Ukwenziwa Lula KweNdibano YeSithili Yowe-1995
1 Hayi indlela ekuchwayitisa ngayo ukubakho kwisidlo sokomoya, enoba kukwiintlanganiso zebandla, iindibano zesiphaluka, iindibano ezikhethekileyo zosuku olunye, okanye iindibano zesithili! Ngoba? Ukunxulumana nabantu aboyika uThixo kuyahlaziya, ibe izinto zokomoya ezinikelwa ngezo zihlandlo zisikhumbuza ngezinto eziziincamisa.
2 Kwiminyaka yakutshanje amawaka andayo aye akho kwezi ndibano zokomoya. Phakathi konyaka we-1985 nowe-1994, inani lamabandla ehlabathini lonke lenyuka ngaphezu kwama-50 ekhulwini, lisusela kuma-49-716 ukusa kuma-75 573. Njengokuba uYehova ewukhawulezisa umsebenzi wokuhlanganisa, inani leendibano zesithili nezesiphaluka nalo liyanda. (Isa. 60:22) Kwanokwanda kwenani leendibano zesithili eziqhutywe kwintsimi ephantsi kwesebe laseMzantsi Afrika, elisusela kuma-21 ngowe-1984 ukusa kuma-30 ngowe-1994, kubonisa ukwanda kwenani lamabandla. Umsebenzi wokulungiselela nokuqhutywa kwezi ndibano ubusanda kakhulu. Ekubeni sihlanganisana ukuze singenelwe kucwangciso lokomoya olulungiselelweyo kwezi zidlo, kububulumko ukuwenza lula kangangoko kunokwenzeka amalungiselelo okwenyama.
3 Amanyathelo Angakumbi Aza Kuthatyathwa: Njengokuba siqhubela phambili silindele iintsikelelo kuYehova. Kuyasivuyisa ukubona ukuba unike abantu bakhe umoya wobulumko nokuqonda abakufunayo. Simele silivume elokuba ngodidi lomkhonzi othembekileyo, uYesu Kristu uye walathisa imicimbi ngokuphumelelayo ukuze kuphumelele injongo kaYehova ngendlela emangalisayo. (Mat. 24:45-47; Kol. 1:9, 10) Isaziso esikuBulungiseleli Bethu BoBukumkani bukaJulayi sithe: “Ukususela ngoSeptemba 1995 kwiindibano zesiphaluka neendibano ezikhethekileyo zosuku olunye nakwiNdibano YeSithili ‘Yabadumisi Abanovuyo’ yokuphela kwalo nyaka, akuzi kubakho lungiselelo lokutya. Ngamnye uya kuza nokutya nesiselo sakhe.” Kuye kwakho intsabelo entle kwesi saziso. Usenokuba nomdla wokwazi indlela olu tshintsho oluza kuba yingenelo ngayo. Mhlawumbi le ngxubusho ingezantsi yotshintsho oluye lwenziwa kwiminyaka yakutshanje iya kukukhumbuza ngeengenelo esele sizifumana ngokwenza lula umsebenzi ezindibanweni.
4 Uhlengahlengiso Lwexa Elidluleyo Lokwenza Lula Izinto: Ngaphambi kokuqaliswa kwendlela esemgangathweni nelula kumalungiselelo eendibano zesithili, njengamalungiselelo okutya, inkonzo yamatsha-ntliziyo namagumbi, amawaka abazalwana noodade basekuhlaleni bekufuneka basebenze nzima kumsebenzi wangaphambi kwendibano. Ngenxa yeengcinezelo nezinto ubomi bemihla ngemihla obuzifuna kubazalwana bethu nangenxa yokukhula okuqhubekayo kwentlangano, kuye kwafuneka kwenziwe uhlengahlengiso lokwenza umsebenzi ube lula. Ukongezelela, ngenxa yokwenza lula ilungiselelo lokutya, abazalwana noodade abaninzi abebedla ngokusebenza nzima ebudeni bocwangciso belungiselela ukutya baye bakwazi ukuphulaphula ucwangciso. Anjani wona ukuba mahle amalungiselelo, enze umsebenzi walula aza avumela ithuba lokunikela ingqalelo engakumbi kwizinto zokomoya endibanweni, ekubeni abasebenzayo bekwazi ukuphulaphula baze banandiphe ucwangciso. (Dut. 31:12) Abathembekileyo phakathi kwethu abebekhonza ngokunyaniseka kangangeminyaka emininzi bayikhumbula kakuhle le nkqubela ibe baye bachaza indlela abaluxabisa ngayo olu lwalathiso luye lwafumaneka. Kodwa nguwuphi omnye umsebenzi onokuncitshiswa ukuze abangakumbi bakwazi ukungenelwa ngokuzeleyo kolu cwangciso lokomoya?
5 Iinguqulelo Eziza Kubakho: Ebudeni beminyaka yaxa kwaqaliswa ukulungiselelwa kokutya okungafuni msebenzi mninzi, kwabonwa ukuba ngokwentelekiso zaba “mbalwa” izinto ‘ezazifuneka ngokwenene.’ (Thelekisa uLuka 10:38-42, NW.) Noko ke, xa uphindaphinda ezi zinto zimbalwa ngenani labantu abakhoyo kusafuneka ezinye izinto nomsebenzi othe chatha, nezixhobo ezingakumbi nezifuna imali eninzi. Kwakhona, bekufuneka amatsha-ntliziyo amaninzi okulungiselela nokuxhasa loo malungiselelo. Bekufuneka kubekho iindawo zokugcina nokunikezela ukutya. Ukongezelela, amanye amasebe ezempilo kamasipala ebengqongqo gqitha ngezinto ezifuneka xa kulungiselelwa ukutya, ibe oku bekuluxanduva kubazalwana abakulungiselelayo. Ngaphezu koko, abazalwana abaninzi baya kufumana isiqabu kumsebenzi omninzi wokulondoloza izixhobo zesebe lokutya.
6 Inkonzo yokuzithandela yabo bebesebenza kule misebenzi ibiluncedo gqitha yaye ixatyiswa kakhulu. Noko ke, ngenxa yoku kwenziwa lula kwezinto okungakumbi, loo mawaka asebenza ekulondolozeni nasekuqhubeni iilori nasekuthengeni, ekulungiseleleni, ekukhupheni nasekuphakeni ukutya aya kukwazi ukusebenzisa ixesha lawo kwezinye izilangazelelo zoBukumkani ezibalulekileyo, kuquka ukunandipha ngokuzeleyo unxulumano ezindibanweni. Loo matsha-ntliziyo ebesebenza kwiSebe Lokutya ngoku aya kukwazi ukunceda kwamanye amasebe, njengelabaLindi nelokuCoca. Oku kuya kuphungula umthwalo kubo bonke ibe akuyi kufuneka abaninzi basebenze de kube sezinzulwini zobusuku, ngonyezi, okanye ebudeni bocwangciso, njengokuba bekunjalo ngabaninzi abakwiSebe Lokutya.
7 Ukuxhasa La Malungiselelo: UMbutho uyixabisa kakhulu inkxaso yenu entle bazalwana noodade eniyinikele ‘ngentliziyo ephelelisileyo’ ebudeni beminyaka kumalungiselelo endibano, kuquka ilungiselelo lokutya. (1 Kron. 29:9) Oku kuncede ngeendlela ezininzi. Kuncede ekuqesheni izakhiwo ezihle nokunyamekela iindleko zendibano. Kwakhona kuye kwanceda abakhoyo endibanweni bahlale kumabala endibano ebudeni bonqumamo olufutshane lwasemini ukuze bakufumane ngokulula ukutya, bahlaziyeke baze babekho kucwangciso lokomoya. Yaye ngokungathandabuzekiyo ububele nenkxaso eboniswe ngabazalwana noodade ekunikeleni kula malungiselelo iya kuqhubeka. Bekuyindlela yokubonakalisa uxabiso lwabo ngokoqobo.—IMize. 11:25; Luka 16:9.
8 Ukunyamekela Iintswelo Zakho Zokutya: Noko ke, kolu hlengahlengiso lubhekele phaya, kuya kufuneka abantu ngabanye neentsapho bazilungiselele isixhaso abaza kusifuna ebudeni bekhefu lasemini. Sizixabisa kunene iingenelo zocwangciso lokomoya. Akuyi kuba bubulumko ukuvumela ukutya kokwenyama kube yeyona nto iphambili ngokugqith’ emgceni. Kubalulekile ukuba ngamnye kuthi ‘acikide izinto eziziincamisa’ kulo mba. (Fil. 1:9, 10a) Iindibano ezinkulu zakutshanje zabantu bakaYehova ePoland, eRashiya naseUkraine nakwezinye iindawo, ziye zaqhutywa ngempumelelo kungakhange kubekho lungiselelo lokutya. Ukongezelela, ezinye iziphaluka kweli lizwe ziye zaqhuba iindibano zesiphaluka nezikhethekileyo zosuku olunye ngaphandle kwelungiselelo lokutya ngenxa yeemeko zasekuhlaleni. Kwimeko nganye abebeze endibanweni bebeziphathela umphako wesidlo sasemini. Siya kufumanisa ukuba, ukuba siziphathela into etyiwayo encinane yesidlo sasemini, oko kuya kusinceda sihlale sithe qwa, kuze kusenze singenelwe ngokuzeleyo kucwangciso lwasemva kwemini. Ngokuvisisana noku, wonke ubani ufanele eze nokutya okulula nokunesongo. Ngokomzekelo, xa uYesu wondla izihlwele, wazityisa izinto ezimbini kuphela, isonka nentlanzi. (Mat. 14:16-20; kwakhona bona uLuka 10:42a.) Ngenxa yoko, siyavuyiswa kukunikela amacebiso angezinto ezinokuphathwa ezinokuba zezifanelekileyo kunqumamo lwasemini oluncitshisiweyo nohlobo lwendawo enendibano.
9 Ekubeni kungazi kubakho lungiselelo lokutya endibanweni, xa becebe kakuhle abo beze endibanweni baya kutya isidlo sakusasa neentsapho zabo ekhaya okanye kwenye indawo. Ngokuphumla ngokwaneleyo kubusuku obungaphambili, nifanele nikwazi ukuvuka kwangethuba ukuze nifumane isixhaso sakusasa nize nifike kwangexesha endibanweni ukuze ninandiphe unxulumano nabanye abeze endibanweni. Enye ingenelo yeli lungiselelo litsha kukuba indawo esetyenziswayo akuyi kufuneka ibe nabasebenzi ize ivulwe ekuseni kakhulu njengaxa bekuye kuvulelwe amatsha-ntliziyo esebe lokutya neentsapho zawo. Ezi ndawo ziya kuvulwa ngeye-8:00 kusasa ukwenzela bonke abeze endibanweni, ngaphandle kwabo bambalwa banemisebenzi ethile eyenza kufuneke bangene ngaphambilana kunoko. Njengakwixa elidluleyo, akuyi kubakho mfuneko yokungxamela kwindawo enendibano kuba ufuna ukufumana izihlalo, ekubeni kulungiselelwe izihlalo ezaneleyo zesihlwele ekulindelwe ukuba siya kubakho.
10 Unqumamo lwasemini luya kuba lufutshane kunolweendibano ezidluleyo. Noko ke, lisaya kubakho ithuba lokufumana isixhaso esilula nexesha lokunxulumana nabanye. Abazalwana noodade wethu abahlala kwindawo enendibano okanye kufutshane ababuyela ekhaya kwingokuhlwa nganye baya kukwazi ukulungiselela ilungu ngalinye leentsapho zabo intwana yokutya ukwenzela unqumamo lwesidlo sasemini. Oku kuya kufana nomphako ophathwa lulutsha esikolweni, mhlawumbi iqebengwana, isiqhamo esithile, iibhiskiti nesiselo. Abantu abaninzi baphatha loo mphako naxa besiya emsebenzini.
11 Ngokungathandabuzekiyo oku kuya kuba lucelomngeni kwabo basuka kwiindawo ezikude nesixeko sendibano, ekubeni kuya kufuneka balungiselele kwangaphambili izinto abaza kuzitya ngesidlo sasemini. Mhlawumbi kusenokufuneka niphathe amaphepha okosula izandla, iikomityi zephepha ukwenzela iqela enihamba nalo. Abanye basenokufumanisa ukuba into etyiwayo njengeziqhamo okanye imifuno inokuzanelisa iintswelo zabo, yaye nazo ninokuziphathela ekhaya. Okunye ukutya kwesidlo sasemini sosuku ngalunye ninokukufumana kwivenkile ekwisixeko sendibano.
12 Ukunikhumbuza, ncedani NINGAPHEKI KUMAGUMBI OKULALA ESIKOLO, KUMAGUMBI OKUFUNDELA OKANYE EYADINI YESIKOLO ngaphandle kokuba kukho ikhitshi elincinane lokuphekela. Kuyingozi yaye akukho semthethweni ukwenjenjalo yaye kunokudyobha iindonga ngamabala namafutha. Kushiya ivumba elihlala iintsuku eziliqela kwelo gumbi. Yiloo nto kusenokuba bubulumko ukucinga ngokuthenga izinto ezingaboliyo, njengeenuts, iziqhamo eziqwayitiweyo neebhiskiti, okanye nisenokukhetha ukuza nezinto ezibhakiweyo, njengesonka, iirolls, okanye iimuffins. Ukuba ninqwenela izinto zesidlo sasemini, njengamaqebengwane, mhlawumbi ninokufumana ivenkile enecala lokutya okuvuthiweyo apho konke oku sekulungiselelwe. Ukuthenga olu hlobo lwezinto kwenza kungabi yomfuneko ukulungiselela ukutya kwindawo enihlala kuyo okanye kwizithuthi.
13 Ekubeni indawo enendibano iba yiHolo yoBukumkani enkulu ebudeni bendibano, kwakhona kububulumko ukuphepha ukuba sibe ngathi sikwipikiniki ebudeni bonqumamo lwasemini. Yaye kanye njengokuba singatyi ebudeni beentlanganiso kwiHolo yoBukumkani, asiyi kutya okanye sisele ebudeni bocwangciso lwendibano. Iimantyi ezinkulu zepikiniki aziyi kuvunyelwa kwindawo enendibano. Zinokubangela ingozi yaye azinakushiywa epasejini okanye zibekwe ezihlalweni. Mhlawumbi iibhegi ezinokuphinda zisetyenziswe okanye iibhegi zephepha ezilahlwayo zingayilungela into etyiwayo encinane esiya kuyisebenzisa kunqumamo lwasemini. Ukuba kuyimfuneko, imantyi encinane enokubekwa ngaphantsi, kungekhona phezu, kwesihlalo isenokusetyenziswa.
14 Kwakhona sifanele silumkele uhlobo lwezinto esiphatha ngazo isiselo esikhetha ukuza nazo kwindawo enendibano. Iziselo ezishushu zisenokuphathwa ngeeflaski. Izinto zalo naluphi uhlobo lwegilasi zinokuba yingozi. Kwiindawo ezininzi kuyalelwa kwaukusetyenziswa kwazo. Ngoko ke, siyanicela, ningezi NEZINTO ZEGILASI kwindawo enendibano. Ukuba isiselo esibandayo osikhethileyo asithengiswa sikwizinto zeplastiki okanye zenkcenkce, kuya kuba kuhle ukuba usigalele kwenye into engophukiyo eya kungena phantsi kwesihlalo.
15 Iingenelo Ezongezelelekileyo: Ngokwenyaniso sinokububona ubulumko bala malungiselelo ahlengahlengisiweyo. Sonke siya kukwazi ukunikela ingqalelo epheleleyo kwiingenelo zokomoya—injongo yokwenene yokuhlanganisana kwethu. Ezi ngenelo sizifumana kunxulumano esilunandiphayo nakucwangciso. Ngoko endaweni yokushiya indawo enendibano siye kufuna ukutya, hayi indlela ekuya kuba yingenelo ngayo ukuziphathela okuthile. Oku kuya kwenza sikwazi ukunandipha unxulumano nabazalwana noodade wethu yaye kuya kusenza singaphoswa lucwangciso lwasemva kwemini.
16 Xa sele behlaziyekile ngokomoya emva kocwangciso lwasemva kwemini, abanye basenokuqhubeka benandipha unxulumano lobuKristu baze bancokole ngezinto ezintle abazifundileyo ngoxa besitya ukutya okunesondlo nentsapho nezihlobo kwindawo yokutyela elungiselelweyo ekuhlaleni. Abanye basenokuthenga ukutya evenkileni okanye kwivenkile yezinto ezivuthiweyo. Abo bakwaziyo ukubuyela ekhaya basenokukhetha ukusityela emakhayeni abo isidlo sangokuhlwa, njengokuba bebeya kwenza ngeentsuku abazichithela emsebenzini okanye kwinkonzo yasentsimini.
17 Sizinandipha ngokwenene izidlo zokomoya kwezi ndibano zesiphaluka nezesithili, apho sifumana iimpapasho ezintsha, imfundiso ephilileyo nesiluleko esisebenzisekayo. Zezi ntsikelelo ezikhunjulwa nguye wonk’ ubani, kunye novuyo lokuhlanganisana nabantu bakaThixo. IMizekeliso 10:22 ithi: “Intsikelelo kaYehova, yiyo etyebisayo, imbulaleko ayongezi nento kuyo.” Oku kungenxa yokuba njengabantu bakaYehova, asiyi endibanweni sicinga ngeentswelo zezinto eziphathekayo nobutofotofo. Sihlanganisana sinomnqweno ofanelekileyo wokungenelwa kangangoko ngokomoya, yaye uYehova usivuza ngokwenene ngomoya esiwubonisayo.—1 Tim. 6:6-8; Heb. 11:6.
18 Ezi zihlandlo zokukhuthazwa zikwasikhumbuza ngenkqubela kwisivuno sokomoya. (Yoh. 4:35, 36) Amazwi okuvula kaIsaya isahluko 54 amema intlangano kaYehova ebumfazi ukuba ilungiselele ulwando oluvuyisayo. Kukho ithemba lolwando nokuhlaziywa kwamandla njengokuba uIsaya waprofetayo: “Yenze banzi indawo yentente yakho, uwatwabulule amalengalenga eminquba yakho, ungathinteli; zolule izintya zakho, uziqinisele izikhonkwane zakho. Kuba uya kutyhobozela ekunene nasekhohlo.” Inzaliseko yesi siprofeto sichwayitisayo iye yaphumela kulwando oluphawulekayo lonqulo oluyinyaniso esilubonayo ngoku.—Isa. 54:1-4.
19 Ngokwenene kubonakala ikukusebenzisa ingqiqo ukumisela eli lungiselelo libhekele phaya lokwenziwa lula kwezinto ukuze bonke bakwazi ukunandipha ucwangciso lokomoya olulungiselelweyo bengaphazanyiswa. Kwakhona sinethemba lokuba neli liya kusikelelwa nguYehova, ekubeni liya kwenza kusingathwe ulwando olungakumbi. Ngokunikela ingqalelo kokufunekayo, siya kukwazi ukunandipha iintsuku zethu esizicebele unxulumano olonwabisayo nezinto ezilungileyo zokomoya. Sithandaza ngokunyanisekileyo ukuba uYehova asikelele imigudu yethu njengokuba siqhubeka sihlanganisana size sondliwe kwisithebe sakhe.—Thelekisa iDuteronomi 16:14, 15.
[Box on page 8]
Iingenelo Zelungiselelo Lokungabikho Kokutya
◼ Umsebenzi uyancipha ngaphambi, ebudeni nasemva kocwangciso, nto leyo enikela ithuba elingakumbi lokunxulumana
◼ Akukho zixhobo zesebe lokutya zimele zilondolozwe
◼ Abantu abangakumbi bayakwazi ukunikela ingqalelo epheleleyo kucwangciso lokomoya
◼ Kubakho amatsha-ntliziyo angakumbi okunceda kwamanye amasebe
◼ Kubakho ixesha elingakumbi lezinye izinto zobuthixo
Izinto Ekucetyiswa Ukuba Ziphathelwe Unqumamo Lwasemini
◼ Ukutya okulula okunesongo
◼ Iziqhamo eziqwayitiweyo, iinuts, izinto ezibhakiweyo, iziqhamo
◼ Iimantyi ezincinane ukuba kuyimfuneko
◼ Iziselo, iziselo ezenziwe ngencindi yeziqhamo, okanye amanzi akwizinto ezingophukiyo
MUSANI Ukuza Nazo Kwindawo Enendibano
◼ Iziselo Ezinxilisayo
◼ Izinto zegilasi
◼ Iimantyi ezinkulu zepikiniki