Zonke Izinto Zenzeleni Uzuko LukaThixo
1 Hayi indlela ekuhlaziya ngayo ukunxulumana nabazalwana noodade wethu abathandekayo! (1 Kor. 16:17, 18) Oku sikwenza ezintlanganisweni, kwiindibano ezincinane nezinkulu nakubulungiseleli basentsimini. Kwakhona sihlanganisana nangezinye izihlandlo, njengaxa sineendwendwe ezityelele emakhayeni ethu. Ngokwenjenjalo, sibonisa ukubuk’ iindwendwe yaye siyakhuthazana. (Roma 12:13; 1 Pet. 4:9) Xa ulungiselela itheko lomtshato, khumbula isiluleko esihle esikwiMboniselo kaOktobha 15, 1984.
2 Iimbutho Zokuzonwabisa Ezilungeleleneyo: Enokuba ‘siyadla okanye siyasela okanye senza nayiphi na into,’ sifanele ‘sizenzele uzuko lukaThixo izinto zonke.’ (1 Kor. 10:31-33) Abanye abasithobeli esi siluleko, yaye iingxaki zona ziyaqhubeka zivela ngenxa yokuba itheko liba yingxikela de lingakwazi ukulawuleka. Kwezinye iimeko, kumenywa amakhulu abantu ukuba beze kuzimasa la matheko apho kubalaseliswa ukuzonwabisa kwehlabathi. Maxa wambi abo bezayo bacelwa ukuba bahlawule amangeno okanye ezinye iimali. Iimbutho ezinjalo zifana twatse neembutho zehlabathi, moya lowo ongavisisani kwaphela nokundileka nemigaqo yeBhayibhile.—Roma 13:13, 14; Efe. 5:15-20.
3 Kuye kwanikelwa ingxelo yokuba kuye kwalungiselelwa iingxikela zamatheko omtshato, amanye ade abe neendwendwe ezingaphezu kwe-1 000. Kwezinye iindawo, kuye kwathunyelwa izimemo zomtshato ezifuna abantu abakhulu kuphela kwitheko, kungekhona abantwana. Abanye baye baya emathekweni omtshato bengamenywanga. Ngaba oku kuyavisisana nolwalathiso olwanikelwa kwixa elidluleyo? Ngokuqinisekileyo akunjalo! Ngenxa yobunzima bokulawula kakuhle loo maqela makhulu, kuye kwavela iingxaki. Maxa wambi oku kuphumele kubundlongondlongo, ekuzintyintyeni kanobom ngotywala kwanasekuziphatheni okubi. (Efe. 5:3, 4) Oku kuye kwaba ngunozala wokuba abanye basuswe kubudlelane okanye bohlwaywe yikomiti egwebayo baze abanye abadala nezicaka zolungiselelo baphulukane namalungelo abo enkonzo. Ngokuqinisekileyo, iimbutho ezinjalo azimzukisi uYehova. Kunoko, zingcolisa igama elihle lebandla yaye ziyabakhubekisa abanye.—1 Kor. 10:23, 24, 29.
4 AmaKristu akhuthazelwa ukuba abonise ukubuk’ iindwendwe, kodwa oku kumele kwenziwe ngendlela yokukhuthazana ngokomoya. (Roma 1:11, 12) Ngokuqhelekileyo iimbutho ezincinane zezona zilungileyo. Kwiphepha 135 incwadi ethi Ubulungiseleli Bethu ithi: “Maxa wambi, iintsapho eziliqela zisenokumenyelwa kwikhaya ukuze zidlelane njengamaKristu. . . . Ngokusengqiqweni, abo bamkela ezo ndwendwe kwiimeko ezinjalo bamele bazive benembopheleleko yobuqu ngokwenzekayo. Ecinga ngoku, amaKristu asebenzis’ ingqondo abubonile ubulumko bokulinganisela ubukhulu bamaqela anjalo nobude bexesha lezo ndibano.” UYesu wabonisa ukuba akufuneki bugocigoci xa sinosukelo lokukhuthaza abahlobo bethu ngokomoya.—Luka 10:40-42.
5 Kuhle kona ukubonakalisa ukubuk’ iindwendwe kwamanye amaKristu. Noko ke, kukho umahluko omkhulu phakathi kwembutho encinane kwikhaya lethu nembutho enkulu ekwisakhiwo esiqeshwayo ebonakalisa umoya wehlabathi. Xa umeme abanye babe ziindwendwe zakho, ufanele uqiniseke ukuba ubophelelekile ngoko kwenzekayo.—Bona IMboniselo ka-Agasti 15, 1992, iphepha 17-20.
6 Ngokwenene, uYehova usisikelele ngabazalwana esifumana kubo ukhuthazo oluhlaziyayo nolusishukumisela ukuba siqhubeke nemisebenzi emihle. (Mat. 5:16; 1 Pet. 2:12) Ngokubonakalisa ukuthozama nengqiqo kwiimbutho zokuzonwabisa, siya kuhlala sizukisa uThixo wethu size sibakhe abanye.—Roma 15:2.