Nceda Abanye Bazuze Ulwazi Olukhokelela Ebomini
1 Umpostile uPawulos wacacisa ukuba ‘kukuthanda kukaThixo ukuba zonke iintlobo zabantu zifikelele elwazini oluchanileyo lwenyaniso.’ (1 Tim. 2:4) Singabanceda njani abanye bazuze olo lwazi? Enye indlela kukubuyela kubantu abavuselelwe umdla yincwadi ethi Ulwazi Olukhokelela Kubomi Obungunaphakade. Le mpapasho inikela inyaniso yeBhayibhile ngamazwi acacileyo, alula nakhethwe kakuhle. Ngokuyifundisisa, zonke iintlobo zabantu zinokukhokelelwa ebomini. Yintoni esinokuyithetha eya kukhuthaza abanye bayifundisise kunye nathi?
2 Kwabaye banomdla kwiBhayibhile njengokhokelo olusebenzisekayo, usenokubuyela kubo uze uqalise isifundo, mhlawumbi ngokuthi:
◼ “Xa bendilapha ngaphambilana, sixubushe ngesizathu sokuba sinokukholosa ngeBhayibhile njengomthombo wokhokelo olusebenzisekayo. Ngenxa yokuba iphefumlelwe nguThixo, iBhayibhile ikwangumthombo oqinisekileyo wentuthuzelo nethemba, kwanjengokuba nomnye wabapostile bakaKristu watshoyo. [Funda amaRoma 15:4.] Ekuqukumbeleni incoko yethu kwixa elidluleyo, ndibuzile ukuba, Sinokungenelwa njani kulwazi oluseBhayibhileni?” Funda isiqendu 18 kwiphepha 11 kwincwadi ethi Ulwazi. Mchazele ukuba amaNgqina kaYehova aqhuba izifundo zeBhayibhile ezinokuba zizigidi ezihlanu kwihlabathi lonke, enceda abantu bazo zonke iindawo bazuze ulwazi olukhokelela kubomi obungunaphakade. Mbonise ngokufutshane indlela esiqhutywa ngayo isifundo, usebenzisa iziqendu ezihlanu zokuqala kwisahluko 1.
3 Ukuba ekuqaleni ubuxubushe ngomthandazo nomntu othile, usenokuzama le ntshayelelo ngenjongo yokuqalisa isifundo:
◼ “Ndinethemba lokuba uyithandile inkcazelo engomthandazo ebesixubushe ngayo kwincwadi ethi Ulwazi Olukhokelela Kubomi Obungunaphakade. Ndikuthembise ngokubuya ndize kuxubusha nawe indlela abanokuthi, nabo bathandazayo bamphulaphule ngayo uThixo. Phawula ukuba kuthiwani kwiphepha 158. [Funda isiqendu 18.] Ngaloo ndlela, ngokufundisisa iBhayibhile, siphulaphula oko sikuxelelwa nguThixo. Ukwenza oko kusisondeza kuye kuze kusincede sihlangabezane neengxaki zobomi bemihla ngemihla esizithandazelayo. Ndingakuvuyela kakhulu ukufundisisa iBhayibhile kunye nawe.” Ukuba lo mntu uyavuma, qala kwisahluko sokuqala sencwadi ethi Ulwazi.
4 Ukuba ubusebenzise intshayelelo engqalileyo ekuqaliseni isifundo, usenokuthetha oku usongezelela kwingxubusho yakho yokuqala:
◼ “Ndenze umgudu okhethekileyo wokubuyela kuba ndifuna ukukuxelela okungakumbi ngelungiselelo lethu lesifundo seBhayibhile sesisa. Bendikushiyele incwadi ethi, Ulwazi Olukhokelela Kubomi Obungunaphakade, esiyisebenzisa njengoncedo lokufundisisa. Phawula indlela esikhuthaza ukuba siligqale ngayo iLizwi likaThixo. [Funda isiqendu 23 kwiphepha 22.] Ukuba unganceda uze neyakho incwadi, mhlawumbi singaqhubeka siyifundisisa sithabathele apho besiyeke khona kwixa elidluleyo.” Ukuba asizange siqaliswe isifundo kutyelelo lokuqala, usenokuthi: “Mhlawumbi eli lixesha elihle lokuba ndikubonise indlela esiyifundisisa ngayo iBhayibhile.” Emva kokuqwalasela iziqendu ezimbalwa, beka ixesha eliqinisekileyo lokubuyela ukwenzela isifundo sexa elizayo.
5 Ukuyisebenzisa ngokuphumelelayo incwadi ethi Ulwazi kuya kusenza silusasaze ulwazi oluchanileyo ukuze kusikelelwe abanye. (IMize. 15:7) Olo lwazi luya kubavuyisa abo bantliziyo zilungileyo, yaye luya kubakhuthaza ngamandla ukuba baphile ngokuvisisana nobulungisa bukaYehova, luze ekugqibeleni lubakhokelele kubomi obungunaphakade.