Uluntu Kufuneka Lube Nolwazi NgoThixo

“Uya kwandula ukukuqonda ukoyika uYehova, ukufumane ukumazi uThixo.”—IMIZEKELISO 2:5.

1. Kunokutshiwo njani ukuba intliziyo yomntu ingumsebenzi wobugcisa wendalo kaThixo?

ZIINTLIZIYO zabantu abamalunga nama-5 600 000 000 ezibethayo emhlabeni ngalo mzuzu. Mihla le, intliziyo yakho ibetha izihlandlo ezili-100 000 yaye impompa iilitha ezingama-7 600 zegazi elityhutyha imithambo eziikhilomitha ezili-100 000 exananaze kumzimba wakho. Alikho elinye ilungu lomzimba elisebenza nzima ngaphezu kweli lungu lingumsebenzi wobugcisa wendalo kaThixo.

2. Ungayichaza njani intliziyo yokomfuziselo?

² Kwakhona kukho iintliziyo zokomfuziselo ezingama-5 600 000 000 emhlabeni. Kwintliziyo yokomfuziselo kuhlala iimvakalelo zethu, iintshukumisa zethu, iminqweno yethu. Ingumthombo weengcinga zethu, ukuqonda kwethu, nowezinto esizithandayo. Intliziyo yokomfuziselo inokuba nekratshi okanye ithobeke, inokudakumba okanye ichwayite, inokuba sebumnyameni okanye ibe sekukhanyeni.—Nehemiya 2:2; IMizekeliso 16:5; Mateyu 11:29; IZenzo 14:17; 2 Korinte 4:6; Efese 1:16-18.

3, 4. Iintliziyo zabantu zifikelelwa njani ngeendaba ezilungileyo?

³ UYehova uThixo uyakubona okusentliziyweni yomntu. IMizekeliso 17:3 ithi: “Ukhamba lolokunyibilikisa isilivere; iziko lelokunyibilikisa igolide; umcikidi weentliziyo nguYehova.” Noko ke, kunokwazi nje oko kusezintliziyweni zabantu aze awise isigwebo, uYehova usebenzisa amaNgqina akhe ukufikelela iintliziyo zabantu ngeendaba ezilungileyo. Oku kuvisisana namazwi ompostile uPawulos athi: “Bonke abasukuba belinqula igama leNkosi bosindiswa. Bothini na ke ukumnqula lowo bangakholwanga kuye? Bothini na ke ukukholwa kulowo bangamvanga? Bothini na ke ukuva, kungekho mshumayeli? Bothini na ke ukushumayela, bengathunywanga? Njengokuba kubhaliwe kwathiwa, Hayi, ukuba zintle kwazo iinyawo zabashumayela iindaba ezilungileyo zoxolo, zabashumayela iindaba ezilungileyo zezinto ezilungileyo.”—Roma 10:13-15.

⁴ Kumkholisile uYehova ukuthumela amaNgqina akhe eziphelweni zomhlaba ukuze ‘ashumayele iindaba ezilungileyo zezinto ezilungileyo’ nokuze afumane abo baphulaphulayo. Ngoku singaphezu kwezi-5 000 000—ngokwesilinganiso, iNgqina eli-1 kubantu abali-1 200 emhlabeni. Akukho lula ukufikelela amawaka ezigidi asemhlabeni ngeendaba ezilungileyo. Kodwa uThixo walathisa lo msebenzi ngoYesu Kristu yaye ubasondeza kuye abantliziyo zinyanisekileyo. Ngaloo ndlela, isiprofeto esibhalwe kuIsaya 60:22 singqineka siyinene: “Omncinanana uya kuba liwaka, noweyeleyo abe luhlanga olunamandla. Mna, Yehova, ndiya kukukhawulezisa oko ngexesha lako oko.”

5. Luyintoni ulwazi, yaye kunokuthiwani ngobulumko behlabathi?

⁵ Lingoku elo xesha, yaye licacile elokuba—amawaka ezigidi asemhlabeni kufuneka abe nolwazi. Ngokusisiseko, ulwazi kukwazi izibakala ezifunyenwe kumava, ekwenzeni uhlolisiso, okanye ekufundisiseni. Ihlabathi liye lazifumbela ulwazi oluninzi. Kuye kwenziwa inkqubela kwimimandla enjengezothutho, ukunyanyekelwa kwempilo nonxibelelwano. Kodwa ngaba lulwazi lwehlabathi oluyimfuneko ngenene ebantwini? Akunjalo konke konke! Iimfazwe, ingcinezelo, izifo nokufa kuyaqhubeka kuluthwaxa uluntu. Ngokufuthi ubulumko behlabathi bungqineka buyinkcitha xesha.

6. Ngokuphathelele igazi, ulwazi ngoThixo lwahluke njani kubulumko behlabathi?

⁶ Ngokomzekelo: Kwiinkulungwane ezimbini ezidluleyo, kwakuqhelekile ukophiswa kwabantu njengendlela ethile yokunyanga. UGeorge Washington, umongameli wokuqala waseUnited States, wophiswa izihlandlo eziliqela kwiiyure zokugqibela zokuphila kwakhe. Ngaxa lithile wathi: “Ndiyekeni ndife ngokuzolileyo; andinakuphila xesha lide.” Wayenyanisile, kuba wafa kwangaloo mini—ngoDisemba 14, 1799. Kunokophisa abantu, namhlanje kugxininiswa ekutofeleni igazi emzimbeni womntu. Zombini ezi ndlela zonyango bezizaliswe ziingxaki ezibulalayo. Noko ke, kwakudala, iLizwi likaThixo lathi: ‘Nizile igazi.’ (IZenzo 15:29) Ulwazi ngoThixo lusoloko luchanile, lunokuthenjwa, lusexesheni.

7. Ngokuphathelele ukukhulisa abantwana, ulwazi oluchanileyo lweZibhalo lwahluke njani kubulumko behlabathi?

⁷ Khawucinge ngomnye umzekelo wobulumko behlabathi obungenakuthenjwa. Kangangeminyaka izazinzulu ngengqondo zazikhuthaza ukukhuliswa kwabantwana ngaphandle kwemiqathango, kodwa kamva esinye esasikukhuthaza oku savuma ukuba kwakuyimpazamo. IGerman Philological Association yakha yathi ukukhuliswa kwabantwana ngaphandle kwemiqathango “ngandlel’ ithile kungunobangela weengxaki esijamelene nazo ngoku ngabantu abaselula.” Ubulumko behlabathi busenokungazinzi ngokungathi buphetshethwa ngumoya, kodwa ulwazi oluchanileyo lweZibhalo alunakugungqiswa. IBhayibhile idlulisela isiluleko esilungeleleneyo ngendlela yokuqeqesha abantwana. IMizekeliso 29:17 ithi: “Mqeqeshe unyana wakho, wokuphumlisa, awuyolise umphefumlo wakho.” Olo qeqesho lufanele ludluliselwe ngothando, kuba uPawulos wabhala: “Boyise, musani ukubacaphukisa abantwana benu; bondleleni ekuqeqesheni nasekululekeni kweNkosi.”—Efese 6:4.

“Ukumazi UThixo”

8, 9. Ubunokukuchaza njani oko kuthethwa yiMizekeliso 2:1-6 ngolwazi ekufuneka lube nalo ngenene uluntu?

⁸ Nangona uPawulos wayengumntu ofundileyo, wathi: “Ukuba umntu uba usisilumko phakathi kwenu kweli phakade, makabe sisidenge, ukuze abe sisilumko. Kuba ubulumko beli hlabathi bubudenge kuye uThixo.” (1 Korinte 3:18, 19) NguThixo kuphela onokunika uluntu ulwazi oluyimfuneko ngenene kulo. Ngokuphathelele olo lwazi, IMizekeliso 2:1-6 ithi: “Nyana wam, ukuba uthe wazamkela iintetho zam, wayiqwebela kuwe imithetho yam, ukuze uyibazele ubulumko indlebe yakho, uyithobele ukuqonda intliziyo yakho; ewe, ukuba uthe wayibiza ingqondo, walisa ekuqondeni ilizwi lakho; ukuba uthe wabufuna njengesilivere, wabumba njengobutyebi obuselelweyo: uya kwandula ukukuqonda ukoyika uYehova, ukufumane ukumazi uThixo, ngokuba uYehova upha ubulumko; emlonyeni wakhe kuphuma ukwazi nokuqonda.”

⁹ Abo baqhutywa ziintliziyo ezilungileyo babubazela indlebe ubulumko ngokulisebenzisa kakuhle ulwazi oluvela kuThixo. Bazithobela ukuqonda iintliziyo zabo, beziphicotha ngenyameko iingongoma abazifundayo. Ngokungathi kunjalo, bayakubiza ukuqonda, okanye ubuchule bokubona indlela ezidibana ngayo iinkalo zemibandela ethile. Abaneentliziyo ezilungileyo basebenza ngokungathi bemba isilivere yaye bafuna ubutyebi obuselelweyo. Kodwa bubuphi ubutyebi obukhulu obufunyanwa ngabo baphulaphulayo? ‘Kukumazi uThixo.’ Yintoni leyo? Ngamafutshane, lulwazi olufumaneka kwiLizwi likaThixo, iBhayibhile.

10. Yintoni esimele siyenze ukuze sihlale siphilile ngokomoya?

¹⁰ Ulwazi ngoThixo alunasiphako, aluguquki, luyaphilisa. Lwenza umntu aphile ngokomoya. UPawulos wabongoza uTimoti esithi: “Umzekelo wamazwi aphilileyo owawevayo kum, wubambe elukholweni naseluthandweni olukuKristu Yesu.” (2 Timoti 1:13, akekeliswe sithi.) Ulwimi lunomzekelo wokulandelelaniswa kwamazwi. Ngokufanayo, “intetho enyulu” yenyaniso yeZibhalo ‘inomzekelo wamazwi aphilileyo,’ osekelwe ngokuyintloko kumxholo weBhayibhile wokuthethelelwa kolongamo lukaYehova ngoBukumkani. (Zefaniya 3:9) Kufuneka siwugcine lo mzekelo wamazwi aphilileyo ezingqondweni nasezintliziyweni zethu. Ukuba siza kuzigcina ziphilile iintliziyo zethu zokomfuziselo yaye sihlale somelele ngokomoya, sifanele siyisebenzise iBhayibhile ebomini bethu size siwasebenzise ngokuzeleyo amalungiselelo okomoya esiwenzelwa nguThixo ‘ngomkhonzi othembekileyo noqondayo.’ (Mateyu 24:45-47; Tito 2:2) Masisoloko sikhumbula ukuba ukuze sihlale siphilile ngokomoya, kufuneka sibe nolwazi ngoThixo.

11. Ziziphi ezinye izizathu ezenza uluntu kufuneke lube nolwazi ngoThixo?

¹¹ Cinga ngezinye izizathu zokuba amawaka ezigidi asemhlabeni kufuneka abe nolwazi ngoThixo. Ngaba onke ayayazi indlela owabakho ngayo umhlaba nabantu? Hayi, awakwazi oko. Ngaba lonke uluntu luyamazi uThixo oyinyaniso noNyana wakhe? Ngaba bonke abantu bayayazi imbambano ephakanyiswe nguSathana ngokuphathelele ulongamo lukaThixo nengqibelelo yabantu? Kwakhona impendulo nguhayi. Ngaba abantu ngokubanzi bayasazi isizathu sokuba saluphale size sife? Kwakhona simele sithi hayi. Ngaba bonke abemi bomhlaba bayaqonda ukuba uBukumkani bukaThixo buyalawula ngoku kwanokuba siphila kwimihla yokugqibela? Ngaba bayaqonda ukuba kukho imimoya engendawo esebenzayo? Ngaba bonke abantu banolwazi oluchanileyo ngendlela yokuyila ubomi bentsapho obonwabileyo? Yaye ngaba inkoliso yabantu iyazi ukuba injongo yoMdali wethu kukuba abantu abanentobelo baphile ubomi obumnandi eParadisi? Nakule mibuzo impendulo nguhayi. Ngoko, licacile elokuba uluntu kusafuneka lumazi uThixo.

12. Sinokumnqula njani uThixo “ngoMoya nangenyaniso”?

¹² Uluntu lukwafanele lumazi uThixo ngenxa yoko kwathethwa nguYesu emthandazweni ngobusuku bokugqibela bobomi bakhe basemhlabeni. Abapostile bakhe bamele ukuba bachukumiseka ngokunzulu kukumva esithi: “Bubo ke obu ubomi obungunaphakade, ukuba mabakwazi, wena ukuphela koThixo oyinyaniso, naye uYesu Kristu omthumileyo.” (Yohane 17:3) Ukusebenzisa olo lwazi kuphela kwendlela yokumnqula ngokwamkelekileyo uThixo. UYesu wathi: “UThixo unguMoya; abo ke bamnqulayo bamelwe kukumnqula ngoMoya nangenyaniso.” (Yohane 4:24) UThixo simnqula “ngoMoya” xa sishukunyiswa ziintliziyo ezizele ukholo nothando. Simnqula njani “ngenyaniso”? Ngokufundisisa iLizwi lakhe nangokumnqula ngokuvisisana nenyaniso ayityhilileyo—“ukumazi uThixo.”

13. Sisiphi isiganeko esibhalwe kwiZenzo 16:25-34, yaye sinokufunda ntoni kuso?

¹³ Nyaka ngamnye amawaka aqalisa ukukhonza uYehova. Ukanti, ngaba abantu abanomdla bamele baqhutyelwe izifundo zeBhayibhile ixesha elide, okanye ngaba kunokwenzeka ukuba abantliziyo zinyanisekileyo bafikelele kwinqanaba lokubhaptizwa ngokukhawuleza? Cinga ngoko kwenzeka kwimeko yomgcini-mabanjwa nentsapho yakhe, ekhankanywe kwiZenzo 16:25-34. UPawulos noSilas babevalelwe entolongweni eFilipi, kodwa ezinzulwini zobusuku, iingcango zentolongo zavulwa yinyikima enkulu. Ecinga ukuba onke amabanjwa abalekile kwanokuba wayeza kohlwaywa ngokuqatha, lo mgcini-mabanjwa wayeza kuzibulala xa uPawulos wamxelela ukuba babesekho bonke. UPawulos noSilas “balithetha kuye ilizwi leNkosi, nakubo bonke ababesendlwini yakhe.” Loo mgcini-mabanjwa nentsapho yakhe babengabantu beeNtlanga abangazaziyo iZibhalo Ezingcwele. Ukanti, ngobusuku nje obunye, baba ngamakholwa. Ngaphezu koko, “wabhaptizwa yena kwalapho, nabo bonke abakhe.” Zazingaxhaphakanga iimeko ezinjalo, kodwa abasebatsha babefundiswa iinyaniso ezisisiseko baze bazifunde kwiintlanganiso zebandla ezinye izinto. Kunokwenzeka okufanayo nanamhlanje.

Isivuno Sikhulu!

14. Kutheni kukho imfuneko yokuqhuba izifundo zeBhayibhile eziphumelelayo ezingakumbi ngexesha elifutshanana?

¹⁴ Bekunokuba kuhle ukuba amaNgqina kaYehova ebenokuqhuba izifundo zeBhayibhile eziphumelelayo ezingakumbi ngexesha elifutshanana. Kufuneka ngokwenene oku. Ngokomzekelo, kumazwe aseMpuma Yurophu, abantu kufuneka balinde kuluhlu oluthile ngaphambi kokuqhutyelwa izifundo zeBhayibhile. Oku kunjalo nakwezinye iindawo. Kwenye idolophu ekwiDominican Republic, kwakukho abantu abaninzi ababecela amanye amaNgqina amahlanu ukuba abaqhubele izifundo kangangokuba ayengasakwazi ukuziqhuba zonke. Yintoni awayenzayo? Akhuthaza abanomdla ukuba baye kwiintlanganiso eHolweni yoBukumkani baze balinde de lifike ithuba labo kuluhlu lwezifundo zeBhayibhile. Le meko ikho nakwezinye iindawo ezininzi emhlabeni wonke.

15, 16. Kulungiselelwe ntoni ukuze ulwazi ngoThixo lusasazwe ngokukhawuleza ngakumbi, yaye ziziphi izinto ebalasele ngazo?

¹⁵ Imimandla emikhulu—amasimi amakhulu afuna ukuvunwa—ivulelekela abantu bakaThixo. Nangona uYehova, ‘iNkosi Yokuvuna,’ ekhupha abasebenzi abangakumbi, umsebenzi usemkhulu. (Mateyu 9:37, 38) Ngoko ke, ukuze ulwazi ngoThixo ludluliselwe ngokukhawuleza, ‘umkhonzi othembekileyo’ uye walungiselela okuthile okunikela inkcazelo engqalileyo emfutshane ukuze abafundi beBhayibhile bakwazi ukwenza inkqubela ngokomoya sihlandlo ngasinye beqhutyelwa isifundo. Le yimpapasho entsha enokugutyungelwa ngokukhawuleza kwizifundo zeBhayibhile zamakhaya—mhlawumbi ngeenyanga ezimbalwa. Yaye kulula ukuyiphatha kwiibhegi zethu, izipaji zethu okanye ezipokothweni zethu! Amakhulu amawaka awayehlanganisene kwiiNdibano Zesithili “Zabadumisi Abanovuyo” zamaNgqina kaYehova akuvuyela ukufumana le ncwadi entsha inamaphepha ali-192 enomxholo othi Ulwazi Olukhokelela Kubomi Obungunaphakade.

¹⁶ Inkcazelo ilungiselelwe ngababhali abakumazwe ahlukahlukeneyo yaza yalungelelaniswa kakuhle ukuze iyile le ncwadi ithi Ulwazi. Ngoko ifanele ibe nomtsalane emhlabeni wonke. Kodwa ngaba le mpapasho iya kufumaneka kudala ngeelwimi zabantu abasehlabathini lonke? Akunjalo, kuba incwadi enamaphepha ali-192 inokuguqulelwa ngokukhawuleza ngakumbi kuneencwadi ezinkudlwana. Ngo-Oktobha 1995, iKomiti Yokubhala yeQumrhu Elilawulayo yakuncomela ukuguqulelwa kwale ncwadi kwiilwimi ezingaphezu kwe-130 ngokusuka esiNgesini.

17. Ngabaphi oothunywashe abafanele bakwenze kube lula ukusebenzisa incwadi ethi Ulwazi?

¹⁷ Inkcazelo ekwisahluko ngasinye sencwadi ethi Ulwazi ifanele yenze umfundi akwazi ukwenza inkqubela yokomoya esengqiqweni yokomoya ngokukhawuleza. Le ncwadi idlulisela iinyaniso zeZibhalo ngendlela eyakhayo. Ayithethi kakhulu ngeemfundiso zobuxoki. Ukusetyenziswa kwentetho eqhelekileyo nendlela ezilandelelaniswe ngokusengqiqweni ngayo iingongoma ifanele ikwenze kube lula ukuqhuba izifundo zeBhayibhile ngale ncwadi kuze kuncedwe abantu baluqonde ulwazi ngoThixo. Ngaphandle kwezibhalo ezicatshuliweyo, le ncwadi inezibhalo zeBhayibhile anokuzihlola umfundi xa elungiselela ingxubusho. Ezi zibhalo zinokufundwa ebudeni besifundo xa ixesha livuma, nangona bekungayi kuba bubulumko ukongezelela amagqabaza anokugqumelela iingongoma eziziintloko. Kunoko, abo baqhuba izifundo zeBhayibhile kufuneka bazame ukukuqonda oko kuthethwa sisahluko ngasinye baze bakudlulisele kumfundi. Oku kuthetha ukuba ofundisayo kufuneka afundisise kakuhle, ukuze zikhanye kakuhle engqondweni yakhe iingongoma eziziintloko.

18. Ngawaphi amacebiso anikelweyo ngokuphathelele ukusetyenziswa kwencwadi ethi Ulwazi?

¹⁸ Inokuwukhawulezisa njani umsebenzi wokwenza abafundi le ncwadi ithi Ulwazi Olukhokelela Kubomi Obungunaphakade? Le ncwadi inamaphepha ali-192 inokufundwa ngexesha elifutshane kakhulu, yaye abo “babenotyekelo olufanelekileyo ngobomi obungunaphakade” bafanele bakwazi ukufumana ulwazi olwaneleyo ukuba bazahlulele kuYehova baze babhaptizwe emva kokuyifunda. (IZenzo 13:48, NW) Ngoko masiyisebenzise ngokuzeleyo kubulungiseleli bethu le ncwadi ithi Ulwazi. Ukuba umfundi weBhayibhile sele ehambele phambili ekufundisiseni enye incwadi, kusenokuba sengqiqweni ukuyigqibezela. Kungenjalo, kucetyiswa ukuba izifundo zeBhayibhile zitshintshelwe kule ncwadi ithi Ulwazi. Akuba eyigqibile le mpapasho intsha, akukhuthazwa ukuba aqhutyelwe isifundo kwenye incwadi umfundi. Abo bayamkelayo inyaniso banokulwandisa ulwazi lwabo ngokuya kwiintlanganiso zamaNgqina kaYehova kwanangokuzifundela iBhayibhile nezinye iimpapasho zamaKristu.—2 Yohane 1.

19. Ngaphambi kokuqhuba izifundo zeBhayibhile ngencwadi ethi Ulwazi, kutheni bekuya kuba luncedo ukuhlolisisa iphepha 175 ukuya kwelama-218 kwincwadi ethi Ukulungelelaniselwa Ukufeza Ubulungiseleli Bethu?

¹⁹ Le ncwadi ithi Ulwazi ibhalwe ngenjongo yokunceda umntu akwazi ukuphendula yonke imibuzo ehlolisiswa ngabadala nabavakalisi abangabhaptizwanga abanqwenela ukubhaptizwa njengamaNgqina kaYehova. Ngoko, ngaphambi kokutshintshela izifundo zeBhayibhile oziqhubayo kule mpapasho intsha, kucetyiswa ukuba uchithe iiyure ezimbalwa uhlolisisa imibuzo ekwiphepha 175 ukuya kwelama-218 kwincwadi ethi Ukulungelelaniselwa Ukufeza Ubulungiseleli Bethu.a Oku kuya kukunceda ubethelele iimpendulo zale mibuzo xa uqhuba izifundo zeBhayibhile kwincwadi ethi Ulwazi.

20. Uceba ukwenza ntoni ngencwadi ethi Ulwazi Olukhokelela Kubomi Obungunaphakade?

²⁰ Abantu bazo zonke iindawo bafanele bazive iindaba ezilungileyo. Ewe, uluntu kufuneka lufumane ulwazi ngoThixo, yaye uYehova usebenzisa amaNgqina akhe ukulwenza lulufumane. Ngoku uBawo wethu wasezulwini onothando usilungiselele le ncwadi intsha esebenzisa umkhonzi othembekileyo noqondayo. Ngaba uza kuyisebenzisa ukufundisa inyaniso uze uphakamise igama likaYehova elingcwele? UYehova uya kukusikelela ngenene xa usenza konke okusemandleni akho ukudlulisela ulwazi olukhokelela kubomi obungunaphakade kubantu abaninzi.

[Umbhalo osemazantsi]

Ubuya Kuphendula Uthini?

◻ Ubuya kuyichaza njani intliziyo yokomfuziselo?

◻ Luyintoni ulwazi ngoThixo?

◻ Kutheni uluntu kufuneka lube nolwazi ngoThixo?

◻ Yiyiphi incwadi entsha efumanekayo, yaye uceba ukuyisebenzisa njani?

[Umfanekiso okwiphepha 10]

Zininzi izizathu ezenza amawaka ezigidi asemhlabeni kufuneke afumane ulwazi ngoThixo