‘Zondelela Imisebenzi Emihle’ NgoAprili!

¹ Kulo nyaka uphelileyo kwanikelwa ubungqina ngendlela engazange ibonwe ngaphambili xa kwasasazwa izigidi zephecana iKingdom News No. 34 ehlabathini lonke. Abavakalisi noovulindlela bebandla baba nesabelo ngenzondelelo kulo msebenzi ukhuthazayo. Ngaba wawuphakathi kwabo? Ukuba kunjalo, asinamathandabuzo ngento yokuba nawe wakunandipha ukuba nesabelo kwelo phulo lalibalasele. Ngoku usenokuba uyazibuza, Nguwuphi ‘umsebenzi omhle’ esiza kuwenza kulo nyaka?—Tito 2:14.

² NgoAprili nasebutsheni bukaMeyi, siza kube sivuyiswa kukusasaza inkupho ekhethekileyo yephephancwadi uVukani!, kaMeyi 8, 1996, eya kubalaselisa umxholo othi “Xa Iimfazwe Ziya Kuba Zingasekho.” Ekubeni uninzi lwabaninimzi luza kuba nomdla kulo mbandela, siza kuzabalazela ukuwasasaza ngokubanzi la maphephancwadi kangangoko kunokwenzeka. Ngenxa yokubaluleka kwenkcazelo eyiquletheyo, le nkupho kaVukani! ifanele ibalaseliswe ngoAprili nangoMeyi, de iphele.

³ Usukelo Lwethu—Ukuba Nesabelo Sonke Njengabavakalisi: Kuya kukhuthaza ngokwenene ukuba wonke umvakalisi kweli lizwe unokuba nesabelo kumsebenzi wokushumayela ngoAprili. Ekubeni iSikhumbuzo sokufa kukaKristu siza kube sisathe thaa ezingqondweni zethu, ngokuqinisekileyo siya kufuna ukubonakalisa uxabiso esinalo ngokulunga kukaThixo ngokunikela “umbingelelo wendumiso” kubulungiseleli basentsimini.—Heb. 13:15.

⁴ Kufanele kwenziwe umgudu wenkuthalo wokujonga iintswelo zelungu lebandla ngalinye ukuze onke abe nesabelo ngenzondelelo kubulungiseleli ngoAprili. (Roma 15:1) Abaqhubi bezifundo zencwadi bafanele bazazi ngokupheleleyo iimeko zabo basemaqeleni abo baze banikele uncedo olusebenzisekayo xa kuyimfuneko. Ngaba kukho oswele isithuthi? Ngubani onokumbonelela? Ngaba abanye baneentloni okanye abazithembanga? Ngaba abavakalisi abangamagqala bangasebenza kunye nabo? Kuthekani ngabo balele ngandletyana nye ekhaya okanye abagulayo? Ngaba banokunikela ubungqina ngomnxeba, ngeleta, okanye ngenye indlela enemveliso?

⁵ Abanye abaye baphola abebekhuthazwa rhoqo ngokomoya, basenokushukunyiselwa ukuba nesabelo kumsebenzi wokushumayela kwakhona. Eli phulo likaVukani! okhethekileyo liya kubanika ithuba elihle lokuhlaziyeka kwakhona.

⁶ Qeqesha Abaselula Babe Nesabelo: Kangangeminyaka emininzi inyambalala yabantwana bamaNgqina kaYehova ibipheleka abazali bayo ukuya kwindlu ngendlu, nangona ingekabi ngabavakalisi abangabhaptizwanga. Ngaba eli lixesha lokuba bangaqalisa? Ngaba bachukumiseke ngokusuka entliziyweni yaye bakulungele ukuba nesabelo ngokunentsingiselo kumsebenzi wendlu ngendlu? Ebudeni besifundo seBhayibhile sentsapho iintloko-ntsapho zifanele zisebenzise elo xesha ukuze zincede abantwana bazo abafanelekayo balungiselele intshumayelo ngokuvisisana neminyaka namandla omntwana ngamnye. Abantwana abadadlana bafanele bakhethe umbuzo ohlokoz’ ingcinga oya kuvusa umdla womninimzi baze bambonise impendulo kwiphephancwadi. Abancinane bona banokunikela ubungqina ngokuphumelelayo ngokubetha nje koomofu. Ngokomzekelo, banokumkhuthaza umninimzi ukuba “afunde eli phephancwadi likhethekileyo lisasazwa emhlabeni wonke kule nyanga.” Xa ulungiselela nentsapho yakho, qiniseka ukuba uquka namacebiso okoyisa inkcaso esidla ngokudibana nayo. Kwincwadi ethi Ukuqiqa uya kufumana amacebiso amahle. Ngamaxesha ezidlo nangezinye izihlandlo ezifanelekileyo, khuthaza amalungu entsapho abalise amava aye aba nawo kwinkonzo yasentsimini.

⁷ Abafundi BeBhayibhile Abafanelekayo Bangenela Umsebenzi Owenziwa NguYesu: UYesu wayengafundisi ngemibandela engemfundiso nje kuphela. Wayehamba nabafundi bakhe kubulungiseleli ebafundisa ukushumayela. (Luka 8:1; 10:1-11) Injani imeko namhlanje? Kweli loMzantsi Afrika nakumazwe aselumelwaneni aphantsi kwesebe lethu kuqhutywa izifundo zeBhayibhile ezingaphezu kwama-65 000. Alithandabuzeki elokuba, ngokufumana ukhuthazo olufanelekileyo uninzi lwaba bafundi lunokwenza inkqubela kuqeqesho lwalo luze lufanelekele ukukhonza njengabavakalisi abangabhaptizwanga ngoAprili.

⁸ Ukuba uqhuba isifundo seBhayibhile, cinga ngale mibuzo: Ngaba lo mfundi wenza inkqubela, ngokuvisisana neminyaka namandla akhe? Ngaba sele eqalisile ukwabelana nabanye ngokholo lwakhe ngokungacwangciswanga? Ngaba wambatha “ubuntu obutsha”? (Kol. 3:10) Ngaba uyahlangabezana neemfaneleko zabavakalisi abangabhaptizwanga, ezandlalwe kwiphepha 97 ukusa kwelama-99 kwincwadi ethi Ubulungiseleli Bethu? Ukuba ucinga ukuba uyafaneleka, kutheni ungawuxubushi naye lo mbandela? Abanye abafundi bafuna ukumenywa nje ngokungqalileyo ukuze babe nesabelo kulo msebenzi. Kakade ke, ukuba umfundi uyavuma, kuqala kuya kufuneka umveleli owongamelayo enze njengesiqhelo alungiselele abadala ababini baxubushe naye. Kwelinye icala, kusenokuba kukho into ebangela umfundi arhoxobise. Mhlawumbi omnye wabadala usenokukupheleka xa usiya kweso sifundo seBhayibhile aze azame ukufumanisa indlela avakalelwa ngayo ngenyaniso. Emva kokuphulaphula koko kuthethwa ngumfundi, umdala usenokumpha amacebiso asebenzisekayo, noncedo lweZibhalo.

⁹ ‘Zithengeleni Ixesha’ Lokuba Ngoovulindlela Abangabancedani: Nyaka ngamnye ebudeni bexesha leSikhumbuzo, ukuba nombulelo ngentlawulelo kushukumisela amawaka ukuba ‘azithengele’ ixesha lokuba ngoovulindlela abangabancedani. (Efe. 5:15-17) Nangona kuye kufuneke ukuzincama okuthile, imivuzo ayinganganto. Iqela lolutsha elincomekayo liye lilisebenzise kakuhle ikhefu lesikolo ukuze libe ngoovulindlela abangabancedani. Abantu abakhulu abasebenza ixesha elizeleyo basebenzisa amarhatya neempela-veki ngokuyingenelo kwakulo msebenzi. Ngaloo ndlela, bonke entsatsheni baye babuxhamla kunye ubuvulindlela bobuncedani! Kwamanye amabandla inkoliso yabadala nezicaka zolungiselelo nabafazi babo baye baba ngoovulindlela abangabancedani. Bekhuthazwe ngumzekelo wabo wenzondelelo, nabanye baye benza okufanayo, nto leyo eyenza ukuba uninzi lwabantu ebandleni lukhonze njengoovulindlela abangabancedani ngoAprili.

¹⁰ Enoba unganguvulindlela ongumncedani okanye akunjalo, khangela iindlela zokwandisa inkonzo yakho yasentsimini ngoAprili. Zibekele usukelo oluya kufuna wenze umgudu othile kodwa olufikelelekayo. Umnqweno wakho ‘wokusebenzisa konke onako nokuze usetyenziswe ngokupheleleyo’ enkonzweni kaYehova, ngokweemeko zakho, uya kusikelelwa nguye.—2 Kor. 12:15.

¹¹ Iintlanganiso Zenkonzo Yasentsimini: Kufanele kucwangciselwe iintlanganiso zenkonzo yasentsimini yonke imihla yephulo likaVukani!, ngexesha eliya kwenza kuqaliswe kwangethuba kubulungiseleli. Kwakhona kufanele kwenziwe namalungiselelo okunikela ubungqina ngamarhatya. Inkoliso yabavakalisi iya kuba nesabelo kwinkonzo yasentsimini ngeempela-veki, ngoko ke amabandla afanele acwangcisele ukuya kwinkonzo yasentsimini ngeMigqibelo, kusasa nasemva kwemini, ngalo lonke ixesha lokusasazwa koVukani! okhethekileyo.

¹² Abo baqhuba iintlanganiso zenkonzo yasentsimini bafanele baqinisekise ukuba kukho umhlaba omninzi. Kuqala kufanele kugutyungelwe umhlaba ogqityelwe kudala ukusetyenzwa. Noko ke, umhlaba ongabelwanga bani ophantsi kweliso loMbutho awufanele usetyenzwe ngaphandle kwemvume yoMbutho. Ngaba unomhlaba wobuqu okanye engakumbi engekagutyungelwa okwangoku? Ukuba uza kufuna ukuncedwa ekuyisebenzeni ebudeni bephulo, thetha nomveleli wenkonzo okanye umzalwana onyamekela umhlaba yaye baya kukuvuyela ukukulungiselela uncedo.

¹³ Mangaphi Amaphephancwadi Oya Kuwahambisa? Lo mbuzo ufanele uphendulwe ngumntu ngamnye. Ukuze ubone ukuba mangaphi na amaphephancwadi onokuwahambisa ebudeni beli phulo, cinga ngentsimi oza kuyisebenza, iminyaka yakho, impilo yakho, ixesha oya kulinikela kulo msebenzi, nezinye izinto. Noko ke, phawula, oko sakhunjuzwa ngako yiMboniselo kaJanuwari 1, 1994, eyayisithi: “Sicebisa ukuba abavakalisi babe nosukelo, mhlawumbi, lokuhambisa amaphephancwadi ali-10 ngenyanga, ngokweemeko zabo; oovulindlela basenokuzabalazela angama-90.” Ngaba usukelo olunjalo luya kuba sengqiqweni kwimeko yakho?

¹⁴ Badala—Kufuneka Nicebe Ngenyameko: Ukuba kunokwenzeka, qinisekani ukuba, kuyo yonke intsimi yebandla kuya kuhanjiswa inkupho ekhethekileyo kaVukani! Nifanele ninikele ingqalelo ngenyameko ekusetyenzweni kwayo yonke intsimi yebandla enamashishini. Abo bashumayela kuyo bafanele balungiselele kakuhle baze banxibe kakuhle. Akuyomfuneko ukulungiselela intshumayelo enzima. Xa usiya kusomashishini, usenokumxelela ukuba akudli ngokubafumana oosomashishini emakhayeni abo, ngoko uze kwindawo eneshishini lakhe ukuze umnike iphephancwadi oqinisekileyo ngalo ukuba uya kulithanda. Usenokwandula ke umchazele ngengongoma ethile ekwiphephancwadi elo. Kwakhona ukunikela ubungqina esitratweni kufanele kulungelelaniswe ngokufanelekileyo kwintsimi yebandla. Eyona ndlela iphumelelayo ekunikeleni ubungqina esitratweni kukuya ngokwakho kubantu abadlulayo, kunokulindela ukuba beze kuwe. Ekubeni abantu beza kube benijongile, nifanele nikuphaphele ukuba nembonakalo endilisekileyo. Kusenokubakho nezinye iindawo kwintsimi yenu ezinokusetyenzwa ebudeni beli phulo, njengezikhululo zeenqwelo-moya, izibhedlele, iindawo zokumisa iinqwelo-mafutha, iipaki namakhaya abalupheleyo. Iqumrhu labadala lifanele ligqibe ngamalungiselelo anokwenziwa ukuze kunikelwe ubungqina kwezi ndawo zikwintsimi yebandla lenu.

¹⁵ UYehova ungumsebenzi ongadinwayo. (Yoh. 5:17) Wadala amazulu nomhlaba ndawonye nezityalo nezilwanyana; kodwa waqhubeka esebenza de wadala eyona nto yokugqibela kumsebenzi wakhe emhlabeni—umntu. Isibakala sokuba sinobom sibangelwa kukukhuthalela kukaThixo ukusebenza. ‘Njengabaxelisa uThixo,’ ukumthanda kwethu kufanele kusishukumisele ‘ukuzondelela imisebenzi emihle.’ (Efe. 5:1; Tito 2:14) Ekubeni sifanele simenzele konke okusemandleni ethu uYehova yaye ekubeni umnqweno wokuba nemveliso uluphawu lomntu onenzondelelo, sifanele sibe nomnqweno wokwenza umsebenzi omhle kubulungiseleli. Kakade ke, uYehova uyakuxabisa nakuphi na ukuzincama esikwenza ngenxa yakhe, ibe umsebenzi wethu awulolize. (1 Kor. 15:58) Ngoko ke, ngeentliziyo ezizele ngumbulelo, masizinikele kumsebenzi wenzondelelo ngoAprili, siqinisekile ukuba siya kufumana inkoliseko nentsikelelo kaYehova yaye siya kuphumelela!