Isifundo 6

Buyintoni UBukumkani BukaThixo?

UBukumkani bukaThixo bumiswe phi? (1) Ngubani uKumkani wabo? (2)

Ngaba lo Kumkani ulawula nabanye? Ukuba kunjalo, bangaphi alawula nabo? (3)

Yintoni ebonisa ukuba siphila kwimihla yokugqibela? (4)

Yintoni abantu abaya kuyenzelwa buBukumkani bukaThixo kwixesha elizayo? (5-7)

1. Ngoxa wayesemhlabeni, uYesu wafundisa abalandeli bakhe ukuba bathandazele uBukumkani bukaThixo. Ubukumkani ngurhulumente olawulwa ngukumkani. UBukumkani bukaThixo ngurhulumente okhethekileyo. Bumiswe ezulwini yaye buya kulawula lo mhlaba. Buya kungcwalisa, okanye bulenze ngcwele igama likaThixo. Buya kwenza ukuba ukuthanda kukaThixo kwenziwe emhlabeni njengokuba kusenziwa ezulwini.—Mateyu 6:9, 10.

2. UThixo wathembisa ukuba uYesu uya kuba nguKumkani woBukumkani Bakhe. (Luka 1:30-33) Ngoxa uYesu wayesemhlabeni, wangqina ukuba wayeya kuba nguMlawuli onobubele, osesikweni nogqibeleleyo. Xa wabuyela ezulwini, akazange abekwe esihlalweni njengoKumkani woBukumkani bukaThixo kwangoko. (Hebhere 10:12, 13) Ngowe-1914, uYehova wanika uYesu igunya awayemthembise lona. Ukususela ngoko, uYesu uye walawula ezulwini njengoKumkani omiselweyo kaYehova.—Daniyeli 7:13, 14.

3. Kwakhona uYehova uye wanyula amadoda namabhinqa athile athembekileyo ukuze aye ezulwini. Aba baya kulawula noYesu njengookumkani, abagwebi, nababingeleli ebantwini. (Luka 22:28-30; ISityhilelo 5:9, 10) UYesu wababiza aba aza kulawula nabo kuBukumkani bakhe ngokuthi ‘ngumhlambi omncinane.’ Aba bali-144 000.—Luka 12:32; ISityhilelo 14:1-3.

4. Akuba nje uYesu enguKumkani, wamlahlela ngaphandle kwezulu uSathana neengelosi zakhe ezingendawo emlahlela ezantsi emhlabeni. Kungeso sizathu lento izinto ziye zambi emhlabeni ukususela ngowe-1914. (ISityhilelo 12:9, 12) Iimfazwe, iindlala, iindyikitya zokufa, ukwanda kokuchas’ umthetho—zonke ezi ziyinxalenye ‘yomqondiso’ obonisa ukuba uYesu uyalawula yaye le nkqubo ikwimihla yayo yokugqibela.—Mateyu 24:3, 7, 8, 12; Luka 21:10, 11; 2 Timoti 3:1-5.

5. Kungekudala uYesu uza kugweba abantu, ebahlula njengokuba umalusi esahlula izimvu ezibhokhweni. “Izimvu” ngabo baya kube bezingqine bengabalawulwa bakhe abathembekileyo. Baya kufumana ubomi obungunaphakade emhlabeni. “Iibhokhwe” ngabo baya kube bebugatyile uBukumkani bukaThixo. (Mateyu 25:31-34, 46) Kungekudala, uYesu uza kutshabalalisa bonke abanjengeebhokhwe. (2 Tesalonika 1:6-9) Ukuba ufuna ukuba ngomnye ‘wezimvu’ zikaYesu, umele uphulaphule isigidimi soBukumkani uze wenze ngokuvisisana noko ukufundayo.—Mateyu 24:14.

6. Ngoku umhlaba wahlulahlulwe wangamazwe amaninzi. Ngalinye linorhulumente walo. Ezi zizwe ngokufuthi ziyalwa. Kodwa uBukumkani bukaThixo buya kushenxisa bonke oorhulumente babantu. Buya kulawula njengokuphela korhulumente emhlabeni wonke. (Daniyeli 2:44) Emva koko akusayi kuphinda kubekho mfazwe, ulwaphulo-mthetho nogonyamelo. Bonke abantu baya kuhlala kunye ngoxolo nangomanyano.—Mika 4:3, 4.

7. Ebudeni boLawulo lukaYesu Lweminyaka Eliwaka, abantu abathembekileyo baya kufezeka, yaye umhlaba wonke uya kuba yiparadisi. Ekupheleni kweminyaka eliwaka, uYesu uya kube eyenzile yonke into uThixo awayemthume ukuba ayenze. Uya kwandula ke abuyisele uBukumkani kuYise. (1 Korinte 15:24) Kutheni ungaxeleli abahlobo bakho nabo ubathandayo ngoko uBukumkani bukaThixo buza kukwenza?

[Umfanekiso okwiphepha 13]

Phantsi kolawulo lukaYesu, akusayi kuphinda kubekho ntiyo okanye ikhethe