Mdumise UYehova Ngamaxesha Onke
1 Zimbalwa izinto ezibaluleke gqitha ezide zifune ukuba sizinikele ingqalelo ngamaxesha onke. Phakathi kwazo sinokuquka ukutya, ukuphefumla nokulala. Ezi zinto zibalulekile ukuba siza kuhlala siphilile emzimbeni. Umpostile uPawulos wabeka ukushumayela iindaba ezilungileyo kuluhlu olufanayo xa wenza esi sibongozo: “Masithi ngaye sinyuse ngamaxesha onke kuye uThixo umbingelelo wendumiso.” (Heb. 13:15, akekeliswe sithi.) Ngoko, ukudumisa uYehova nako kufuna sihlale sikunikela ingqalelo. Kuyinto esimele sizabalazele ukuyenza suku ngalunye, simdumise uBawo wethu wasezulwini ngamaxesha onke.
2 Xa abanye babezama ukuphazamisa ingqalelo yakhe, uYesu waphendula wathi: “Ndimelwe kukuba ndizishumayele iindaba ezilungileyo zobukumkani bukaThixo.” (Luka 4:43) Ebudeni beminyaka emithathu enesiqingatha yobulungiseleli bakhe, yonke into awayeyenza suku ngalunye yayihlobene ngandlel’ ithile nokuzukisa uThixo. Siyazi ukuba uPawulos wayevakalelwa ngale ndlela, ngenxa yoko wakuthetha kweyoku-1 kwabaseKorinte 9:16: “Yeha ke mna, ukuba ndisuka ndingazishumayeli iindaba ezilungileyo!” Amanye amaKristu athembekileyo akhuthazwa ukuba ahlale ekulungele ukuziphendulela ngethemba lawo kwabanye abantu. (1 Pet. 3:15) Namhlanje amakhulu amawaka oovulindlela nezigidi zabavakalisi bebandla zizabalazela ukuxelisa le mizekelo mihle.
3 Xa sicamngca ngenzondelelo yentliziyo iphela eyaboniswa nguYesu Kristu, uMzekelo wethu, sikhuthazelwa ukulandela emanyathelweni akhe ngokusondeleyo. (1 Pet. 2:21) Maxa wambi sisenokudimazeka xa kufuneka sijamelane neengxaki zobomi bemihla ngemihla. Sinokuwaxhakamfula njani amathuba okudumisa uYehova imihla ngemihla xa siphangela ixesha elizeleyo? Asinakuzityeshela iimbopheleleko zentsapho ezifuna ixesha lethu elininzi. Inkoliso yabantu abaselula ixakeke gqitha yimisebenzi yemihla ngemihla yesikolo. Bambi basenokuba noluvo lokuba akwenzeki ukudumisa uYehova ekuhleni yonke imihla. Maxa wambi, abanye isenokuphela inyanga bengakhange babe nesabelo kwiindaba ezilungileyo nakancinane.
4 UYeremiya akazange akwazi ukurhoxobisa. Xa wasilelayo ukuthetha ngegama likaYehova ngethuba nje elifutshane, weva umlilo onganyamezelekiyo uvutha ngaphakathi kuye. (Yer. 20:9) Phezu kwabo nje ubunzima obabubonakala bukho, ngamaxesha onke uYeremiya wayezama indlela yokuthetha ngesigidimi sikaYehova kwabanye. Ngaba sinokuwuxelisa umzekelo wakhe wenkalipho size sizingise ekuxhakamfuleni amathuba okudumisa uMdali wethu suku ngalunye?
5 Ukuthetha kwethu ngoYehova akufanele kupheleliselwe nje kubungqina obucwangcisiweyo, nakumathuba acetywe kwangaphambili okunikela ubungqina nabanye abavakalisi kwintsimi yebandla. Into esiyifunayo ngumntu oya kuphulaphula. Mihla le sisoloko sidibana nabantu—beza emakhayeni ethu, siphangela nabo, sima nabo emigceni ezivenkileni, okanye sikhwela nabo uduladula. Into efunekayo kukubulisa ngobuhlobo uze uphakamise umbuzo ohlokoz’ ingcinga okanye amagqabaza aya kuqalisa incoko. Uninzi lukufumanise oku kuyeyona ndlela luyisebenzisayo yokunikela ubungqina ephumelelayo. Xa sinamathuba amaninzi okuthetha nabanye ngeendaba ezilungileyo, akunakude kuphele inyanga yonke singakhange sinikele bungqina ngoBukumkani. Kwakhona kubalulekile ukufaka ingxelo yenkonzo ngokukhawuleza ekupheleni kwenyanga nganye.
6 Ilungelo lokudumisa uYehova alinakuze liphele. Kunjengokuba umdumisi wabonisayo, yonke into ephefumlayo ifanele imdumise uYehova, yaye ngokuqinisekileyo nathi sifuna ukwenjenjalo. (INdu. 150:6) Ukuba iintliziyo zethu zisikhuthazela ukwenjenjalo ngamaxesha onke, siya kuwaxhakamfula amathuba imihla ngemihla ukuze sithethe ngoYehova nangeLizwi lakhe.