yeendinyana zeSityhilelo ezifundisiswayo. Ngale ndlela uya kufumana okungakumbi kuneempendulo nje zemibuzo. Zabalazela ukuba ungazuzi nje ulwazi kodwa ubulumko nokuqonda. (IMize. 4:7) Okwesithathu, yiba nenxaxheba ngenkuthalo ngokugqabaza nokufunda izibhalo. Zenzele usukelo lokuphendula ubuncinane kube kanye yaye ukuba kunokwenzeka kaliqela kwisifundo ngasinye. Ukwenjenjalo kuya kukunceda ugcine ingqondo yakho itsoliswe kwisifundo.
8 Ukunikela ingqalelo ngokugqithiseleyo kwilizwi lesiprofeto kuquka okungakumbi kunokulungiselela, ukubakho nokuba nenxaxheba. Kukwathetha ukuba nasemva kwesifundo, siqhubeka ‘sizinyamekela ezo zinto, sihlale kuzo.’ (1 Tim. 4:15) Ukuba ilizwi lesiprofeto liza kuba njengesibane esikhanyisa ezintliziyweni zethu, simele silivumele lichaphazele ngokunzulu umntu wethu wangaphakathi—iingcinga, iminqweno, iimvakalelo, iintshukumisa nosukelo lwethu. (2 Pet. 1:19) Ngaloo ndlela, sifanele sizibuze imibuzo enjengale: Le nkcazelo ithetha ntoni kum ngokobuqu? Ndifunde ntoni ngoYehova noNyana wakhe, uYesu Kristu? Yiyiphi imigaqo enikelwayo kulo mbandela? Ngaba ndisiqonda ngentliziyo yam esi sifundo? Ndingazisebenzisa njani ezi nyaniso kubomi bam? Kwintsapho yam? Ebandleni? Ngokusebenzisa esikufundayo, ngokufanayo nomdumisi, sinokuthi: “Lisisibane seenyawo zam ilizwi lakho, likukukhanya emendweni wam.”—INdu. 119:105; Yobhi 29:3, 4.
9 Hlala Uphaphile Ebudeni Bala Maxesha Anomngcipheko: Ngonyaka wama-33 C.E., uYesu walumkisa abafundi bakhe ngentshabalalo yeYerusalem eyayisiza nemeko eyayiya kuba ngumqondiso wexesha lokuba basabele kwindawo ekhuselekileyo. (Luka 19:41-44; 21:7-21) Ngoko, kwadlula iminyaka engaphezu kwama-30. Kusenokuba kwamanye amaKristu angamaYuda kwabonakala ngathi izinto zaziza kuguquka kancinane kwikamva elalingekude. Hayi indlela esasisexesheni ngayo eso sibongozo sompostile oyintanda uPetros kwincwadi yakhe yesibini, eyabhalwa malunga nowama-64 C.E., sokuba ‘anikele ingqalelo kwilizwi lesiprofeto’! (2 Pet. 1:19, NW) Ngokufutshane emva koko, ngowama-66 C.E., iYerusalem yangqongwa yimikhosi yamaRoma. Xa imikhosi yamaRoma ngesiquphe yarhoxayo ngaphandle kwesizathu esicacileyo, amaKristu akwelakwaYuda awayephaphile alandela imiyalelo kaYesu aza asaba. Kwandula ke, ngowama-70 C.E., imikhosi yamaRoma yabuya yaza yayitshabalalisa iYerusalem. Hayi indlela amele ukuba avuya ngayo loo maKristu kuba anikela ingqalelo ngokusondeleyo kwilizwi lesiprofeto likaYesu!
10 Thina maKristu anamhlanje yintoni esiyiphapheleyo? Kwimibono yeSityhilelo, uYesu walumkisa amaKristu aphilayo ngoku ngeziganeko ezininzi ezaziya kubakho ebudeni bemini yeNkosi. Ebudeni beminyaka engama-80 edluleyo, uninzi lwezi ziganeko sele lwenzekile: ukuzalwa koBukumkani; imfazwe ezulwini eyalandelwa kukoyiswa kukaSathana needemon zakhe, kwaza kwalandela ukusikelwa kwabo umda kummandla wasemhlabeni; ukuwa kweBhabhiloni Enkulu; nokubonakala kwerhamncwa elimfusa, igunya lehlabathi lesibhozo. Ukuzaliseka kwezi nkalo zelizwi lesiprofeto leSityhilelo kuqinisekisa ngakumbi ukuba kungekudala siya kuzibona iziganeko eziseleyo eziphawulekayo ezizezi: ukutywinwa kwamalungu okugqibela e-144 000, ukuhlanganiswa okupheleleyo kwesihlwele esikhulu, ukutshatyalaliswa kweBhabhiloni Enkulu, imfazwe yeArmagedon, ukufakwa enzonzobileni kukaSathana noLawulo Lwewaka Leminyaka lukaKristu. Hayi indlela ekubaluleke ngayo ukuba sinikele ingqalelo kwisilumkiso sikaYesu esithi: “Yabona, ndiza njengesela. Unoyolo lowo uphaphileyo, uzigcinayo iingubo zakhe, ukuze angahambi ze, balibone ihlazo lakhe”!—ISityhi. 16:15.
11 Ngaba sihlala siphaphile? Silithabatha nzulu kangakanani ilizwi lesiprofeto? Enoba sazahlulela kuYehova kangangeminyaka emi-5 edluleyo okanye engama-50 eyadlulayo, amazwi kaPawulos kumaKristu aseRoma asebenza ngokufanelekileyo kuthi: “Silazi nje ixesha eli, ukuba lilixa lokuba ngoku sivuke ebuthongweni; kuba ngoku usindiso lukufuphi kuthi, kunokuya saqalayo ukukholwa. Ubusuku buhambile, ukusa ke kusondele.” Wandula ke uPawulos abongoze amaKristu ukuba ‘ayilahle ngoko imisebenzi yobumnyama,’ aze ‘ahambe ngokubekekileyo.’ (Roma 13:11-13) Siphila kwihlabathi elikwintsunguzi yobumnyama ngokokuziphatha. Okwakujongwa njengehambo eyothusayo kwiminyaka engama-30 okanye engama-40 eyadlulayo sele kuqhelekile kubantu abaninzi behlabathi kweli shumi leminyaka lokugqibela lenkulungwane yama-20. Bazalwana, lumkani, ningaze nizivumele nikhukuliselwe kubumnyama behlabathi nize nozele ngokokuziphatha. Ukuba nizivumela niyekelele okanye nikunyamezele ukucinga nendlela yobomi yeli hlabathi egqwethekileyo, aniyi kuziqonda izinto eziza kusehlela namhlanje neziya kuzinziswa kungekudala ngonaphakade: ukuthethelelwa kolongamo lukaYehova nokungcwaliswa kwegama lakhe. Ukozela ngokomoya kuya kulubeka engozini usindiso lukabani, ngoku olusemnyango.
12 Khulisani Entliziyweni Uxabiso Ngelizwi Lesiprofeto: Abaprofeti bamandulo abangamaHebhere babenomdla kakhulu ekuzalisekeni kwamazwi abo aphefumlelwe ngomoya angoMesiya. “Babuzisa, baphengulula kunene” indlela ephunyezwa ngayo injongo kaThixo. (1 Pet. 1:10, 11) Ngokufanayo, njengokuba unikela ingqalelo kwilizwi lesiprofeto elikwincwadi yeSityhilelo, uxabiso lwakho ngezinto zokomoya luya kukhula. Umdla wakho ngezinto zokomoya uya kwanda, ngaloo ndlela ushukunyiselwe ukumba ‘iinzulu zikaThixo.’ (1 Kor. 2:10) Njengokuba uzalisa intliziyo yakho ngoxabiso nothando ngelizwi lesiprofeto, akuyi kufuneka nabani na akukhuthaze ukuba ubekho kwiintlanganiso; uya kushukunyiselwa ukubakho uze ube nenxaxheba rhoqo. (Luka 6:45) Yaye ukuba eli ‘lizwi lisentliziyweni yakho,’ uya kushukunyiselwa ‘ukwenza uvumo lwasekuhleni ngalo ukuze usindiswe.’—Roma 10:8-10.
13 Okukhona sisiya singena ngokunzulu kwixesha lesiphelo, kokukhona abagxeki beya kusinyemba ngokuzingisa kukholo lwethu kumazwi kaThixo esiprofeto. (2 Pet. 3:3, 4) Ukanti, siya kuliphaphela ilizwi lesiprofeto. Isibane seLizwi likaThixo sisibonisa apho simi khona kumsinga wexesha. Sisikhanyisa ngokuqaqambileyo isibakala sokuba sikwimihla yokugqibela yeli hlabathi lobumnyama. Ikhwezi liphumile! UKristu usemandleni oBukumkani! Elundini phayaa sele sisibona isifingo sokusa. Ngamana ihlabathi elitsha likaThixo elithenjisiweyo lingaqhubeka liyinto yokwenene kuthi njengokuba uBukumkani babunjalo kubapostile abathathu ababenelungelo lokubona kwangaphambili umbono omangalisayo wokwenziwa kumila kumbi kukaYesu!